ᐃᖃᓗᐃᑦ, ᓄᓇᕗᑦ – ᐄᐳᓪ 22, 2021 – ᐅᓪᓗᒥ, ᕿᑭᖅᑕᓃᒃᑯᑦ ᐋᖅᑭᒋᐊᖅᓯᔪᑦ ᐃᑲᔫᑎᒋᕙᒃᑕᖓᓂᑦ ᓄᓇᕗᑦ ᐸᖓᒍᔾᔨᓂᐅᑉ ᒥᒃᓵᓄᑦ, ᐱᔾᔪᑎᒋᓪᓗᒍ ᓄᕙᓐᓇᕐᔪᐊᖅ-19 ᖃᓄᐃᓐᓂᕆᔭᖓᓂ ᕿᑭᖅᑕᓂ  ᐊᒻᒪᓗ ᓄᖅᑲᖅᑎᑕᐅᒋᐊᖃᕐᓂᖓ ᐄᐳᓪᒥ ᓱᒃᑲᓴᐅᑎᓂᐅᔪᒥ.

“ᕿᑭᖅᑕᓃᒃᑯᑦ ᐊᒻᒪ ᐸᖓᒍᔾᔨᓂᕐᒧᑦ ᐋᖅᑭᒃᓱᐃᔨᐅᔪᑦ ᑕᒪᑐᒥ ᑐᑭᑖᕈᑎᖃᖅᑎᓪᓗᒋᑦ ᐱᔭᕆᐊᑭᓚᐅᙱᑦᑐᖅ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ. “ᓴᖅᑭᔮᖅᑎᑦᑎᑦᑎᐊᕐᓂᐊᓚᐅᕋᓗᐊᕋᑦᑎᒍᑦ ᐃᑲᔪᖅᑐᕐᓂᕆᔭᑦᑎᓐᓂ ᐸᖓᒍᔾᔨᓂᐅᔪᒥᒃ, ᑭᓯᐊᓂ ᐊᑦᑕᕐᓇᖅᑐᒦᑎᑦᑎᑕᐃᓕᓂᖅ ᐊᒻᒪ ᖃᓄᐃᑦᑕᐃᓕᖁᓪᓗᒋᓪᓗ ᐃᓄᐃᑦ ᕿᑭᖅᑕᓂ ᓯᕗᓪᓕᖅᐹᖑᒋᐊᖃᖅᑐᖅ ᑮᓇᐅᔭᖃᖅᑎᑦᑎᔨᐅᔪᓄᑦ ᓱᒃᑲᓴᐅᑎᓂᐅᔪᒥᒃ ᐋᖅᑭᒃᓱᐃᔨᐅᖃᑕᐅᔪᓄᑦ.  ᐃᑲᔪᖃᑕᐅᔪᒍᑦ ᓯᐊᒻᒪᒃᑎᑦᑎᑕᐃᓕᓂᕐᒥᒃ  ᓄᕙᓐᓇᕐᔪᐊᖅ-19ᒥ.”

ᐱᔾᔪᑎᒋᓪᓗᒍ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᐊᑐᓕᖁᓯᒪᔭᖏᑦ ᓄᖅᑲᖓᖁᔨᓯᒪᓪᓗᓂ ᐃᖏᕐᕋᓂᕐᒥᒃ ᐃᖏᕐᕋᕆᐊᖃᙱᑉᐸᑕ, ᐊᒻᒪᓗ ᒪᓕᒡᓗᒋᑦ ᓄᕙᓐᓇᕐᔪᐊᖅ-19ᒧᑦ ᑭᒡᓕᓕᐅᖅᑕᐅᓯᒪᔪᑦ, ᐊᔪᕐᓇᕐᒪᓪᓗ ᑲᔪᓯᒍᓐᓇᙱᓐᓂᖓᓂᒃ ᓱᒃᑲᓴᐅᑎᓂᐅᔪᖅ ᐸᕐᓇᒃᑕᐅᓯᒪᓂᕆᓚᐅᖅᑕᖓᑐᑦ.

ᕿᑭᖅᑕᓂᒃᑯᑦ  ᓄᓇᕗᒥ ᐸᖓᒡᒍᔾᔨᓂᐅᑉ ᒥᔅᓵᓄᑦ ᐃᑲᔫᑎᖏᑕ ᖃᓄᐃᓕᖓᓂᖏᓐᓂᒃ ᐋᖅᑭᒋᐊᖅᓯᕗᑦ:

• ᐊᑐᓂᑦ 14 ᐊᑎᓕᐅᕐᓯᒪᔪᑦ ᕿᒧᔅᓯᖁᑎᓖᑦ ᑐᓂᓯᔭᐅᓂᐊᖅᑐᑦ $5,000ᓂᑦ ᐃᑲᔪᖅᑕᐅᓗᑎᒃ ᐱᓕᕆᖃᑎᒌᑦ ᐊᒻᒪᓗ ᐊᑭᓕᐅᑕᐅᓂᐊᕐᖓᑕ ᐊᑭᓕᐅᑎᒋᓯᒪᔭᖏᓐᓄᑦ ᐸᕐᓇᑎᓪᓗᒋᑦ 2021ᒥ ᓱᑲᓐᓂᑭᓴᐅᑎᓂᐅᓂᐊᓚᐅᖅᑐᒧᑦ.
• $10,000 ᐃᓕᔭᐅᓂᐊᖅᑐᑦ ᐊᑭᓕᐅᑕᐅᓗᑎᒃ ᐸᖓᒡᒍᔾᔨᓂᕐᒥᒃ ᐋᖅᑭᔅᓱᐃᓂᕐᒧᑦ ᐊᑭᓕᕐᓱᐃᔾᔪᑕᐅᓯᒪᔪᓂᑦ ᐊᒻᒪᓗ ᐃᑲᔪᖅᑕᐅᓗᑎᒃ ᑲᑎᒪᔨᕋᓛᑦ ᐅᐸᓗᖓᐃᔭᕐᓂᐊᑎᓪᓗᒋᑦ ᐊᕐᕌᒎᓛᖅᑐᒧᑦ.
• $20,000 ᐃᓕᔭᐅᓂᐊᖅᑐᑦ ᕿᑭᖅᑕᓂᒃᑯᑦ ᕿᒻᒥᓂᑦ ᐊᑐᖅᑕᐅᑎᑦᑎᒋᐊᒃᑲᓂᕐᓂᕐᒧᑦ ᐱᓕᕆᐊᖓᓐᓄᑦ, ᐊᒥᓱᕈᒃᑲᓂᕐᓂᐊᕐᖓᑕ ᐃᑲᔫᑎᒋᔪᒫᖅᑕᕗᑦ ᓯᕗᓂᔅᓴᑎᓐᓂ ᓱᑲᓐᓂᑭᓴᐅᑎᓂᐊᖃᑦᑕᓂᐊᖅᑐᓄᑦ.

ᕿᑭᖅᑕᓃᒃᑯᑦ ᓇᓗᓇᐃᖅᓯᒍᒪᕗᑦ ᑖᒃᑯᐊ 2021ᒥ ᐋᖅᑭᒃᓱᐃᖃᑕᐅᔪᑦ ᓱᒃᑲᓴᐅᑎᓂᕐᒥᒃ ᐱᓕᕆᔪᒻᒪᕆᐅᓯᒪᓂᖏᓐᓄᑦ ᑕᒪᑐᒥᖓ.  ᐃᑲᔪᕐᓂᕆᔭᖏᑦ ᕿᒧᒃᓯᖅᑎᐅᔪᓄᑦ ᕿᑭᖅᑕᓂ ᐅᔾᔨᕆᔭᐅᐅᑦᑎᐊᖅᑐᑦ.  ᓂᕆᐅᑐᐃᓐᓇᕐᓂᐊᖅᑐᒍᑦ ᖃᖓᑐᐃᓐᓇᖅ ᑲᑎᒍᓐᓇᖅᓯᓛᕐᓂᑦᑎᓐᓄᑦ ᐊᒻᒪᓗ ᖁᕕᐊᓲᑎᒋᓗᒍ ᕿᒻᒥᖃᕐᓂᖅ ᐊᑐᓕᖅᑕᐅᒃᑲᓐᓂᕐᓂᖓᓂ ᕿᑭᖅᑕᓂ.

ᑐᑭᓯᒃᑲᓐᓂᕆᐊᖃᕈᕕᑦ, ᖃᐅᔨᒋᐊᕐᕕᒃᓴᖅ:
ᕕᐅᓪ ᕼᐋᑉᑭᓐᔅ
ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413/1.800.667.2742