ᐸᐃᕆᕕᓕᕆᓂᖅ ᐊᒻᒪ ᓯᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐃᑲᔫᑎᑦ

ᐸᐃᕆᕕᓐᓄᑦ ᐃᑲᔫᑏᑦ

ᐃᑲᔪᖃᑦᑕᕐᓂᖅ ᐃᓄᓐᓂᑦ ᕿᑐᕐᖓᕇᓂᑦ ᐊᑭᓖᖃᑦᑕᓂᕐᒧᑦ ᐸᐃᕆᔭᐅᔾᔪᑎᓄᑦ

ᕿᑭᖅᑕᓂᒃᑯᑦ ᐸᐃᕆᕕᓐᓄᑦ ᐃᑲᔫᑎᖏᑦ ᐱᒋᐊᖅᑎᑕᐅᔪᔪᑦ ᐅᑐᐱᕆ 2017ᖑᑎᓪᓗᒍ ᑖᔅᓱᒪ ᐊᑖᓂ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐱᓕᕆᐊᕐᒥ. ᑖᓐᓇ ᐱᓕᕆᐊᖅ ᐃᑲᔫᑎᖃᕐᐸᑦᑐᖅ ᕿᑭᖅᑕᓂ ᐃᓄᖏᓐᓄᑦ ᕿᑐᕐᖓᓕᓐᓄᑦ ᕿᑐᕐᖓᖏᑦ ᓚᐃᓴᓕᓐᓄᑦ ᐸᐃᕆᕕᓕᐊᖃᑦᑕᑎᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ ᐊᑭᓖᖃᑦᑕᓂᕐᒧᑦ ᐸᐃᕆᕕᓐᓄᑦ ᐊᑭᓕᐅᑎᒋᒋᐊᖃᕐᐸᑦᑕᖏᓐᓂᒃ.

ᑖᒃᑯᐊ ᐃᑲᔫᑏᑦ ᐱᕙᓪᓕᐊᒍᑎᖃᕐᓯᒪᔪᖅ ᑲᑭᕙᒃ ᑲᑐᔾᔨᖃᑎᒌᑦ ᒫᓐᓇ ᐱᓕᕆᐊᕆᕙᑦᑕᖓᓐᓂᒃ. ᑕᐃᒪᙵᑦ 1990 ᓄᙳᖏᓐᓂ ᐱᒋᐊᓚᐅᕐᓯᒪᒻᒪᑕ, ᑲᑭᕙᒃᑯᑦ ᐊᐅᓚᑦᑎᖃᑦᑕᕐᓯᒪᒻᒪᑕ ᕿᑐᕐᖓᓕᓐᓄᑦ ᐃᑲᔫᑎᓂᑦ ᑮᓇᐅᔭᖅᑖᕐᓯᒪᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᓪᓚᓄᑦ ᐃᓄᓐᓄᓪᓗ ᐸᐃᕆᔨᖃᖃᑦᑕᓂᕐᒧᑦ ᐱᓇᓱᐊᕈᑕᐅᕙᑦᑐᒥ.

ᕿᑭᖅᑕᓂᒃᑯᑦ ᐃᑲᔫᑎᖏᑦ ᖄᒃᑲᓐᓂᐊᒍᑦ ᐃᓚᓕᐅᑎᕙᑦᑐᑦ ᑲᑭᕙᒃᑯᑦ ᐃᑲᔫᑎᒋᕙᑦᑕᖏᓐᓄᑦ $19 ᖃᐅᑕᒫᑦ, ᐃᓄᓐᓄᑦ ᕿᑐᕐᖓᓕᓐᓄᑦ $29ᓂᑦ ᖃᐅᑕᒫᑦ ᐸᐃᕆᕕᒻᒧᑦ ᐊᑭᓕᐅᑎᖃᕐᐸᑦᑐᑦ. ᕿᑭᖅᑕᓂᒃᑯᑦ ᐸᐃᕆᕕᓐᓄᑦ ᐃᑲᔫᑎᖏᑦ ᐊᑐᐃᓐᓇᐅᓂᐊᖅᑐᑦ ᒫᑦᓯ 2022ᒧᑦ ᑎᑭᓪᓗᒍ.

ᑖᓐᓇ ᐊᖅᑯᑎᒋᓪᓗᒍ ᐱᓕᕆᐊᖅ ᕿᑭᖅᑕᓂᒃᑯᑦ ᐃᑲᔪᕐᓯᒪᔪᑦ ᑕᒫᓂ 200ᖏᓐᓃᑦᑐᓂᑦ ᐃᓄᓐᓂᑦ ᓱᕈᓯᕐᓂᑦ ᐸᐃᕆᕕᒻᒦᐸᑦᑐᓂᑦ. ᕿᑐᕐᖓᓖᑦ ᕿᑭᖅᑕᓂ ᓄᓇᓖᑦ ᐃᑲᔫᓯᐊᕐᑖᐸᑦᑐᑦ $2,500ᓂᑦ ᐊᑐᓂᑦ ᓱᕈᓯᕐᓄᑦ, ᐊᕐᕌᒍᑕᒫᑦ ᓚᐃᓴᓕᓐᓂᑦ ᐸᐃᕆᕕᒻᒦᖃᑦᑕᕈᓐᓇᖁᓪᓗᒋᑦ. ᑖᒃᑯᐊ ᐊᑑᑎᖃᕐᐸᑦᑐᓂᑦ ᖃᓂᒋᔭᖓᓃᑦᑐᑦ $500,000 ᐊᕐᕌᒍᑕᒫᑦ ᐸᐃᕆᕕᒻᒦᑎᑦᑎᖃᑦᑕᕈᓐᓇᖁᓪᓗᒋᑦ.

ᑐᑭᓯᒃᑲᓐᓂᕈᒪᒍᔅᓯ ᐅᕝᕙᓘᓐᓃᑦ ᑐᔅᓯᕋᐅᓯᐅᕈᑦ ᐱᔪᒪᒍᔅᓯᐅᒃ:

ᑲᑭᕙᒃ ᑲᑐᔾᔨᖃᑎᒌᖏᑦ

2018-2019 ᐊᕐᕌᒍᓕᒫᕐᓯᐅᑏᑦ ᐅᓂᒃᑳᑦ

ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᓂᕐᒧᑦ ᐊᑐᖃᑦᑕᕋᔅᓴᐃᑦ

ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᖅ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒥᒃ

2018ᖑᑎᓪᓗᒍ, ᕿᑭᖅᑕᓂᒃᑯᑦ ᐱᓕᕆᖃᑎᖃᔪᔪᑦ ᐅᖃᓕᒫᒐᓕᐅᖅᑎᓂᑦ Inhabit Media−ᑯᓐᓂᑦ ᓴᓇᓂᐊᕐᖓᑕ ᓱᕈᓯᓛᕐᓄᑦ ᐃᓕᓐᓂᐊᕆᐅᕐᓴᐅᑎᓂᑦ ᓲᕐᓗ ᐊᒡᒐᒻᒧᑦ ᐊᐅᓚᑕᒐᐃᑦ, ᐋᖅᑭᔅᓱᒐᐃᑦ, ᐅᖃᓕᒫᒐᐃᑦ, ᐊᒻᒪᓗ ᐅᖃᓕᒫᕆᐅᕐᓴᐅᑏᑦ ᐱᔾᔪᑎᓖᑦ ᐃᓄᐃᑦ ᐃᓅᓯᖏᓐᓂᑦ ᐃᓕᖅᑯᓯᖓᓐᓂᓪᓗ.

ᑲᑐᔾᔨᖃᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᑖᒃᑯᐊ ᐊᑐᖃᑦᑕᕋᔅᓴᐃᑦ ᑐᓂᔭᐅᔪᔪᑦ 55ᓄᑦ ᐸᐃᕆᕕᓐᓄᑦ ᓄᓇᕗᒻᒦᑦᑐᓄᑦ. ᕿᑭᖅᑕᓂᒃᑯᑦ ᐃᓱᒪᔪᑦ ᑕᒫᓂ ᐅᖓᑖᓃᑦᑐᑦ 1,000 ᕿᑭᖅᑕᓂ ᓱᕈᓯᖏᑦ ᐱᕚᓪᓕᕈᑎᖃᕐᐸᓪᓕᐊᓂᖏᓐᓂᒃ ᑖᒃᑯᓂᖓ ᐃᓕᓐᓂᐊᕆᐅᕐᓴᐅᑎᓂᑦ. ᑖᓐᓇ ᐱᓕᕆᐊᖅ ᑲᔪᓯᑎᑕᐅᔪᓐᓇᕐᓯᒪᔪᖅ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐊᑐᖅᑐᑎᒃ.

ᑐᑭᓯᒃᑲᓐᓂᕈᒪᒍᔅᓯ ᐅᕝᕙᓘᓐᓃᑦ ᐱᔪᒪᒍᔅᓯᐅᒃ ᐊᑐᖃᑦᑕᕋᔅᓴᐃᑦ:

2018-2019 ᐊᕐᕌᒍᓕᒫᕐᓯᐅᑏᑦ ᐅᓂᒃᑳᑦ

ᐅᖃᓕᒫᒐᑦ ᐱᔭᔅᓴᐅᕗᑦ ᑖᒃᑯᑎᒎᓇ Inhabit Media

ᐃᐱᑎᑭ

ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᖅ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒥᒃ ᕿᑭᖅᑕᓂ ᓄᓇᓕᓐᓂᑦ

2018ᖑᑎᓪᓗᒍ, ᕿᑭᖅᑕᓂᒃᑯᑦ ᓴᖅᑭᑎᑦᑎᔪᔪᑦ ᓄᑖᕐᒥᒃ ᐱᓕᕆᐊᕐᒥᑦ, ᐃᐱᑎᑭ, ᑐᕌᖓᔪᖅ ᐱᔨᑦᑎᕋᐅᑎᖃᕐᓂᕐᒥᒃ ᐃᓕᖅᑯᓯᕐᒨᖓᔪᓂᑦ ᐅᖃᐅᓯᕐᒨᖓᔪᓂᓪᓗ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᓂᑦ.

ᐃᐱᑎᑭ ᐱᓕᕆᐊᖅ ᒪᑯᓂᖓ ᑲᒪᒋᔭᖃᕐᓯᒪᔪᑦ:

  • ᐱᓇᓱᐊᕈᑎᔅᓴᐃᑦ ᐃᑲᔫᑎᖃᕐᓂᐊᕐᖓᑕ ᐃᓄᑐᖃᐃᑦ ᐃᓚᒋᔭᐅᖃᑦᑕᖁᓪᓗᒋᑦ ᐸᐃᕆᕕᓐᓂᑦ
  • ᕿᑐᕐᖓᕇᓄᑦ ᐅᖃᓕᒫᖃᑦᑕᕈᑎᔅᓴᐃᑦ ᓈᒪᔪᑦ
  • ᐸᐃᕆᕕᓐᓂᑦ ᑲᑎᒪᑎᑦᑎᓂᖅ ᐊᒻᒪᓗ ᐃᓕᓐᓂᐊᑎᑦᑎᓂᖅ
  • ᐋᖅᑭᓱᖅᑕᐅᓯᒪᔪᒥᒃ ᐃᓕᓐᓂᐊᑎᑦᑎᓂᖅ ᐸᐃᕆᕕᓐᓂᑦ ᑲᑎᒪᔨᓂᑦ

ᐄᐳᓗ 2018ᖑᑎᓪᓗᒍ, ᕿᑭᖅᑕᓂᒃᑯᑦ ᑲᑎᒪᑎᑦᑎᔪᔪᑦ ᐃᓄᑐᖃᕐᓂᑦ ᐅᑯᓇᙶᕐᓯᒪᔪᓂᑦ ᖃᐅᓱᐃᑦᑐᖅ, ᒥᑦᑎᒪᑕᓕᒃ, ᐃᒡᓗᓕᒃ, ᐸᓐᓂᖅᑑᖅ, ᐊᒻᒪᓗ ᐃᖃᓗᐃᑦ ᐃᑲᔪᕐᓂᐊᕐᖓᑕ ᐃᐱᑎᑭ ᐱᓕᕆᐊᖑᕙᑦᑐᒥᑦ. ᐃᓄᑐᖃᐃᑦ ᐅᖃᐅᓯᖃᖃᑦᑕᔪᔪᑦ ᑐᓴᕈᒥᓇᖅᑐᓂᑦ ᐊᑐᕐᓯᒪᔭᖏᓐᓂᑦ ᐱᓕᕆᖃᑎᖃᖃᑦᑕᓂᕐᒥᒃ ᓱᕈᓯᕐᓂᑦ ᐃᓅᓱᑦᑐᓂᓪᓗ ᐊᒻᒪᓗ ᐅᓂᒃᑳᖃᑦᑕᔪᔪᑦ ᓱᖅᑯᐃᒋᔭᖏᓐᓂᑦ ᐃᓕᓐᓂᐊᑎᑦᑎᖃᑦᑕᓂᕐᒥᒃ ᐃᓅᓱᑦᑐᓂᑦ ᐱᖅᑯᓯᖅᑎᓐᓂᒃ ᐃᓕᓯᒪᔭᖏᓐᓂᑦ, ᓲᕐᓗ ᒥᕐᓱᓂᕐᒥᒃ ᐊᒻᒪᓗ ᓴᓇᕐᕈᑎᓕᐅᖃᑦᑕᓂᕐᒥᒃ. ᐃᓄᑐᖃᐃᑦ ᖃᐅᔨᑎᑦᑎᒍᑎᖃᔪᔪᑦ ᐊᑑᑎᓕᓐᓂᑦ ᐱᙳᐊᕈᓰᑦ ᐱᓕᕆᐊᔅᓴᓪᓗ ᒥᔅᓵᓄᑦ ᐊᑐᖅᑕᐅᖃᑦᑕᕐᓯᒪᔪᓂᑦ ᐅᐊᑦᑎᐊᕈ ᐃᓕᓐᓂᐊᑎᑦᑎᓪᓗᑎᒃ ᓱᕈᓯᕐᓂᑦ ᐊᒻᒪᓗ ᐱᓕᕆᐊᕆᕙᑦᑕᒥᓂᖏᓐᓂᒃ ᖁᕕᐊᒋᓪᓗᒋᑦ ᓱᕈᓯᐅᓪᓗᑎᒃ.

ᒫᑦᓯ 2019ᖑᑎᓪᓗᒍ, ᕿᑭᖅᑕᓂᒃᑯᑦ ᓯᕗᓪᓕᕐᐹᒥᑦ ᕿᑭᖅᑕᓂ ᐸᐃᕆᕕᓕᕆᔨᓂᑦ ᑲᑎᒪᕕᔾᔪᐊᑎᑦᑎᔪᔪᑦ. ᑖᓐᓇ ᑲᑎᒍᑕᐅᔪᔪᖅ 45ᓄᑦ ᑲᑎᒪᔭᖅᑐᔪᔪᓄᑦ ᖁᓕᐅᙱᒐᖅᑐᓂᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓂᑦ ᐊᒻᒪᓗ ᑲᑎᒪᒍᑕᐅᔪᔪᖅ ᑖᒃᑯᓄᖓ ᐃᓕᓐᓂᐊᕈᑕᐅᓪᓗᓂᓗ ᐊᑐᖅᑕᐅᖃᑦᑕᕈᓐᓇᖅᑐᑦ ᐊᑐᐃᓐᓇᕈᖅᑎᑕᐅᓯᒪᔪᑦ ᒥᔅᓵᓄᑦ ᐸᐃᕆᕕᓐᓂᑦ.

ᐃᐱᑎᑭ ᐱᓕᕆᐊᖅ ᑮᓇᐅᔭᖅᑖᖅᑎᑕᐅᓯᒪᔪᖅ ᒪᑭᒋᐊᖅᑕᑯᓐᓂᑦ.

ᑐᑭᓯᒃᑲᓐᓂᕈᒪᒍᔅᓯ:
ᑐᑭᓯᒋᐊᕐᓗᓯ ᐅᕗᖓ: makigiaqta.com
2018-2019 ᐊᕐᕌᒍᓕᒫᕐᓯᐅᑏᑦ ᐅᓂᒃᑳᑦ

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ