ᓄᓇᕗᑦ ᕿᒧᒃᓯᐅᒡᔪᐊᕐᓂᖅ 2024 − ᑭᒃᑰᓂᖏᑦ ᓱᑲᓴᖅᑏᑦ ᓄᓇᕗᑦ ᕿᒧᒃᓯᐅᒡᔪᐊᖅᑐᓂ

ᒪᒃᑯᒃᑐᑦ ᐃᒡᓗᓕᒃᒥᖔᖅᑐᑦ ᐃᑲᔪᖅᐳᑦ ᐃᒃᐱᐊᕐᔪᖕᒦᑎᓪᓗᒋᑦ ᓂᕆᐅᖕᓂᖃᖅᖢᑎᒃ ᐱᒋᐊᕐᓂᐊᕐᓂᖓᓂ ᓄᓇᕗᑦ ᕿᒧᒃᓯᐅᔾᔪᐊᕐᓂᖅ. ᐊᒡᒋᐸᓪᓕᐊᑎᓪᓗᒍ ᓱᑲᓐᓂᑭᓴᐅᑎᓂᐅᓂᐊᖅᑐᖅ, ᒪᒃᑯᒃᑐᑦ ᐃᑲᔪᖅᑕᐅᓯᒪᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ ᐃᖅᑲᓇᐃᔭᖅᑎᖏᓐᓂᒃ ᐊᐱᖅᓱᕈᓐᓇᖅᓯᓚᐅᕐᒪᑕ ᓱᑲᓴᕐᓂᐊᖅᑐᓂᒃ.

#1 ᑕᐃᕕᑎ ᐆᔪᑯᓗᒃ − ᐃᒃᐱᐊᕐᔪᒃ

ᑕᐃᕕᑎ ᕿᒧᒃᓯᖃᑦᑕᓕᓚᐅᖅᓯᒪᔪᖅ 2016−ᒥ ᐱᒋᐊᖅᖢᓂ. ᐃᓕᑉᐸᓪᓕᐊᓕᓚᐅᖅᑐᖅ ᐊᑖᑕᖓᓂ ᐃᑲᔪᖅᑎᐅᕙᒃᖢᓂ, ᐃᓚᐅᔪᓐᓇᖃᑦᑕᖅᖢᓂ ᕿᒧᒃᓯᐅᔾᔪᐊᖅᑐᓂ. ᑕᐃᕕᑎ ᐃᓚᐅᖃᑕᐅᖃᑦᑕᖅᓯᒪᔪᖅ 2016ᒥ ᐱᒋᐊᖅᑐᓂ ᐊᒻᒪᓗ ᓵᓚᒃᓴᓚᐅᖅᓯᒪᓪᓗᓂ. ᑕᐃᕕᑎ ᐃᖅᑲᓇᐃᔭᖅᑎᐅᔪᖅ ᐊᖁᑎᐅᓪᓗᓂ ᐹᓯᒧᑦ ᐃᓅᔭ ᐃᓕᓐᓂᐊᕐᕕᖕᒧᑦ. ᕿᒻᒥᖏ ᕿᒧᓕᒻᒪᒃᑎᖏᒃᑯᓂᒋᑦ ᐃᖅᑲᓇᐃᔭᕐᕕᖓᓃᖃᑦᑕᖅᑐᖅ ᐅᑭᐅᒃᑯ ᐱᓇᓱᐊᕈᓯᐅᑉ ᓄᙳᐊᓂ ᐃᒃᐱᐊᕐᔪᒃ ᖃᖓᑕᓲᒃᑯᕕᐅᖅ ᐋᖅᑭᐅᒪᑎᑦᑎᔨᐅᓪᓗᓂ. ᑕᐃᕕᑎ ᓂᕆᐅᖕᓂᖃᖅᐳᖅ ᐱᒋᐊᖅᑎᑦᑎᔪᒪᓪᓗᓂ ᓄᓇᓕᓐᓂᑦ ᐊᓯᖏᓐᓂᑦ ᕿᒧᒃᓯᐅᔾᔪᐊᕈᓐᓇᖅᓯᖁᓪᓗᓂᒋᑦ ᐊᒻᒪᓗ ᖁᕕᐊᓱᒍᑎᖃᖁᔨᕗᖅ ᐱᓗᐊᖅᑐᒥ ᐊᑦᑕᕐᓇᖅᑐᒥᖏᓪᓗᑎᒃ.

#2 ᓖ ᐃᓄᐊᕋᖅ − ᒥᑦᑎᒪᑕᓕᒃ

ᓖ ᐃᓄᐊᕋᖅ ᕿᒧᓕᒻᒪᒃᓴᖅᓯᒪᕙᐃᑦ ᕿᒧᒃᓯᖏᑦ ᐊᕐᕌᒍᓂᑦ 15ᓂᑦᐊᓂᒍᖅᑐᑦ, ᑕᐃᒪᖓᓂᓪᓗ ᐃᓚᐅᖃᑦᑕᕐᓯᒪᓪᓗᓂᓂ ᓄᓇᕗᑦ ᕿᒧᒃᓯᐅᔾᔪᐊᖅᑐᓂ 2010−ᒥᓂᑦ. ᓖ ᐊᖑᓇᓱᑦᑎᓪᓚᕆᒃ, ᖁᕕᐊᒋᔭᖓ ᓄᓇᒦᖦᖢᓂ ᓂᕿᔅᓴᕐᓯᐅᖅᖢᓂ ᐃᓚᖏᓐᓄᑦ ᐊᒻᒪᓗ ᕿᒥᖅᑯᑎᒃᓴᖅᓯᐅᖅᖢᓂ  ᕿᒻᒥᖏᓐᓄᑦ. ᓖ ᓂᕆᐅᒋᔭᖃᖅᐳᖅ ᐃᓄᖃᑎᖃᕆᐊᒃᓴᖅ ᕿᒧᒃᓯᖅᑎᐅᖃᑎᒥᓂᒃ ᐊᒻᒪᓗ ᖁᕕᐊᓱᖕᒪᕆᒃᐳᖅ ᐅᐸᒍᑎᓛᕋᒥ ᐊᖏᕐᕋᒥᓄᑦ ᒥᑦᑎᒪᑕᓕᒃᒧᑦ.

#3 ᕿᓕᖅᑎ ᐃᕙᓗ − ᐃᒡᓗᓕᒃ

ᕿᓕᖅᑎ ᐃᕙᓗ ᕿᒧᒃᓯᖃᑦᑕᓕᓚᐅᖅᓯᒪᔪᖅ 2016−ᒥ ᐱᒋᐊᖅᖢᓂ. ᐱᒋᐊᕈᑎᖃᓚᐅᖅᑐᖅ ᑐᓂᔭᐅᓚᐅᖅᖢᓂ ᑕᓪᓕᒪᓂ ᕿᒻᒥᐊᕐᔪᖕᓂ  ᓗᒃ ᐊᐃᕈᑦᒥᑦ ᑖᓐᓇ ᐃᓅᔪᓐᓃᕐᓯᒪᓕᖅᑐᖅ. ᕿᓕᖅᑎᐅ ᒪᕐᕈᒋᓕᖅᑕᖓᓐᓂ ᐃᓚᐅᖃᑕᐅᕗᖅ ᕿᒧᒃᓯᐅᔾᔪᐊᖅᑐᓂ, ᓯᕗᓪᓕᖅᐹᒥ ᐱᖃᑕᐅᓚᐅᕐᓯᒪᔪᖅ 2022−ᒥᑦ. ᕿᓕᖅᑎ ᐱᔭᒃᓴᖃᐅᖅᐳᖅ ᐃᖅᑲᓇᐃᔮᒥᓂᒃ, ᒫᓐᓇ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑐᖅ ᕿᑎᖓᓂ ᒥᑭᓐᓂᖅᓴᓂ ᐊᖏᓂᖅᓴᐅᔪᓂᒡᓗ ᐃᓕᓐᓂᐊᖅᑎᓂ ᐊᑯᓐᓂᖅᓱᖅᑐᓂ ᐃᒡᓗᓕᒃᒥᑦ, ᕿᖕᒥᓂᐊᖅᑎᐅᓂᕐᒥᒃ ᐃᖅᑲᓇᐃᔮᓕᒃ, ᐊᐅᓚᐅᓯᕆᔨᐅᓪᓗᓂᓗ ᓂᐅᕕᕐᕕᖕᒥᑦ. ᐃᖅᑲᓇᐃᔭᖏᒐᐃᒻᒪᑦ ᕿᓕᖅᑎ ᖁᕕᐊᒋᔭᖃᓲᖅ ᓅᓯᒪᔭᕆᐊᒡᓴᖅ ᐱᖑᐊᕈᑎᕐᓗᓂᓘᓐᓃᑦ. ᕿᓕᖅᑎ ᓂᕆᐅᖕᓂᖃᖅᐳᖅ ᑕᑯᔪᒪᓪᓗᓂ ᖃᓄᖅᑎᒋ ᓱᒃᑲᑎᒋᖕᒪᖔᑕ, ᐊᓯᖏᑦ ᓱᑲᓴᖅᑏᑦ, ᑐᓴᖅᓯᒪᖕᒪᑦ ᐃᒃᐱᐊᕐᔪᖕᒥᐅᑦ ᕿᒻᒥᖏᑦ ᓱᒃᑲᓂᕋᖅᑕᐅᕙᖕᒪᑕ ᐊᒻᒪᓗ ᖃᓄᐃᓕᖓᒐᔭᕐᒪᖔᑕ ᕿᒻᒥᖏᑦ ᓴᓂᐊᓂ.

#4 ᑖᓇᕙᓐ ᖃᐅᓐᓇᖅ − ᕿᒧᒃᓯᖃᑦᑕᓕᓚᐅᖅᓯᒪᔪᖅ ᐱᒋᐊᖅᖢᓂ 2016−ᒥ, ᕿᒧᒃᓯᖃᑦᑕᓕᕐᓂᑯ ᐊᖏᔪᒥᓂᒃ ᐊᔪᕆᖦᖢᓂ. ᐱᖓᔪᒋᓕᖅᑕᖓᓂ ᕿᒧᒃᓯᐅᔾᔪᐊᖃᑕᐅᔪᖅ ᓄᓇᕗᒻᒥ. ᐃᒃᐱᒋᔭᖃᖅᐳᖅ ᑲᒪᑦᑎᐊᕆᐊᒃᓴᖅ ᕿᒻᒥᖏᓐᓂᑦ ᐅᑭᐅᓕᒫᖅ. ᑖᓇᕙᓐ ᓂᕆᐅᒃᐳᖅ ᖁᕕᐊᓇᕐᓂᐊᕐᓂᖓᓂᒃ ᓄᓇᒥ ᕿᒧᒃᓯᖅᑎᓪᓗᒋᑦ

#5 ᑖᓂᐅᓪ ᐃᓄᐊᕋᖅ − ᐃᒃᐱᐊᕐᔪᒃ

ᑖᓂᐅᓪ ᐃᓄᐊᕋᖅ ᕿᒧᒃᓯᖃᑕᐅᖃᑦᑕᖏᑦᑑᒐᓗᐊᖅ, ᐊᕐᕌᒍᓂᑦ ᐱᖓᓱᓂᑦ ᐊᓂᒍᖅᑐᓂᑦ ᐃᓚᐅᖃᑦᑕᖅᓯᒪᔪᖅ ᓄᓇᕗᑦ ᕿᒧᒃᓯᐅᕐᔪᐊᖅᑐᓂᑦ ᓯᑭᑑᖅᑎᐅᓪᓗᓂ. ᑭᓯᐊᓂᓕ, ᓯᕗᓪᓕᖅᐹᑦᑎᐊᕐᒥ ᓱᑲᓴᖅᑎᐅᕗᖅ, ᖃᑕᖑᑎᐊᑕ ᐃᓚᐅᔪᒪᖕᒪᖔᖅ ᐊᐱᕆᓚᐅᕐᒪᒍ ᐊᖏᖅᖢᓂ. ᑕᓂᐅᓪ ᐊᖑᓇᓱᒃᑎᓪᓚᕆᒃ ᖁᕕᐊᒋᓪᓗᓂᐅᓪ ᓅᓯᒪᖃᑦᑕᕆᐊᒃᓴᖅ.

#7 ᔨᐅᕋᒥ ᑯᓄ − ᐃᒃᐱᐊᕐᔪᒃ

ᔨᐅᕋᒥ ᕿᒧᒃᓯᖃᑦᑕᖅᓯᒪᓕᖅᑐᖅ ᐊᕐᕌᒍᓄ ᐱᖓᓱᓄᑦ. ᕿᒧᒃᓯᖃᑦᑕᓕᓚᐅᖅᓯᒪᔪᖅ ᐊᖓᔪᖓ ᕿᒧᒃᓯᖃᑦᑕᕈᒪᒍᓐᓃᖅᑎᓪᓗᒍ ᐱᑖᕆᓪᓗᓂᒋᑦ ᕿᒻᒥᖏᑦ. ᑎᓴᒪᖓᓂ ᐃᓚᐅᖃᑕᐅᕗᖅ ᕿᒧᒃᓯᖕᓂᕐᒥᑦ. ᔨᐅᕋᒥ ᐱᔭᒃᓴᖃᐃᓐᓇᐅᔭᖅᐳᖅ ᕿᒻᒥᖏᓐᓄᑦ, ᕿᒧᒃᑎᖏᒃᑯᓂᒋᑦ ᐊᖑᓇᓱᒋᐊᕐᓯᕙᒃᑐᖅ. ᔨᐅᕋᒥ ᓂᕆᐅᒃᐳᖅ ᕿᒧᒃᓯᐅᔾᔪᐊᕐᓂᐊᖅᑐᓂ ᑕᒫᓂ ᐊᕐᕌᒍᒥ.

#8 ᑖᒻ ᓇᕿᑕᕐᕕᒃ − ᐃᒃᐱᐊᕐᔪᒃ

ᑖᒻ ᐊᑯᓂᐅᓂᕐᐹᖅ ᕿᒧᒃᓯᖃᑦᑕᕐᓯᒪᖅᑰᖅᑐᖅ ᕿᒧᒃᓯᖅᑎᐅᔪᓂ ᓄᓇᕗᒻᒥ ᑕᒫᓂ ᐊᕐᕌᒍᒥ, ᕿᒧᖃᑦᑕᖅᓯᒪᓕᕐᖓᑦ ᐊᕐᕌᒍᓄᑦ 18−ᓄᑦ. ᐱᒋᐊᓚᐅᓯᒪᔪᖅ ᐊᑖᑕᖓ ᕿᒧᒃᓯᖃᑦᑕᕈᓐᓂᕐᒪᑦ. ᑖᒻ ᕿᒧᒃᓯᖃᑦᑕᖅᓯᒪᕗᖅ 15−ᓂᒃ ᐊᕐᕌᒍᓂᒃ ᕿᒧᒃᓯᐅᔾᔪᐊᖅᑐᓂᑦ. ᑖᒻ ᓇᖕᒥᓂᖃᖅᑐᖅ ᓇᓐᓄᒐᓱᒃᐸᒃᑐᓄᑦ ᓇᓐᓄᒐᓱᑦᑎᑦᑎᕙᑦᑐᓂ. ᓄᓇᒦᒐᔪᒃᐳᖅ, ᕿᒻᒥᖏᑦ ᕿᒧᒃᑎᖏᒃᑯᓂᒋᑦ, ᓂᕿᒃᓴᖅᓯᐅᕈᑎᖃᑦᑕᖅᑕᖏᑦ ᕿᒻᒥᖏᑦ. ᑖᒻ ᓂᕆᐅᒋᔭᖃᖅᐳᖅ ᒪᒃᑯᖕᓂᖅᓴᐃᑦ ᐱᖃᑕᐅᖃᑦᑕᖁᓪᓗᓂᒋᑦ ᕿᒧᒃᓯᐅᔾᔪᐊᖅᑐᓂᑦ, ᐅᓄᖅᓯᖁᖕᒪᒋᑦ ᕿᒧᒃᓯᖃᑦᑕᖅᑐᑦ. ᐃᑉᐱᒍᓱᖕᒥᔪᖅ ᐃᓄᐃᑦ ᕿᖕᒥᓪᓚᑦᑖᖏᑦ ᕿᖕᒥᓪᓚᑦᑖᖑᐃᓐᓇᖁᓪᓗᓂᖏᑦ.

#9 ᓇᓄᕋᖅ − ᐃᒡᓗᓕᒃ

ᓇᓄᕋᐅᑉ (ᔨᓂᐅᓪ ᐅᑕᒃ) ᓯᕗᓪᓕᖅᐹᖅᓱᖅᖢᓂ ᕿᒧᒃᓯᐅᔾᔪᐊᖃᑕᐅᔪᖅ, ᕿᒧᒃᓯᖃᑦᑕᓕᓵᓚᐅᖅᑐᖅ ᐊᕐᕌᒍᒃ ᒪᕐᕉᒃ ᐊᓂᒍᖅᑑᒃ. ᓇᓄᕋᖅ ᖁᕕᐊᒋᔭᖃᖅᐳᖅ ᓄᓇᒦᑦᑕᕆᐊᒃᓴᖅ, ᓂᕿᒃᓴᖅᓯᐅᖃᑦᑕᕆᐊᔅᓴᖅ ᐊᒻᒪᓗ  ᐱᓚᒃᑳᓘᓪᓗᓂ. ᓇᓄᕋᖅ ᓂᕈᐅᖕᓂᖃᑦᑎᐊᖅᐳᖅ ᓄᓇᒦᑦᑕᕆᐊᒃᓴᖅ ᑲᔾᔭᐅᓴᖕᓂᐊᕋᒥ ᐃᒃᐱᐊᕐᔫᑉ ᖃᓂᒋᔮᓂ.

#10 ᐅᐊᓐ ᔪᕋᓐᑯ − ᒥᑦᑎᒪᑕᓕᒃ

ᐅᐊᓐ ᓯᖕᓇᒃᑑᒪᒌᓐᓇᐅᔭᖅᑕᖓ ᕿᒧᒃᓯᖅᑎᐅᔭᕆᐊᒃᓴᖅ. ᐱᖓᔪᒋᓕᖅᑕᖓᓂ ᑖᒃᑯᐊ ᕿᒻᒥᖏᑦ, ᐊᓯᖏᓐᓂᒃ ᕿᒥᕐᖃᕐᓂᑰᒐᓗᐊᕐᒥᔪᖅ ᒪᕐᕈᐊᑎᖅᑐᓂ,ᑭᓯᐊᓂ ᓄᑖᑦ ᕿᒻᒥᖏᑦ ᑲᑎᓚᐅᖅᐳᑦ ᒪᕐᕉᒃ ᑕᖅᑮᒃ ᐊᓂᒍᖅᑑᒃ. ᓯᕗᓪᓕᖅᐹᒥ ᕿᒧᒃᓯᐅᔾᔪᐊᖃᑕᐅᔪᖅ. ᒫᓐᓇᐅᔪᖅ ᐅᐊᓐ ᐃᖅᑲᓇᐃᔭᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ ᓇᐅᑦᑎᖅᓱᖅᑎᐅᓪᓗᓂ. ᓄᓇᒦᖏᒃᑯᓂ ᐃᖅᑲᓇᐃᔮᒥᓄᑦ, ᐊᖑᓇᓱᖃᑦᑕᖅᑐᖅ. ᐊᖏᕐᕋᕐᓂᐊᕐᓂᕐᒥᓂᒃ ᒥᑦᑎᒪᑕᓕᒻᒧᑦ ᓂᕆᐅᖕᓂᖃᖅᐳᖅ.

#11 ᐋᐸᒃ − ᐃᒃᐱᐊᕐᔪᒃ

ᐋᐸᒃ (ᐊᓐᑐᕋᐃ ᐱᓕᐴᓯ ᑕᖅᑐ) ᕿᒧᖃᑦᑕᖅᓯᒪᓕᖅᑐᖅ ᐊᕐᕌᒍᓄᑦ ᐱᖓᓱᓄᑦ. ᐱᒋᐊᓚᐅᖅᓯᒪᔪᖅ ᐃᓪᓗᖓᑕ ᑐᓂᓚᐅᕐᓯᒪᒻᒪᒍ ᐱᖓᓱᓂᑦ ᕿᒻᒥᕐᓂᑦ. ᐱᖓᔪᒋᔭᖓᓂ ᕿᒧᒃᓯᐅᔾᔪᐊᖃᑕᐅᔪᖅ. ᐋᐸᒃ ᐃᓕᓐᓂᐊᖅᑎᑦᑎᖃᑦᑕᖅᑐᖅ ᐃᓕᖅᑯᓯᐅᔪᓂᑦ ᒪᒃᑯᒃᑐᓄᑦ. ᒪᒃᑯᒃᑐᑦ ᓄᓇᓕᐊᕈᑎᖃᑦᑕᖅᑕᖏᑦ ᐃᓕᑎᖃᑦᑕᖅᑕᖏᑦ ᐊᖑᓇᓱᖕᓂᕐᒥᑦ ᓴᓇᕐᕈᑎᒃᓴᓕᐅᕐᓂᕐᒥᒡᓗ. ᕿᒧᒃᓯᖏᑉᐸᑦ, ᓄᓇᒥ ᑕᑯᔭᒃᓴᐅᖃᑦᑕᖅᑐᖅ ᓂᕿᒃᓴᖅᓯᐅᖅᑎᓪᓗᒍ ᕿᖕᒥᖏᓐᓄᑦ. ᑕᒪᐃᓐᓂᓪᓕ, ᐋᐸᒃ ᐅᖃᖅᐳᖅ ᖁᕕᐊᓇᖅᑐᖅ ᐃᓚᐅᖃᑕᐅᔭᕆᐊᒃᓴᖅ ᕿᒧᒃᓯᐅᔾᔪᐊᖅᑐᓂᑦ, ᒪᒥᓴᐅᑎᒋᕙᖕᒪᒍ ᐊᒻᒪᓗ ᖁᕕᐊᓇᖅᖢᓂ ᐃᓱᓕᒃᑳᖓ ᓱᑲᓐᓂᑭᓴᐅᑎᓂᖅ.

ᖃᐅᔨᒪᔭᐅᔭᕆᐊᓕᒃ: # 6 ᒪᐃᑯ ᖃᐅᓐᓇᖅ ᐱᖃᑕᐅᔾᔮᒍᓐᓃᕐᒪᑦ ᕿᒧᒃᓯᐅᕐᔪᐊᖅᑐᓂᑦ ᓇᖕᒥᓂᖅ ᐱᔾᔪᑎᖃᖅᑐᓂ.