ᐃᖃᓗᐃᑦ, ᓄᓇᕗᑦ, ᒪᐃ 6, 2024 – ᓄᓇᕗᑦ ᑐᙵᕕᒃ ᑎᒥᖓ (“ᑐᙵᕕᒃᑯᑦ”) ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (“ᕿᑭᖅᑕᓃᒃᑯᑦ”) ᑐᑭᑖᕈᑎᒋᔭᐅᔪᒥᒃ ᐱᒻᒪᕆᐋᓗᖕᒥ ᖁᕕᐊᓲᑎᖃᖅᐳᑦ ᓴᖅᑭᑕᐅᔪᒧᑦ ᒐᕙᒪᑐᖃᒃᑯᑦ ᐃᖅᑲᖅᑐᐃᕝᕕᖓᒍᑦ ᐄᐳᓪ 6, 2024ᒥ.  2021−ᖑᑎᓪᓗᒍ, ᒥᓂᔅᑕ ᐃᒪᕐᒥᐅᑕᓕᕆᔨᒃᑯᓐᓂᑦ ᑐᑭᑖᕈᑎᖃᓚᐅᖅᓯᒪᖕᒪᑦ ᑐᓂᓯᒃᑲᓐᓂᖅᖢᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖃᓗᓕᕆᓂᕐᒥᒃ ᓚᐃᓴᓐᓯᑖᖅᑎᑦᑎᓪᓗᓂ ᓄᓇᕗᒥ ᐃᒪᕕᖏᓐᓂᑦ ᐃᖃᓗᒐᓱᐊᕐᕕᖕᓂᑦ ᐃᓄᒻᒪᕆᐅᙱᑦᑐᓄᑦ ᐃᖃᓗᓕᕆᔨᐅᔪᓄᑦ ᑲᓇᑕᐅᑉ ᓂᒋᐊᓂᕐᒥᐅᑕᓂᒃ.  ᑕᕝᕙᓂ ᐱᓇᓱᐊᕈᓯᕐᒥ, ᐃᖅᑲᖅᑐᐃᕝᕕᒃ ᖁᔭᓈᖅᓯᓚᐅᕐᒪᑦ ᑐᑭᑖᕈᑎᒋᔭᐅᓚᐅᖅᓯᒪᔪᒥᒃ, ᓇᓗᓇᐃᖅᓯᓪᓗᓂ  ᐱᔾᔪᑎᖓᓂᒃ ᑖᓐᓇᒎᖅ ᒥᓂᔅᑕ ᑲᔪᓯᑎᑦᑎᑦᑎᐊᓚᐅᙱᓐᓂᖓᓄᑦ “ᐱᓕᕆᐊᒃᓴᕆᔭᖏᓐᓂᒃ”ᓄᓇᕗᒥ ᐊᖏᕈᑎᒥᑦ ᑎᓕᐅᕈᑎᒋᔭᐅᓯᒪᔪᓂᒃ::

“[ᒥᓂᔅᑕᐅᑉ] ᑐᑭᑖᕈᑎᖓ ᐱᔾᔪᑎᖃᑦᑎᐊᓚᐅᙱᒻᒪᑦ ᐱᔾᔪᑎᒋᓪᓗᒍ ᒪᓕᒐᑎᒍᑦ ᑭᓪᓕᖃᖅᑎᑦᑎᓯᒪᓂᖏᓐᓂᒃ ᓄᓇᕗᒥ ᐊᖏᕈᑎᒥᒃ ᐊᒻᒪᓗ ᑕᐃᒪᓐᓇᐃᒋᐊᖃᓚᐅᙱᒃᑲᓗᐊᕐᒪᑦ, ᒪᑐᐃᖓᑦᑎᐊᓚᐅᙱᒻᒪᑦ, ᑐᑭᓯᐅᒪᓗᐊᕐᓇᓂᓗ ᖃᐅᔨᓴᑦᑎᐊᓚᐅᙱᓐᓂᖏᓐᓂᒃ ᓇᓗᓇᐃᔭᐃᓂᖏᓐᓄᑦ ᑐᑭᖓᓂᒃ ᐊᔾᔨᐅᙱᑦᑐᒥᒃ ᐃᓱᒪᓕᐅᕈᑎᖃᕆᐊᖃᕐᓂᕐᒥᒃ ᐃᓗᓕᖓᓂᒃ ᓄᓇᕗᑦ ᐊᖏᕈᑎᒥᒃ ᑐᑭᓕᐅᖅᑕᐅᓯᒪᔪᖅ ᐱᔾᔪᑎᒋᓪᓗᒍ ᐃᓛᒃᑯᑦ 15.3.7 ᐊᒻᒪᓗ ᐃᒃᐱᒋᔭᐅᒋᐊᖃᕐᓂᖓᑦ ᑭᖕ ᓇᓗᓇᐃᔭᖅᓯᒪᔭᖏᓐᓂᒃ.”

ᒪᓕᒃᖢᒍ ᓄᓇᕗᑦ ᐊᖏᕈᑎᖓ, ᒥᓂᔅᑕ ᑐᑭᑖᕈᑎᖃᖅᐸᑦ ᓚᐃᓴᓐᓯᓂᒃ ᐃᒪᓂᑦᓄᓇᕗᑦ ᖃᓂᒋᖓᓂᑦ, ᑖᓐᓇ ᒥᓂᔅᑕ “ᐊᔾᔨᐅᙱᑦᑐᒥᒃ ᐃᓱᒪᓕᐅᕈᑎᖃᕆᐊᖃᕋᓗᐊᕐᒪᑦ” ᐱᔾᔪᑎᒋᓪᓗᒍ ᐊᑭᒋᔭᐅᔪᒦᓐᓂᖏᑦ (ᑖᒃᑯᐊ ᓄᓇᓖᑦ ᐃᑲᔫᓯᐊᖅᑖᕐᕕᒋᒋᐊᖃᕋᓗᐊᕐᒪᔾᔪᒃ ᐃᒪᖁᑎᖏᓐᓃᑦᑐᑦ) ᐊᒻᒪᓗ ᐃᓱᒪᒋᒋᐊᖃᓚᐅᕋᓗᐊᕐᒪᒍ ᓄᓇᕗᒥ ᐃᓅᓯᕆᔭᐅᓂᖓᓂᒃ ᐊᒻᒪᓗ ᒪᑭᒪᔾᔪᑎᒃᓴᑐᖃᕆᓪᓗᓂᒋᑦ ᓄᓇᓖᑦ ᐃᖃᓗᓕᕆᓂᖅ.

ᓄᓇᕗᑦ ᐊᖏᕈᑎᖓ ᐊᑎᓕᐅᖅᑕᐅᑎᓪᓗᒍ 1993ᒥ, ᐊᒥᓲᓂᖅᓴᐅᔪᑦ ᓚᐃᓴᓐᓯᐅᔪᑦ ᓄᓇᕗᑦ ᐃᒪᖏᓐᓄᑦ ᑎᒍᒥᐊᖅᑕᐅᓚᐅᕐᒪᑦ ᖃᓪᓗᓈᓂᙶᖅᓯᒪᔪᓂᒃ.  ᑖᒃᑯᐊ ᓚᐃᓴᓐᓰᑦ  ᐱᒻᒪᕆᐋᓗᖕᒪᑦ ᐊᒻᒪᓗ ᓇᖕᒥᓂᖃᖅᑐᖅ ᐊᓯᔾᔨᓚᐅᖅᓯᒪᙱᖦᖢᓂ.  ᐱᔾᔪᑎᒋᓪᓗᒍ ᑖᒃᑯᐊ ᖃᓄᖅ ᓚᐃᓴᓰᑦ ᐊᐅᓚᑕᐅᓂᖏᑦ ᑕᐃᔅᓱᒪᓂᙶᖅᓯᒪᖕᒪᑕ, ᓄᓇᕗᑦ ᐊᑐᐃᓐᓇᖃᕐᓂᖏᑦ ᓯᔾᔭᕆᔭᖏᑕ ᐃᒪᖁᑎᖏᓐᓂᒃ ᐃᖃᓗᓕᕆᓂᖅ ᑭᖑᕙᖅᓯᒪᔪᖅ ᐃᓱᒪᒋᓪᓗᒋᑦ ᐊᓯᖏᑦ ᐃᖃᓗᓕᕆᕕᐅᕙᒃᑐᓂᒃ ᑲᓇᑕᒥ.  ᐊᒥᓱᓄᑦ ᐊᕐᕌᒍᓄᑦ, ᑖᒃᑯᐊ ᓚᐃᓴᓐᓰᑦ ᐃᑲᔪᕐᒪᑕ ᖃᓪᓗᓈᓃᑦᑐᓂᒃ  ᓄᓇᓕᖏᓐᓂᓪᓗ, ᑎᑎᕋᖅᓯᒪᔪᖃᑦᑎᐊᕋᓗᐊᖅᑎᓪᓗᒍ ᓄᓇᕗᑦ ᐊᖏᕈᑎᒥᒃ.

ᑕᐃᒪᙵᓂᑦ, ᓄᓇᕗᑦ ᑐᙵᕕᒃᑯᑦ ᐊᒻᒪ ᕿᑭᖅᑕᓃᒃᑯᓪᓗ ᐱᓕᕆᓯᒪᐃᓐᓇᕐᒪᑕ ᐊᔾᔨᒌᔾᔪᒥᔪᓂᒃ ᐃᓚᒋᔭᐅᔪᒪᒐᑦᑕ ᓄᓇᕗᒥ ᐃᖃᓗᓕᕆᕕᐅᔪᓐᓇᖅᑐᓄᑦ.  2021ᒥ, ᑖᓐᓇ ᒥᓂᔅᑕ ᓚᐃᓴᓐᓯᑖᖅᑎᑦᑎᒃᑲᓐᓂᑐᐃᓐᓇᖅᖢᓂ  ᖃᓪᓗᓈᓃᑦᑐᓄᑦ ᐃᖃᓗᓕᕆᔨᓂᒃ ᐃᓱᒪᙱᑦᑎᐊᖅᖢᑎᒃ ᐱᔪᓐᓇᐅᑎᒋᔭᐅᔪᑦ ᓄᓇᕗᒥ ᓄᓇᓕᖕᓂᑦ, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᕿᑭᖅᑕᓃᒃᑯᑦ ᑐᓂᓯᓚᐅᖅᓯᒪᔪᑦ ᐃᖅᑲᖅᑐᐃᕝᕕᒃᑯᑦ ᕿᒧᕐᕈᔭᐅᖁᓪᓗᒍ ᑐᑭᑖᕈᑎᒋᔭᐅᔪᖅ ᐲᖅᑕᐅᖁᓪᓗᒍ.

“ᑕᒪᓐᓇ ᐱᒻᒪᕆᐊᓗᖕᒥᑦ ᓵᓚᒃᓴᓂᐅᔪᖅ ᐃᓄᖕᓄᑦ ᐊᒻᒪᓗ ᐅᑯᐊ ᐊᖏᕈᑎᓕᐊᖑᓯᒪᔪᑦ ᐊᑎᓕᐅᖅᑎᐅᓯᒪᔪᓄᑦ” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ “ᒐᕙᒪᑐᖃᒃᑯᑦ ᐃᖅᑲᖅᑐᐃᕝᕕᖓᑕ ᑐᑭᑖᕈᑎᖓ ᓇᓗᓇᐃᒃᑯᑕᐅᕗᖅ ᑭᓇᑐᐃᓐᓇᕐᒧᑦ, ᐊᒻᒪᓗ ᐱᓗᐊᖅᑐᒥᒃ ᒐᕙᒪᒃᑯᓐᓄᑦ, ᑖᓐᓇ ᑭᖕ ᐃᒃᐱᒍᓱᑦᑎᐊᕆᐊᖃᖅᑐᖅ ᐊᖏᕈᑎᒋᓯᒪᔭᑦᑎᓐᓂᒃ ᐊᒻᒪᓗ ᐱᓕᕆᓗᑎᒃ ᕿᓚᒻᒥᐅᓂᖅᐹᖑᔪᒥᒃ ᐋᖅᑭᒋᐊᕐᓗᒋᑦ ᐊᑐᓕᖅᑎᑦᑎᓗᒋᓪᓗ  ᒪᓕᒐᒃᓴᓂᒃ.   ᐱᑕᖃᕐᒪᑦ ᐱᕕᒃᓴᖃᕐᓂᕐᒥᒃ ᒪᑭᒪᔾᔪᑎᒃᓴᓕᐅᕈᓐᓇᕐᓂᕐᒥᒃ ᓄᓇᓕᖕᓂᑦ ᓄᓇᕗᙵ, ᑭᓯᐊᓂ ᐱᕙᓪᓕᐊᑎᑕᐅᑦᑎᐊᕐᓂᐊᖅᐸᑦ ᐅᐃᒍᒋᐊᖅᑕᐅᓗᓂᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖃᓪᓕᕿᓂᕐᒥᒃ ᑮᓇᐅᔭᓕᐅᕐᕕᐅᑦᑎᐊᕈᓐᓇᕐᓂᐊᖅᐸᑦ ᓄᓇᕗᒥ ᐊᑕᐅᑦᓯᒃᑯᑦ ᐱᓕᕆᐊᖑᓗᓂ ᐃᓚᐃᓐᓇᖅᓯᐅᖅᑕᐅᓂᕆᓚᐅᖅᑕᖏᑦ ᐃᓄᐃᑦ ᖃᓂᑦᑐᒥᒃ ᑮᓇᐅᔭᓕᐅᕋᓱᐊᕐᕕᒋᔪᓐᓇᓚᐅᖅᑕᕋᓗᐊᖏᓐᓄᑦ.”

“ᓄᓇᕗᒥ ᐃᓄᐃᑦ ᐊᑐᕆᐊᖃᒃᑲᓐᓂᓚᐅᖅᑐᑦ ᐃᖅᑲᖅᑐᐃᕝᕕᒃᑰᖅᑎᑦᑎᓪᓗᑎᒃ ᑲᓇᑕ ᐃᓕᑕᖅᓯᔪᓐᓇᖁᓪᓗᒍ ᐱᔪᓐᓇᐅᑎᒋᔭᐅᔪᓄᑦ ᓇᓗᓇᐃᔭᖅᓯᒪᑦᑎᐊᖅᑐᓂᒃ ᓄᓇᕗᑦ ᐊᖏᕈᑎᖓᓂᒃ.” ᐅᖃᖅᑐᖅ ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᓄᓇᕗᒥ ᓄᓇᓖᑦ ᐊᑭᒋᔭᖃᖅᑐᓄᑦ ᐃᒪᓂᒃ ᐃᖃᓗᓕᕆᕕᐅᔪᓄᑦ ᐊᔾᔨᐅᙱᑦᑐᒃᑯᑦ ᐃᓱᒪᓕᐅᕈᑕᐅᓯᒪᒋᐊᖃᓚᐅᖅᑑᒐᓗᐊᖅ ᐃᖃᓗᓕᕆᓂᕐᒧᑦ ᓚᐃᓴᓐᓯᑖᖅᑎᑦᑎᓂᐊᖅᑎᓪᓗᒋᑦ, ᑕᐃᒪᙵᓂᒃ ᓄᓇᕗᑦ ᐊᖏᕈᑎᖓ ᐊᑎᓕᐅᖅᑕᐅᓚᐅᖅᑎᓪᓗᒍ 1993ᒥ ᑕᐃᒪᐃᓕᐅᖏᓐᓇᖅᑐᑦ.  ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖃᑦᑎᐊᕆᐊᖃᖅᑐᑦ ᐊᖏᕈᑎᒋᔭᑦᑎᓐᓂᒃ ᑲᓇᑕᒃᑯᓐᓂ ᐊᒻᒪᓗ ᐊᑐᖅᑕᐅᓯᑲᐅᑎᒋᖁᓪᓗᒍ ᑐᑭᑖᕈᑎᒋᔭᐅᓂᐊᖅᑐᓄᑦ.  ᓄᓇᕗᒥ ᐃᓄᐃᑦ ᐃᓅᓯᖏᓐᓂᒃ ᒪᑭᒋᐊᒃᑲᓐᓂᕆᐊᖃᕐᒪᑕ ᐊᒻᒪᓗ ᐱᕕᒃᓴᕆᔭᐅᔪᑦ ᑮᓇᐅᔭᕆᔭᐅᔪᓪᓗ ᐊᑐᖅᑕᐅᙱᓐᓂᖅᓴᐅᓗᑎᒃ ᓇᓗᓇᐃᖅᓯᒐᓱᖁᔨᓪᓗᑎᒃ ᐱᔪᓐᓇᐅᑎᒋᔭᑦᑎᓐᓂᒃ ᐃᓗᓕᖏᓐᓃᒌᖅᑐᓄᑦ ᑲᓇᑕᐅᑉ ᐱᖁᔭᕐᔪᐊᖓᓂᒃ.”

ᓄᓇᕗᑦ ᑐᙵᕕᒃᑯᑦ ᐊᒻᒪ ᕿᑭᖅᑕᓃᒃᑯᑦ ᓂᕆᐅᒃᐳᑦ ᐃᖅᑲᓇᐃᔭᖃᑎᖃᕈᓐᓇᕐᓂᐊᕐᓂᖏᓐᓄᑦ ᒥᓂᔅᑕᒥᒃ ᑲᔪᓯᑎᑦᑎᓂᕐᒥᒃ ᐱᔾᔪᑎᖏᓐᓂᒃ ᓄᓇᕗᑦ ᐊᖏᕈᑎᒥᒃ.  ᒐᕙᒪᑐᖃᒃᑯᑦ ᐃᖅᑲᖅᑐᐃᕝᕕᖓ ᓇᓗᓇᐃᖅᓯᑎᓪᓗᒋᑦ ᐱᕕᖃᖅᑎᑦᑎᓂᐊᖅᑐᖅ ᓄᓇᕗᒥ ᐊᑐᐃᓐᓇᖃᕈᓐᓇᖅᓯᓂᖏᓐᓄᑦ ᐃᖃᓗᓕᕆᓂᕐᒥᒃ ᐊᑭᒋᔭᑦᑎᓐᓂᒃ ᐃᓚᐃᓐᓈᖅᑕᐅᙱᓪᓗᑎᒃ ᐊᒻᒪᓗ ᐊᔾᔨᒌᑎᑕᐅᓗᑎᒃ ᓱᕐᓗᑐ ᑕᐃᒃᑯᑎᓇ ᖃᓪᓗᓈᓂᑦ ᐱᓕᕆᐊᖑᕙᒃᑐᓂᒃ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᔾᔪᑎᓂᒃ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(P) 867.975.8398 ᐊᑭᖃᙱᑦᑐᒧᓪᓘᓐᓃᑦ 1.800.667.2742
kflaherty@qia.ca

ᕿᑭᖅᑕᓃᒃᑯᓐᓂᑦ
ᑭᐊᕕᓐ ᖃᑉᓗᑦᓯᐊᖅ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓂᕐᒧᑦ, ᓄᓇᕗᑦ ᑐᙵᕕᒃ
media@tunngavik.com