ᐃᖃᓗᐃᑦ, ᓄᓇᕗᑦ − ᓄᕕᐱᕆ 17, 2020. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᐃᑲᔫᑎᖃᕐᓂᐊᓕᕐᒥᒻᒪᑕ ᐅᖓᑖᓃᑦᑐᓂᑦ $1.8 ᒥᓕᐊᓐ ᓄᓇᓕᓐᓂᑦ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᑦᑐᓄᑦ ᐊᒻᒪᓗ Hᐊᒪᓚᐅᔪᓄᑦ ᐃᑲᔫᑎᒋᓗᒋᑦ ᐃᓱᒪᓕᕆᓂᕐᒧᑦ ᐃᑲᔫᑎᐅᖃᑦᑕᓂᐊᖅᑐᓂᑦ ᖃᓂᒪᓇᖅᑐᖅᑕᖃᕐᓂᖓᓂ ᓄᓇᕐᔪᐊᓕᒫᒥ.

ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐃᑲᔫᑎᒋᓗᒋᑦ ᐃᓕᓴᖅᓯᕕᒃ ᑲᑐᔾᔨᖃᑎᒌᒃᑯᓐᓄᑦ, YWCA ᐊᒡᕕᒃᑯᓐᓄᑦ, ᐅᖂᑕᖅ ᑲᑐᔾᔨᖃᑎᒌᒃᑯᓐᓄᑦ, ᑐᑭᓯᒋᐊᕐᕕᒃ ᑲᑐᔾᔨᖃᑎᒌᒃᑯᓐᓄᑦ, ᕿᑭᖅᑕᓂ Hᐊᒪᓚᒃᑯᑦ ᐱᙳᐊᖅᑐᓕᕆᔨᖏᓐᓄᑦ ᐊᒻᒪᓗᑦᑕᐅᖅ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓄᑦ.

“ᖃᓂᒪᓇᖅᑐᖅᑕᖃᕐᓂᖓ ᓄᓇᕐᔪᐊᓕᒫᒥ ᐃᓱᒪᔮᕈᑕᐅᓪᓚᕆᒻᒪᑦ ᐃᓄᓐᓄᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑖᒃᑯᐊ ᑮᓇᐅᔭᑦ ᐃᑲᔫᑎᖃᕐᓂᐊᖅᑐᑦ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᑦᑐᓄᑦ Hᐊᒪᓚᒃᑯᓄᓪᓗ ᐱᓕᕆᐊᖃᕈᓐᓇᖁᓪᓗᒋᑦ ᐃᑲᔫᑎᖃᕐᓂᐊᖅᑐᓂᑦ ᐃᓄᓐᓄᑦ ᕿᓄᐃᓵᒃᑲᓐᓂᕈᓐᓇᖁᓪᓗᒋᑦ ᐅᖁᒪᐃᓪᓕᐅᕈᑕᐅᑎᓪᓗᒍ ᖃᓂᒪᓇᖅᑐᖅ ᓄᓇᕐᔪᐊᓕᒫᒥ.”  ”

ᐃᓕᓴᖅᓯᕕᒃ ᑲᑐᔾᔨᖃᑎᒌᑦ: $517,000

ᕿᑭᖅᑕᓂᒃᑯᑦ ᑲᑐᔾᔨᖃᑎᖃᕐᓂᐊᖅᑐᑦ ᐃᓕᓴᖅᓯᕕᒃᑯᓐᓂᑦ ᐃᓄᓐᓂᑦ ᐃᓱᒪᓕᕆᖃᑦᑕᓂᕐᒥᒃ ᐊᒻᒪᓗ ᐃᓅᓯᓕᕆᖃᑦᑕᓂᕐᒥᒃ ᐱᓕᕆᒋᐊᒃᑲᓐᓂᕈᓐᓇᖁᓪᓗᒋᑦ ᕿᑭᖅᑕᓂ ᓄᓇᓕᐅᔪᓂᑦ. ᑖᒃᑯᐊ ᒪᑯᓂᖓ ᐃᓚᖃᕐᓂᐊᖅᑐᑦ:

• ᖃᓂᒪᓇᖅᑐᖅᑕᖃᕐᓂᖓᓂ ᓄᓇᓕᓐᓂᑦ ᑐᓴᐅᒪᑎᑦᑎᒋᐊᕈᓐᓇᖁᓪᓗᒋᑦ ᐊᒻᒪᓗ ᐃᓕᓐᓂᐊᖅᑐᓕᕆᖁᓪᓗᒋᑦ
• ᐅᐸᓗᖓᐃᔭᐃᓗᑎᒃ ᑭᒃᑯᑐᐃᓐᓇᕐᓄᑦ ᐃᑲᔫᑎᐅᓂᐊᖅᑐᓂᑦ ᐊᓂᑦᑕᐃᓕᑲᐃᓐᓇᖁᔭᐅᓯᒪᔪᓂᑦ ᖃᓂᒪᓇᖅᑐᖅ ᐱᔾᔪᑎᒋᓪᓗᒍ
• ᐱᓕᒻᒪᓴᐃᑦᑕᐅᑎᒋᓂᐊᕐᖓᑕ ᐃᓄᓐᓂᑦ ᓄᓇᓕᓐᓂᑦ ᐃᓅᓯᓕᕆᔨᓂᑦ ᑐᑭᓯᐅᒪᔾᔪᑎᔅᓴᓂᑦ ᐃᓱᕐᕆᐅᑕᐅᕙᑦᑐᓄᑦ ᐊᒻᒪᓗ ᐃᓱᒪᓕᕆᓂᕐᒧᑦ
• ᐋᖅᑭᔅᓱᐃᕙᓪᓕᐊᓂᐊᕐᖓᑕ ᐃᓕᓴᖅᓯᕕᒻᒥ ᐱᓕᕆᐊᖑᕙᑦᑐᓂᑦ ᐃᑲᔪᒃᑲᓐᓂᖃᑦᑕᕈᓐᓇᓂᐊᕐᖓᑕ ᖃᕋᓴᐅᔭᒃᑯᑦ ᐊᒻᒪᓗ ᐅᖓᓯᑦᑐᒦᖅᑐᓂᑦ ᐃᓅᓯᓕᕆᖃᑦᑕᕐᓗᑎᒃ

YWCA ᐊᒡᕕᒃ: $182,000

ᕿᑭᖅᑕᓂᒃᑯᑦ ᑮᓇᐅᔭᓂᑦ ᐃᑲᔫᑎᖏᑦ ᐱᓕᕆᐊᖃᕈᑕᐅᔪᓐᓇᓂᐊᖅᑐᑦ ᒪᑯᓂᖓ ᓲᕐᓗ:

• ᒥᕐᓱᑎᑦᑎᖃᑦᑕᓂᕐᒥᒃ ᐊᕐᓇᓂᑦ ᐊᕐᓇᓄᑦ ᓇᔪᒐᐅᕙᑦᑐᒥ
• ᐅᓂᑳᑐᐊᖅᑎᑦᑎᖃᑦᑕᕐᓗᑎᒃ ᐊᒻᒪᓗ ᐱᖅᑯᓯᖅᑎᒍᑦ ᐱᙳᐊᕈᓯᕐᓂᑦ ᐱᙳᐊᑎᑦᑎᖃᑦᑕᕐᓗᑎᒃ
• ᐃᖅᑲᓇᐃᔭᖅᑎᓄᑦ ᐃᑲᔫᑏᑦ ᐱᔾᔪᑕᐅᔪᓄᑦ ᖃᓂᒪᓇᖅᑐᖅᑕᖃᕐᓂᖓᓅᖓᔪᓂᑦ ᑭᓪᓕᓕᐅᕈᑕᐅᓯᒪᔪᓂᑦ ᒪᑐᓯᒪᒍᑕᐅᔪᓂᓪᓗ

ᐅᖂᑕᖅ ᑲᑐᔾᔨᖃᑎᒌᑦ: $237,000

ᕿᑭᖅᑕᓂᒃᑯᑦ ᑮᓇᐅᔭᓂᑦ ᐃᑲᔫᑎᖏᑦ ᐃᑲᔫᑕᐅᒋᐊᒃᑲᓂᕐᓂᐊᕐᖓᑕ ᐱᓕᕆᐊᕆᕙᑦᑕᖏᓐᓄᑦ ᐱᓕᒻᒪᔅᓴᐃᓂᕐᒧᓪᓗ ᒪᑯᓂᖓ ᓲᕐᓗ:

• ᐊᐅᓪᓚᕐᓯᒪᓗᑎᒃ ᐱᓕᕆᐊᖑᖃᑦᑕᓂᐊᖅᑐᓄᑦ
• ᐃᓅᓯᓕᕆᖃᑦᑕᕐᓂᖅ
• ᐃᓱᒪᓕᕆᓂᕐᒧᑦ ᐃᓕᓐᓂᐊᑎᑦᑎᓂᖅ

ᑐᑭᓯᒋᐊᕐᕕᒃ ᑲᑐᔾᔨᖃᑎᒌᑦ: $62,000

ᕿᑭᖅᑕᓂᒃᑯᑦ ᑮᓇᐅᔭᓂᑦ ᐃᑲᔫᑎᖏᑦ ᐃᑲᔫᑎᖃᕐᓂᐊᖅᑐᑦ ᐱᓕᕆᐊᕐᓄᑦ ᒪᑯᓂᖓ ᓲᕐᓗ:

• ᐃᓪᓗᕋᓛᓕᐅᖅᑎᑦᑎᖃᑦᑕᕐᓂᖅ
• ᑲᒻᒥᑎᑦᑎᓂᖅ

ᕿᑭᖅᑕᓂ Hᐊᒪᓚᐅᔪᓄᑦ ᐱᙳᐊᖅᑐᓕᕆᔨᖏᓐᓄᑦ: $425,000

• ᕿᑭᖅᑕᓂᒃᑯᑦ ᐱᓕᕆᖃᑎᖃᕐᖓᑕ ᕿᑭᖅᑕᓂ Hᐊᒪᓚᒃᑯᑦ ᐱᙳᐊᖅᑐᓕᕆᔨᖏᓐᓂᒃ ᑮᓇᐅᔭᖃᖅᑎᑎᓪᓗᑎᒃ ᐃᓅᓱᑦᑐᓂᑦ ᐃᓱᒪᓕᕆᓂᕐᒧᑦ ᐃᓅᓯᓕᕆᓂᕐᒧᓪᓗ ᐃᑲᔫᑎᓂᑦ ᑕᖅᑭᐅᓂᐊᖅᑐᓄᑦ ᐊᒥᓲᙱᑦᑐᓄᑦ ᐊᑐᖅᑕᐅᓂᐊᖅᑐᓂᑦ.

ᕿᑭᖅᑕᓂ ᐃᓚᒌᓄᑦ ᐃᑲᔫᑏᑦ: $415,000

• ᕿᑭᖅᑕᓂᒃᑯᑦ ᓇᓗᓇᐃᕐᓯᔪᒻᒪᑕ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓂᑦ ᓄᕕᐱᕆ 4, 2020ᑎᓪᓗᒍ
• $415,00 ᐊᑐᖅᑕᐅᔪᒻᒪᑕ ᓯᕕᑦᑐᕆᐊᕐᓯᒍᑕᐅᓪᓗᑎᒃ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓂᑦ

ᐋᒡᒌᓯ 25, 2020, ᒥᓂᔅᑕ ᒥᓗ ᓇᓗᓇᐃᕐᓯᓚᐅᕐᓯᒪᒻᒪᑦ $82.5 ᒥᓕᐊᓐᓂᒃ ᐱᓕᕆᒋᐊᒃᑲᓐᓂᕈᑕᐅᓂᐊᖅᑐᓂᑦ ᐊᒻᒪᓗ ᐋᖅᑭᔅᓱᐃᒍᑕᐅᓂᐊᖅᑐᓂᑦ ᒫᓐᓇ ᐃᓱᒪᓕᕆᓂᕐᒧᑦ ᐃᑲᔫᑎᐅᕙᑦᑐᓂᑦ ᑲᒪᒋᔭᖃᕐᓗᑎᒃ ᖃᓂᒪᓇᖅᑐᖅᑕᖃᖅᑎᓪᓗᒍ ᐃᓱᒪᓕᕆᒍᑕᐅᔭᕆᐊᓕᓐᓂᑦ ᐊᒻᒪᓗ ᐱᔭᕆᐊᑐᔪᒃᑰᕈᑕᐅᔪᓂᑦ ᓄᓇᖃᖅᑐᑐᖃᐃᑦ ᓄᓇᓕᖏᓐᓂ. ᕿᑭᖅᑕᓂᒃᑯᓐᓄᑦ ᑐᓂᔭᐅᓯᒪᔪᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᐃᓱᒪᓕᕆᓂᕐᒧᑦ ᐃᑲᔫᑕᐅᒋᐊᒃᑲᓂᕐᓂᐊᖅᑐᑦ ᑮᓇᐅᔭᑦ ᐊᒥᓲᓂᓖᑦ  $1,839,763.

ᑐᑭᓯᒋᐊᒃᑲᓐᓂᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742