ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᑎᒃᑯᐊᖅᑕᐅᓂᖏᓐᓂᒃ ᐅᑯᐊ ᐃᖅᑲᓇᐃᔭᖅᑎᐅᖃᑕᐅᓂᐊᖅᑐᑦ:

ᔪᐊᔾ ᖁᕕᖅ ᖁᓚᐅᑦ, ᐋᔩᕋᖅᑎᓪᓗᐊᑕᖅ

ᔪᐊᔾ ᕿᑭᖅᑕᓂᒃᑯᓐᓄᑦ ᐃᖅᑲᓇᐃᔭᖃᑕᐅᓯᔪᔪᖅ ᔮᓐᓄᐊᓕ 2022ᖑᑎᓪᓗᒍ. ᔪᐊᔾ ᑲᑎᒪᔨᐅᖃᑦᑕᕐᓯᒪᔪᖅ ᓂᕈᐊᖅᑕᐅᓚᐅᕐᓯᒪᔪᖅ ᒪᓕᒐᓕᐅᕐᕕᒻᒧᑦ 2013ᒥ ᓂᕈᐊᕐᓇᐅᑎᓪᓗᒍ, ᑕᐃᑲᓂ ᓈᕆᓚᐅᕐᓯᒪᔪᖅ ᓂᕈᐊᖅᑕᐅᕕᒋᓯᒪᔭᖓᓂ ᒪᓕᒐᓕᐅᖅᑎᐅᓂᕐᒧᑦ ᐊᒻᒪᓗ ᐅᖃᖅᑎᐅᓂᕐᒧᑦ, ᑭᒡᒐᖅᑐᐃᓪᓗᓂ ᐊᒥᑦᑐᕐᒥᐅᓂᑦ.

ᐃᓕᓐᓂᐊᕐᓯᒪᔪᖅ ᐊᓪᒑᓐᑯᐃᓐ ᓯᓚᑦᑐᓴᕐᕕᒻᒥ ᐋᑐᕚᒥ ᐊᒻᒪᓗ ᐃᖅᑲᓇᐃᔭᓚᐅᕐᓯᒪᓪᓗᓂ ᐃᒡᓗᓕᒻᒥ ᑲᓇᓐᓇᕐᒥ ᖃᐅᔨᓴᖅᑐᓕᕆᕕᒻᒥ 14ᓂᑦ ᐊᕐᕌᒍᓂᑦ. ᕿᑭᖅᑕᓂᒃᑯᓐᓂᑦ ᓄᓇᓕᓐᓄᑦ ᑲᑎᒪᔨᐅᓚᐅᕐᓯᒪᔪᖅ ᐃᒡᓗᓕᒻᒥᐅᓄᑦ 9ᓂᑦ ᐊᕐᕌᒍᓂᑦ, ᐊᒻᒪᓗ ᐃᔅᓯᕙᐅᑕᕆᔭᐅᓚᐅᕐᓯᒪᔪᖅ ᕿᑭᖅᑖᓗᒃ ᑯᐊᐳᕇᓴᒃᑯᓐᓂᑦ.

ᔪᐊᔾ ᐱᒃᑯᒍᓱᑦᑐᖅ ᐅᖃᕆᐊᔅᓴᖅ 18ᓂᑦ ᐃᕐᖑᑕᖃᕋᒥ ᐊᒻᒪᓗ 5ᓂᑦ ᐃᓗᓕᖃᕋᒥ.

ᑭᐊᕋᓐ ᕙᓚᕋᑎ, ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ

ᑭᐊᕋᓐ ᕿᑭᖅᑕᓂᒃᑯᓐᓄᑦ ᐃᖅᑲᓇᐃᔭᖃᑕᐅᓯᔪᔪᖅ ᕖᕝᕗᐊᓕ 2022ᖑᑎᓪᓗᒍ. ᐃᖅᑲᓇᐃᔮᖃᕋᑖᔪᔪᖅ ᐃᑲᔪᖅᑎᐅᓂᕐᒥᒃ ᑐᑭᒧᐊᑦᑎᑦᑎᔨᖓᓐᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᓄᓇᕗᑦ ᑐᙵᕕᒃᑯᓐᓂᑦ, ᐊᒻᒪᓗ ᐊᐅᓚᑦᑎᔨᐅᓂᕐᒥᒃ ᑐᓴᐅᒪᖃᑦᑕᐅᑎᓂᕐᒧᑦ, ᐃᓕᓐᓂᐊᕐᓂᓕᕆᓂᕐᒧᑦ ᑐᑭᓯᐅᒪᑎᑦᑎᒋᐊᖃᑦᑕᓂᕐᒧᓪᓗ ᓄᓇᕗᑦ ᒐᕙᒪᒃᑯᖏᓐᓂᑦ. ᑭᐊᕋᓐ ᐃᓕᓐᓂᐊᖃᑕᐅᓂᑯ ᐊᒻᒪᓗ ᑲᑎᒪᔨᐅᖃᑕᐅᓪᓗᓂ ᐊᕕᑦᑐᕐᓯᒪᓂᐅᔪᓂᑦ ᐃᔅᓯᕙᐅᑕᐅᖃᑕᐅᓪᓗᓂ ᓄᓇᕗᒥ 2022ᒥ ᑯᐃᓐ ᑭᒡᒐᑐᖅᑎᖓᑕ ᑲᓇᑕᒥ ᓯᕗᓕᖅᑎᐅᓂᕐᒧᑦ ᑲᑎᒪᔨᓄᑦ

ᕆᑦᓱᑦ ᐸᐃᑕᓐ, ᑐᑭᒧᐊᑦᑎᑦᑎᔨᓪᓗᐊᑕᖅ ᐱᓕᕆᐊᔅᓴᓄᑦ

ᕆᑦᓱᑦ ᐊᐅᓪᓛᕋᑖᔪᔪᖅ ᑐᑭᒧᐊᑦᑎᑦᑎᔨᓪᓗᐊᑕᐅᓂᕐᒧᑦ ᐱᓕᕆᐊᔅᓴᓄᑦ ᐃᖅᑲᓇᐃᔮᖃᓕᖅᑐᓂ ᕿᑭᖅᑕᓂᒃᑯᓐᓂ. ᕆᑦᓱᑦ ᐃᖅᑲᓇᐃᔭᖃᑕᐅᓯᓚᐅᕐᓯᒪᔪᖅ ᕿᑭᖅᑕᓂᒃᑯᓐᓂᑦ ᔪᓚᐃ 2020ᑎᓪᓗᒍ. ᕆᑦᓱᑦ ᑐᓴᐅᒪᑎᑦᑎᔨᐅᖃᑦᑕᕐᓯᒪᔪᖅ, ᓯᕗᓕᖅᑎᐅᓯᒪᔪᖅ ᐊᒻᒪᓗ ᑐᑭᒧᐊᒍᑎᔅᓴᓕᕆᖃᑦᑕᕐᓯᒪᔪᖅ ᑕᒪᒃᑯᓂᖓ ᖃᐅᔨᒪᑦᑎᐊᖅᑐᖅ. ᐃᖅᑲᓇᐃᔮᖃᓚᐅᕐᓯᒪᔪᖅ ᐊᐅᓚᑦᑎᔨᓪᓗᐊᑕᐅᓂᕐᒥᒃ ᐃᖅᑲᓇᐃᔮᓂᑦ ᐊᒥᓱᓂᑦ ᐊᓪᓚᕝᕕᐅᔪᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ ᐊᒻᒪᓗ ᐊᐅᓚᑦᑎᔨᒻᒪᕆᐅᓯᒪᔪᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ. ᐱᒃᑯᒍᓱᑦᑎᐊᖅᑐᓂ ᐊᑖᑕᒋᔭᐅᔪᖅ 5ᓄᑦ ᐃᕐᓂᖏᓐᓄᑦ ᐊᒻᒪᓗ ᖁᕕᐊᒋᔭᖃᓪᓚᕆᑦᑐᓂ ᐊᑲᕐᕆᔾᔪᑕᐅᕙᓕᖅᑐᓂᑦ ᐅᓪᓗᒥ.

ᐋᑕᓖᓐ ᓵᓚᒨᓂ, ᑐᑭᒧᐊᑦᑎᑦᑎᔨ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᒧᓪᓗ

ᐋᑕᓖᓐ ᐃᖅᑲᓇᐃᔭᖃᑕᐅᓯᕋᑖᑦᑎᐊᔪᔪᖅ ᕿᑭᖅᑕᓂᒃᑯᓐᓂ ᒫᑦᓯ 7, 2022ᖑᑎᓪᓗᒍ. ᐋᑕᓖᓐ ᐊᐅᓚᑦᑎᔨᐅᓂᕐᒥᒃ ᐃᖅᑲᓇᐃᔮᖃᕐᐸᓪᓕᐊᓯᒪᔪᖅ ᐊᒻᒪᓗ ᐊᒥᓱᓂᑦ ᐃᖅᑲᓇᐃᔮᖃᕐᓯᒪᓪᓗᓂ ᓄᓇᕗᑦ ᒐᕙᒪᒃᑯᖏᓐᓂᑦ, ᓲᕐᓗ ᑐᑭᒧᐊᑦᑎᑦᑎᔨᐅᓂᕐᒥᒃ ᐃᖅᑲᓇᐃᔭᖅᑐᓕᕆᔨᓄᑦ, ᐊᐅᓚᑦᑎᔨᐅᓂᕐᒥᒃ ᑭᒃᑯᑐᐃᓐᓇᕐᓄᑦ ᐱᔨᑦᑎᕋᕐᓂᕐᒧᑦ ᐃᓕᓐᓂᐊᕈᑕᐅᕙᑦᑐᒥ, ᐊᐅᓚᑦᑎᔨᐅᓂᕐᒥᒃ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᐱᓇᓱᐊᕈᑕᐅᕙᑦᑐᓂᑦ ᐊᒻᒪᓗ ᓯᕗᓕᖅᑎᒃᓴᓄᑦ ᑐᑭᒧᐊᑦᑎᑦᑎᔨᐅᓂᕐᒥᒃ. ᐋᑕᓖᓐ ᐱᔭᕇᕐᓯᓯᒪᔪᖅ HᐃᕗᓕᖅᑎᒃHᐊᓄᑦ ᓯᕗᓕᖅᑎᐅᓂᕐᒥᒃ ᐃᓕᓐᓂᐊᓂᕐᒥᒃ ᐱᓇᓱᐊᒃᑲᓐᓂᖃᑦᑕᕈᓐᓇᖅᑐᓂ ᑖᓪHᐊᐅᓯ ᓯᓚᑦᑐᓴᕐᕕᔾᔪᐊᕐᒥ ᐊᒻᒪᓗ ᑲᔪᓯᑎᑦᑎᓪᓗᓂ ᐃᖅᑲᓇᐃᔮᕆᕙᑦᑕᖏᓐᓂᒃ ᐱᕙᓪᓕᐊᑎᑦᑎᓂᕐᒥᒃ ᑭᒃᑯᑐᐃᓐᓇᕐᓄᑦ ᐊᐅᓚᑦᑎᔾᔪᑎᓕᕆᓂᕐᒥᒃ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑕᖏᓐᓂᒃ.

ᕗᔨᓐᓂᐊ ᒥᐅᓐᔅ, ᑐᑭᒧᐊᑦᑎᑦᑎᔨᓪᓗᐊᑕᖅ ᐃᓄᓐᓅᖓᔪᓂᑦ    

ᕗᔨᓐᓂᐊ ᐃᖅᑲᓇᐃᔭᖃᑕᐅᓯᔪᔪᖅ ᒫᑦᓯ 22, 2022ᖑᑎᓪᓗᒍ. ᐃᖅᑲᓇᐃᔮᖃᕋᑖᓚᐅᖅᑐᖅ ᓄᓇᕗᑦ ᒐᕙᒪᒃᑯᓐᓂᑦ, ᐊᒥᓱᓂᑦ ᓯᕗᓕᖅᑎᐅᓂᕐᒥᑦ ᐃᖅᑲᓇᐃᔮᖃᖃᑦᑕᔪᔪᖅ ᐊᕐᕌᒍᓂᑦ ᐊᒥᓱᓂᑦ ᐊᓂᒍᖅᑐᓂᑦ. ᓄᓇᕗᑦ ᒐᕙᒪᒃᑯᖏᓐᓄᑦ ᐃᖅᑲᓇᐃᔭᕆᐊᓯᓚᐅᕋᓂ, ᕗᔨᐊᓐᓂ ᐃᖅᑲᓇᐃᔭᓚᐅᕐᓯᒪᔪᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ 11ᓂᑦ ᐊᕐᕌᒍᓂᑦ. ᕗᔨᓐᓂᐊ ᐃᖅᑲᓇᐃᔮᕆᓯᒪᔭᖏᑦ ᒪᑯᐊ ᒥᔅᓵᓅᖓᖃᑦᑕᕐᓯᒪᔪᑦ ᐃᓅᓯᓕᕆᓂᕐᒥ ᐃᓕᖅᑯᓯᓕᕆᓂᕐᒥᓪᓗ ᐊᓪᓚᕕᒻᒥ ᓄᓇᕗᑦ ᑐᙵᕕᒃᑯᓐᓂᑦ, ᐊᒻᒪᓗ ᑐᑭᒧᐊᒍᑎᔅᓴᓂᑦ ᐸᕐᓇᐃᓂᕐᒥᒃ ᐊᓪᓚᕝᕕᖓᓐᓂ ᒐᕙᒪᓕᕆᔨᒃᑯᑦ.

“ᐱᒃᑯᒍᓱᓪᓚᕆᑦᑐᖓ ᓇᓗᓇᐃᕐᓯᔭᕆᐊᔅᓴᖅ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᑖᕐᓯᒪᒻᒪᑕ ᐱᓕᕆᑦᑎᐊᒃᑳᓗᓐᓂᑦ ᐃᓄᓐᓂᑦ ᓯᕗᓕᖅᑎᓂᑦ ᓯᕕᑐᔪᒨᖓᔪᓂᑦ ᓈᒪᑦᑎᐊᖅᑐᓂᑦ ᐊᑐᕐᓯᒪᔪᓂᑦ ᐊᔾᔨᒌᙱᑐᒡᒍᑎᓂᑦ ᐃᖅᑲᓇᐃᔭᕐᕕᐅᕙᑦᑐᓄᑦ ᓄᓇᕗᒥ. ᓇᓗᖅᑯᑎᙱᑎᐊᖅᑐᖓ ᐊᑐᓂᑦ ᑖᒃᑯᐊ ᐊᑑᑎᓕᒻᒥᒃ ᐃᑲᔫᑎᖃᕐᓂᐊᒥᒻᒪᑕ ᕿᑭᖅᑕᓂᒃᑯᑦ ᐱᓇᓱᐊᒐᖏᓐᓄᑦ ᐊᒻᒪᓗ ᓯᕗᓪᓕᐸᐅᑦᑎᐅᑎᒍᓯᒪᔭᖏᓐᓄᑦ ᑲᒪᒋᔭᖏᓐᓄᑦ.” ᐅᖃᖅᑐᖅ ᐊᖏᔪᖅᑳᖅ ᕿᑭᖅᑕᓂᒃᑯᓐᓄ ᐅᓛᔪᒃ ᐊᑭᓱᒃ.

ᑖᒃᑯᐊ ᐃᖅᑲᓇᐃᔭᖅᑎᓂᑦ ᐊᓯᔾᔨᕋᑖᕐᓯᒪᔪᑦ ᐱᓪᓗᒋᑦ, ᕿᑭᖅᑕᓂᒃᑯᑦ ᒫᓐᓇ ᐃᖅᑲᓇᐃᔭᖅᑎᑖᕈᒪᔪᑦ ᑐᑭᒧᐊᑦᑎᑦᑎᔨᐅᓂᐊᖅᑐᒥᒃ ᐃᓄᐃᑦ ᖃᐅᔨᒪᔭᑐᖃᖏᓐᓅᖓᔪᓂᑦ ᐃᓚᒋᔭᐅᑎᑦᑎᖃᑦᑕᓂᕐᒨᖓᔪᓄᓪᓗ.