ᑖᒃᑯᐊ ᓈᓚᐅᑎᒃᑯᑦ ᐅᖃᐅᓯᐅᖃᑦᑕᓂᐊᖅᑐᑦ ᑐᓂᔭᐅᓯᒪᔪᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᑦᑎᓐᓄᑦ ᐊᒻᒪᓗ ᓄᓇᓕᓐᓂᑦ ᑲᑎᒪᔨᑦᑎᓐᓄᑦ ᐅᖃᐅᓯᐅᖃᑦᑕᓂᐊᕐᖓᑕ ᓄᓇᓖᑦ ᓈᓚᐅᑎᖃᕐᕕᖏᑎᒍᑦ.

ᑐᑭᓯᑎᑦᑎᒋᐊᕈᑎᓖᑦ ᓄᓇᕗᒧᑦ ᐱᔾᔪᑎᒋᓪᓗᒍ ᐳᕝᕕᕆᓇᖅᑐᖅ COVID-19 ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᔪᖅ

 

ᐊᐃᖓᐃ ᐃᓘᓐᓇᓯ,

ᐅᕙᖓ ᓄᓇᑦᑎᓐᓂ ᑲᑎᒪᔨᐅᔪᖓ/ᓄᓇᑦᑎᓐᓂ ᑐᓴᐅᒪᑎᑦᑎᔨᐅᔪᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐅᖃᐅᑎᔪᒪᓪᓗᓯ ᖃᓄᖅᑑᕈᑕᐅᔪᑦ ᒥᔅᓵᓄᑦ ᓄᓇᕗᒥ ᐃᑲᔫᑎᖃᕐᓂᐊᕐᖓᑕ ᐸᓚᕐᔫᒥᑎᑦᑎᒋᐊᕐᓂᕐᒥᒃ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ ᐅᕝᕙᓘᓐᓃᑦ ᐳᕝᕕᕆᓇᖅᑐᖅ−19 ᓄᓇᕐᔪᐊᓕᒫᒥ ᓯᐊᒻᒪᐸᓪᓕᐊᔪᖅ.

ᐅᓪᓗᒥᒧᑦ ᑎᑭᑦᑐᒍ ᖃᐅᔨᔭᐅᔪᖃᕐᓯᒪᙱᑦᑐᖅ ᐳᕝᕕᕆᓇᖅᑐᒧᑦ−19 ᓄᓇᕗᒥ

ᐃᓄᓕᒫᓄᑦ ᐋᓐᓂᐊᖅᑐᓕᕆᔩᑦ ᓄᓇᕗᒥ ᑐᓴᐅᒪᐃᓐᓇᕋᓱᒻᒪᑕ ᑕᒫᓂ 111ᖏᓐᓃᑦᑐᓂᑦ ᖃᐅᔨᓴᖅᑕᐅᔪᓂᑦ ᐳᕝᕕᕆᓇᖅᑐᖃᕐᒪᖔᑕ COVID-19. 43 ᑭᒃᑯᑐᐃᓐᓇᐃᑦ ᒫᓐᓇ ᖃᐅᔨᓴᖅᑕᐅᓯᒪᔪᑦ ᖃᐅᔨᕕᐅᓯᒪᙱᑦᑐᑦ.

ᐃᑲᔪᖁᓪᓗᑕ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ COVID-19 ᓄᓇᕗᑦ ᐊᑐᓕᕐᖓᑦ ᐸᓚᕐᔫᒥᑎᑦᑎᒋᐊᕈᑎᔅᓴᓂᑦ.

ᐃᓘᓐᓇᑎᒃ ᐃᓄᓕᒫᓂᑦ ᑲᑎᒪᓂᐅᕙᑦᑐᑦ ᓄᖅᑲᖅᑎᑕᐅᕗᑦ ᓄᓇᕗᒥ.

ᐱᒋᐊᕐᓗᑎᒃ ᐊᐃᑉᐱᕐᒥ, ᒫᑦᓯ 24 11:59ᒥ ᐅᓐᓄᒃᑯᑦ ᓄᓇᕗᒻᒥᐅᑕᑐᐊᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐊᑑᑎᖃᓪᓚᕆᓐᓂᖏᑦ ᐃᓯᕈᓐᓇᖅᑎᑕᑑᓂᐊᓕᖅᑐᑦ ᓄᓇᕗᒻᒧᑦ.

ᓄᓇᓖᑦ ᑕᑯᑎᑦᑎᖃᑦᑕᕆᐊᖃᕐᓂᐊᖅᑐᑦ ᑕᒫᓂᒥᐅᑕᐅᓂᖏᓐᓂᒃ ᖃᖓᑕᓲᒃᑰᕈᓐᓇᕐᓯᑎᑕᐅᓚᐅᙱᓐᓂᖏᓐᓂ ᓄᓇᕗᓕᐊᖅᑐᓄᑦ.

ᖃᖓᑕᓲᕐᒧᑦ ᐃᑭᓚᐅᙱᓂᔅᓯᓐᓂ ᑕᒪᐅᖓ ᓄᓇᕗᓕᐊᖅᑐᒧᑦ, ᐊᑐᖅᑕᐅᓴᐃᓐᓇᕆᐊᓕᒻᒥᒃ ᐊᑐᕆᐊᖃᕋᔭᖅᑐᑎᑦ 14ᓂᑦ−ᐅᓪᓗᓂᑦ ᐊᓂᑦᑕᐃᓕᑲᐃᓐᓇᕆᐊᖃᕋᔭᖅᑐᑦ ᑖᒃᑯᓂᖓ ᓇᓕᑐᐃᓐᓇᖏᓐᓂ ᐋᑐᕚ, ᐅᐃᓂᐸᒡ, ᐃᑦᒪᓐᑕᓐ ᐅᕝᕙᓘᓐᓃᑦ ᔨᐊᓗᓇᐃᕝ.

14 ᐅᓪᓗᐃᑦ ᓈᑉᐸᑕ ᐊᓂᑦᑕᐃᓕᑲᐃᓐᓇᓚᐅᖅᑎᓪᓗᒋᑦ, ᑭᒃᑯᑐᐃᓐᓇᐃᑦ ᖃᓄᐃᒍᑎᖃᖅᑑᔮᙱᑦᑐᑦ ᐊᒻᒪᓗ ᐱᒡᒐᖏᑦᑐᑦ ᐅᑎᕋᔭᖅᑐᑦ ᓄᓇᖏᓐᓄᑦ. ᑖᓐᓇ ᐱᖃᓯᐅᔾᔨᔪᖅ ᐋᓐᓂᐊᕕᓕᐊᕐᓯᒪᓪᓗᑎᒃ ᐊᐅᓪᓚᕐᓯᒪᔪᓄᑦ.

ᐃᖅᑲᓇᐃᔭᖅᑏᑦ ᐊᑑᑎᖃᓗᐊᖅᑐᓄᑦ ᑎᑎᕋᕐᓯᒪᔪᒥᒃ ᐊᖏᖅᑕᐅᓯᒪᔭᕆᐊᓖᑦ ᓄᓇᕗᒥ ᐃᓱᒪᑕᖓᓐᓄᑦ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᓐᓄᑦ ᐊᐅᓪᓚᕈᓐᓇᕐᓂᕋᕐᓗᒍ ᑕᒪᐅᖓ ᓄᓇᕗᒻᒧᑦ.

ᐃᖅᑲᓇᐃᔭᖅᑏᑦ ᐊᑑᑎᖃᓗᐊᖅᑐᓄᑦ ᐅᑎᕐᐸᓪᓕᐊᔪᑦ ᐊᓯᖏᓐᓂᑦ ᐊᐅᓚᑦᑎᕕᓐᓃᙶᖅᑐᑦ ᑲᓇᑕᒥ ᖃᓄᐃᒍᑎᖃᖅᑑᔮᙱᑦᑐᑦ ᐊᒻᒪᓗ ᐊᐅᓪᓚᕈᓐᓇᕐᓂᕋᖅᑕᐅᓯᒪᔪᑦ ᐃᖅᑲᓇᐃᔭᕆᐊᕈᓐᓇᖅᑎᑕᐅᖃᑦᑕᓂᐊᖅᑐᑦ ᐊᒻᒪᓗ ᐊᐅᓪᓚᖃᑦᑕᕐᓗᑎᒃ ᓄᓇᓕᓐᓄᑦ ᐊᖏᖅᑕᐅᓯᒪᓗᑎᒃ ᓄᓇᕗᒥ ᐋᓐᓂᐊᑐᓕᕆᔨᓄᑦ.

ᓇᓕᑐᐃᓐᓇᖏᑦ ᐃᖅᑲᓇᐃᔭᖅᑎᒋᔭᐅᔪᑦ ᐊᑑᑎᖃᓗᐊᖅᑐᓄᑦ ᑲᓇᑕᐅᑉ ᓯᓚᑖᓃᙶᖅᑐᑦ ᐊᓂᑦᑕᐃᓕᑲᐃᓐᓇᕆᐊᓖᑦ ᐅᓪᓗᓂᑦ 14ᓂᑦ ᓄᓇᕗᓕᐊᓚᐅᙱᓐᓂᖏᓐᓂ.

ᓄᓇᕗᒥ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑏᑦ ᐊᒻᒪᓗ ᐃᓚᖏᑦ ᒫᓐᓇ ᐃᓕᓐᓂᐊᖅᑐᑦ ᓄᓇᕗᑦ ᓯᓚᑖᓂ ᐅᓪᓗᓂᑦ−14ᓂᑦ ᐊᓂᑦᑕᐃᓕᑲᐃᓐᓇᕆᐊᓖᑦ ᐋᑐᕚᒥ ᐅᕝᕙᓘᓐᓃᑦ ᐅᓂᐃᐸᒡᒥ.

ᐅᓪᓗᐃᑦ−14 ᐊᓂᒍᖅᑲᑕ ᐊᓂᑦᑕᐃᓕᓚᐅᖅᑎᓪᓗᒋᑦ, ᐃᓕᓐᓂᐊᖅᑏᑦ ᐊᐅᓪᓚᕈᔾᔭᐅᒐᔭᖅᑐᑦ ᓄᓇᖏᓐᓄᑦ. ᑖᒃᑯᐊ ᐃᓕᓐᓂᐊᖅᑏᑦ ᐅᖃᕐᕕᐅᓯᒪᔪᑦ ᐊᒻᒪᓗ ᐸᕐᓇᑦᑐᑎᒃ ᐊᓂᑦᑕᐃᓕᓯᒪᑲᐃᓐᓇᕆᐊᖃᕐᓂᐊᕐᓂᖏᓐᓄᑦ.

ᑐᔪᕐᒥᕕᔅᓴᖏᑦ, ᓂᕆᖃᑦᑕᓂᐊᖅᑕᖏᑦ ᐊᑐᕆᐊᖃᖅᑕᖏᓪᓗ ᐃᓘᓐᓇᑎᒃ ᐊᐅᓪᓚᕐᓯᒪᔪᑦ ᐊᑐᐃᓐᓇᖃᖅᑎᑕᐅᓂᐊᖅᑐᑦ ᐊᓂᑦᑕᐃᓕᓂᖏᓐᓂ.

ᐃᖅᑲᐅᒪᓂᐊᖅᑯᓯ, ᓴᐳᔾᔨᓯᒪᑦᑎᐊᓂᕐᐹᖑᔪᓐᓇᖅᑐᓯ ᓄᓇᖅᑲᑎᔅᓯᓐᓂᒃ, ᐃᓄᑐᖃᑦᑎᓐᓂᒃ ᐊᒻᒪᓗ ᐃᓕᔅᓯᓐᓂᒃ ᓇᒻᒥᓂᖅ ᐊᖏᕐᕋᕐᓯᒪᑐᐃᓐᓇᕐᓗᓯ ᐊᒻᒪᓗ ᖃᓂᔅᓴᓗᐊᖅᑕᐃᓕᓗᓯ ᐃᓅᖃᑎᔅᓯᓐᓂᒃ.

ᑕᐃᒫᒃ ᓇᓗᓇᐃᕐᓯᔪᒐᑦᑕ ᐱᓇᓱᐊᕈᓯᐅᓚᐅᖅᑐᒥ, ᕿᑭᖅᑕᓂᒃᑯᑦ ᐊᑐᓕᖅᑎᑦᑎᓯᒪᔪᑦ ᐃᖅᑲᓇᐃᔭᖅᑎᑦᑎᓂᕐᒥᒃ−ᐊᖏᕐᓯᒪᓗᑎᒃ ᑕᐃᒫᒃ ᐊᐅᓚᔾᔪᓯᖃᑲᐃᓐᓇᖅᑐᑦ.

ᐊᓪᓚᕝᕕᕗᑦ ᒪᑐᓯᒪᔪᖅ ᑐᑭᓯᑎᑕᐅᓇᓱᓐᓂᑎᓐᓂᒃ ᖃᓄᐃᓕᖓᓂᐊᕐᒪᖔᑦᑕ.

ᐃᑲᔪᖅᑕᐅᔭᕆᐊᖃᕈᔅᓯ ᐃᑲᔫᑕᐅᕙᑦᑐᓄᑦ ᐊᑑᑎᖃᓗᐊᖅᑐᓄᑦ ᐅᕙᑦᑎᓐᓄᑦ ᐅᖄᓚᖃᑦᑕᕈᓐᓇᖅᑐᓯ ᐅᕗᖓ 867-975-8400.

 

ᑎᑎᕋᕐᓗᓯᓘᓐᓃᑦ ᖃᕋᓴᐅᔭᒃᑯᑦ ᐃᕐᖐᓈᖅᑕᐅᑖᓄᑦ: info@qia.ca. ᓱᒃᑲᔪᒃᑯᑦ ᓇᔅᓯᐅᔾᔨᔪᓐᓇᕐᒥᔪᓯ ᐅᕗᖓ: 867-979-3238.

ᐃᓘᓐᓇᑎᒃ ᕿᑭᖅᑕᓂᒃᑯᑦ ᐱᓕᕆᐊᕆᕙᑦᑕᖏᑦ ᓄᖅᑲᖓᑎᑕᐅᑲᐃᓐᓇᖅᑐᑦ ᑐᑭᓯᑎᑕᐅᓇᓱᓐᓂᖏᓐᓂ ᖃᓄᐃᓕᖓᓂᐊᕐᒪᖔᑕ.

ᕿᑭᖅᑕᓂᒃᑯᑦ ᑎᓕᐅᕆᔪᑦ ᑭᓇᑐᐃᓐᓇᕐᒥᒃ ᐱᓕᕆᐊᔅᓴᖓᓐᓄᑦ ᑮᓇᐅᔭᖅᑖᖅᑎᑕᐅᓯᒪᔪᒥᒃ ᐅᕙᑦᑎᓐᓂᒃ ᓄᖅᑲᖓᑎᑦᑎᑲᐃᓐᓇᖁᓪᓗᒋᑦ ᐱᓕᕆᐊᔅᓴᖓᓐᓂᒃ ᐃᑲᔪᕐᓗᑎᒃ ᓯᐊᒻᒪᑎᑦᑎᑦᑕᐃᓕᓂᕐᒥᒃ ᐳᕝᕕᕆᓇᖅᑐᒥᒃ COVID-19.

ᐋᖅᑭᓯᒪᕕᖏᑦ ᐅᖓᕙᕆᐊᖅᑕᐅᓯᒪᓂᐊᖅᑐᑦ ᑕᐃᒫᒃ ᐱᓕᕆᐊᖃᕈᓐᓇᓛᕋᔅᓯ ᓯᕗᓂᔅᓴᑎᓐᓂ.

ᕿᑭᖅᑕᓂᒃᑯᑦ ᐃᓚᒋᔭᐅᒻᒥᔪᑦ ᐋᓐᓂᐊᖅᑐᓕᕆᔨᓂᑦ ᑎᓕᐅᕆᓪᓗᑎᒃ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ ᓴᐳᔾᔨᓯᒪᖁᓪᓗᓯ ᓇᒻᒥᓂᖅ ᐃᓕᔅᓯᓐᓂᒃ ᐊᒻᒪᓗ ᓄᓇᖅᑲᑎᔅᓯᓐᓂᒃ.

ᐊᑲᐅᓂᕐᐹᖑᓂᐊᖅᑐᖅ ᓯᐊᒻᒪᑎᑦᑎᑦᑕᐃᓕᓂᕐᒥᒃ ᐳᕝᕕᕆᓇᖅᑐᒥᒃ COVID-19 ᒪᑯᓂᖓ ᐊᑐᖃᑦᑕᕐᓗᓯ:

• ᐅᐊᓴᖃᑦᑕᕐᓗᒋᑦ ᐊᒡᒐᓯ ᐅᐊᓴᕐᔫᒥᔭᒐᓪᓗᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ
• ᐊᑦᑐᐊᑲᑕᑦᑕᐃᓕᓗᒋᑦ ᑮᓇᓯ, ᐱᓗᐊᖅᑐᒥᑦ ᐃᔨᓯ ᓱᕐᓗᓯ ᖃᓂᓯᓗ
• ᐊᑐᕐᔫᒥᓇᓱᓪᓗᓯ ᖃᓂᔅᓴᓗᐊᖅᑕᐃᓕᓂᕐᒥᒃ ᐃᓅᖃᑎᔅᓯᓐᓂᒃ
  • ᐃᒫᒃ ᑐᑭᓕᒃ ᑲᑎᕈᓘᔭᖅᑕᐃᓕᑲᐃᓐᓇᕐᓗᓯ
  • ᐃᖅᑲᓇᐃᔭᕐᓗᓯ ᐊᖏᕋᕐᓯᒪᓗᓯ ᐊᔪᕐᓇᖏᑉᐸᑦ

ᑐᙵᓇᕐᓗᓯ ᐊᒻᒪᓗ ᖃᐅᔨᒋᐊᕐᔫᒥᖃᑦᑕᕐᓗᒋᑦ ᐃᓄᑐᖃᐃᑦ ᐅᕝᕙᓘᓐᓃᑦ ᐃᓱᒫᓗᓇᓗᐊᕐᓂᖏᑦ ᐱᖃᑎᓯ ᐅᕝᕙᓘᓐᓃᑦ ᐃᓚᓯ ᐃᑲᔪᖅᑕᐅᔭᕆᐊᖃᕋᔭᖅᑑᔮᖅᑐᑦ. ᐅᖄᓚᕕᒋᖃᑦᑕᕐᓗᒋᑦ ᐅᕝᕙᓘᓐᓃᑦ ᓂᕆᔭᔅᓴᓂᑦ ᒪᑐᖓᑕ ᑎᒍᓕᖓᓄᑦ ᐃᓕᓯᖃᑦᑕᕐᓗᓯ ᑭᓯᐊᓂ ᐳᓛᖅᑕᐃᓕᓗᓯ.

ᐳᐃᒍᖅᑕᐃᓕᒋᔅᓯ ᐊᓂᑦᑕᐃᓕᑲᐃᓐᓇᕆᐊᖃᕐᓂᕐᒥᒃ ᖃᓄᐃᒍᑎᖃᖅᑑᔮᕈᔅᓯ ᖃᓄᐃᒍᑕᐅᕙᑦᑐᓂ ᐳᕝᕕᕆᓇᖅᑐᒧᑦ COVID-19.

ᑕᒪᒃᑯᐊ ᖃᓄᐃᒍᑕᐅᕙᑦᑐᑦ ᐃᒪᐃᑦᑑᒻᒪᑕ ᐆᓇᕐᓂᖅ ᐆᓐᓂᐊᓇᕐᓗᑎᑦ, ᖁᐃᕐᓱᑲᑕᓐᓂᖅ ᐅᕝᕙᓘᓐᓃᑦ ᐃᐱᓂᐊᕐᓂᖅ.

 ᖃᓄᐃᓐᓂᕐᓂᒃ ᐱᓕᐅᒥᒍᕕᑦ ᐅᖄᓚᒐᔭᖅᑯᑎᑦ ᐋᓐᓂᐊᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓖᑦ ᐅᖄᓚᓚᐅᙱᓪᓗᑎᑦ.

ᖃᐅᔨᒪᔪᖓ ᒫᓐᓇ ᐱᔭᕆᐊᑐᔪᐊᓘᒻᒪᑦ, ᑭᓯᐊᓂ ᐃᑲᔪᖅᑎᒌᒃᑯᑦᑕ; ᓴᐳᔾᔨᒍᓐᓇᕐᓂᐊᕋᑦᑕ ᓄᓇᖅᑲᑎᑦᑎᓐᓂᒃ.

 ᖃᐅᔨᒋᐊᖃᑦᑕᕆᔅᓯ ᐅᕙᒍᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓂᒃ ᐅᕗᖓ qia.ca ᑐᑭᓯᒋᐊᒃᑲᓐᓂᕈᒪᒍᔅᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᑕᑯᔪᓐᓇᕐᒥᔪᓯ ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᑐᑭᓯᑎᑦᑎᒋᐊᕈᑕᐅᓯᒪᔪᓂᓪᓗ ᖃᕋᓴᐅᔭᒃᑯᑦ ᐃᑭᐊᖅᑭᕕᑦᑎᓐᓂ ᐅᑯᓇᓂ ᕙᐃᔅᐳᒃ, ᑐᐃᑐ ᐊᒻᒪᓗ ᐊᔾᔨᙳᐊᓕᕆᔾᔪᑦ Instagram.

ᖁᔭᓐᓇᒦᓪᓚᕆᒃ ᐱᕕᖃᖅᑎᑕᐅᑲᐃᓐᓇᕋᒪ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᙱᑦᑎᐊᖁᓇᖅᑯᓯᓗ.