ᐅᓂᒃᑳᕐᕕᒋᓂᐊᖅᑕᑦᓯ ᐱᔾᔪᑎᒋᓪᓗᒍ ᐱᔭᕇᖅᓯᑦᑎᐊᕈᓐᓇᖅᑐᒍᑦ ᑲᑐᔾᔨᓗᑕ ᑕᒪᑦᑕ ᓴᓇᒍᑦᑕ. ᑲᓇᑕ ᐱᓕᕆᕗᖅ ᑕᒪᐃᓄᓕᒫᖅ ᒐᕙᒪᓄᑦ ᐊᑕᔪᓄᑦ ᐱᒋᐊᕈᑎᓂᒃ ᐊᒻᒪᓗ ᐃᑲᔪᖃᑎᒌᑦᑐᑦ ᐱᓇᓱᐊᖃᑎᒌᑦᑎᐊᖅᑐᑦ ᐃᓄᖕᓂᒃ ᐱᓪᓗᒍ ᓴᐃᒻᒪᖃᑎᒌᑦᑎᐊᕐᓂᖅ. ᑲᑐᔾᔨᓪᓗᑕ ᓴᐳᒻᒥᕗᒍᑦ ᐊᕙᑎᑦᑎᓐᓂᒃ, ᐊᒻᒪᓗ ᐋᕿᒃᓱᐃᔪᒍᑦ ᑭᓱᓕᕆᕕᒋᓂᐊᖅᑕᑦᑎᓐᓂᒃ ᑲᔪᓰᓐᓇᕐᓂᐊᖅᑐᓄᑦ ᑲᒻᐸᓂᐅᔪᑦ ᐊᒻᒪᓗ ᐱᐅᖅᓱᐊᕐᓂᒃᑯᑦ ᒪᑭᒪᔾᔪᑕᐅᔪᓐᓇᖅᑐᓂᒃ. ᓇᐃᓈᕐᓗᒍ ᐅᖃᕈᓐᓇᖅᑐᖓ, ᓴᐳᑎᔪᓐᓇᖅᑕᕗᑦ ᓄᓇᕗᑦ, ᐃᒪᕗᑦ, ᐊᒻᒪᓗ ᐃᓄᖁᑎᕗᑦ.

ᐋᕿᒃᓱᐃᕙᓪᓕᐊᕗᑦ ᓴᕿᑕᐅᖁᓪᓗᒍ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᐃᒪᖏᓐᓂᒃ ᓴᐳᓐᓂᐊᖅᑕᐅᔪᖅ, ᑕᐃᒪᓗ ᐱᓕᕆᐊᕆᔪᒪᓕᓚᐅᖃᑦᑎᒍᑦ, ᐊᒻᒪᓗ ᐋᕿᒃᓯᓚᐅᖅᑐᒍᑦ  ᐃᓱᒪᔪᒪᓪᓗᑕ ᓯᓚᑖᒎᑦ ᖃᓄᑐᐃᓐᓇᖅ.

ᑭᓯᐊᓂ ᓯᕗᓪᓕᖅᐹᒥᒃ, ᓴᕿᑎᑦᑎᐊᕐᓚᒍ ᓄᓇᖓᑦ. ᑕᓪᓕᒪᑦ ᑲᓂᒌᑦ ᖁᑎᒃᑐᕐᒥ ᐅᑭᐅᖅᑕᖅᑐᒥ ᓄᓇᓖᑦ ᓴᓂᐊᓃᑦᑐᓕᒫᑦ ᑕᓪᓗᕈᑎᐅᑉ ᐃᒪᖓᑕ. ᖃᐅᓱᐃᑦᑐᖅ, ᐊᐅᓱᐃᑦᑐᖅ, ᐃᒃᐱᐊᕐᔪᒃ, ᒥᑦᑎᒪᑕᓕᒃ ᐊᒻᒪᓗ ᑲᖏᖅᖢᒑᐱᒃ. ᖃᓂᒋᔮᓂ 4,000 ᐃᓄᐃᑦ ᓄᓇᖃᖅᑐᑦ ᑖᒃᑯᓇᓂ ᓄᓇᓕᖕᓂ, 94% ᐃᓄᐃᑦ. ᐃᓄᖏᑦ ᑖᒃᑯᐊ ᓄᓇᓖᑦ ᓴᓇᕙᒃᑐᖅ ᐊᒃᓱᕈᖅᖢᑎᒃ, ᐊᖕᖏᔪᒥᒃ ᐆᒻᒪᑎᖃᖅᑐᑦ ᐊᒻᒪᓗ ᓴᐱᓕᔾᔮᓐᖏᑦᑐᑦ – ᖃᐅᔨᒪᔪᖓ ᐱᔾᔪᑎᒋᓪᓗᒍ ᐃᓚᒃᑲᑦᑕᐅᖅ ᑕᐃᑲᓃᖃᑕᐅᖕᒪᑕ.

ᑕᒪᑦᓯᑎᐊᐸᓗᒃ ᑕᑯᔭᕆᐅᕐᓗᓯᐅᒃ ᐳᓛᓚᐅᖅᓯᒪᓐᖏᑕᓯ ᐃᓄᐃᑦ ᓄᓇᖓ ᐅᒡᕙᓘᓐᓃᑦ ᑕᓪᓗᕈᑎᐅᑉ ᐃᒪᖓ. ᑲᔾᔮᕐᓇᖅᑐᒻᒪᕆᐋᓗᒃ ᓄᓇᖓᑦ ᐊᕙᓗᔭᐅᓯᒪᔪᑦ ᐊᖕᖏᓂᖅᐹᒥᒃ ᐃᒪᕐᒥᒃ, ᐊᒥᓱᓂᒃ ᖃᓄᕆᑦᑐᑐᐃᓐᓇᓂᒃ ᓂᕐᔪᑎᖃᖅᑐᖅ – ᑕᐃᔭᐅᕙᖕᒪᑦ ᑕᒪᓐᓇ ᐅᑭᐅᖅᑕᖅᑐᖅ ᓄᓇᑐᐃᓈᓗᒃ. ᐊᔾᔨᐅᓐᖏᓐᓂᖅᐹᓂᒃ ᐊᓯᐊᓂ ᐆᒪᔪᓐᓇᓐᖏᑦᑐᓂᒃ ᓂᕐᔪᑎᖃᖅᑐᖅ ᐊᕙᑎᓕᒫᖏᓪᓗ ᓄᓇᕐᔪᐊᓕᒫᒥᑦ – ᐃᓅᔪᑦ ᐊᒻᒪᓗ ᐅᐸᒃᑕᐅᕙᒃᑐᖅ ᖃᓂᒋᔮᓂ ᑕᒪᕐᒥᒃ ᐆᒪᔪᓕᒫᑦ ᓇᓂᔭᐅᕙᒃᑐᑦ ᐱᓇᖕᓇᖓᓂ ᐅᑭᐅᖅᑕᖅᑐᖅ. ᓂᕐᔪᑎᑦ ᑕᒫᖔᖅᑐᖅ ᑕᓪᓗᕈᑎᐅᑉ ᐃᒪᖓᓂᑦ ᐃᖏᕐᕋᔪᑦ ᑲᐄᕙᓪᖢᒍ ᓄᓇᕐᔪᐊᖅ, ᑎᑭᐅᑎᖃᑦᑕᖅᑐᑦ ᐅᖓᓯᖕᓂᖅᐹᒧᑦ ᐊᓐᐋᒃᑎᒃ ᐊᕐᕌᒍᑕᒫᑦ. ᑖᒃᑯᐊᑦᑕᐃᓐᓇᐃᑦ ᐆᒪᔪᑦ ᐆᒪᖃᑎᒌᓐᓇᖅᑕᖏᑦ ᓴᓂᐊᓂ ᐃᓄᐃᑦ ᐊᒥᓱᒻᒪᕆᐋᓗᖕᓄᑦ ᐅᑭᐅᓄᑦ ᓂᕿᖃᖅᑎᓪᓗᒋᑦ, ᐊᓐᓄᕌᖃᖅᑎᓪᓗᒋᑦ, ᐊᒻᒪᓗ ᐃᒡᓗᖃᖅᑎᓪᓗᒋᑦ ᕿᑭᖅᑕᓂ ᓄᓇᓖᑦ.

ᑕᐃᒪᖓᓂ 1960-ᓂᑦ, ᐃᓄᐃᑦ ᓄᓇᕘᑉ ᖁᑎᒃᑐᐊᓂ ᐱᓕᕆᓚᐅᖅᑐᑦ ᓴᐳᒻᒥᓪᓗᒍ ᑲᔾᔮᕐᓇᕐᓂᖅᐹᖅ ᐃᒪᖏᑦ ᑕᓪᓗᕈᑎᐅᑉ ᐃᒪᖓᑕ. ᑭᓯᐊᓂ ᓵᑦᑎᓯᒪᑎᑕᐅᓚᐅᖃᑦᑕ ᐊᖕᖏᕈᓐᓇᓐᖏᑦᑐᓂᒃ, ᑐᓗᖅᑕᐅᑎᓂᒃ, ᐊᒻᒪᓗ ᓇᒻᒪᒃᓴᓕᕈᓐᓇᓐᖏᑦᑐᓂᒃ.

ᑭᓯᐊᓂ ᐅᖃᓪᓚᖃᑎᒋᖃᑦᑕᓕᕋᑦᑎᒍᑦ ᒥᓂᔅᑕ ᒥᒃᑭᓇ ᑕᒪᓐᓇ ᑕᑯᔪᒪᓯᒪᔭᕗᑦ ᓴᐳᒻᒥᔭᐅᖁᓪᓗᒋᑦ ᑖᒃᑯᐊ ᐃᒪᐃᑦ ᑕᐃᒪᓐᓇᐃᓕᓪᓚᑖᓕᑕᐃᓐᓇᓚᐅᖅᑐᖅ. ᑕᒪᐅᓐᓇ ᐱᓇᓱᐊᖃᑎᒌᒡᖢᑕ ᐃᑲᔪᖃᑎᒌᒡᖢᑕ ᐊᖏᒡᓕᒋᐊᕈᓐᓇᓚᐅᖅᑐᖅ ᑭᒡᓕᑖᕆᔪᒪᔭᕗᑦ ᑕᓪᓗᕈᑎᐅᑉ ᐃᒪᖓ ᐱᒋᐊᖅᑎᑕᐅᓚᐅᖅᑐᖅ ᒐᕙᒪᐅᓚᐅᖅᑐᓂᑦ. ᐅᑯᐊ ᓄᑖᑦ ᑭᒡᓕᖏᑦ ᐃᒪᐅᑉ ᐃᓱᒪᒋᑐᐃᓐᓇᖅᑕᑦᑎᒍᑦ ᑎᑎᕋᖅᓯᒪᓂᖃᓐᖏᑦᑐᑦ ᓄᓇᓐᖑᐊᕐᑎᒍᑦ. ᐅᑯᐊᓕ ᐋᕿᒃᑕᐅᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᓄᐊᑦᑎᓪᓗᑎᒃ ᐊᒥᓱᓄᑦ ᐅᑭᐅᓄᑦ ᓄᓇᓖᑦ ᐅᖃᖃᑎᒋᓪᓗᒋᑦ ᕿᒥᕐᕈᐊᖃᑎᒋᓪᓗᒋᑦ.

ᐅᑎᕆᐊᑲᓐᓂᒐᓛᒡᓗᖓ, ᓇᓗᓇᐃᑦᑎᐊᕐᓚᒍ ᖃᓄᖅ ᐱᒻᒪᕆᐅᑎᒋᓂᖓ ᐃᒪᕕᒃ ᐃᓄᖕᓄᑦ.  ᓄᓇᕗᑦ ᐅᓇ 43%-ᖑᔪᖅ ᑲᓇᑕᐅᑉ ᓯᒡᔭᖏᓐᓂ – ᐊᒡᕙᓪᓗᐋᖓ.  ᑕᒪᕐᒥᑦᑎᐊᖅ ᕿᑭᖅᑕᓂ ᓄᓇᓖᑦ ᓯᒡᔭᓃᑦᑐᑦ. ᓄᓇᕗᑦ ᐃᓄᖏᑦ ᐃᓅᔪᑦ ᐃᒫᓂ ᑕᐃᒫᑦᑎᐊᖅᑕᐅᖅ ᓄᓇᒥ. ᓱᓕᕗᑦ, ᐃᒪᖓ ᓯᑯᓯᒪᕙᖕᒪᑦ 8-ᓄᑦ ᑎᑭᓪᓗᒍ 9-ᓄᑦ ᑕᕿᓄᑦ ᐊᕐᕌᒍᑕᒫᑦ, ᑭᒡᓕᐊᓃᑦᑎᐊᖅᑐᑦ ᓄᓇᐅᑉ ᐊᒻᒪᓗ ᐃᒪᐅᑉ.

• 

• 

• 

• 

ᑕᒪᓐᓇ ᐃᒪᕕᒃ ᐃᖏᕐᕋᕗᖅ ᐊᐅᒃᑎᒍᑦ, ᐆᒪᔪᔾᑎᑑᓐᖏᒃᑲᓗᐊᕋᒥ, ᑭᓯᐊᓂᑦᑕᐅᖅ ᑕᒃᑯᐊ ᐃᑲᔫᑎᑦ ᓄᓇᒥᑦ ᐱᔭᕆᐊᖃᖅᑕᕗᑦ ᐆᒪᓂᐊᕐᓗᑕ. ᑕᒪᓐᓇ ᐊᖁᑎᒋᔭᐅᓪᓗᐊᑕᖅᑐᖅ ᑲᑎᖓᑎᑦᑎᔪᖅ ᓄᓇᓕᖕᓂᒃ ᐃᒻᒥᖕᓄᑦ ᐊᒻᒪᓗ ᐊᖑᓇᓱᒃᑎᓂᒃ ᐊᖑᓇᓱᒡᕕᖕᓄᑦ ᓄᓇᓄᑦ. ᑕᒪᓐᓇ ᓄᓇᖓᑦ ᐊᑐᖅᑕᐅᔪᖅ ᐊᖕᖏᔪᒥᒃ, ᐃᓚᒋᑦ ᐃᓄᐃᑦ ᐃᖏᕐᕋᕕᒋᔭᖓᑦ ᕼᐊᓐᓇᓚᑦ ᐊᒥᓱᒻᒪᕆᐋᓗᐃᑦ ᑭᓚᒦᑕᔅ ᐅᒥᐊᒃᑯᑦ ᐅᒡᕙᓘᓐᓃᑦ ᓯᑭᑑᒃᑯᑦ ᐃᖃᓪᓕᐊᖅᑐᑦ, ᑎᖕᒥᐊᕋᓱᒋᐊᖅᑐᑦ, ᓇᑦᑎᕋᑐᒃᓱᑦ ᐊᒻᒪᓗ ᐊᓯᖏᓐᓂᒃ ᐳᐃᔨᓐᓇᓱᒃᑐᑦ ᓂᕿᒃᓴᒥᖕᓂᒃ ᐊᒻᒪᓗ ᐊᓐᓄᕌᒃᓴᒥᖕᓂᒃ.

ᑲᑎᖓᓂᖓᑦ ᐊᕙᑖᓂᑦ ᐃᓄᐃᑦ ᐊᒻᒪᓗ ᐃᒪᕕᒃ ᐊᒃᓱᒻᒪᐋᓗᒃ ᓴᖕᖏᔪᖅ ᓴᖕᖏᓗᐊᒧᑦ ᐅᓂᒃᑳᖅᑐᖃᖅᐳᖅ ᑕᒪᓐᓇ ᐃᒪᕕᒃ.  ᐃᓚᖏᓐᓄᑦ ᖃᐅᔨᒪᔭᐅᔪᖅ ᐅᓂᒃᑳᖅᑐᐊᖅ ᓄᓕᐊᔪᒃ, ᑕᐃᔭᐅᓲᖅᑕᐅᖅ ᓯᑦᓇ, ᐃᓅᓪᓗᓂ ᑕᕆᐅᕐᒥᐅᑕᖅ. ᐅᖃᖅᓯᒪᔪᖅ ᐅᓂᒃᑳᖅᑐᐊᖅ ᐃᕐᓂᓲᕉᖅ ᖃᓄᕆᑦᑐᑐᐃᓐᓇᕐᓂᒃ ᐆᒪᔪᓂᒃ ᑕᕆᐅᕐᒥ. ᑕᐃᒪᓗ ᓄᓕᐊᔪᒃ ᓂᖕᖓᒃᑯᓂ ᓴᐃᒪᔪᓐᓃᕈᓂ, ᑕᕆᐅᖅ ᒪᓪᓕᓕᕐᓗᓂ.

ᑕᒪᓐᓇ ᓴᖕᖏᔫᓂᖓ ᑲᑎᖓᓂᖓᑦ ᐊᕙᑖᓂᑦ ᐃᓄᐃᑦ ᐊᒻᒪᓗ ᐊᕙᑎᕗᑦ, ᐊᑐᖅᓯᓯᒪᕗᑦ ᐊᑑᑎᓕᒻᒪᕆᖕᓂᒃ ᓯᓚᑦᑎᓐᓂ ᐊᕙᑎᑦᑎᓂ ᐱᔨᑦᑎᕋᖅᑐᑦ. ᐃᒻᒪᓂᑐᖄᓗᒃ ᐃᓄᐃᑦ ᐃᒻᒥᖕᓂᒃ ᑕᐃᕙᒃᑐᑐᖃᐃᑦ ᐃᑲᔪᖅᑎᐅᔪᑦ ᐱᔨᑦᑎᕋᖅᑎᐅᔪᑦ ᐅᑭᐅᖅᑕᖅᑐᒥ – ᓴᐳᒻᒥᔪᑦ ᑲᔾᔮᕐᓇᕐᓂᐹᒥᒃ ᐃᒪᕕᖕᒥᒃ ᐊᒻᒪᓗ ᓄᓇᒥᒃ.

ᑭᖑᓂᑦᑎᓐᓂ ᐃᒻᒪᑲᓪᓚᒃ, ᖃᓪᓗᓈᑦ ᐊᑐᐊᒐᖏᑦ ᐊᒻᒪᓗ ᐱᓕᕆᔾᔪᓯᖏᑦ ᐊᑐᖁᔭᐅᔪᑦ ᐅᕙᑦᑎᓄᑦ ᒐᕙᒪᒃᑯᓂᑦ ᓄᖑᑎᑦᑎᓯᒪᔪᑦ ᐃᓚᒌᒍᓯᑦᑎᓂᒃ ᐊᕙᑎᑦᑎᓄᑦ. ᐊᔭᐅᖅᑕᐅᕗᒍᑦ ᓅᑕᐅᓪᓗᑕ, ᕿᒻᒥᕗᑦ ᑐᖁᕋᖅᑕᐅᕗᑦ, ᐃᓕᓐᓂᐊᕆᐊᖅᑎᑕᐅᕗᒍᑦ ᐅᖓᓯᒃᑐᒧᑦ, ᐲᖅᑕᐅᕗᑦ ᐱᐅᓯᑐᖃᑦᑎᓐᓂᒃ ᐊᑑᑎᒋᔭᑦᑎᓂᒃ ᐊᒻᒪᓗ ᐱᓕᕆᔾᔪᓯᕆᔭᑦᑎᓂᒃ. ᑭᓯᐊᓂ ᒫᓐᓇᐅᓕᕐᒪᑦ ᓴᐃᒻᒪᑎᒌᑦᑎᐊᕆᐊᖃᖅᖢᑕ, ᓴᖕᖏᒃᑎᒋᐊᖅᖢᒋᑦ ᓄᓇᖁᑎᕗᑦ ᐊᒻᒪᓗ ᐊᑐᕆᐊᑲᓐᓂᖅᖢᒋᑦ ᐱᐅᓯᑐᖃᖅᐳᑦ.  ᐅᓇ ᑐᑭᖃᖅᑐᖅ, ᐅᑎᖅᐸᓪᓕᐊᓯᕗᒍᑦ ᓄᓇᒧᑦ.

• 

• 

• 

ᑕᑯᓐᓇᖅᖢᒍ ᓯᕗᓂᒃᓴᖅ, ᓯᕗᓂᒃᓴᕆᖁᔭᓐᓂᒃ ᕿᑐᕐᖓᓐᓄᑦ, ᐅᐱᒍᓱᖁᔭᒃᑲ ᐃᓅᓂᕐᒥᖕᓂᒃ. ᐊᕙᓗᔭᐅᓯᒪᖁᔭᒃᑲ ᐱᕈᖅᐸᓪᓕᐊᑎᐊᖅᑐᒥᒃ ᐊᒻᒪᓗ ᖃᓄᐃᖏᑦᑎᐊᖅᑐᒥᒃ ᐊᕙᑎᖃᖅᑐᑦ. ᐊᒻᒪᓗ ᐃᓱᓕᑦᑎᑎᐊᖁᔭᒃᑲ ᐊᒻᒪᓗ ᐋᕿᒃᓱᑦᑎᐊᕐᓗᑎᒃ ᐃᖅᑲᓇᐃᔮᕆᓂᐊᖅᑕᒥᖕᓄᑦ ᐃᓕᓐᓂᐊᕈᑎᒥᖕᓂᒃ ᐊᑕᐄᓐᓇᕈᑎᒋᓂᐊᖅᑕᖏᓐᓄᑦ ᐃᓄᐃᑦ ᓄᓇᖓᓐᓂ.

ᓱᓕᕗᖅ – ᐃᓄᐃᑦ, ᑖᒃᑯᑎᑐᑦᑕᐅᖅ ᐊᓯᒥᒃᑎᑐᑦ, ᐃᖅᑲᓇᐃᔮᖃᕈᒪᔪᑦ, ᐱᕕᖃᖅᑎᑕᐅᔪᒪᔪᑦ, ᐊᒻᒪᓗ ᑮᓇᐅᔭᓕᐅᕐᕕᒃᓴᓂᒃ ᐱᕙᓪᓕᐊᑎᑦᑎᖁᔨᕗᑦ ᐱᕈᕈᑎᒃᓴᓄᑦ. ᑭᓯᐊᓂ ᓱᓕᕗᖅᑕᐅᖅ ᐅᑯᐊ ᐃᓄᐃᑦ  ᐃᒃᐱᒋᑦᑎᐊᖅᑕᖏᑦ ᐅᐱᒋᓪᓗᒋᑦ ᓴᐳᒻᒥᕙᒃᑕᑐᖃᕆᒐᒥᔾᔪᒃ ᐊᒻᒪᓗ ᓄᖑᑕᐅᔮᓇᓂᔾᔪᒃ ᓄᓇᖁᑎᒋᔭᑎᒃ.

ᐃᓚᒋᓪᓗᒍ ᑕᒪᒃᑯᓄᖓ ᐱᓕᕆᐊᖑᓇᓱᐊᖅᑐᓄᑦ ᓴᓇᖃᑎᒌᒡᑐᒍᑦ ᐋᕿᒃᓱᖅᖢᒋᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐱᕙᓪᓕᐊᑎᑦᑎᓂᖅ ᐱᒋᐊᖅᓯᒪᓪᓗᑎᒃ ᐊᕙᑎᑦᑎ ᐱᔨᑦᑎᕋᕐᓂᖅ ᓴᐳᓐᓂᐊᕐᓂᖅ ᐊᒻᒪᓗ ᓄᓇᒥᒃ ᓱᕈᖅᓴᐃᓐᖏᑦᑐᓂᒃ ᑲᔪᓰᓐᓇᕈᓐᓇᖅᑐᑦ ᑲᒻᐸᓂᐅᔪᓂᒃ. ᐅᖃᐅᓯᖃᖅᑐᖓ ᑲᒻᐸᓂᐅᔪᑦ ᐃᖃᓗᒐᓱᒃᑐᑦ ᐃᖅᑲᓇᐃᔮᖃᖅᑎᑦᑎᑐᐃᓐᓇᕋᑎᒃ, ᑭᓯᐊᓂᑦᑕᐅᖅ ᓂᕿᖃᕐᑎᑦᑎᔪᑦ ᓄᓇᑦᑎᓂᒃ ᖃᓄᐃᖏᑦᑎᐊᖅᑎᑦᑎᔪᑦ, ᓄᓇᓖᑦ ᐊᖑᓇᓱᒃᐸᒃᑐᑦ ᓂᕿᒃᓴᓂᒃ ᓂᕿᓪᓚᑖᓂᒃ.

ᐋᕿᒃᖢᒋᑦ ᓴᐳᓐᓂᐊᕆᐊᓕᑦ ᓄᓇᐃᑦ ᐊᒻᒪᓗ ᒥᕐᖑᐃᖅᓯᕐᕕᑦ ᐅᓇ ᐃᓚᖓᑦ ᐊᑐᖅᑕᐅᔪᖅ ᕿᓂᑦᑐᑦ ᖃᓄᑲᓐᓂᖅ ᑎᑭᐅᑎᔪᓐᓇᖅᐱᑕ ᑕᒪᐃᓐᓄᑦ ᑐᕌᕆᔭᑦᑎᓐᓄᑦ – ᐊᕙᑎᑦᑎᓂᑦ ᓴᐳᓐᓂᐊᕐᓂᖅ ᐊᒻᒪᓗ ᑮᓇᐅᔭᖃᕐᑎᑦᑎᓂᖅ ᐱᕙᓪᓕᐊᑎᑦᑎᓂᖅ.

ᒫᓐᓇ ᐅᖃᐅᓯᕆᓪᓗᒍ ᑕᒪᓐᓇ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᖃᑎᒋᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐋᔩᖃᑎᒌᒍᑎᖃᖅᑐᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᓴᕿᑕᐅᑎᓪᓗᒍ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᖓ ᓴᐳᓐᓂᐊᑦᑕᐅᔪᖅ.

• 

• 

ᐅᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ ᐊᑐᖅᑕᐅᓂᐊᖅᑐᖅ ᐅᑯᐊ ᐃᓄᐃᑦ ᐃᑲᔫᓯᐊᖁᓪᓗᒋᑦ ᐱᓕᕆᔭᐅᔪᓄᑦ ᓄᓇᖓᓐᓂ. ᐅᓇ ᐊᖕᖏᕈᑎ ᑎᑎᕋᖅᑕᐅᓯᒪᔪᖅ ᖃᖓᓕᒫᖅ ᐊᔾᔨᐅᓐᖏᑦᑐᖅ. ᐃᓚᖃᖅᑐᖅ ᐊᑐᖅᑕᐅᓂᐊᑦᑐᓂᒃ ᐃᑲᔪᖃᑎᒌᒍᑎᒃᓴᐃᑦ ᐊᐅᓚᑦᑎᔾᔪᑎᓄᑦ, ᑲᔪᓯᓗᓂ ᐃᓄᐃᑦ ᐊᖑᓇᓱᒍᓐᓇᕐᓗᑎᒃ, ᐊᒻᒪᓗ ᐃᓄᐃᑦ ᐃᖅᑲᓇᐃᔭᕐᓗᑎᒃ ᐊᒻᒪᓗ ᑮᓇᐅᔭᓕᐅᕐᕕᐅᓗᓂ.

ᐱᒋᐊᓕᓵᖅᑐᖅ ᐃᑲᔫᑎᔪᖅ ᑕᓪᓗᕈᑎᐅᑉ ᐃᒪᖓ ᐊᖏᕈᑎ ᑲᔪᓯᔪᓐᓇᕐᒪᖔᑦ ᑲᔪᓯᔪᓐᓇᓐᖏᒻᒪᖔᑦ ᐱᓕᕆᐊᖑᔪᖅ ᐃᒃᐱᐊᕐᔪᖕᒥ. ᐊᑖᓂ ᔪᓚᐃ 2018 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᒋᐊᖅᑎᑦᑎᓚᐅᖅᑐᑦ ᑲᔪᓯᔪᓐᓇᕐᒪᖔᑦ ᑲᔪᓯᔪᓐᓇᓐᖏᒻᒪᖔᑦ ᐱᓕᕆᑎᑦᑎᔾᔪᑕᐅᔪᖅ ᐱᓇᓱᐊᖃᑎᒋᓪᓗᒋᑦ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕ. 6-ᖑᔪᑦ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓪᓗᑎᒃ ᐊᐅᓚᑦᑎᓗᑎᒃ ᐊᒻᒪᓗ ᐱᔨᑦᑎᕋᖅᑎᐅᓗᑎᒃ ᑕᓪᓗᕈᑎᐅᑉ ᐃᒪᖓᓄ. ᐅᑯᐊ ᐱᓇᓱᐊᖃᑎᒌᑦ ᖃᓄᑐᐃᓐᓇᑦᑎᐊᖅ ᑕᒪᐃᓐᓂᑦ ᐱᓕᕆᖃᑦᑕᖅᑐᑦ;  ᑕᒫᖓᑦ ᒥᐊᓂᕆᓪᓗᑎᒃ ᓯᑯᒥᒃ ᖃᓄᕆᑦᑑᖕᒪᖔᑦ, ᑲᒪᒋᑦᑎᐊᖅᖢᒋᑦ ᐃᑦᑕᕐᓂᑕᖃᕐᕕᑦ ᐃᓂᖏᑦ ᐊᒻᒪ ᐃᑲᔪᖅᐸᒃᑐᑦ ᕿᓂᖅᑎᐅᖃᑕᐅᓪᓗᑎᒃ. ᐃᑲᓇᐃᔮᖓᑦ ᐊᖕᖏᒍᔪᒥᒃ ᐃᑲᔪᕐᓂᖃᓕᕇᖅᑐᖅ.

ᑕᒪᕐᒥᑦᑎᐊᐸᓗᒃ ᐃᓄᒃ ᐊᑕᐅᓯᐅᔪᖅ ᓂᕿᖃᕐᑎᑦᑎᔨᐅᔪᖅ ᐊᖕᖏᕋᒥᖕᓂ. ᐃᓚᒌᑦ, ᐃᑲᔪᖅᑐᑦ ᖃᓂᒋᔮᓂ 12 ᐃᓐᓇᕐᓂᒃ ᐊᒻᒪᓗ 20 ᓄᑕᖃᓂᒃ. ᑭᓯᐊᓂ ᐃᑲᔫᑎᖏᑦ ᓄᓇᓕᖕᓄᑦ ᐱᓂᖅᓴᐅᕙᖕᒥᔪᑦ ᓇᖕᒥᓂᖅ ᐃᓚᒥᖕᓄᑦ. ᐃᓚᒋᓪᓗᒍ ᓴᓈᒥᒍᑦ, ᐃᖃᓗᒐᓱᖃᑦᑕᖅᑐᑦ ᐊᒻᒪᓗ ᓇᑦᑎᕋᓱᖃᑦᑕᖅᑐᑦ ᓄᐊᑦᑎᓂᐊᕋᒥᒃ ᖃᐅᔨᓴᕈᑖᕐᓴᓂᒃ ᐳᐃᔨᑦ-ᐆᒪᔾᔪᑎᖏᓐᓂᒃ. ᑭᓱᑕᑎᒃ ᓂᕐᔪᑎᑕᑎᒃ, ᓂᕿᒋᔭᐅᓪᓗᒋᑦ ᓄᓇᓕᖕᓂᑦ ᓂᕆᕕᒡᔪᐊᖅᑎᑦᑎᕙᒃᑐᑦ ᓂᕆᓂᐊᖅᒪᑕ ᑳᒃᑐᑦ.

ᐅᓇ ᐱᓕᕆᑎᑦᑎᔾᔪᑕᐅᔪᖅ ᐋᕿᓯᓂᒻᒪᕆᐅᕗᖅ ᐃᓂᖏᓐᓄᑦ ᐊᕙᑎᑦᑎᓂ ᐱᔨᑦᑎᕋᖅᑎᐅᓪᓗᑎᒃ ᐊᒻᒪᓗ ᐊᖑᓇᓱᒃᑎᐅᓪᓗᑎᒃ ᐊᒻᒪᓗ ᐋᕿᒃᓱᐃᔨᐅᔪᑦ ᑐᓐᖓᕕᒃᓴᖏᓐᓂᒃ ᐱᔭᕆᐅᖅᓴᑎᑦᑎᕕᒃᓴᑦ, ᐃᖅᑲᓇᐃᔮᒃᓴᑦ, ᐊᒻᒪᓗ ᑮᓇᐅᔭᖃᕐᑎᑦᑎᓂᖅ ᐱᕙᓪᓕᐊᑎᑦᑎᓂᖅ ᐃᓄᖕᓂᒃ. 

            ᐊᖕᖏᔪᒻᒪᕆᐋᓗᖕᒥᒃ ᐱᔭᒃᓴᖃᖅᑐᒍᑦ – ᓄᓇᓕᕗᑦ ᐅᕙᑦᑎᓐᓂᒃ ᐋᕿᒃᓱᐃᔨᐅᖁᔨᕗᑦ ᐋᕿᑦᑎᐊᕐᓗᒋᑦ ᐃᑲᔫᓯᐊᖅᑖᕈᑎᒃᓴᐃᑦ ᐊᑐᖅᑕᐅᓂᐊᖅᑐᑦ ᓯᕗᓂᒃᓴᑦᑎᓂᑦ ᐊᒻᒪᓗ ᓴᐳᒻᒥᓂᐊᖅᑐᑦ ᐃᒪᑦᑎᓐᓂᒃ ᐊᒻᒪᓗ ᐆᒪᔪᓕᒫᓂᒃ ᐊᕙᑎᓕᒫᖏᓪᓗ ᐆᒪᔾᔪᑎᒋᔭᐅᓂᐊᖅᑐᑦ.  ᑲᓇᑕᒥᐅᑦ ᐅᕙᑦᑎᓐᓂᒃ ᐋᕿᒃᓱᐃᔨᐅᖁᔨᕗᑦ ᓴᐳᓐᓂᐊᕐᓗᒋᑦ ᓄᖑᑕᐅᑦᑕᐃᓕᑎᓪᓗᒋᑦ ᐅᑭᐅᖅᑕᖅᑐᖅ ᐊᕙᑎᖓ ᐊᒻᒪᓗ ᑲᓇᑕ ᓯᕗᓕᐅᕆᔨᐅᖏᓐᓇᖅᑐᖅ ᐊᕙᑎᑦᑎᓂᒃ ᓴᐳᓐᓂᐊᕐᓂᕐᒧᑦ. ᓴᓇᖃᑎᒌᒡᓗᑕ ᐱᓪᓗᒍ ᓴᐃᒻᒪᖃᑎᖐᑦᑎᐊᕋᓱᐊᕐᓂᖅ ᑎᑭᐅᑎᑦᑎᐊᕐᓂᐊᕋᑦᑕ ᑕᒪᑦᑕ ᑐᕌᕆᔭᑦᑎᓄᑦ ᐊᒻᒪᓗ ᐋᕿᒃᓱᕐᓗᒍ ᑲᓇᑕ ᐊᑐᕐᓂᐊᖅᑕᖏᓐᓄᑦ ᓯᕗᓂᕆᓂᐊᖏᓐᓄᑦ ᐃᓅᓂᐊᖅᑐᑦ ᐊᒡᒋᖅᑐᑦ.