ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒧᑦ ᓂᕿᔅᓴᕐᓯᐅᖃᑦᑕᓂᕐᒧᓪᓗ ᐅᓂᒃᑳᓂᑦ
ᓴᖅᑭᑎᑦᑎᔪᒻᒥᔪᒍᑦ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒧᑦ ᓂᕿᔅᓴᕐᓯᐅᖃᑦᑕᓂᕐᒧᓪᓗ ᐅᓂᒃᑳᓂᑦ ᐃᑲᔫᑎᖃᕐᓂᐊᕐᖓᑕ ᐅᖃᐅᓯᐅᑎᓪᓗᒋᑦ ᓂᕿᔅᓴᖃᑦᑎᐊᖃᑦᑕᕆᐊᖃᕐᓂᖅ ᓄᓇᑦᑎᓐᓂ ᐊᕕᑦᑐᕐᓯᒪᕕᑦᑎᒍᑦ ᐊᒻᒪᓗ ᓄᓇᕗᒥ. ᑖᒃᑯᐊ ᐅᓂᒃᑳᑦ ᓇᓗᓇᐃᔭᐃᓯᒪᔪᑦ ᓯᕗᓂᔅᓴᑎᓐᓄᑦ ᐱᔾᔪᑎᓕᓐᓂᑦ, ᐋᖅᑭᐅᒪᒍᑎᔅᓴᓂᑦ ᐱᓇᓱᐊᕈᑕᐅᓂᐊᖅᑐᓂᑦ ᓄᓇᕗᒥ ᓂᕿᓂᑦ ᐊᔪᕐᓴᖃᑦᑕᓂᕐᒥᒃ ᐊᑲᐅᙱᓕᐅᕈᑎᖃᖅᑎᓪᓗᒋᑦ. ᐅᓂᒃᑳᕗᑦ ᕿᓄᔾᔪᑎᓕᒃ ᐃᓱᒪᒋᔭᐅᕙᑦᑐᒥᒃ ᓴᖑᑎᑦᑎᒋᐊᖁᔨᓪᓗᑎᒃ ᓂᕿᔅᓴᑦᑎᐊᕆᐊᖃᕐᓂᕐᒥᒃ ᒪᑐᒧᖓ ᓵᙵᒋᐊᖔᖁᔨᓪᓗᑎᒃ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒥᒃ. ᐃᒫᒃ ᑐᑭᓕᒃ ᓄᑖᕈᖅᑎᑕᐅᒋᐊᕐᓗᑎᒃ ᐊᑐᐊᒐᐃᑦ ᐋᖅᑭᓱᖅᑕᐅᓯᒪᓂᖏᑦ ᐊᒻᒪᓗ ᑮᓇᐅᔭᖃᖅᑎᑦᑎᖃᑦᑕᓂᕐᒧᑦ ᐋᖅᑭᓯᒪᓂᕆᕙᑦᑕᖏᑦ ᐱᔪᓐᓇᕐᓯᒋᐊᒃᑲᓐᓂᖁᓪᓗᒋᑦ ᐃᓄᐃᑦ ᓂᕆᑎᑕᐅᖃᑦᑕᓂᐊᕐᖓᑕ ᓄᓇᓕᕗᑦ.
ᐃᓄᐃᑦ ᐃᓄᓕᖅᑕᓂᒃ ᓂᕿᑖᖅᑎᑦᑎᒐᐃᒻᒪᑕ, ᐊᑐᖅᑕᐅᑎᑦᑎᒋᐊᒃᑲᓐᓂᖃᑦᑕᕐᖓᑕ ᐃᓄᐃᑦ ᐃᓕᖅᑯᓯᖅᑎᒍᑦ ᐱᓕᕆᔾᔪᓯᖏᓐᓂᒃ, ᐃᓄᐃᑦ ᖃᐅᔨᒪᔭᖏᓐᓂᒃ, ᐅᖃᐅᓯᖓᓐᓂᒃ ᐊᒻᒪᓗ ᓇᒻᒥᓂᕐᓱᕈᓐᓇᕐᓂᖏᓐᓂᒃ. ᐃᑲᔪᕐᓰᓂᖅ ᓂᕿᓂᑦ ᐊᐅᓚᑦᑎᔾᔪᑎᖃᕐᓂᕐᒥᒃ ᑕᑯᑎᑦᑎᒻᒪᑦ ᑲᑦᑐᖓᐃᕐᓯᒪᒍᑎᖃᕐᓂᕐᒥᒃ ᓴᐃᒻᒪᖃᑎᒌᓐᓂᕐᒧᑦ ᐊᒻᒪᓗ ᐊᐅᓚᔾᔭᐃᕙᑦᑐᓂ ᓄᓇᖏᓐᓂ ᒪᑭᒪᓇᓱᐊᕈᑎᒋᕙᑦᑕᖏᓐᓂᒃ.
ᕿᑭᖅᑕᓂᒃᑯᑦ ᐊᑐᕈᒪᓯᒪᒻᒪᑕ ᑐᑭᖓᓂᒃ ᓂᕿᓂᑦ ᐊᐅᓚᑦᑎᒍᑎᖃᕐᓂᕐᒥᒃ ᐊᑐᙱᖔᕐᓗᑎᒃ ᐆᒥᖓ ᓂᕿᓂᑦ ᐊᔪᕐᓴᖃᑦᑕᖏᓐᓂᖅ ᐱᔾᔪᑎᒋᓪᓗᒍ ᓂᕿᓂᑦ ᐊᐅᓚᑦᑎᒍᑎᖃᕐᓂᖅ ᐃᒫᒃ ᑐᑭᖃᕐᓂᓴᐅᒻᒪᑦ ᐃᓕᖅᑯᓯᖅᑎᒍᑦ ᐊᒻᒪᓗ ᓄᓇᖅᑲᑎᒌᑦ−ᐃᓱᒪᐅᓯᖏᓐᓂᒃ ᐱᓇᓱᐊᕈᑎᖃᕐᓂᕐᒥᒃ ᓂᕿᓕᕆᖃᑦᑕᓂᕐᒧᑦ. ᓂᕿᓂᑦ ᐊᐅᓚᑦᑎᔾᔪᑎᖃᓕᖅᑎᑕᐅᑉᐸᑕ ᕿᑭᖅᑕᓂ ᓄᓇᓖᑦ ᓇᖅᑭᑎᑦᑎᒋᐊᒃᑲᓐᓂᕋᔭᕐᖓᑕ ᐃᓄᐃᑦ ᐃᓕᖅᑯᓯᖓᓐᓂᒃ ᐊᒻᒪᓗ ᐱᒋᐊᕈᑕᐅᓪᓚᕆᒃᑲᔭᖅᑐᓂ ᐃᓱᒪᒋᔪᓐᓇᐃᖅᑎᒌᓐᓂᕐᒧᑦ ᑖᒃᑯᓄᖓ ᐃᓄᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ.
ᓄᓇᑦᑎᓐᓂ ᓂᕿᔅᓴᖅᑖᕆᕙᑦᑕᕗᑦ ᐊᒻᒪᓗ ᐊᖑᓇᓱᖃᑦᑕᕐᓂᖅ ᑐᙵᕕᓪᓗᐊᑕᐅᒻᒪᑕ ᐃᓄᐃᑦ ᐃᓕᖅᑯᓯᖓᓐᓂᒃ, ᓄᓇᖅᑲᑎᒌᓄᑦ ᐊᒻᒪᓗ ᒪᑭᒪᓂᕐᒧᑦ. ᐊᐅᓚᑕᐅᓂᖅ ᓵᓚᖃᑦᑕᖒᓪᓗᓂ ᑲᓲᒪᒍᓐᓃᕈᑎᒋᓯᒪᒐᑦᑎᒍ ᐊᖑᓇᓱᖃᑦᑕᓂᕐᒧᑦ, ᐃᓕᖅᑯᓯᖅᑎᒍᑦ ᐱᓕᕆᔾᔪᓯᓪᓚᕆᐊᓗᒃ ᓇᖅᑭᐅᒪᑎᑦᑎᕙᑦᑐᖅ ᐃᓕᓴᕐᓇᕈᑎᑦᑎᓐᓂᒃ, ᓂᕆᑎᑦᑎᒍᑕᐅᕙᑦᑐᓂ ᓄᓇᖅᑲᑎᑦᑎᓐᓂᒃ ᐊᒻᒪᓗ ᐃᖏᕐᕋᑎᑦᑎᕙᑦᑐᓂ ᑲᔪᓯᑏᓐᓇᖅᑐᒍ ᓄᓇᑦᑎᓐᓂ ᒪᑭᒪᒍᑕᐅᕙᑦᑐᓂᑦ. ᐱᓇᓱᐊᕈᑎᖃᕆᐊᖃᓪᓚᑦᑖᓕᕋᑦᑕ ᐊᐅᓚᔾᔪᑎᔅᓴᓂᑦ ᐱᖁᑎᕐᔪᐊᓂᑦ, ᐱᓗᐊᖅᑐᒥᑦ ᐅᒥᐊᕐᓄᑦ ᑐᓚᑦᑕᕐᕕᓐᓂᑦ ᓴᓇᔭᐅᒋᐊᓕᓐᓂᑦ ᐊᒻᒪᓗᑦᑕᐅᖅ ᐱᓇᓱᐊᕈᑎᔅᓴᓂᑦ ᐱᔭᖅᑭᔅᓴᖅᑕᐅᔾᔪᑎᔅᓴᖏᓐᓂᒃ ᐃᖅᑲᓇᐃᔮᖃᕈᑎᔅᓴᖏᓐᓂᒃ ᐃᓄᐃᑦ ᐃᖅᑲᓇᐃᔮᔅᓴᓄᑦ ᐊᖑᓇᓱᖃᑦᑕᖅᑐᓕᕆᓂᕐᒥᒃ.
ᐊᖑᓇᓱᑦᑏᑦ ᐊᖑᓂᕐᐸᑦᑕᖏᑦ ᓄᓇᓖᑦ ᖁᐊᒃᑯᕕᖓᓐᓂᒃ ᐃᓗᓪᓕᕐᓱᐃᒍᑕᐅᖃᑦᑕᓂᐊᕐᖓᑦ ᓂᕆᑎᑦᑎᒍᑕᐅᖃᑦᑕᕐᓗᓂᓗ ᓄᓇᕗᒻᒥᐅᓄᑦ. ᐊᖑᓂᑦᑕᖏᓐᓃᙶᖅᑐᓪᓗ ᑭᓱᑐᐃᓐᓇᐃᑦ ᐊᐅᓚᒍᑕᐅᓂᐊᕆᓪᓗᑎᒃ ᓄᓇᖓᓐᓂ ᒪᑭᒪᒍᑕᐅᔭᕆᐊᓕᓐᓂᑦ. ᐊᒦᑦ, ᓄᐃᓚᔅᓴᐃᑦ, ᕿᓰᑦ, ᓴᐅᓃᑦ, ᓇᔾᔪᐃᑦ, ᑑᒑᓪᓗ ᐊᑑᑎᖃᓪᓚᕆᓐᓂᐊᖅᑐᑎᒃ ᓱᓇᒃᑯᑖᕈᖃᑦᑕᕐᖓᑕ ᐊᓐᓄᕌᓕᐊᖑᔪᓐᓇᖅᑐᑎᒃ, ᓴᓇᐅᒐᓕᐊᖑᔪᓐᓇᖅᑐᑎᒃ ᒥᕐᓱᒐᓕᐊᖑᔪᓐᓇᖅᑐᑎᓪᓗ.
ᕿᑭᖅᑕᓂᒃᑯᑦ ᑕᑯᓐᓇᙳᐊᕐᖓᑕ ᓄᓇᕗᒻᒥᑦ ᓄᓇᖓᓐᓂᑦ ᓂᕿᔅᓴᖅᑖᖑᕙᑦᑐᑦ ᐊᑐᐃᓐᓇᐅᑦᑎᐊᖃᑦᑕᕐᓗᑎᒃ ᐃᓱᒪᕐᓲᑕᐅᖃᑦᑕᕐᓗᑎᒃ ᐃᓚᒌᓄᑦ ᐊᒻᒪᓗ ᐊᖑᓇᓱᖃᑦᑕᕐᓂᖅ ᐃᓅᓯᕆᔭᐅᓗᓂ. ᑐᕌᒐᖃᖅᑐᒍᑦ ᐃᓄᓕᒫᑦ ᕿᑭᖅᑕᓂ ᓄᓇᓖᑦ ᐋᖅᑭᓯᒪᑦᑎᐊᖅᑐᒥᒃ ᐊᒻᒪᓗ ᓯᕕᑐᔪᒨᖓᔪᒥᒃ ᓄᓇᑦᑎᓐᓂ ᓂᕿᔅᓴᓂᖃᑦᑕᖁᓪᓗᒋᑦ ᓄᓇᖓᓐᓂ. ᕿᑭᖅᑕᓂᒃᑯᑦ ᐃᓱᒪᒋᔭᓖᑦ ᑕᒪᑐᒥᖓ ᐅᔾᔨᕐᓇᕈᑎᓪᓗᐊᑕᐅᓂᖓᓂᒃ ᑎᑭᐅᑎᒍᑎᔅᓴᐅᓪᓗᓂ ᓂᕿᓂᑦ ᐊᐅᓚᑦᑎᒍᑎᖃᕐᓂᕐᒧᑦ ᐃᓱᒪᒋᔪᓐᓇᐃᖅᑎᒌᓐᓂᒧᓪᓗ ᐅᑭᐅᖅᑕᖅᑐᒥ. ᐃᓚᖓᑦ ᖃᐅᔨᒪᑦᑎᐊᕈᑕᐅᓂᐊᖅᑐᖅ ᓄᓇᖓᓐᓂ ᓂᕿᔅᓴᖅᑖᖃᑦᑕᕈᓐᓇᓂᕐᒧᑦ ᐃᑲᔪᖅᑕᐅᓗᑎᒃ ᐊᖑᓇᓱᑦᑏᑦ ᐊᒻᒪᓗ ᐃᑲᔪᕐᓗᒋᑦ ᐃᓕᓐᓂᐊᑎᑦᑎᑎᓪᓗᒋᑦ ᐃᓕᓯᒪᔭᖏᓐᓂᒃ ᑭᖑᕚᕆᓂᐊᖅᑕᑎᓐᓄᑦ.
