ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔩᑦ ᑲᑎᒪᓂᖏᑦ ᐱᔭᕇᖅᐳᑦ
ᐃᖃᓗᐃᑦ, ᓄᓇᕗᑦ, ᒫᑦᓯ 4, 2022 – ᐅᓪᓗᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᔭᕇᖅᑲᐅᔪᑦ ᑲᑎᒪᑎᑦᑎᓂᖏᖕᓂᑦ ᐊᒻᒪᓗ ᑲᑎᒪᔩᑦ ᑲᑎᒪᓂᖏᖕᓂᑦ ᖃᕋᓴᐅᔭᖅᑎᒍᑦ. ᑕᒫᓂ ᐱᓇᓱᐊᕈᓯᕐᒥ, ᐊᒥᓱᑦ ᐱᖁᔨᕗᔪᖔᕈᑎᑎᒍᑦ ᐃᓱᒪᓕᐅᕈᑕᐅᓚᐅᖅᑐᑦ ᐊᖏᖅᑕᐅᓯᒪᓪᓗᑎᑦ, ᐅᑯᐊ:
- ᐊᖏᖅᑕᐅᓪᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ 2022-2023 ᑮᓇᐅᔭᖅᑐᕈᑎᒃᓴᑦ ᐃᒪᓐᓇᐅᔪᑦ5 ᒥᓕᐊᓐ ᑮᓇᐅᔭᑦ, ᐊᒥᓱᕈᕆᐊᖅᓯᒪᓪᓗᑎᑦ 2.12 ᒥᓕᐊᓐ ᑮᓇᐅᔭᑦ ᐊᕐᕌᒎᓚᐅᖅᑐᓂᑦ ᐊᖏᖅᑕᐅᓯᒪᔪᓂᑦ ᑮᓇᐅᔭᖅᑐᕈᑎᒃᓴᓂᑦ.
- ᐊᖏᖅᑕᐅᓪᓗᑎᑦ ᓂᐅᕕᖅᑕᐅᓂᐊᕐᓗᑎᑦ ᐊᒥᓱᓄᑦ ᐊᑑᑕᐅᔪᓐᓇᖅᑐᒥᒃ ᐃᒡᓗᕐᔪᐊᕐᒥᒃ ᖃᐅᓱᐃᑦᑐᒥ ᐊᑐᖅᑐᑎᑦ ᑮᓇᐅᔭᓂᑦ ᐱᔭᒥᓃᑦ ᑲᓇᑕᒥ ᒐᕙᒪᖓᓂᑦ ᒪᓕᑦᑐᒍ ᑕᓪᓗᕈᑎᐅᑉ ᐃᒪᖓ ᐊᖏᕈᑎ ᑐᕌᖓᔪᑦ ᐱᖁᑎᕐᔪᐊᓄᑦ ᑮᓇᐅᔭᓂᑦ ᐊᑐᕐᓂᐊᕐᓂᖏᖕᓂᑦ ᐱᕚᓪᓕᕈᑎᓂᑦ.
- ᐊᖏᖅᑕᐅᓪᓗᑎᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᕈᑎ ᐊᖏᖃᑎᒌᒍᑕᐅᓪᓗᓂ ᐅᑯᓄᖓ ᑲᑭᕙᒃ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᒻᒥ ᓴᓇᔪᓕᕆᓂᕐᒧᑦ ᑯᐊᐳᕇᓴᙵᑕ ᐱᕙᓪᓕᐊᑎᑦᑎᔨᖏᑦ ᓴᓇᒐᔭᕐᒪᑕ ᖁᑦᑎᒃᑐᒥ ᓴᓇᔪᓕᕆᓂᕐᒧᑦ ᐱᓕᒻᒪᒃᓴᐃᕕᒻᒥ ᐊᑭᖃᖅᑎᒋᔪᖅ 13 ᒥᓕᐊᓐ ᑮᓇᐅᔭᑦ ᐊᑐᖅᑕᐅᒐᔭᖅᑐᓂ ᐊᑯᓂᐅᓂᖏᑦ ᑮᓇᐅᔭᓕᕆᓐᓇᑉ ᐊᕐᕌᒍᖏᑦᑕ 2022-2025 ᑲᖏᖅᑐᒑᐱᖕᒥ, ᒥᑦᑎᒪᑕᓕᒃ, ᐃᒃᐱᐊᕐᔪᒃ, ᖃᐅᓱᐃᑦᑐᖅ ᐊᒻᒪᓗ ᐊᐅᓱᐃᑦᑐᕐᒥ.
- ᐊᖏᖅᑕᐅᓪᓗᑎᑦ ᐋᖅᑭᒃᑕᐅᓂᖓ ᐊᐅᓚᑦᑎᔩᑦ ᐊᑭᓕᖅᓱᖅᑕᐅᓂᖏᖕᓄᑦ ᐊᑐᐊᒐᖅ − ᓱᖅᑯᐃᓇᑦᑎᐊᖅᑐᑯᓗᒃᑯᑦ ᓇᓗᓇᐃᔭᐃᓯᒪᔪᑦ ᐃᑲᔫᑎᒃᓴᕆᔭᐅᓂᐊᖅᑐᓂᑦ ᐊᒻᒪᓗ ᑐᑭᒧᐊᕈᑎᒋᔭᐅᒐᔭᖅᑐᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ, ᐊᖓᔪᖅᑳᑉ ᑐᖏᓕᐊᑕ, ᐊᓪᓚᑦᑎ/ᑮᓇᐅᔭᓕᕆᔨᑉ ᐊᒻᒪᓗ ᐱᖓᓱᑦ ᐊᐅᓚᑦᑎᔩᑦ ᑲᑎᒪᔨᖏᖕᓄᑦ ᐊᑭᓕᖅᓱᖅᑕᐅᔾᔪᑎᒃᓴᕆᒐᔭᖅᑕᖏᑦ.
- ᐊᖏᖅᑕᐅᖁᔨᔾᔪᑎ ᑲᔪᓯᓗᑎᑦ ᐱᕙᓪᓕᐊᒍᑎᒋᔭᐅᓂᖏᑕ ᐊᒻᒪᓗ ᓴᒃᑯᑕᐅᓂᖏᑕ ᑐᓴᖅᑎᑦᑎᔾᔪᑎᑉ ᑐᓴᖅᑎᑦᑎᔪᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᐃᓚᒋᔭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᓯᔾᔩᓂᐊᕐᓂᖏᖕᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑮᓇᐅᔭᑦ ᐃᓯᖅᐸᓪᓕᐊᔪᑦ ᐊᑐᐊᒐᖓᓄᑦ. ᓇᓗᓇᐃᔭᑦᑎᐊᖅᓯᒪᔪᑯᓗᖏᑦ ᑖᔅᓱᒪᑉ ᐱᖁᔨᕗᖔᕈᑎᐅᑉ ᐄᐳᕈᓪ 2022-ᖑᓕᖅᐸᑦ ᑐᓂᔭᐅᒐᔭᖅᑐᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᑲᑎᒪᔨᐅᔪᑦ ᑎᒃᑯᐊᖅᓯᓚᐅᖅᐳᑦ ᐃᓄᑭ ᐃᖅᑭᑦᑐᕐᒥᒃ ᑲᑭᕙᒃ ᐊᐃᑦᑑᓯᐊᖅᑎᑦᑎᔩᑦ ᐊᒻᒪᓗ ᐃᑲᔫᓯᐊᖅᑖᑎᑦᑎᔩᑦ ᑲᑎᒪᔨᕋᓛᖏᖕᓄᑦ, ᑲᑎᒪᔨᐅᓂᐊᖅᑐᓂ ᑕᐃᒃᑯᓄᖓ ᑲᑎᒪᔨᕋᓛᕐᓄᑦ ᐊᑯᓂᐅᑎᒋᔪᖅ ᐱᖓᓱᑦ (3) ᐊᕐᕌᒎᓂᐊᖅᑐᓂᑦ ᐃᓱᓕᑦᑎᓪᓗᒍ ᑲᑎᒪᔨᕋᓛᖑᖃᑕᐅᓂᖓ ᒫᑦᓯ 25, 2025−ᖑᓕᖅᐸᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᔨᐅᔪᑦ ᑎᒃᑯᐊᖅᓯᓚᐅᕆᕗᑦ ᓇᐃᓴᓇ ᕿᓪᓚᕐᒥᒃ ᐊᒡᒍᑎᓐᓂ ᑲᑐᔾᔨᖃᑎᒌᑦᑐᑦ ᒥᕐᖑᐃᓯᕐᕕᑉ ᐊᐅᓚᑕᐅᓂᖏᖕᓄᑦ ᑲᑎᒪᔨᕋᓛᖏᖕᓄᑦ, ᑲᑎᒪᔨᐅᓂᐊᖅᑐᓂ ᑕᐃᒃᑯᓄᖓ ᑲᑎᒪᔨᕋᓛᕐᓄᑦ ᐊᑯᓂᐅᑎᒋᔪᖅ ᐱᖓᓱᑦ (3) ᐊᕐᕌᒎᓂᐊᖅᑐᓂᑦ ᐃᓱᓕᑦᑎᓪᓗᒍ ᑲᑎᒪᔨᕋᓛᖑᖃᑕᐅᓂᖓ ᒫᑦᓯ 31, 2025−ᖑᓕᖅᐸᑦ.
ᐊᒥᓲᒋᕗᑦ ᓱᓕ ᑲᑎᒪᔨᑖᕐᕕᐅᔭᕆᐊᓖᑦ ᐊᒻᒪᓗ ᑲᑎᒪᔨᕋᓛᕐᓄᑦ ᐃᓚᐅᕝᕕᐅᔭᕆᐊᓖᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᑐᓂᓯᔪᖃᓚᐅᙱᑦᑐᖅ ᐱᓇᓲᑎᓂᑦ ᐅᑯᓄᖓ ᑲᑎᒪᔨᓄᑦ ᐊᒻᒪᓗ ᑲᑎᒪᔨᕋᓛᕐᓄᑦ: ᓄᓇᕗᑦ ᐸᐸᑦᑎᕕᖓ, ᓄᓇᕗᒻᒥ ᑎᒥᒃᑯᑦ ᐊᔪᕈᑎᓖᑦ ᑲᑎᒪᔨᖏᑦ, ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑯᐊᐳᕇᓴᙵᓄᑦ, ᐃᖃᓗᓐᓂ ᐸᕐᓇᒃᑎᐅᖃᑎᒌᑦᑐᑦ ᐊᒻᒪᓗ ᐊᐅᓚᑦᑎᔨᐅᖃᑎᒌᑦᑐᑦ ᑲᑎᒪᔨᕋᓛᖏᑦ, ᐊᐅᔪᐃᑦᑐᖅ ᐸᕐᓇᒃᑎᐅᖃᑎᒌᑦᑐᑦ ᐊᒻᒪᓗ ᐊᐅᓚᑦᑎᔨᐅᖃᑎᒌᑦᑐᑦ ᑲᑎᒪᔨᕋᓛᖏᑦ, ᐊᒻᒪᓗ ᖃᐅᓱᐃᑦᑐᖅ ᑲᓇᑕᒥ ᒥᕐᖑᐃᓯᕐᕕᒃ ᓯᕐᒥᓕᒃ ᐸᕐᓇᒃᑎᐅᖃᑎᒌᑦᑐᑦ ᐊᒻᒪᓗ ᐊᐅᓚᑦᑎᔨᐅᖃᑎᒌᑦᑐᑦ ᑲᑎᒪᔨᕋᓛᖏᖕᓄᑦ.
ᑲᑎᒪᔨᕈᕈᒪᓐᓂᕈᕕᑦ ᓇᓕᐊᓐᓄᑐᐃᓐᓇᖅ ᑕᒪᒃᑯᓄᖓ ᑲᑎᒪᔨᓄᑦ ᐊᒻᒪᓗ ᑲᑎᒪᔨᕋᓛᕐᓄᑦ, ᖃᐅᔨᓇᓱᖃᑦᑕᕆᑦ ᓄᓇᓕᓐᓂ ᓴᖅᑭᔮᖅᑎᑦᑎᒍᑎᓂᑦ ᐱᕙᓪᓕᐊᔪᓂᑦ, ᐊᒻᒪᓗ ᖃᕋᓴᐅᔭᒃᑯᑦ ᐃᓅᖃᑎᒌᒍᓐᓇᐅᑎᑎᒍᑦ ᐊᒻᒪᓗ ᓄᓇᓕᓐᓂ ᓈᓚᐅᑎᒃᑯᑦ ᓈᓚᖃᑦᑕᕐᓗᑎᑦ ᐱᓇᓱᐊᕐᕕᒃᓴᐅᓂᕋᖅᑕᐅᓕᕐᓂᖏᖕᓂᑦ ᑲᑎᒪᔨᐅᖃᑕᐅᓗᓂ.
ᑕᒪᐃᓐᓂᓕᒫᖅ ᐱᖁᔨᕗᖔᕈᑎᓕᐊᕆᔭᐅᓯᒪᔪᑦ ᐃᓱᒪᓕᐊᒥᓃᑦ ᐊᑐᐃᓐᓇᐅᕗᑦ ᑐᓂᔭᐅᒍᓐᓇᖅᑐᑎᑦ ᑐᒃᓯᕌᕆᔭᐅᒍᑎᑦ.
ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ, ᖃᐅᔨᒃᑲᕐᓗᒍ:
ᑭᐅᕋᓐ ᕕᓕᐅᕆᑎ
ᑐᑭᒧᐊᑦᑎᑦᑎᔨ, ᖃᓄᖅᑑᖅᓯᒪᓪᓗᑎᑦ ᑐᓴᐅᒪᔪᓕᕆᔨᒃᑯᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑎᖓ) 867.975.8398 ᐅᕝᕙᓘᓐᓃᑦ ᐊᑭᖃᙱᑦᑐᖅ 1.800.667.2742
kflaherty@qia.ca
