ᖃᐅᓱᐃᑦᑐᖅ ᒥᕐᖑᐃᓯᕐᕕᒃ ᐃᓘᓐᓇᖏᓐᓄᑦ ᐱᓇᓱᐊᕈᑕᐅᓯᒪᓪᓗᓂ ᐃᓄᓐᓄᑦ, ᑲᓇᑕᐅᑉ ᒐᕙᒪᒃᑯᖏᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ ᐱᙳᖅᑎᑕᐅᓂᑰᒻᒪᑦ, ᐱᒻᒪᕆᐅᓪᓗᓂᓗ ᖃᐅᔨᒪᔭᐅᔭᕆᐊᖃᕐᓂᖓ ᐅᓪᓗᒥ ᖁᕕᐊᓲᑕᐅᓂᖓ ᐊᒻᒪᓗ ᒪᑐᐃᖅᑕᐅᓂᖓ ᑲᔪᓯᒐᔭᓚᐅᙱᒻᒪᑦ ᐱᓇᓱᐊᕈᑎᖃᓚᐅᙱᑉᐸᑕ ᐃᓄᐃᑦ ᖁᑦᑎᑦᑐᒥᐅᑦ. ᓄᓇᓖᑦ ᓲᕐᓗ Hᐊᒪᓚᒃᑯᖏᑦ ᖃᐅᓱᐃᑦᑐᕐᒥᐅᑦ ᐊᔅᓱᕈᐊᖃᕐᓯᒪᒻᒪᑕ ᑭᓪᓕᒋᓂᐊᖅᑕᖓᓂᒃ ᒥᕐᖑᐃᓯᕐᕕᐅᑉ ᓴᐳᑎᔭᐅᓯᒪᑦᑎᐊᖁᓪᓗᒋᑦ ᖁᑦᑎᑦᑑᑉ ᑐᑦᑐᖏᑦ ᐊᒻᒪᓗ ᓇᔪᒐᕆᕙᑦᑕᖏᑦ.

ᑭᓯᐊᓂᓕ, ᐱᒻᒪᕆᐅᓯᒋᐊᓚᐅᕐᓯᒪᕗᖅ ᖃᐅᓱᐃᑦᑐᖅ ᒥᕐᖑᐃᓯᕐᕕᐅᑉ ᓯᕗᓂᐊᒍᑦ 1950ᖏᓐᓂ ᐃᓄᐃᑦ ᐊᐅᓪᓛᖅᑎᑕᐅᒻᒪᑕ ᖃᐅᓱᐃᑦᑐᕐᒧᑦ. ᑕᒪᓐᓇ ᐱᒻᒪᕆᐊᓘᓪᓗᓂ ᐱᖅᑯᓯᖅᑎᒍᑦ ᐊᑐᖅᑕᐅᖃᑦᑕᕐᓯᒪᒻᒪᑦ ᓇᓕᑐᐃᓐᓇᖏᓐᓄᑦ ᐃᓄᓐᓄᑦ ᓄᓇᓕᐅᔪᓄᑦ ᐊᕐᕌᒍᓂᑦ ᐊᓂᒍᖅᑐᓂᑦ. 4,500 ᐊᕐᕌᒍᑦ ᐊᓂᒍᖅᑐᑦ ᑕᐃᔅᓱᒪᓂᑐᖄᓗᒃ ᐃᓄᒋᐊᙵᒥᓃᑦ ᐱᖓᓱᑦ ᑐᖏᓕᕇᑦ ᑕᒫᓂ ᓄᓇᖃᖅᑐᑐᖃᐅᓯᒪᒻᒪᑕ.

ᓂᕐᔪᑏᑦ ᑕᒫᓂ ᐊᓐᓇᐅᒪᑎᑦᑎᓯᒪᒻᒪᑕ ᓂᕿᒋᔭᐅᓪᓗᑎᒃ ᐃᓄᓐᓄᑦ ᐊᕐᕌᒍᒐᓴᕐᔪᐊᕌᓗᓐᓂᑦ. ᒥᕐᖑᐃᓯᕐᕕᕈᖅᑎᑕᐅᓂᖓ, ᐊᒻᒪᓗ ᐊᐅᓚᑦᑎᖃᑎᒌᓐᓂᖏᓐᓄᑦ ᐃᓄᐃᑦ ᖁᑦᑎᑦᑐᒥᐅᑦ, ᑲᑐᔾᔨᖃᑎᖃᖅᑐᑎᒃ ᒐᕙᒪᑐᖃᒃᑯᓐᓂ, ᖃᐅᔨᒪᑦᑎᐊᕈᑕᐅᓂᐊᖅᑐᖅ ᖃᐅᓱᐃᑦᑐᖅ ᐊᒻᒪᓗ ᐊᓯᕝᕙᖏᑦ ᐃᖃᓗᒐᓱᕝᕕᒋᕙᑦᑕᖏᓪᓗ ᐊᑐᖅᑕᐅᖏᓐᓇᖃᑦᑕᓂᐊᕐᓂᖏᓐᓂᒃ ᑭᖑᕚᖏᓐᓄᑦ ᓯᕗᓂᔅᓴᑎᓐᓂ.

ᐃᓄᐃᑦ ᖃᐅᔨᒪᔭᑐᖃᖏᑦ – ᐊᒻᒪᓗ ᐃᓄᐃᑦ ᐅᓂᒃᑳᕆᖃᑦᑕᕐᓯᒪᔭᖏᑎᒍᑦ ᐅᖃᐅᓯᒃᑯᑦ ᐱᒻᒪᕆᐅᒻᒪᑕ ᐊᐅᓚᑕᐅᖃᑦᑕᕐᓂᖏᓐᓄᑦ ᑕᐃᔅᓱᒪᓂᓴᐃᑦ ᐃᑦᑕᕐᓂᓴᐃᓪᓗ ᒥᕐᖑᐃᓯᕐᕕᒻᒦᑦᑐᑦ. ᐃᓄᐃᑦ ᖃᐅᔨᒪᔭᑐᖃᖏᑦ ᐃᒻᒧᐊᓃᒻᒪᑕ ᑐᑭᓕᐅᖅᑕᐅᖃᑦᑕᕐᓂᖏᓐᓄᑦ ᐊᑐᖅᑕᐅᖃᑦᑕᕐᓯᒪᔪᑐᖃᐃᑦ ᖃᐅᓱᐃᑦᑐᖅ ᒥᕐᖑᐃᓯᕐᕕᒻᒥ. ᖁᕕᐊᓱᓪᓚᕆᑉᐳᒍᑦ ᖃᐅᔨᑎᑦᑎᔭᕆᐊᔅᓴᖅ ᑕᒪᒃᑯᓂᖓ ᖃᐅᔨᒪᔭᐅᓕᕐᐸᓪᓕᐊᓯᒪᔪᓂᑦ ᑭᖑᕚᕇᓄᑦ ᐃᓄᓐᓄᑦ ᑲᑐᔾᔨᖃᑎᒋᕙᑦᑕᑎᓐᓄᑦ ᒥᕐᖑᐃᓯᕐᕕᓕᕆᔨᒃᑯᓐᓂ ᑲᓇᑕᒥ ᑕᐃᒫᒃ ᖃᐅᔨᒪᑦᑎᐊᕐᓂᐊᕋᑦᑕ ᐊᐅᓚᑕᐅᑦᑎᐊᓂᐊᕐᓂᖓᓂᒃ ᖃᐅᓱᐃᑦᑑᑉ ᕿᑐᕐᖓᑎᓐᓄᑦ ᕿᑐᕐᖓᖏᓐᓄᓪᓗ.

ᖁᕕᐊᓲᑎᖃᕐᓂᖅ ᐊᑑᑎᖃᑦᑎᐊᖅᑐᖅ, ᑖᔅᓱᒥᖓᑐᐊᑯᓗᒃ ᑲᔪᓯᑎᑕᑦᑎᓐᓂᒃ ᐱᔾᔪᑎᖃᕐᓇᑕ, ᑭᓯᐊᓂᓕ ᐱᕕᖃᕈᑎᒋᓂᐊᕋᑦᑎᒍ ᓄᑖᓂᑦ ᐱᓕᕆᖃᑎᒌᒍᑎᖃᕐᓂᕐᒥᒃ ᐊᒻᒪᓗ ᑐᙵᕕᓕᐅᕐᓂᕐᒥᒃ ᓯᕗᓂᔅᓴᑎᖃᑦᑎᐊᖁᓪᓗᑕ. ᐅᓪᓗᒥ ᑕᒫᓂ ᓇᖏᖅᑐᖓ, ᐃᖅᑲᐅᒪᕙᒃᑲ ᓯᕗᓕᕗᑦ ᐊᒻᒪᓗ ᐃᑉᐱᒍᓱᑦᑎᐊᕐᓂᕆᓚᐅᖅᑕᖏᑦ ᑕᒪᑐᒥᖓ ᐊᕙᑎᑦᑎᓐᓂᒃ ᓈᒪᑦᑎᐊᖅᑐᒥᒃ, ᐅᔾᔨᕆᑦᑎᐊᕆᓪᓗᒋᓪᓗ ᐱᔭᕆᐊᑐᔪᐊᓗᒃᑰᖃᑦᑕᕐᓯᒪᒻᒪᑕ ᐃᓄᐃᑦ ᖁᑦᑎᑦᑐᒥ ᐊᐅᓪᓛᖅᑎᑕᐅᒻᒪᑕ ᖃᐅᓱᐃᑦᑐᕐᒧᑦ – ᑭᓯᐊᓂᓕ ᐊᖏᓂᕐᐹᖑᓪᓗᒍ ᑕᑯᓐᓈᖅᑕᕋ ᓯᕗᓂᔅᓴᑎᓐᓂ ᓂᕆᐅᒋᔭᔅᓴᖃᕐᓂᐊᕐᓂᖏᑦ ᐃᓄᐃᑦ ᑕᒫᓂᒥᐅᑦ.

ᐋᖅᑭᓱᖅᑕᐅᓯᒪᓂᖏᑦ ᖃᐅᓱᐃᑦᑐᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᑐᙵᕕᓕᐅᕈᑕᐅᓯᒪᕗᑦ ᐃᓄᓐᓄᑦ ᖁᑦᑎᑦᑐᒥᐅᓄᑦ ᐊᒻᒪᓗ ᖃᐅᓱᐃᑦᑐᕐᒥᐅᓄᑦ ᐱᕚᓪᓕᕈᑎᖃᐃᓐᓇᖃᑦᑕᖁᓪᓗᒋᑦ ᒥᕐᖑᐃᓯᕐᕕᒻᒥᑦ ᑕᒫᙵᑦ ᐅᓪᓗᒥ ᓯᕗᓂᕆᓂᐊᖅᑕᑎᓐᓂᓪᓗ.

ᐊᖏᖃᑎᒌᒍᑦ ᓇᓗᓇᐃᒃᑯᑕᐅᕗᖅ ᐋᖅᑭᑦᑕᐅᓂᖓ, ᐊᐅᓚᑕᐅᓂᖓ ᐊᐅᓚᓂᕆᓂᐊᖅᑕᖓᓗ ᖃᐅᓱᐃᑦᑑᑉ ᐊᑕᓂᐊᕐᖓᑦ ᐃᓄᐃᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᓐᓄᑦ. ᓴᐳᔾᔨᒍᑕᐅᓂᐊᕐᖓᑦ ᓂᕐᔪᑎᓄᑦ ᓇᔪᒐᓪᓗᐊᑕᐅᕙᑦᑐᓂᑦ ᐊᒻᒪᓗ ᐊᖅᑯᑕᐅᕙᑦᑐᓂᑦ, ᓄᕐᕆᐅᕐᕕᐅᕙᑦᑐᓂᑦ, ᐅᑭᐊᓪᓕᕕᐅᕙᑦᑐᓂᓪᓗ ᓄᖑᓕᕐᓂᕋᖅᑕᐅᓯᒪᔪᓄᑦ ᖁᑦᑎᑦᑑᑉ ᑐᑦᑐᖏᓐᓄᑦ, ᐊᒻᒪᓗᑦᑕᐅᖅ ᓇᔪᒐᕆᕙᑦᑕᖏᓐᓂᒃ ᐅᒥᖕᒪᐃᑦ, ᐅᑭᐅᖅᑕᖅᑐᒥ ᐊᒪᖅᑯᐃᑦ, ᑎᕆᒐᓐᓂᐊᑦ, ᐊᕕᙵᐃᑦ ᐅᑲᓖᓪᓗ. ᐃᓘᓐᓇᑎᒃ, ᐱᒻᒪᕆᐊᓘᒻᒪᑕ ᓄᓇᒥᐅᑕᐅᓪᓗᑎᒃ ᐃᓄᓐᓄᑦ ᓄᓇᓕᓐᓄᑦ.

ᓯᕗᓂᔅᓴᑎᓐᓄᑦ ᑕᑯᓐᓈᕐᓂᖅ ᑭᖑᕚᕆᓂᐊᖅᑕᕗᑦ ᐱᔾᔪᑎᒋᓪᓗᒋᑦ, ᖃᐅᓱᐃᑦᑐᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᒪᑭᒪᓇᓱᐊᕈᑎᔅᓴᓂᑦ ᓴᖅᑭᑎᑦᑎᒻᒪᑕ ᐃᓄᓐᓄᑦ ᐱᓕᕆᔪᓐᓇᕐᓯᕙᓪᓕᐊᓂᕐᒧᑦ ᐊᒻᒪᓗ ᐱᕚᓪᓕᕈᑎᖃᕈᓐᓇᓂᕐᒧᑦ ᐃᖅᑲᓇᐃᔮᔅᓴᓂᑦ ᐊᒻᒪᓗ ᐱᓕᕆᕕᖃᕐᓂᕐᒧᑦ ᐱᓇᓱᐊᕋᔅᓴᓂᑦ ᒥᕐᖑᐃᓯᕐᕕᓕᕆᓂᕐᒨᖓᔪᓂᑦ.

ᑖᔅᓱᒪ ᒪᑐᐃᖅᑕᐅᓂᖓ ᖃᐅᓱᐃᑦᑑᑉ ᐃᒫᒃ ᑐᑭᓕᒃ ᐃᖅᑲᓇᐃᔮᖑᓪᓚᕆᒋᐊᖃᕐᓂᐊᕐᖓᑕ ᑖᒃᑯᐊ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᑲᔪᓯᑎᑕᐅᒋᐊᓕᕐᓗᑎᒃ. ᐱᓇᓱᐊᕈᓯᐅᓂᐊᖅᑐᓂᑦ ᑕᖅᑭᐅᓂᐊᖅᑐᓂᓪᓗ ᐊᒥᓲᙱᑦᑐᓂᑦ ᑲᑎᖃᑎᒋᖃᑦᑕᕐᓂᐊᕋᑦᑎᒍ ᖃᐅᓱᐃᑦᑐᕐᒥᐅᑦ ᑲᑎᒪᒍᑎᖃᖃᑦᑕᕐᓗᑕ ᖃᓄᖅ ᐃᓱᒪᒋᒻᒪᖔᕐᓯᐅᒃ ᑲᔪᓯᑎᑕᐅᓂᐊᕐᓂᖏᓐᓂᒃ ᑕᒪᒃᑯᐊ ᐃᖅᑲᓇᐃᔮᖑᔭᕆᐊᖃᕐᓂᐊᖅᑐᑦ. ᓄᓇᓕᓐᓂᑦ ᑐᓴᕈᒪᓂᐊᕋᑦᑕ ᐃᓱᒪᒋᔭᖏᓐᓂᒃ ᐊᒻᒪᓗ ᓄᐊᑉᐸᓪᓕᐊᓗᒋᑦ ᐃᓱᒪᒋᔭᐅᔪᑦ ᖃᓄᖅ ᖃᐅᓱᐃᑦᑐᕐᒥ ᐊᖏᖃᑎᒌᒍᑦ ᐊᑑᑎᖃᕐᓂᐊᕐᒪᖔᖅ ᓯᕗᓂᔅᓴᕆᓂᐊᖅᑕᓯᓐᓄᑦ.

ᑭᖑᓪᓕᕐᐹᒥ, ᖃᐅᔨᒪᖁᔨᔪᖓ ᖃᐅᓱᐃᑦᑐᖅ ᓇᓗᓇᐃᒃᑯᑕᐅᒻᒪᑦ ᐃᑲᔫᑎᖃᕐᓯᒪᓂᖏᓐᓄᑦ ᐃᓄᐃᑦ ᑲᓇᑕᒥ ᐊᑐᖅᑕᐅᖃᑦᑕᕐᓯᒪᔪᓄᑦ, ᑲᓇᑕᐅᔾᔪᑎᖓᓄᑦ ᐊᒻᒪᓗ ᐊᐅᓚᑦᑎᕕᖃᕐᓂᖓᓄᑦ ᐅᑭᐅᖅᑕᖅᑐᒥ. ᑖᓐᓇ ᒥᕐᖑᐃᓯᕐᕕᒃ ᖃᐅᔨᒪᔾᔪᑕᐅᓂᐊᓕᖅᑐᖅ ᑲᔪᓯᑎᑦᑎᒍᓐᓇᓂᑦᑎᓐᓂᒃ ᑲᑐᔾᔨᖃᑎᒌᖃᑦᑕᕈᑦᑕ ᐃᓱᒪᒋᓪᓗᒍ ᓴᐃᒻᒪᖃᑎᒌᓐᓂᖅ. ᖃᐅᓱᐃᑦᑐᖅ ᐊᒻᒪᓗ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᑐᓐᓂᖅᑯᑎᒋᒐᑦᑎᒍ ᐃᓄᓐᓄᑦ ᑕᒫᓂ ᓄᓇᓕᓐᓄᑦ – ᑕᑯᔪᒥᓇᙳᓱᑦᑐᖅ ᐃᑲᔫᑎᖃᕐᓂᖓᓂᒃ ᓄᓇᓕᖁᑎᑦᑎᓐᓄᑦ ᐱᕙᓪᓕᐊᑎᓪᓗᒋᑦ ᒪᑭᑉᐸᓪᓕᐊᑎᓪᓗᒋᓪᓗ ᓯᕗᓂᕆᐊᓂᖅᑕᑎᓐᓂ.

ᖁᔭᓐᓇᒦᒃ