ᐃᖃᓗᐃᑦ, ᓄᓇᕗᑦ – ᓄᕖᕝᕙ  6, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐃᑲᔪᖅᑐᑦ ᐃᓄᖕᒥᒃ ᓇᓗᓇᐃᖅᑕᐅᓯᒪᔪᒥᒃ ᓄᕙᓐᓇᕐᔪᐊᖅ-19ᒥ ᓴᓂᑭᓗᐊᕐᒥ, ᐃᓚᖏᓐᓂᓗ ᐊᒻᒪᓗ ᓄᓇᖅᑲᑎᒋᔭᐅᔪᓂᒃ.

ᒫᓐᓇᐅᓂᖓᓂᒃ, ᕿᑭᖅᑕᓃᒃᑯᑦ ᐊᒡᓚᕝᕕᖓ ᓴᓂᑭᓗᐊᕐᒥ ᒪᑐᓯᒪᓂᐊᖅᑐᑦ ᐃᓄᖕᓄᑦ. ᐃᓄᐃᑦ ᓴᓂᑭᓗᐊᕐᒥ ᐅᖄᓚᖁᔭᐅᓯᒪᕗᑦ ᐅᕝᕙᓘᓐᓃᑦ ᓇᒃᓯᐅᔾᔨᓗᑎᒃ ᐃᕐᖐᓐᓈᕈᑎᒃᑯᑦ ᐊᐱᖅᑯᑎᒃᓴᖃᖅᑐᖃᖅᐸᑦ, ᑐᑭᓯᔪᒪᔪᖃᖅᐸᓪᓘᓐᓃᑦ.

“ᐃᓱᒪᒋᔭᐅᕗᖅ ᑖᓐᓇ ᐃᓄᒃ ᐋᓐᓂᐊᖅᑖᖅᓯᒪᔪᒥᒃ ᓄᕙᓐᓇᕐᔪᐊᖅ-19ᒥ ᐃᓚᖏᓪᓗ ᐊᒻᒪᓗ ᓄᓇᖅᑲᑎᖏᑦ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐊ ᐊᕿᐊᕈᖅ. “ᓇᓗᓇᐃᖅᓯᒍᒪᔪᒍᑦ ᑖᓐᓇ ᐋᓐᓂᐊᖅᑖᖅᓯᒪᔪᖅ ᐊᒻᒪ ᐃᓚᖏᓪᓗ ᐃᑲᔪᖅᑕᐅᑦᑎᐊᕐᓂᐊᕐᓂᖏᓐᓄᑦ ᐊᒻᒪᓗ ᑐᓂᔭᐅᓯᒪᓗᑎᒃ ᐃᓅᑑᓂᐊᖅᑎᓪᓗᒋᑦ ᐊᖏᕐᕋᒥᓂᒃ.  ᑕᐃᒪ ᒫᓐᓇ ᐃᓄᐃᑦ ᓴᖅᑭᔮᖅᑎᑦᑎᑦᑎᐊᕆᐊᖃᖅᐳᑦ ᐃᑲᔪᖅᑐᐃᑦᑎᐊᕐᓂᖏᓐᓄᑦ, ᑐᙵᓱᒃᑎᑦᑎᓗᑎᒃ ᐊᒻᒪᓗ ᓇᓪᓕᒍᓱᒡᓗᑎᒃ, ᐅᕙᒍᓕᒫᖅ ᑕᒪᑐᒥᖓ ᐊᒃᑐᖅᑕᐅᕗᒍᑦ.”

ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᖅᑐᑦ ᓄᓇᕗᑦ ᒐᕙᒪᒃᑯᓐᓂ, ᓄᓇᕗᑦ ᑐᙵᕕᒃᑯᓐᓂ, ᐊᒻᒪᓗ ᑯᐊᐸᒃᑯᓐᓂ, ᑖᒃᑯᐊ ᐃᓚᒌᑦ ᑐᓂᔭᐅᓂᐊᕐᒪᑕ ᐱᓯᒪᔭᕆᐊᖃᖅᑕᖏᓐᓂᒃ ᓱᕐᓗ ᓴᓗᒻᒪᖅᓴᐅᑎᒃᓴᓂ, ᓂᕿᓂᒃ ᐊᒻᒪᓗ ᐊᓯᖏᓐᓂᒃ ᐊᑐᕆᐊᖃᕐᓂᐊᖅᑐᒥᒃ ᐃᓄᑑᓂᐊᖅᑎᓪᓗᒍ.

ᕿᑭᖅᑕᓃᒃᑯᑦ ᐃᑲᔪᖅᑐᑦ ᓄᓇᓕᖕᒥ ᑐᓴᐅᒪᖃᑦᑕᐃᓐᓇᖅᖢᑎᒃ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐊᓂ ᐱᕙᓪᓕᐊᓂᐅᔪᓂᒃ ᑕᒪᑐᒥᖓ.

ᕿᑭᖅᑕᓃᒃᑯᑦ ᑐᓴᐅᒪᐃᓐᓇᕋᓱᐊᕐᒥᔪᑦ ᒪᐃᔭᒥᒃ ᓴᓂᑭᓗᐊᕐᒥ ᓄᓇᓕᒃ ᐃᑲᔪᖅᑐᖅᑕᐅᑦᑎᐊᕋᓗᐊᕐᒪᖔᑦ.

ᐊᐃᑉᐹᓂᒃ ᐅᐸᓗᖓᐃᔭᐅᑎᒋᔭᐅᔪᓂᒃ ᓄᕙᓐᓇᕐᔪᐊᖅ-19ᒧᑦ ᐱᓕᕆᐊᖑᔪᖅ ᐃᑲᔪᕐᓂᐊᖅᑐᑦ ᓴᓂᑭᓗᐊᕐᒥᐅᓂᒃ ᐊᓯᖏᓐᓂᓗ ᕿᑭᖅᑕᓂ ᓄᓇᓕᖕᓂ.  ᕿᑭᖅᑕᓂ ᐃᓄᐃᑦ ᑐᒃᓯᕋᕈᓐᓇᖅᑐᑦ ᐱᓇᓱᖃᑕᐅᓗᑎᒃ ᐃᑲᔫᑎᓂᒃ ᖃᕆᓴᐅᔭᒃᑯᑦ ᐃᑭᐊᖅᑭᕕᖕᒥ.  ᐊᓯᖏᑦ ᐃᑲᔫᑎᑦ ᓴᖅᑭᑕᐅᔪᒃᓴᒫᖑᔪᑦ ᐱᓇᓱᐊᕈᓯᐅᓂᐊᖅᑐᒥᒃ.

ᑭᓇᑐᐃᓐᓇᖅ ᐅᐱᕆᔭᖃᖅᐸᑦ ᐊᒃᑐᖅᑕᐅᓯᒪᓂᖏᓐᓄᑦ ᓄᕙᓐᓇᕐᔪᐊᖅ-19ᒥ ᐅᖄᓚᒋᐊᖃᖅᐳᖅ ᓄᓇᕗᑦ ᒐᕙᒪᒃᑯᑦ ᓄᕙᓐᓇᕐᔪᐊᖅ-19ᒧᑦ ᐅᖄᓚᕕᒃᓴᒧᑦ ᐅᕗᖓ  1-888-975-8601 10ᒥ ᐅᓪᓛᒃᑯᑦ 6ᒧᑦ ᐅᓐᓄᒃᑯᑦ, ᐅᕝᕙᓘᓐᓃᑦ ᑐᓴᖅᑎᑦᑎᓗᑎᒃ ᓄᓇᓕᖕᒥ ᐋᓐᓂᐊᕐᕕᖕᒥ, ᐊᒻᒪᓗ ᐃᓄᑑᒋᐊᓯᑲᐅᑎᒋᓗᓂ 14ᓄᑦ ᐅᓪᓗᓄᑦ.  ᐋᓐᓂᐊᕐᕕᓕᐊᖅᑕᐃᓕᑦᑎᐊᕆᑦ.

ᐋᓐᓂᐊᖃᖅᑐᑦ ᓄᕙᓐᓇᕐᔪᐊᖅ-19ᒥ ᐆᓇᖅᓯᖃᑦᑕᖅᑐᑦ, ᖁᐃᖅᓱᖅᖢᑎᒃ ᐅᕝᕙᓘᓐᓃᑦ ᐊᓂᖅᑎᕆᑦᑎᐊᕈᓐᓃᖅᖢᑎᒃ.  ᐱᐅᓂᖅᐹᖑᔪᖅ ᐃᖕᒥᓂᒃ ᓴᐳᑎᓯᒪᓗᓂ ᐊᒻᒪ ᓯᐊᒻᒪᒃᑎᑦᑎᑕᐃᓕᓂᕐᒥᒃ ᐅᕝᕙᓘᓐᓃᑦ ᐋᓐᓂᐊᖅᑖᖅᑕᐃᓕᓂᕐᒥᒃ, ᐊᑐᕐᓗᓯ ᒪᑐᐊᕐᓂ, ᐊᒡᒐᓯ ᐅᐊᓴᕋᔪᒡᓗᒋᑦ 20ᓯᑲᓐᓯᓂ, ᖁᐃᖅᓱᖃᑦᑕᕐᓗᑎᒃ ᑕᒋᐅᖃᑦᑕᕐᓗᑎᓪᓗ ᐃᑯᓯᕐᓄᑦ ᐊᒻᒪᓗ ᐊᖏᕐᕋᖅᓯᒪᑦᑎᐊᑐᐃᓐᓇᕐᓗᑎᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋᕼᐃ,

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742