ᐃᖃᓗᐃᑦ, ᓄᓇᕗᑦ − ᐄᐳᓗ 20, 2021 – ᐃᑉᐸᔅᓴᖅ, ᕿᒥᕐᕈᔭᐅᓚᐅᖅᑎᓪᓗᒋᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑑᑎᔅᓴᓂᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᑉᐳᑦ ᖃᐅᔨᔭᕆᐊᔅᓴᖅ ᓯᕗᓪᓕᐅᔾᔭᐅᓂᐊᖅᑐᓂᑦ ᐋᖅᑭᑦᑕᐅᕋᑖᖅᑐᓂᑦ ᒐᕙᒪᑐᖃᒃᑯᓐᓂᑦ.

“ᕿᑭᖅᑕᓂᒃᑯᑦ ᑐᙵᓱᑦᑎᑦᑎᕗᑦ ᑮᓇᐅᔭᖅᑑᑎᔅᓴᓂᑦ 2021ᒥ ᐱᓇᓱᐊᕈᑎᔅᓴᐅᓂᐊᕐᖓᑕ ᑲᔪᓯᑎᑦᑎᓗᑎᒃ ᐱᓕᕆᖃᑎᒌᓐᓂᕆᕙᑦᑕᖏᓐᓂᒃ ᐃᓄᓐᓄᑦ ᒪᑭᒪᓇᓱᐊᕈᑕᐅᓂᐊᖅᑐᓄᑦ ᐋᖅᑭᐸᓪᓕᕈᑕᐅᓂᐊᖅᑐᓂᑦ ᖃᓄᐃᓐᓂᐅᕙᑦᑐᓄᑦ ᖃᐅᑕᒫᑦ ᐃᓅᓯᕆᕙᑦᑕᖏᓐᓂᒃ ᐃᓄᐃᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᐸᐅᓗᓯ ᐊᕿᐊᕈᖅ. “ᑲᓇᑕᐅᑉ ᑲᑦᑐᖓᐃᕈᑎᒋᓯᒪᔭᖏᑦ ᐃᒪᕕᓐᓂᑦ ᓴᐳᔾᔨᓂᕐᒧᑦ, ᐱᖁᑎᕐᔪᐊᓕᕆᓂᕐᒧᑦ, ᓂᕿᔅᓴᖃᑦᑎᐊᕆᐊᖃᕐᓂᕐᒧᑦ, ᐃᓕᖅᑯᓯᓕᕆᓂᕐᒧᑦ ᒪᒥᓴᕐᓂᕐᒧᓪᓗ, ᐸᐃᕆᕕᓕᕆᓂᕐᒧᓪᓗ ᑕᑯᔾᔪᑎᒋᒐᑦᑎᒍ ᑖᒃᑯᓂᖓᔅᓴᐃᓐᓇᖅ ᐱᔾᔪᑎᖃᕐᓂᑎᓐᓂᒃ. ᐃᖅᑲᓇᐃᔮᕆᓂᐊᖅᑕᕗᑦ ᑲᑐᔾᔨᓗᑕ ᓯᕗᓂᕆᓂᐊᖅᑕᑎᓐᓂ ᑐᑭᓯᓇᕐᓯᑎᑦᑎᓂᐊᕐᖓᑕ ᖃᓄᑎᒋ ᓈᒻᒪᑦᑐᒥᒃ ᐊᑐᖅᑎᑦᑎᓂᖃᕐᒪᖔᑕ ᑖᒃᑯᐊ ᑲᑦᑐᖓᐃᕈᑕᐅᔪᑦ ᐃᓄᓐᓄᑦ.”

ᕿᑭᖅᑕᓂᒃᑯᑦ ᓂᕆᐅᒋᔭᖃᑦᑎᐊᓚᐅᕐᖓᑕ ᑖᒃᑯᓂᖓ ᓯᕗᓪᓕᕐᓂᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑑᑎᔅᓴᓂᑦ ᓴᖅᑭᖅᑕᐅᓯᒪᔪᓂᑦ ᒪᕐᕉᓐᓂᒃ ᐊᕐᕌᒎᓐᓂᒃ. ᑮᓇᐅᔭᐃᑦ ᐊᑐᐃᓐᓇᕈᖅᑎᑕᐅᓯᒪᔪᑦ ᐱᓇᓱᐊᕈᑕᐅᒋᐊᒃᑲᓂᕐᓂᐊᕐᖓᑕ ᕿᑭᖅᑕᓂᒃᑯᑦ ᑐᕌᒐᖓᓐᓄᑦ ᐊᔾᔨᒌᙱᑐᒡᒍᑎᓂᑦ ᐃᓄᓐᓄᑦ ᒪᑭᒪᓇᓱᐊᕈᑎᒋᕙᑦᑕᖏᓐᓄᑦ ᓯᕗᓂᔅᓴᑎᓐᓂ ᐊᕐᕌᒍᓂᑦ ᐊᒡᒋᖅᑐᓂ.

ᕿᑭᖅᑕᓂᒃᑯᑦ ᑐᙵᓱᑦᑎᑦᑎᕗᑦ ᓯᕗᓪᓕᐅᔾᔭᐅᓂᖏᓐᓂᒃ ᐸᐃᕆᔨᖃᖃᑦᑕᕆᐊᖃᕐᓂᕐᒧᑦ ᐸᕐᓇᐅᑎᓂᑦ, ᑖᒃᑯᐊ ᓈᒻᒪᑎᐊᖅᑐᑎᒃ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐱᕈᕐᐸᓪᓕᐊᑎᑦᑎᔾᔪᑎᒋᓇᓱᐊᖅᑕᖏᓐᓄᑦ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒧᑦ ᐸᐃᕆᕕᓕᕆᓂᕐᒧᓪᓗ.

ᓄᓇᕗᑦ ᖃᓂᒪᓇᖅᑐᒧᑦ ᑎᑭᑕᐅᓯᒪᓕᖅᑎᓪᓗᒍ, ᑲᓇᑕᐅᑉ ᐃᑲᔫᑎᒋᕙᑦᑕᖏᑦ ᓄᓇᖃᖅᑐᑐᖃᐃᑦ ᓄᓇᓕᖏᓐᓄᑦ ᐃᑲᔫᑎᑎᒍᑦ ᑮᓇᐅᔭᓂᑦ ᖃᐅᔨᒪᑦᑎᐊᕈᑕᐅᓂᐊᕐᖓᑕ ᕿᑭᖅᑕᓂᒃᑯᑦ ᑲᔪᓯᑎᑦᑎᒍᓐᓇᓂᐊᕐᓂᖏᓐᓂᒃ ᐃᓄᓐᓄᑦ−ᑐᕌᖓᔪᓂᑦ ᖃᓂᒪᓇᖅᑐᖅᑕᖃᕐᓂᖓᓂ ᐃᑲᔫᑎᔅᓴᓂᑦ.

ᕿᑭᖅᑕᓂᒃᑯᑦ ᒫᓐᓇ ᑲᑎᒪᑎᑦᑎᖃᑦᑕᕐᓂᐊᓕᖅᑐᑦ ᒐᕙᒪᑐᖃᒃᑯᓐᓂᑦ ᒥᓂᔅᑕᐅᔪᓂᑦ, ᐊᖏᔪᖅᑲᐅᑎᐅᔪᓂᑦ ᐊᒻᒪᓗ ᐃᓄᓐᓄᑦ ᑎᒥᐅᖃᑎᖏᓐᓂᒃ ᑲᒪᒋᔭᖃᕐᐸᓪᓕᐊᓯᓂᐊᕐᖓᑕ ᑮᓇᐅᔭᓂᑦ ᐊᑐᕐᓂᐊᖅᑕᖏᓐᓂᒃ ᐃᓕᔭᐅᔪᓂᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑑᑎᔅᓴᑎᒍᑦ. ᕿᑭᖅᑕᓂᒃᑯᑦ ᐅᖃᐅᓯᖃᒃᑲᓐᓂᕈᒫᕐᓂᐊᖅᑐᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖅᑐᑎᔅᓴᐃᑦ ᒥᔅᓵᓅᖓᔪᓂᑦ ᑐᑭᓯᐅᒪᔾᔪᑎᔅᓴᑲᓐᓂᕐᓂᑦ ᑐᓴᖅᑎᑕᐅᓯᒪᓕᖅᑲᑕ ᖃᓄᖅ ᐸᕐᓇᐃᓯᒪᒻᒪᖓᑕ ᐊᑐᓕᖅᑎᑦᑎᓂᐊᕐᓂᖏᓐᓂᒃ ᑮᓇᐅᔭᖅᑑᑎᔅᓴᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᐅᓇ:

ᐅᐃᓪ Hᐊᑉᑭᓐᔅ,
ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᒧᑦ ᑐᓴᐅᒪᖃᑦᑕᐅᑎᑎᑦᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413/1.800.667.2742