ᑖᓐᓇ ᐱᔾᔪᑎᖃᖅᑐᑎᒃ ᓄᓇᓕᓐᓂᑦ ᖁᕕᐊᓲᑎᖃᕐᓂᐅᓚᐅᖅᑐᖅ ᓂᕆᕕᔾᔪᐊᕐᓂᐅᓚᐅᖅᑐᓂᓗ. ᑐᑭᓯᑎᑦᑎᒋᐊᕈᒪᓯᒪᓚᐅᕋᑦᑕ ᐃᒃᐱᐊᕐᔪᒻᒥᐅᓄᑦ ᐃᖅᑲᓇᐃᔮᕆᓯᒪᔭᖏᑕ ᒥᔅᓵᓄᑦ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑕ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓕᕆᓂᕐᒥ, ᑭᓯᐊᓂᑦᑕᐅᖅ ᖁᕕᐊᓲᑎᖃᕈᒪᓯᒪᓚᐅᕐᒥᒐᑦᑕ ᐅᐊᑦᑎᔩᑦ ᐆᑦᑐᕋᐅᑕᐅᓪᓗᓂ ᐱᓕᕆᐊᑉ ᒥᔅᓵᓄᑦ.

ᑖᒃᑯᐊ ᐃᓄᓐᓂᑦ ᐅᐊᑦᑎᔨᖃᕐᓂᕐᒧᑦ ᐱᓕᕆᐊᖅ ᐋᖅᑭᑦᑕᐅᔪᒻᒪᑦ ᕿᑭᖅᑕᓂᒃᑯᓐᓂᑦ ᔪᓚᐃᖑᑎᓪᓗᒍ ᑮᓇᐅᔭᖅᑖᕐᓯᒪᓪᓗᑎᒃ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ. ᐊᖏᕈᑎᑎᒍᑦ ᓯᕗᕙᓯᑦᑐᒥᒃ ᐱᕚᓪᓕᕈᑎᔅᓴᖅᑖᕈᑕᐅᓪᓗᓂ ᑕᓪᓗᕈᑎᐅᑉ ᐃᒪᖓᓂ ᓴᐳᔾᔨᕕᔅᓴᖅ ᐱᔾᔪᑎᒋᓪᓗᒍ. ᐱᓕᕆᐊᖅ ᐃᖅᑲᓇᐃᔭᖅᑎᑦᑎᒍᑕᐅᔪᖅ ᑕᓪᓕᒪᓂᑦ ᐅᐊᑦᑎᔨᓂᑦ ᐅᐊᑦᑎᖃᑦᑕᓂᐊᖅᑐᓂᑦ ᐃᒫᓂ ᖃᓂᒋᔭᖓᓂ ᐃᒃᐱᐊᕐᔫᑉ.

ᐃᒃᐱᐊᕐᔪᒻᒥᐅᑦ ᖁᕕᐊᓲᑎᖃᑦᑎᐊᔪᔪᑦ ᐱᓇᓱᐊᕈᓯᐅᔪᔪᒥ. ᐅᐊᑦᑎᔩᑦ ᐊᖑᓇᓱᒋᐊᔪᔪᑦ ᓇᑦᑎᖅᑐᑎᓪᓗ ᐃᖃᓗᐊᓪᓗᑎᓪᓗ. ᓄᓇᖓᓐᓂ ᐊᖑᓇᓱᑦᑎ ᒪᒃᑖᑖᖅᑎᑦᑎᔪᒻᒥᔪᖅ ᐊᒻᒪᓗ ᑕᒧᓗᒐᔅᓴᓕᐅᖅᑎ ᒪᕐᕉᓐᓂᒃ ᐊᖏᔪᐊᓘᓐᓂᒃ ᑲᐃᓕᐅᔪᒋᓪᓗᓂ ᖁᕕᐊᓲᑕᐅᓂᐊᖅᑑᓐᓂᒃ ᐅᐊᑦᑎᔨᓄᑦ. ᓂᕆᖃᑎᒌᓗᐊᔪᔪᒍᑦ, ᐃᓪᓚᕋᓴᑦᑐᑕᓗ ᐊᒻᒪᓗ ᐊᒧᓯᖃᑦᑕᖅᑐᑕ ᐱᐅᔫᑎᐊᓗᓐᓂᑦ ᓵᓚᖃᐅᓯᐊᕐᓂᐊᖅᑐᓂᑦ ᐊᓪᓛᑦ ᖃᕋᓴᐅᔭᕋᓛᖅᑕᖃᖅᑐᓂ.

ᑲᑎᒪᓂᕐᒥ ᐱᕕᖃᔪᒻᒥᔪᒍᑦ ᕿᑭᖅᑕᓂᒃᑯᑦ ᐋᔩᕋᖅᑎᓪᓗᐊᑕᖓᑦ, ᓵᓐᑐᕋ ᐃᓅᑎᖅ ᐅᖃᐅᓯᖃᕐᓂᕐᒥᒃ ᕿᑭᖅᑕᓂᒃᑯᑦ ᐃᖅᑲᓇᐃᔮᕆᓯᒪᔭᖏᑕ ᒥᒡᓵᓄᑦ ᑕᓪᓗᕈᑎᐅᑉ ᐃᒪᖓᓄᑦ ᐊᖏᕈᑎᓂᑦ ᐋᔩᖃᑎᒌᒍᑎᖃᕐᓂᕐᒥᒃ.

ᐃᓚᒋᓪᓗᓂᐅᒃ ᑐᑭᓯᑎᑦᑎᒋᐊᕈᑎᖓᑕ ᐃᓅᑎᖅ ᑕᑯᓐᓈᑎᑦᑎᔪᔪᖅ ᑕᑯᓐᓇᕋᔅᓴᓕᐊᖑᓯᒪᔪᒥᒃ ᕿᑭᖅᑕᓂᒃᑯᑦ ᓴᓇᓯᒪᔭᖓᓐᓂᒃ ᐅᐊᑦᑎᔩᑦ ᒥᔅᓵᓄᑦ, ᑖᓐᓇ ᖁᕕᐊᒋᔭᐅᑦᑎᐊᔪᔪᖅ ᑕᑯᕋᓐᓂᕆᔭᐅᑦᑎᐊᖅᑐᓂᓗ.

ᓯᕗᓂᐊᒍᓪᓕ ᐅᓪᓗᒃᑯᑦ, ᐃᓅᑎᖅ ᑕᐃᒫᔅᓴᐃᓐᓇᒐᓚᒃ ᑲᑎᒪᑎᑦᑎᔪᔪᖅ Hᐊᒪᓚᒃᑯᑦ ᑲᑎᒪᔨᖏᓐᓂᑦ, ᐊᖑᓇᓱᑦᑐᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᕐᓂᑦ. ᖁᕕᐊᒋᔭᐅᑦᑎᐊᔪᔪᑦ ᑲᑎᒪᓂᖓᓐᓂ ᕿᑭᖅᑕᓂᒃᑯᑦ ᐃᖅᑲᓇᐃᔮᕆᓯᒪᔭᖏᑕ ᒥᔅᓵᓄᑦ ᐊᖏᕈᑎᓕᕆᓂᕐᒥ ᐊᒻᒪᓗ ᐱᓇᓱᐊᕈᑎᖏᓐᓂᒃ ᐋᖅᑮᓇᓱᓐᓂᕐᒧᑦ ᐃᒪᓂ ᐊᐅᓚᔾᔪᑎᔅᓴᓂᑦ ᐊᒻᒪᓗ ᐃᖅᑲᓇᐃᔮᔅᓴᑦᑎᐊᕙᐅᒐᔭᖅᑐᓂᑦ ᐃᓄᓐᓄᑦ.

ᑕᓪᓗᕈᑎᐅᑉ ᐃᒪᖓᓄᑦ ᐊᖏᕈᑏᑦ ᐋᔩᕋᕈᑕᐅᒍᒫᕐᓂᐊᖅᑐᑦ ᒥᕐᖑᐃᓯᕐᕕᓕᕆᔨᒃᑯᓐᓂᑦ ᑲᓇᑕᒥ ᐄᐳᓗ 2019 ᖃᓂᒋᔮᓂ.