ᒪᑐᐃᖓᓕᖅᑐᑦ ᑐᒃᓯᕋᐅᑎᓕᐅᕈᒪᔪᓄᑦ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᔭᒃᓴᓕᐊᖓᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᒃᓯᕋᐅᑎᓕᐅᕈᒪᔪᓂᒃ ᒪᓂᒪᑎᑦᑎᓕᕐᒥᒻᒪᑕ ᑕᒪᑐᒧᖓ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᖓᓄᑦ (CIP).
ᑖᓐᓇ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᔭᒃᓴᖓᑦ ᐊᑐᐃᓐᓇᖃᖅᑎᑦᑎᕙᑦᑐᖅ ᑮᓇᐅᔭᓂᒃ ᐱᓕᕆᐊᒃᓴᕆᔭᐅᔪᒪᔪᓄᑦ ᑐᕌᖓᔪᓂᒃ ᓄᓇᓕᒻᒥ ᐱᔪᓐᓇᕐᓂᐅᔪᓂᒃ ᐱᕙᓪᓕᐊᑎᑦᑎᓂᕐᒥᒃ, ᖃᑭᒋᐊᖅᑎᑦᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ, ᐱᕙᓪᓕᐊᔾᔪᑎᒃᓴᓕᕆᓂᕐᒧᑦ, ᐃᓅᓯᕐᓅᖓᔪᓂᒃ, ᐋᓐᓂᐊᖅᑕᐃᓕᓂᕐᒨᖓᔪᓂᒃ ᐊᒻᒪᓗ ᖃᓄᐃᑦᑕᐃᓕᓂᕐᒨᖓᔪᓂᒃ ᐊᒻᒪᓗ ᓴᐳᔾᔨᓂᕐᒥᓪᓗ ᐊᕙᑎᑦᑎᓐᓂ.
“ᐅᐱᒋᔭᒃᑲᑦ ᑖᒃᑯᐊ ᐊᔾᔨᒌᓐᖏᑦᑑᔪᑦ ᓴᖅᑭᑎᑕᐅᓯᒪᔪᑦ ᐃᓅᓱᑦᑐᓄᑦ ᑐᕌᖓᔪᓂᒃ, ᐃᓕᖅᑯᓯᕐᒨᖓᔪᓂᒃ ᐊᒻᒪᓗ ᐱᓐᖑᐊᖅᑐᓕᕆᔪᓂᓗ ᐱᔭᒃᓴᕆᔭᐅᖃᑦᑕᖅᓯᒪᔪᓄᑦ ᓄᓇᓕᓐᓂ ᕿᑭᖅᑖᓗᒻᒥ ᐋᖅᑭᒃᓱᖅᑕᐅᓯᒪᔪᓂᒃ ᑮᓇᐅᔭᖃᖅᑎᑕᐅᓯᒪᑎᓪᓗᒋᑦ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᔭᒃᓴᓕᐊᖓᓂᑦ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ.
ᐊᔾᔨᒌᓐᖏᑦᑐᑦ ᐃᑲᔪᖅᑕᐅᓯᒪᔪ ᐃᒪᐃᓕᐅᖅᓯᒪᔪᓂ ᓅᒍᔾᔨᓂᕐᒧᑦ ᐊᒻᒪ ᐅᒪᔪᖅᓯᐅᕐᓂᕐᒧᑦ ᐊᒻᒪᓗ ᐃᓕᓐᓂᐊᕐᕕᓐᓂ ᓂᕿᑦᑎᐊᕙᓕᕐᓂᕐᒥᒃ ᐊᒻᒪᓗ ᓂᔾᔭᐅᓯᔭᕐᓂᕐᓄᑦ ᑐᕌᖓᔪᓄᑦ, ᕿᑭᖅᑕᓃᒃᑯᑦ ᐱᔭᒃᓴᖓᑦ ᐃᑲᔪᖅᓯᒪᔪᖅ ᐃᓄᐃᑦ ᐃᓅᓯᖏᓐᓂᒃ ᕿᑭᖅᑖᓗᒻᒥ.
“ᐊᕐᕌᓂ ᐸᓐᓂᖅᑑᒥ ᓂᔾᔭᐅᓯᔭᕐᓂᐅᓚᐅᖅᑐᖅ ᖁᕕᐊᒋᔭᐅᒻᒪᕆᓚᐅᖅᑐᖅ ᑮᓇᐅᔭᑎᒍᑦ ᐃᑲᔪᖅᑕᐅᔪᓐᓇᓚᐅᕋᑦᑕ ᕿᑭᖅᑕᓃᒃᑯᑦ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᔭᒃᓴᓕᐊᖓᒍᑦ,” ᐅᖃᖅᑐᖅ ᐱᓕ ᐃᑦᑐᐊᓐᖓᑦ, ᐸᓐᓂᖅᑑᒥ ᓂᔾᔭᐅᓯᔭᕐᓂᕐᒧᑦ ᐃᒃᓯᕙᐅᑕᖓ.
“ᑖᒃᑯᐊ ᑮᓇᐅᔭᐃᑦ ᐃᑲᔪᕈᓐᓇᓚᐅᖅᑐᑦ ᑎᑭᑎᑦᑎᔪᓐᓇᖅᖢᑕ ᖃᐅᔨᒪᔭᐅᒻᒪᕆᒃᑐᓂᒃ ᓂᔾᔭᐅᓯᔭᖅᑎᐅᔪᓂᒃ ᑐᕕᓐ ᕙᓚᐃᒻᔅᑯᓐᓂ ᓂᔾᔭᐅᓯᔭᕐᓂᐊᕐᒪᑕ ᓄᓇᓕᑦᑎᓐᓂ. ᕼᐊᓐᑕᖏᓐᓃᑦᑐᑦ ᐊᔾᔨᓕᐅᖅᑕᐅᖃᑎᖃᓚᐅᖅᑐᑦ ᑖᒃᑯᓂᖓ ᓂᔾᔭᐅᓯᔭᓚᐅᖅᑐᓄᑦ, ᐃᓐᖏᖅᖢᑎᒃ ᐊᒻᒪᓗ ᐊᑎᓕᐅᖅᑎᑦᑎᖃᑦᑕᖅᖢᑎᓪᓗ ᐅᕕᓂᕈᒋᔭᖏᓐᓂᒃ, ᓇᒻᒪᒐᖏᓐᓂᒃ ᐊᒻᒪᓗ ᔭᐸᖏᓐᓂᓗ. ᑕᐃᒪᐃᑦᑐᓂᒃ ᐃᓄᓐᓂᑦ ᐃᔾᔨᐊᕆᔭᐅᔪᒃᓴᐅᔪᓐᓇᖅᑐᓂᒃ ᐊᔾᔨᐅᓐᖏᑦᑐᒃᑯᑦ ᓴᖅᑭᑎᑦᑎᔪᓐᓇᕐᒪ ᓄᓇᓕᑦᑎᓐᓂ.”
ᐃᑲᔫᑎᒋᔭᐅᔪᑦ ᕿᑭᖅᑕᓃᒃᑯᑦ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᔭᒃᓴᖓᓂᑦ ᐱᓕᕆᐊᒃᓴᖃᖅᑎᑦᑎᔪᓐᓇᓚᐅᕐᒥᔪᖅ ᖃᔭᖅᑐᐊᒻᒥ − ᑖᓐᓇ ᐊᖏᔪᒃᑯᑦ ᐱᓕᕆᐊᒃᓴᐅᓚᐅᖅᑐᖅ ᐃᓕᖅᑯᓯᕆᔭᐅᔪᖅ ᖃᐅᔨᒪᔭᐅᓕᒃᑲᓐᓂᖁᓪᓗᒍ ᑕᐃᒪᐃᒻᒪᑦ ᖃᔭᓕᐅᕈᓐᓇᓚᐅᖅᑐᑦ ᐃᓅᓱᑦᑐᐃᑦ ᑭᓐᖓᕐᓂᑦ, ᑭᒻᒥᕈᒻᒥᑦ, ᐃᖃᓗᓐᓂᑦ ᐊᒻᒪᓗ ᑲᖏᖅᑐᒑᐱᒻᒥᑦ.
ᑖᒃᑯᐊ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᑮᓇᐅᔭᐃᑦ ᓂᖏᖅᑕᐅᕙᑦᑐᑦ ᕿᑭᖅᑕᓃᒃᑯᑦ ᑎᒥᖁᑎᖏᓐᓂᑦ: ᕿᑭᖅᑖᓗᒃ ᑯᐊᐳᕇᓴᒃᑯᓐᓂᑦ ᐊᒻᒪᓗ ᓄᓇᓯ ᑯᐊᐳᕇᓴᒃᑯᓐᓂᑦ.
ᕿᑭᖅᑕᓃᒃᑯᑦ ᐃᓕᖅᑯᓯᓕᕆᓂᕐᒧᑦ ᐊᒻᒪ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᑲᑎᒪᔨᕋᓛᖏᑦ ᕿᒥᕐᕈᐃᖃᑦᑕᖅᑐᑦ ᑐᒃᓯᕋᐅᑎᓂ. ᑮᓇᐅᔭᓂᒃ ᑐᓂᓯᖃᑦᑕᖅᑐᑦ ᑐᒃᓯᕋᐅᑎᖏᑦ ᐃᒪᓕᖓᑐᐊᖅᑲᑕ:
- ᓄᓇᓕᓐᓂᓐᖔᖅᓯᒪᔪᑎᒃ;
- ᓇᒻᒥᓂᖅᓱᓕᕈᓐᓇᓛᖅᑐᓂᒃ ᖃᖓᒃᑲᓐᓂᐅᓕᖅᑲᑦ, ᐅᕝᕙᓘᓐᓃᑦ ᐱᕚᓪᓕᕈᑎᒃᓴᖃᖅᑎᑦᑏᓐᓇᕐᓂᐊᖅᑲᑦ ᓄᓇᓕᒻᒧᑦ ᑖᓐᓇ ᐱᓕᕆᐊᖑᔪᖅ ᐱᔭᕇᖅᓯᒪᓕᕋᓗᐊᖅᑎᓪᓗᒍ ᐊᒻᒪᓗ ᑮᓇᐅᔭᐃᑦ ᐃᓱᓕᑎᓪᓗᒋᑦ;
- ᐊᑦᑐᐃᓂᖃᕐᓂᐊᖅᑲᑦ ᐃᓱᒫᓘᑎᒋᔭᐅᔪᓂᒃ ᐃᓄᓐᓄᑦ ᓄᓇᓕᒻᒥ ᐅᕝᕙᓘᓐᓃᑦ ᕿᑭᖅᑖᓗᒻᒥ;
ᖃᓄᖅ ᑐᒃᓯᕋᕈᓐᓇᖅᑭᑦ:
ᓄᓇᓕᒻᒥᐅᑕᐃᑦ ᐊᒻᒪ ᑎᒥᐅᔪᑦ ᕿᑭᖅᑖᓗᒻᒥ ᑐᒃᓯᕋᐅᑎᓕᐅᕈᓐᓇᖅᑐᑦ ᓇᓗᓇᐃᔭᐃᓯᒪᑦᑎᐊᕐᓗᒋᑦ ᐱᓕᕆᐊᒃᓴᕆᔪᒪᓂᐊᖅᑕᖏᓐᓂ.
ᑕᑕᑎᒐᒃᓴᒥᒃ ᐱᔪᓐᓇᖅᑐᑎᑦ ᕿᑭᖅᑕᓃᒃᑯᑦ ᓄᓇᓕᓐᓂ ᑐᓴᐅᒪᑎᑦᑎᔨᐅᔪᑦ ᐊᓪᓚᕝᕕᖏᓐᓂᑦ, ᐅᖄᓚᓗᓯ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᐅᕗᖓ (1-800-667-2742/info@qia.ca), ᐅᕝᕙᓘᓐᓃᑦ ᐃᑭᐊᖅᑭᕕᒻᒥᑦ ᐅᕙᓂ (qia.ca).
ᑐᒃᓯᕋᐅᑎᓕᐅᕈᒪᔪᑦ ᑭᓪᓕᖃᖅᑎᑕᐅᔪᑦ ᒪᔾᔨ 24, 2017ᒥ.
2016/2017ᒥ ᓄᓇᓕᓐᓂ ᐊᐅᓚᔾᔭᐃᒋᐊᕐᓂᕐᒧᑦ ᐱᓕᕆᐊᖓ ᑮᓇᐅᔭᖃᖅᑎᑦᑎᔪᒪᔪᑦ ᐅᑯᓂᖓ
ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᓇ ᖃᐅᔨᒋᐊᕐᕕᒃᓴᖅ:
ᓰᒪ ᓴᕼᐋᕐ ᓯᐊᕋᕼᐃ, ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ,
szerehi@qia.ca, (867) 975.8413, 1.800.667.2742
