ᐃᖃᓗᐃᑦ, ᓄᓇᕗᑦ – ᓄᕖᕝᕙ  27, 2017 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑖᒃᑯᐊ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᑎᓕᐅᕆᓚᐅᖅᑐᑦ ᑕᖅᑭᐅᑉ ᐱᒋᐊᕐᓂᖓᓂᒃ ᐱᕙᓪᓕᐊᑎᑦᑎᓂᐊᖅᖢᑎᒃ ᐃᓄᐃᑦ ᓄᓇᖁᑎᖏᓐᓂᒃ ᐃᖃᓗᓐᓂ.  ᑖᓐᓇ ᓯᕗᓪᓕᖅᐹᖑᓪᓗᓂ ᐱᓕᕆᐊᖑᓂᐊᖅᑐᖅ ᓇᖕᒥᓂᖁᑎᖃᖅᑐᒧᑦ  ᓄᓇᒥ ᐱᕙᓪᓕᐊᑎᑦᑎᓗᑎᒃ ᐃᖃᓗᓐᓂ.

ᑖᓐᓇ ᐃᓄᐃᑦ ᓄᓇᖁᑎᖏᑦ ᐅᑮᕖᓕᐊᕆᐊᑉ ᐊᑐᕆᐊᖓᑕ ᓴᓂᕌᓃᑦᑐᖅ, ᐱᕙᓪᓕᐊᑎᑕᐅᓂᐊᕐᒪᑦ ᐊᑐᕆᐊᖑᓪᓗᐊᑕᐅᔪᒥᒃ ᓄᓇᕗᑦ ᑐᑦᑕᕐᕕᐊᓅᖅᐸᓪᓕᐊᓂᕐᒥᒃ, ᒥᑦᑕᕐᕕᖕᒥᑦ.  ᑖᓐᓇ ᓄᓇ ᓇᓗᓇᐃᖅᑕᐅᓯᒪᓪᓗᓂ ᓄᓇᕗᒥ ᐃᑦᑕᕐᓂᓴᖃᕐᕕᒃᓴᐅᑉ ᐃᓂᒋᓛᖅᑕᖓᓂ.

“ᐊᑎᓕᐅᖅᑕᐅᓂᖓ ᐊᑐᖅᑐᐊᕈᑎ ᐱᒻᒪᕆᐅᔪᒃᑯᑦ ᓯᕗᒧᐊᕈᑎᒋᔭᐅᖕᒪᑦ  ᐱᓐᖑᖅᑎᑕᐅᕙᓪᓕᐊᓂᖏᑦ ᐸᕐᓇᐅᑎᕗᑦ ᓇᑉᐸᖅᑕᐅᓂᐊᕐᓂᖓᓂᒃ ᓄᓇᕗᒥ ᐃᑦᑕᕐᓂᓴᖃᕐᕕᒃᓴᖓ ᓴᖅᑭᔮᖅᑎᑕᐅᑦᑎᐊᕈᓐᓇᖁᓪᓗᒋᑦ ᐃᓄᐃᑦ ᓴᓇᐅᒐᖏᑦ ᐊᒻᒪᓗ ᐃᑦᑕᕐᓂᓴᖁᑎᒋᔭᖏᓐᓂᒃ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐸᐅᓗᓯ ᐊᕿᐊᕈᖅ.

“ᐃᖅᑲᓇᐃᔭᑎᒋᔭᐅᓪᓗᑎᒃ ᕿᑭᖅᑖᓗᒃ ᑯᐊᐳᕇᓴᒃᑯᑦ, ᐱᓕᕆᕙᓪᓕᐊᓪᓗᑕ ᑖᓐᓇ ᓄᓇ ᐱᕙᓪᓕᐊᑎᑕᐅᓂᖓᓂᒃ ᑮᓇᐅᔭᓕᐅᕐᕕᐅᓇᓱᐊᕐᓂᐊᖅᖢᓂ, ᐃᓅᓯᕐᓄᑦ ᐃᓕᖅᑯᓯᕐᒧᓪᓗ ᑐᕌᖓᔪᓂᒃ ᐱᓕᕆᐊᒃᓴᐃᑦ ᐱᓐᖑᖅᑎᑕᐅᔪᓐᓇᕐᓂᖏᓐᓄᑦ.”

ᐅᑭᐊᒃᓵᖅ ᓄᓇᕗᑦ ᑐᓐᖓᕕᒃᑯᑦ  ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓪᓗ ᓇᓗᓇᐃᖅᓯᓯᒪᔪᑦ ᑮᓇᐅᔭᖃᖅᑎᑦᑎᓂᐊᖅᖢᑎᒃ $5ᒥᓕᔭᓂᒃ ᐱᓐᖑᖅᑎᑕᐅᓂᒃᓴᖓᓄᑦ ᓄᓇᕗᒥ ᐃᑦᑕᕐᓂᓴᖃᕐᕕᒃᓴᒧᑦ

ᑖᓐᓇ ᓄᓇ ᐃᓂᒋᔭᐅᓂᐊᕐᒥᔪᖅ ᕿᑭᖅᑖᓗᒃᑯ  ᑯᐊᐳᕇᓴᒃᑯᑦ ᑐᔪᕐᒥᒃᓴᒃᓴᐅᓂᐊᖅᑐᒥᒃ ᑲᑎᒪᕝᕕᒃᓴᐅᓂᐊᖅᑐᒥᓗ ᐊᒻᒪᓗ ᐊᓯᖏᓐᓂᒃ ᐊᓪᓚᕝᕕᒃᓴᐅᓂᐊᖅᑐᓂᒃ.  ᑖᒃᑯᐊ ᐸᕐᓇᐅᑎᑦ ᑐᔪᕐᒥᕕᒃᓴᖃᕐᓂᐊᖅᑐᖅ ᐊᒻᒪᓗ ᐃᓕᓐᓂᐊᕐᕕᐅᔪᓐᓇᖃᑦᑕᕈᓐᓇᕐᓂᐊᖅᖢᑎᒃ ᐃᓕᖅᑯᓯᕐᒨᖓᔪᓂᒃ ᓱᕐᓗ ᐃᓄᒃᑎᑐᐃᓐᓇᖅ ᐸᐃᕆᕕᒃᓴᒥᒃ ᐊᒻᒪ ᐃᓐᓇᒃᑯᕕᐅᓂᐊᖅᑐᒥᒃ.  ᕿᑭᖅᑖᓗᒃ ᑯᐊᐳᕇᓴᒃᑯᑦ ᐸᕐᓇᒃᓯᒪᖕᒥᔪᑦ ᐊᑐᓕᖅᑎᑦᑎᓂᐊᕐᓂᖏᓐᓂᒃ ᐊᑐᓗᐊᖅᑕᐃᓕᔾᔪᑎᓂᒃ ᐃᑯᒪᓂᒃ  ᐃᓕᓯᔪᒫᕐᓂᐊᖅᖢᑎᒃ ᓯᕿᓂᕐᒧᑦ ᓄᒃᑭᒃᓴᓲᓂᒃ ᐱᕙᓪᓕᐊᑎᑦᑎᓕᕈᑎᒃ.

“ᑖᓐᓇ ᐱᕙᓪᓕᐊᓂᐅᓂᐊᖅᑐᖅ ᐃᓄᐃᑦ ᓄᓇᖁᑎᖓᓂᒃ ᓴᖅᑭᔮᖅᓯᒪᑦᑎᐊᕐᓂᐊᖅᑐᖅ ᖃᓄᖅ ᐊᔾᔨᐅᓐᖏᑦᑐᒃᑯᑦ ᐊᑐᓗᐊᖅᑕᐃᓕᓂᒃᑯᓪᓗ ᐱᕙᓪᓕᐊᑎᑦᑎᔪᓐᓇᕐᓂᖏᓐᓄᑦ ᓄᓇᓕᐸᐅᔭᖅ ᐱᕈᖅᐸᓪᓕᐊᑎᓪᓗᒍ ᐃᓱᒪᒋᔭᐅᓪᓗᑎᒃ ᐃᓕᖅᑯᓯᕆᔭᐅᔪᖅ, ᓄᓇᓕᒃ, ᐃᓅᓯᕆᔭᐅᔪᓂᒃ ᐊᑐᖅᑕᐅᔪᓐᓇᓛᖅᑐᒥᒃ ᐊᒻᒪᓗ ᐱᕙᓪᓕᐊᔾᔪᑎᒃᓴᖃᕈᓐᓇᕐᓂᕐᒥᒃ, “ ᐅᖃᖅᑐᖅ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᖓᔪᖅᑳᖓ ᐊᐅᓚᑦᑎᔨᖓᓗ ᕼᐋᓕ ᕙᓚᕼᐊᑎ.

ᑐᑭᓯᔾᔪᑎᑦ ᐃᓄᐃᑦ ᓄᓇᖁᑎᒋᔭᖓᓄᑦ ᐅᑮᕖᓕᐊᕆᐊᑉ ᐊᑐᕆᐊᖓᑕ ᓴᓂᕌᓂ:  

• ᓄᓇᖓᑕ ᐊᖏᓂᖓ: +- 16.2 Ha ᐅᕝᕙᓘᓐᓃᑦ 40 Acres
• ᐱᓕᕆᐊᖑᓂᐊᖅᑐᒧᑦ ᓇᓗᓇᐃᔭᐅᑎᑦ ᑐᓂᔭᐅᓯᒪᔪᑦ ᑲᓇᑕᒥ ᓄᓇᒥᐅᑕᓕᕆᔨᒃᑯᓐᓄᑦ ᐱᔾᔪᑎᒋᓪᓗᒍ ᓴᓗᒪᔪᒥᒃ ᐊᐅᓚᔪᓐᓇᐅᑎᖃᕈᒪᓂᕐᒧᑦ ᐱᓕᕆᐊᖃᕐᓂᕐᒥᒃ.
  • ᓴᖅᑭᔮᕐᓂᖃᕐᓗᑎᒃ ᐃᒡᓗᓕᐅᕈᓯᐅᔪᓂᒃ, ᐃᑯᒻᒪᓕᕈᑎᐅᔪᓂᒃ, ᐅᐊᔭᓄᑦ ᐊᐅᓚᑕᐅᓂᖓ ᐊᒻᒪᓗ ᐹᑕᓖᓄᑦ ᑐᖅᑯᐃᕝᕕᖃᕐᓂᖅ
• ᑲᑐᔾᔨᖃᑎᒌᒍᑕᐅᓪᓗᓂ ᓄᓇᓕᐸᐅᔭᒃᑯᓐᓂ ᐃᖃᓗᓐᓂ:
  • ᐱᕙᓪᓕᐊᑎᑕᐅᓂᖓ ᓄᓇᓕᐸᐅᔭᐅᑉ ᓄᓇᒋᔭᖓᑕ ᐊᑭᒋᔭᖓᓂ
  • ᐊᑐᐃᓐᓇᖃᕐᓂᕐᒥᒃ ᑮᓇᐅᔭᓕᐅᕋᓱᐊᕐᕕᖕᓂᑦ ᐃᑲᔪᕐᓂᐊᖅᑐᓂᒃ ᐱᒻᒪᕆᐅᔪᓂᒃ ᐱᖁᑎᕐᔪᐊᓂ ᓱᕐᓗ ᐃᒪᖃᐅᑎᓂᒃ ᑭᓈᓗᖃᑕᐅᑎᓂᓗ ᐱᔨᑦᓯᕋᕈᑎᓂᒃ ᐱᔨᑦᓯᕐᓂᐊᖅᑐᒥᒃ ᐅᑮᕖᓕᐊᕆᐊᑉ ᐊᑐᕆᐊᖓᑕ ᓴᓂᕌᓂ ᐱᕙᓪᓕᐊᕝᕕᐅᓂᐊᖅᑐᓄᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ ᐅᓇ:

ᓰᒪ ᓴᕼᐋᕐ ᓯᐊᕋᕼᐃ, ᑐᑭᒧᐊᖅᑎᑦᑎᔨ,

ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

(867) 975.8413

1.800.667.2742