ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᖃᑎᖃᖅᑎᓪᓗᒋᒃ ᓄᓘᔮᓂᑦ

ᕿᑭᖅᑕᓃᒃᑯᑦ ᐸᕕᓐᓛᓐᑯᓪᓗ ᑲᑎᒪᑎᑦᑎᓂᐊᕐᒪᑕ ᐊᕐᕌᒍᑕᒫᕐᒥ ᐱᓕᕆᐊᕐᒥ ᕿᒥᕐᕈᓂᐅᓂᐊᖅᑐᒥ ᓄᓘᔮᑦ ᐅᔭᕋᕐᓂᐊᕐᕕᐊᓄᑦ ᒪᐃ 9ᒥᑦ 10ᒥᓗ ᐃᒃᐱᐊᕐᔪᖕᒥ.

ᓄᓘᔮᓂᑦ

ᑖᓐᓇ ᑲᑎᒪᓂᖅ ᐱᕕᒃᓴᕆᔭᐅᓂᐊᕐᒪᑦ ᕿᒥᕐᕈᔭᐅᓂᖏᑦ ᐊᑦᑐᐃᒍᑕᐅᓯᒪᔪᓄᑦ ᐅᔭᕋᕐᓂᐊᕐᕕᖕᒥᑦ ᑕᐃᒃᑯᓄᖓ ᑕᓪᓕᒪᐅᔪᓄᑦ ᐊᑦᑐᖅᑕᐅᓯᒪᔪᓄᑦ ᓄᓇᓕᐅᔪᓄᑦ.  ᑕᐃᑲᓂ ᑲᑎᒪᕐᓂᕐᒥᑦ ᑖᒃᑯᐊ ᐸᕕᓐᓛᓐᑯᑦ ᕿᑭᖅᑕᓃᒃᑯᓪᓗ ᑐᑭᓯᒋᐊᖅᑎᑦᑎᓂᐊᕐᒪᑕ ᐅᓂᒃᑳᕐᓗᑎᒃ ᖃᓄᐃᓕᐅᕈᑕᐅᓯᒪᔪᓂᒃ ᓄᓘᔮᑦ ᐅᔭᕋᕐᓂᐊᕐᕕᐊᓄᑦ ᐊᒻᒪᓗ ᐱᕙᓪᓕᐊᒍᑎᒋᔭᐅᔪᓂᓕ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓂᒃ ᐱᕚᓪᓕᕈᑎᒃᓴᖏᓐᓂ ᐊᖏᕈᑎᒥ.

ᑖᓐᓇ ᑲᑎᒪᓂᖅ ᐱᕕᒃᓴᕆᔭᐅᔪᓐᓇᕐᓂᐊᕐᒥᖕᒪᑦ ᐃᓄᓐᓄᑦ ᐊᐱᖅᓱᕈᓐᓇᕐᓗᑎᒃ ᓄᓘᔮᑦ ᐱᓕᕆᐊᖓᑕ ᒥᒃᓵᓄᑦ.

ᑕᐃᒪ ᐃᓐᓇᖅᑕᖃᕐᓂᐊᖅᑐᖅ ᐃᓅᓱᒃᑐᓂᓪᓗ ᑲᑎᒪᖃᑕᐅᓂᐊᖅᑐᓄᑦ ᐊᒻᒪᓗ ᕿᑭᖅᑕᓃᒃᑯᑦ ᑲᑎᒪᔨᖏᑦ.

ᑖᓐᓇ ᒪᕐᕉᓄᑦ ᐅᓪᓗᓄᑦ ᑲᑎᒪᓂᖓ ᒪᑐᐃᖓᓂᐊᖅᑐᖅ ᐃᓄᓐᓄᑦ ᐊᒻᒪ ᑭᓇᑐᐃᓐᓇᕐᒧᑦ ᐃᒃᐱᐊᕐᔪᖕᒥᐅᑦ ᑐᓐᖓᓱᒃᑎᑕᐅᑦᑎᐊᖅᖢᑎᒃ.

ᓄᓘᔮᓂᑦ ᐱᓕᕆᐊᑦ

ᕿᒥᕐᕈᒌᕈᑎᒃ ᑖᒃᑯᐊ ᕿᑭᖅᑕᓃᒃᑯᑦ ᐸᕕᓐᓛᓐᑯᓪᓗ ᐅᓂᒃᑳᓕᐅᓛᖅᑐᑦ ᐃᓗᓕᖃᕐᓗᓂ ᐊᑐᓕᖁᔭᐅᓯᒪᔪᓂᒃ ᓴᖅᑭᓯᒪᓂᐊᖅᑐᓂᑦ ᐃᓱᒫᓘᑎᒋᔭᐅᔪᓂᑦ ᓴᖅᑭᑕᐅᔪᓂᑦ ᑲᑎᒪᓂᕐᒥᑦ.

ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᐃᓐᓇᖅᑐᑦ ᐸᕕᓐᓛᓐᑯᓐᓂᑦ ᐱᔭᕇᖅᑕᐅᒍᓐᓇᖁᓪᓗᒍ ᐊᒻᒪᓗ ᐊᖏᖅᑕᐅᒍᓐᓇᖁᓪᓗᒍ ᐃᓄᐃᑦ ᐃᖅᑲᓇᐃᔭᖅᑐᓂᒃ ᐸᕐᓇᐅᑎᒥ.

ᑖᓐᓇ ᐸᕐᓇᐅᑎ ᐃᑲᔪᖅᑐᖅᑕᐅᓯᒪᓂᐊᖅᑐᖅ ᐊᓯᖏᓐᓂᑦ ᐸᐃᑉᐹᓂᒃ ᓱᕐᓗ ᐸᕕᓐᓛᓐᑯᑦ ᒥᑭᓐᓂᖅᐹᕆᔪᓐᓇᖅᑕᖏᓐᓂᒃ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᑐᕌᒐᖓᑕ ᐸᕐᓇᐅᑎᖓᓂ ᐊᒻᒪᓗ ᑖᓐᓇ ᐊᕐᕌᒍᑕᒫᕐᒧᑦ ᐊᖏᕈᑎᓕᕆᓂᕐᒧᑦ ᐱᓕᕆᐊᖑᓂᐊᖅᑐᓂᒃ ᐸᕐᓇᐅᑎᒥ.  ᕿᑭᖅᑕᓃᒃᑯᑦ ᐅᒃᐱᕆᔭᖃᖅᑐᑦ ᐱᑕᖃᕆᐊᖃᕐᓂᖓᓂᒃ ᐱᒻᒪᕆᐅᔪᓂᒃ ᐱᒋᐊᕈᑎᓂᒃ ᐃᓄᐃᑦ ᐃᖅᑲᓇᐃᔮᖅᑖᕐᓂᖏᓐᓄᑦ, ᐃᓕᓐᓂᐊᖅᑎᑕᐅᓗᑎᓪᓗ ᐅᕝᕙᓘᓐᓃᑦ ᐃᖅᑲᓇᐃᔮᒃᓴᓂ ᐊᓯᖏᓐᓂᒃ ᓯᕗᒧᐊᕈᑎᖃᕈᓐᓇᕐᓗᑎᒃ ᓄᓘᔮᑦ ᐅᔭᕋᕐᓂᐊᕐᕕᖓᓂ.

ᕿᑭᖅᑕᓃᒃᑯᑦ ᐱᓕᕆᐊᒃᓴᖃᕐᒪᑕ ᐊᑐᓕᖅᑎᑦᑎᖁᔨᓂᖏᓐᓂᒃ ᑖᒃᑯᓂᖓ ᐱᒻᒪᕆᐅᔪᓂᒃ ᓴᖅᑭᒍᓐᓇᕐᓂᐊᖅᑐᓄᑦ ᐊᖏᕈᑎᓂᑦ ᑭᒡᒐᖅᑐᕐᓗᒋᑦ ᐃᓄᐃᑦ, ᓇᓗᓇᐃᖅᓯᒍᒪᓪᓗᑎᒃ ᑖᒃᑯᐊ ᐃᓄᐃᑦ ᐃᑲᔫᓯᐊᖅᑖᑦᑎᐊᕐᓂᖏᓐᓄᑦ.

ᕿᑭᖅᑕᓃᒃᑯᑦ ᐊᒥᓱᒃᑲᓐᓂᕐᓂ ᐃᓄᓐᓂᒃ ᐃᖅᑲᓇᐃᔭᕈᓐᓇᖅᑐᓂᒃ ᑕᑯᔪᒪᔪᑦ.  ᑖᒃᑯᐊ ᐸᕕᓐᓛᓐᑯᑦ ᑎᑭᐅᑎᓐᖏᑉᐸᑕ 25%ᒥᒃ ᑐᕌᒐᕆᔭᐅᔪᒥᒃ ᐃᓄᓐᓂᑦ ᐃᖅᑲᓇᐃᔭᖅᑎᖃᕆᐊᖃᕐᓂᕐᒧᑦ ᑕᐃᒪᓕ ᑕᒪᓐᓇ ᑐᑭᖃᕈᓐᓇᖅᑐᖅ ᐃᓄᐃᑦ ᐃᑲᔫᓯᐊᒃᓴᓂ ᔭᒐᐃᓂᖏᓐᓂ.  ᐃᓄᐃᑦ ᐃᖅᑲᓇᐃᔭᖅᑐᑦ ᐅᔭᕋᕐᓂᐊᕐᕕᖕᒥᑦ 12 %ᖑᔪᖅ ᐊᒻᒪᓗ ᐅᓄᑭᓪᓕᕙᓪᓕᐊᓚᐅᖅᖢᑎᒃ 2016ᒥ.

ᓄᓘᔮᑦ ᐊᕐᕌᒎᑕᒫᑦ ᐱᓕᕆᐊᕐᒥᑦ ᕿᒥᕐᕈᓂᕆᔭᖓᓂ ᑲᑎᒪᕐᔪᐊᕐᓂᖓ ᐃᒃᐱᐊᕐᔪᖕᒥ