ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐅᐱᒍᓱᑦᑎᑐᒃ ᐃᑲᔪᓚᐅᖅᑐᑦ ᑕᑯᓐᓈᖅᑕᐅᑎᑦᑎᑎᓪᓗᒋᑦ ᓄᓇᕗᒥ−ᐋᖅᑭᓱᖅᑕᐅᓯᒪᔪᒥᒃ ᑕᕐᕆᔮᔅᓴᒥᒃ ᐊᒃᑕᐃᑦ. ᖁᕝᕙᓯᓐᓂᓖᑦ 9ᒥᒃ 11ᒥᓪᓗ ᐃᓕᓐᓂᐊᖅᑏᑦ ᐃᖃᓗᐃᑦ ᐃᓄᒃᓱᒃ ᐃᓕᓐᓂᐊᕐᕕᐊᓗᐊᓂ ᑕᑯᓐᓈᕈᓐᓇᓚᐅᖅᑐᑦ ᑕᕐᕆᔮᔅᓴᒥᒃ, ᐊᓐᓇᐅᒪᓂᐅᑉ ᒥᔅᓵᓅᖓᔪᓂᑦ, ᐊᒻᒪᓗ ᐊᑑᑎᖃᓪᓚᕆᓐᓂᖓᓂᒃ ᐱᙳᐊᖃᑦᑕᕐᓂᐅᑉ ᐋᔅᑐᕈ ᑕᕐᕆᔭᕐᕕᒻᒥᑦ.

ᐊᒃᑕᐃᑦ ᑕᑯᓐᓇᕋᔅᓴᓕᐊᖑᓯᒪᔪᖅ ᒪᕐᕉᓐᓄᒃ ᐃᓅᓪᓗᑎᒃ ᐊᕐᓈᓐᓄᒃ, ᐊᓖᑎᐊ ᐊᕐᓇᖅᑯᖅ−ᕕᐅᕈᓪ ᐊᒻᒪᓗ ᓯᑕᐃᓯ ᐊᒡᓗᒃ ᑖᒃᑯᐊ ᐃᖃᓗᓐᓂᒥᐅᑖᒃ. ᑕᕐᕆᔮᔅᓴᖅ ᐱᔾᔪᑎᓕᒃ ᐊᕐᓴᕈᑕᐅᓲᒥᒃ ᓚᑯᕌᔅ ᐃᓅᓯᖏᓐᓂᒃ ᐱᐅᓯᕙᓪᓕᑎᑦᑎᓯᒪᔪᖅ ᐃᓄᐃᑦ ᐃᓕᓐᓂᐊᖅᑏᑦ ᖁᕐᓗᖅᑐᕐᒥᐅᑕᐃᑦ, ᓱᓕᔪᒥᒃ ᐊᑐᖅᑕᐅᓯᒪᔪᒥᒃ ᐱᔾᔪᑎᓖᑦ ᐊᒻᒪᓗ ᐊᒥᓱᑦ ᐃᓄᐃᑦ ᐃᓚᒋᔭᐅᓯᒪᓪᓗᑎᒃ ᐊᓪᓛᑦ ᑕᑯᓐᓇᕋᔅᓴᓕᐊᖑᕙᑦᑐᑦ ᐃᓚᒋᔭᐅᓯᒪᒋᓪᓗᑎᒃ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᑦ.

ᐃᓕᓴᐃᔨ ᓴᒫᓐᑕ ᒪᒃᑑᒪᑦ, ᑕᕐᕆᔭᕆᐊᕐᓯᒪᓚᐅᖅᑐᖅ ᐃᓕᓐᓂᐊᖅᑎᖁᑎᖏᓐᓂᒃ ᐱᖃᑎᖃᖅᑐᓂ: “ᐃᓘᓐᓇᑎᒃ ᐃᓕᓐᓂᐊᖅᑏᑦ ᑕᑯᓐᓈᖅᑕᖏᓐᓂᒃ ᑕᑯᕋᓐᓂᕈᓱᓪᓚᕆᓚᐅᖅᑐᑦ ᐃᑉᐱᒍᓱᓪᓚᕆᑦᑐᑎᓪᓗ. ᖁᔭᓕᔪᖓ ᐱᓇᓱᐊᕈᑎᔅᓴᖅᑕᖃᒃᑲᓐᓂᕐᖓᑦ ᓄᓇᕗᒻᒦᙶᕐᓯᒪᔪᒥᑦ. ᑖᓐᓇ ᑕᕐᕆᔮᔅᓴᖅ ᐊᑐᖅᑕᐅᔪᓐᓇᕐᖓᑦ ᐊᒥᓱᓄᑦ ᐊᔾᔨᒌᙱᑦᑐᓄᑦ ᐱᔾᔪᑕᐅᕙᑦᑐᓄᑦ ᑐᑭᓯᐅᒪᒍᑕᐅᒃᑲᓂᕐᓂᐊᕐᖓᑦ ᐊᑐᕈᓐᓇᓂᐊᖅᑐᑎᒍ. ᐱᐅᓂᕐᐹᖑᔾᔪᑎᖓ ᑖᔅᓱᒪ ᑕᒫᙶᕐᓯᒪᒻᒪᑦ, ᓄᓇᑦᑎᓐᓃᙶᖅᑐᓂ. ᑕᒪᐃᓐᓂᒃ, ᐃᓕᓐᓂᐊᖅᑏᑦ ᖁᕕᐊᒋᔭᖃᓪᓚᕆᓚᐅᖅᑐᑦ ᑕᕐᕆᔮᔅᓴᒥᒃ ᐊᒻᒪᓗ ᖁᔭᓕᑦᑎᐊᓚᐅᖅᑐᑦ ᕿᑭᖅᑕᓂᒃᑯᑦ ᐃᑲᔪᓚᐅᕐᖓᑕ ᑕᑯᓐᓈᖅᑕᐅᑎᑦᑎᓂᕐᒥᒃ.”

80ᖏᓐᓃᓚᐅᖅᑐᑦ ᐃᓕᓐᓂᐊᖅᑏᑦ ᑕᕐᕆᔭᕆᐊᕐᓯᒪᔪᑦ, ᑕᕝᕙ ᐃᓚᖏᑦ ᐅᖃᐅᓯᐅᖃᑦᑕᓚᐅᖅᑐᑦ ᑕᑯᓐᓈᓚᐅᖅᑕᖏᑕ ᒥᔅᓵᓄᑦ:

“ᑕᕐᕆᔮᖅ ᓱᓕᔪᒥᒃ ᐊᑐᖅᑕᐅᕙᑦᑐᒥᒃ ᐅᑭᐅᖅᑕᖅᑐᒥ ᐱᔾᔪᑎᖃᓚᐅᕐᖓᑦ. ᐋᖅᑭᓱᖅᑕᐅᓯᒪᑦᑎᐊᖅᑐᓂ, ᒪᑭᑕᒋᐊᒃᑲᓐᓂᕈᑎᔅᓴᖅᑕᖃᖅᑐᓂ, ᐊᒻᒪᓗ ᐱᔾᔪᑎᖃᖅᑐᓂ ᐊᔾᔨᒋᔭᐅᙱᑦᑐᓂᑦ ᐱᔭᕆᐊᑐᔪᒃᑰᕈᑕᕙᑦᑐᓂᑦ ᐅᑭᐅᖅᑕᖅᑐᒥ ᓲᕐᓗ ᓂᕿᓂᑦ ᐊᔪᕐᓴᖃᑦᑕᕐᓂᖅ, ᓂᙵᐅᔾᔭᐅᖃᑦᑕᕐᓂᖅ, ᐃᓕᓴᕕᒻᒧᑦ ᐅᐸᙱᓗᐊᖃᑦᑕᕐᓂᖅ ᐊᒻᒪᓗ ᐃᒻᒥᓃᖃᑦᑕᕐᓂᖅ.”  

“ᐱᒻᒪᕆᐅᒻᒪᑦ ᐋᖅᑭᓱᖅᑕᐅᓂᖓ ᓄᓇᕗᒥ ᐊᒻᒪᓗ ᑕᒫᙶᕐᓯᒪᔪᓂᑦ ᐃᓄᖃᖅᑐᓂ. ᖁᕕᐊᓇᑦᑎᐊᓚᐅᖅᑐᖅ ᐅᔾᔨᕆᔭᐅᑎᑦᑎᔭᕆᐊᔅᓴᖅ ᓄᓇᑦᑎᓐᓂᒃ ᓄᓇᖃᕐᕕᑎᓐᓂᓪᓗ ᐊᔪᙱᑎᐊᖅᑐᓂᑦ ᐃᓄᑦᑕᖃᕐᓂᖓᓂᒃ ᐅᑭᐅᖅᑕᖅᑐᒥᐅᓂᑦ. ᓇᓗᓇᐃᒃᑯᑕᐅᓪᓗᓂᓗ ᓂᕆᐅᒋᔭᔅᓴᖃᕐᓂᕐᒧᑦ ᒪᑭᑕᒋᐊᒃᑲᓐᓂᕈᑎᔅᓴᓂᓪᓗ ᐃᓄᓐᓄᑦ ᐱᓇᓱᐊᕈᒪᒍᑎᒃ ᐃᖅᑲᓇᐃᔮᕆᒍᒪᒐᔭᖅᑕᖏᓐᓂᒃ ᑕᒪᑐᒥᖓ..”

“ᑕᕐᕆᔮᖅ ᑲᑎᑦᑎᓯᒪᓚᐅᖅᑐᖅ ᐱᖅᑯᓯᖅᑎᒍᑦ ᐃᓄᐃᑦ ᐅᓂᒃᑳᖅᑐᐊᕈᓯᖏᓐᓂᒃ ᐅᓪᓗᒥᓗ ᐊᑐᖅᑕᐅᕙᓕᖅᑐᓂᑦ. ᑖᓐᓇ ᑕᕐᕆᔮᖅ ᐊᑑᑎᖃᓪᓚᕆᑦᑐᖅ ᐱᔾᔪᑎᒋᓪᓗᒍ ᐃᓅᖃᑎᕗᑦ ᐅᓂᒃᑳᕐᖓᑕ ᓇᒻᒥᓂᖅ ᐊᑐᕐᓯᒪᔭᖏᓐᓂᑦ.”

ᐊᒃᑕᓂᑦ ᑕᑯᓐᓇᕋᔅᓴᓕᐅᕐᓯᒪᔪᓂᑦ ᐊᐃᑉᐹ, ᓯᑕᐃᓯ ᐊᒡᓗᒃ, ᖁᕐᓗᖅᑐᕐᒥᐅᑕᔅᓴᔭ, ᕿᑭᖅᑕᓂᒃᑯᑦ ᕙᐃᔅᐳᒃᑯᑦ ᐃᑭᐊᖅᑭᕕᖓᒍᑦ ᖁᔭᓕᓪᓗᓂ ᑎᑎᕋᓚᐅᖅᑐᖅ:

ᖁᔭᓐᓇᒦᒃ ᓯᑕᐃᓯ, ᐊᓖᑎᐊ ᐊᒻᒪᓗ ᑕᑯᓐᓇᕋᔅᓴᓕᐊᒥᓃᑦ ᐊᒻᒪᓗ ᑕᕐᕆᔮᔅᓴᓕᐅᖃᑕᐅᓚᐅᖅᑐᑦ ᑖᔅᓱᒥᖓ ᐅᓂᒃᑳᖑᓯᒪᔪᒥᒃ ᑕᕐᕆᔭᕐᕕᐅᕙᑦᑐᓄᑦ ᑎᑭᐅᑎᑎᑦᑎᒍᓐᓇᓚᐅᕋᔅᓯ ᓄᓇᕐᔪᐊᓕᒫᒥ!