ᔮᓂ ᒪᓚᐃᔭ ᑯᑉᓗ, ᕿᑭᖅᑕᓃᒃᑯᑦ ᑲᑎᒪᔨᖓᑦ; ᒫᑕᓖᓐ ᐃᕙᓗ, ᐃᓐᓇᕐᓄᑦ ᑭᒡᒐᖅᑐᖅᑎ; ᑭᐊᕋᓐ ᐃᕙᓗ, ᐃᓅᓱᒃᑐᓂ ᑭᒡᒐᖅᑐᖅᑎ

ᓄᓘᔮᓕᕆᓂᕐᒥ ᐊᕐᕌᒍᑕᒫᑦ ᕿᒥᕐᕈᓂᕐᒧᑦ ᑲᑎᒪᓂᐅᓚᖅᑐᖅ ᐃᒃᐱᐊᕐᔪᒻᒥ ᒪᐃ 9ᖑᑎᓪᓗᒍ 10ᒥᓗ ᐊᑑᑎᖃᑦᑎᐊᓚᐅᖅᑐᖅ ᐃᓚᒋᔭᐅᓚᐅᖅᑐᑎᒃ ᓄᓇᓕᓐᓂᑦ ᑭᒡᒐᑐᖅᑏᑦ ᓴᓐᓂᕋᔭᒻᒥᐅᑦ, ᐃᒡᓗᓕᒻᒥᐅᑦ, ᑲᖏᖅᑐᒑᐱᒻᒥᐅᑦ, ᒥᑦᑎᒪᑕᓕᒻᒥᐅᑦ ᐊᒻᒪᓗ ᐃᒃᐱᐊᔪᒻᒥᐅᑦ – ᑕᓪᓕᒪᑦ ᓄᓇᓖᑦ ᓱᕐᕋᑦᑕᐅᓯᒪᔪᑦ ᐅᔭᕋᓐᓂᐊᕐᓂᕐᒧᑦ.

ᐊᕐᕌᒍᑕᒫᑦ ᕿᒥᕐᕈᖃᑦᑕᓂᕐᒧᑦ ᑲᑎᒪᖃᑦᑕᕆᐊᖃᕐᖓᑕ ᒪᓕᑦᑐᒍ ᐃᓛᒃᑯᑦ 14 ᓄᓘᔮᓕᕆᓂᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᔅᓴᖏᓐᓄᓪᓗ ᐊᖏᕈᑎᓂᑦ (ᐊᖏᕈᑏ) ᑖᒃᑯᓂᖓ ᑲᑐᔾᔨᖃᑎᒌᒃᑯᓐᓂ ᐹᕕᓐᓛᓐᑯᓐᓂᓗ. ᑲᑎᒪᓂᖓᑦ ᕿᒥᕐᕈᒍᑕᐅᔪᓐᓇᓚᐅᕐᒥᔪᖅ ᓱᕐᕋᐃᒍᑕᐅᓯᒪᔪᓂᑦ ᐊᒻᒪᓗ ᐸᕐᓇᐅᑎᓂᑦ ᐋᖅᑭᒋᐊᕈᑎᔅᓴᓂᑦ ᐅᔭᕋᓐᓂᐊᓂᕐᒧᑦ. ᑲᑎᒪᓂᖓᑦ ᐊᓯᔾᔩᒍᑕᐅᓚᐅᕐᒥᔪᖅ ᐃᓄᓕᒫᑦ ᐊᐱᕐᓱᖃᑦᑕᕈᓐᓇᖁᓪᓗᒋᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᖃᑦᑕᖁᓪᓗᒋᑦ ᐋᖅᑭᒋᐊᕈᑎᔅᓴᓂᑦ ᓄᓘᔮᓕᕆᓂᕐᒥ.

ᑕᐃᕕᑦ ᑰᓕ, ᕿᑭᖅᑕᓃᒃᑯᑦ ᑲᑎᒪᔨᖓ; ᐳᐊᓯ ᐆᑦᑐᕙᒃ, ᐃᓐᓇᕐᓄᑦ ᑭᒡᒐᖅᑐᖅᑎ; ᐃᓕᓴᐱ ᖁᐊᓴ, ᐃᓅᓱᒃᑐᓂ ᑭᒡᒐᖅᑐᖅᑎ

ᑲᑎᒪᓂᖓᓐᓂ ᐃᓚᒋᔭᐅᓚᐅᖅᑐᑦ ᐊᖏᔪᖅᑲᐅᑏᑦ ᑭᒡᒐᑐᖅᑏᑦ ᑲᑐᔾᔨᖃᑎᒌᒃᑯᓐᓂ ᐹᕕᓐᓛᓐᑯᓐᓂᓗ ᐊᒻᒪᓗᑦᑕᐅᖅ ᐃᓄᑐᖃᕐᓂᑦ ᐃᓅᓱᑦᑐᓂᓪᓗ ᑭᒡᒐᑐᖅᑎᓂᑦ ᐊᑐᓂᑦ ᑕᓪᓕᒪᓂᑦ ᐊᑦᑐᖅᑕᐅᓯᒪᔪᓂᑦ ᓄᓇᓕᓐᓂᑦ. ᑕᓪᓕᒪᑦ ᑲᑐᔾᔨᖃᑎᒌᒃᑯᓐᓂ ᓄᓇᓕᓐᓂᑦ ᑲᑎᒪᔨᒋᔭᐅᔪᑦ ᓴᓂᕋᔭᒻᒥᐅᓂᑦ, ᐃᒡᓗᓕᒻᒥᐅᓂᑦ, ᑲᖏᖅᑐᒑᐱᒻᒥᐅᓂᑦ, ᒥᑦᑎᒪᑕᓕᒻᒥᐅᓂᑦ ᐃᒃᐱᐊᔪᒻᒥᐅᓂᓪᓗ ᑲᑎᒪᔭᖅᑐᕐᓯᒪᓚᐅᕐᒥᔪᖅ ᑲᑎᒪᓂᕐᒧᑦ.

ᐊᒥᓱᑦ ᐱᔾᔪᑕᐅᔪᑦ ᐅᖃᐅᓯᐅᓚᐅᖅᑐᑦ ᑲᑎᒪᓂᕐᒥ ᐱᔾᔪᑎᖃᓚᐅᖅᑐᑦ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒥᒃ ᐃᓚᖃᖅᑐᑎᒃ ᑲᒪᒋᔭᖃᒃᑲᓐᓂᕆᐊᖃᕐᓂᖏᓐᓂᒃ ᐸᕐᓇᐅᑎᓂᑦ ᐃᖅᑲᓇᐃᔭᖅᑎᑖᖃᑦᑕᓂᕐᒧᑦ ᐃᖅᑲᓇᐃᔭᖅᑎᖃᐃᓐᓇᕈᓐᓇᓂᕐᒧᓪᓗ ᐃᓄᓐᓂᑦ ᐊᒻᒪᓗ ᐃᑲᔪᖅᑕᐅᖃᑦᑕᕐᓗᑎᒃ ᖁᕝᕙᓯᓐᓂᕐᓴᓄᑦ ᐱᕙᓪᓕᐊᔪᓐᓇᖁᓪᓗᒋᑦ. ᐊᓯᖏᑦ ᐅᖃᐅᓯᐅᓚᐅᕐᒥᔪᑦ ᐋᖅᑭᒋᐊᕐᓯᖁᔨᓪᓗᑎᒃ ᑐᓴᐅᒪᖃᑦᑕᐅᑎᓂᐅᕙᑦᑐᒥᒃ ᐃᓄᓐᓂᑦ ᐊᒻᒪᓗ ᓴᐳᔾᔨᓂᕐᒥᒃ ᐊᕙᑎᑦᑎᓐᓂᒃ.

ᐃᓅᑎᖅ ᐃᒃᑲᕐᕆᐊᓗᒃ, ᕿᑭᖅᑕᓃᒃᑯᑦ ᑲᑎᒪᔨᖓ; ᐆᑦᑐᕙᒃ ᐊᐅᓪᓚᕿᐊᒃ, ᐃᓐᓇᕐᓄᑦ ᑭᒡᒐᖅᑐᖅᑎ; ᐹᑦᑐᕆᒃ ᐸᓖᑦᑐᖅ, ᐃᓅᓱᒃᑐᓂ ᑭᒡᒐᖅᑐᖅᑎ

ᐊᕐᕌᒍᑕᒫᑦ ᕿᒥᕐᕈᖃᑦᑕᓂᕐᒧᑦ ᑲᑎᒪᓚᐅᖅᑎᓪᓗᒋᑦ, ᑲᑐᔾᔨᖃᑎᒌᒃᑯᑦ ᐹᕕᓐᓛᓐᑯᓪᓗ ᐅᓂᒃᑳᓕᐅᕐᓂᐊᖅᑐᑦ ᐃᓚᖃᕐᓂᐊᖅᑐᑎᒃ ᐊᑐᓕᖁᔨᔾᔪᑕᐅᓯᒪᔪᓂᑦ ᐱᔾᔪᑕᐅᔪᓃᙶᕐᓯᒪᔪᓂᑦ ᐃᓱᒫᓘᑕᐅᓯᒪᔪᓂᓪᓗ ᐅᖃᐅᓯᐅᓚᐅᖅᑐᓂᑦ ᑲᑎᒪᓂᕐᒥ. ᑲᑐᔾᔨᖃᑎᒌᒃᑯᑦ ᐹᕕᓐᓛᓐᑯᓪᓗ ᑭᐅᔭᕆᐊᖃᕐᖓᑕ ᖃᓄᖅ ᐃᖅᑲᓇᐃᔮᖃᕐᓂᐊᕐᒪᖔᑕ ᑲᒪᒋᔭᖃᕐᓗᑎᒃ ᐊᑐᓂᑦ ᐊᑐᓕᖁᔨᔾᔪᑕᐅᓯᒪᔪᓂᑦ ᐱᓕᕆᐊᕐᒥ ᕿᒥᕐᕈᓂᕐᒧᑦ ᑲᑎᒪᓂᕆᓚᐅᖅᑕᖓᓐᓂ. ᑖᒃᑯᐊ ᐅᓂᒃᑳᑦ ᑐᓂᔭᐅᓛᕐᖓᑕ ᑲᑎᒪᖃᑕᐅᓚᐅᖅᑐᓄᑦ, ᐃᓄᓕᒫᓄᓪᓗ ᑕᑯᔭᔅᓴᕈᖅᑎᑕᐅᓗᑎᒃ, 90 ᐅᓪᓗᐃᑦ ᑭᖑᓂᐊᒍᑦ ᑲᑎᒪᓚᐅᖅᑎᓪᓗᒋᑦ.

ᐊᐃᕝᕙᓚᕼᐋᒻ ᖃᒪᓂᖅ, ᕿᑭᖅᑕᓃᒃᑯᑦ ᑲᑎᒪᔨᖓ; ᐋᒥ ᑭᑉᓯᒐᖅ, ᐃᓐᓇᕐᓄᑦ ᑭᒡᒐᖅᑐᖅᑎ; ᐃᓕᓴᐱ ᐊᕐᓇᕐᔪᐊᖅ, ᐃᓅᓱᒃᑐᓂ ᑭᒡᒐᖅᑐᖅᑎ

ᑲᑐᔾᔨᖃᑎᒌᒃᑯᑦ ᐅᑉᐱᕈᓱᑦᑐᑦ ᑕᒪᕐᒥᓕᒫᐸᓗᒃ ᐊᑐᓕᖁᔨᔾᔪᑕᐅᓯᒪᔪᑦ ᐱᓕᕆᐊᕐᒥ ᕿᒥᕐᕈᓂᕐᒧᑦ ᑲᑎᒪᓂᕆᓚᐅᖅᑕᖓᓐᓂ ᑲᒪᒋᔭᐅᓂᐊᕆᐊᔅᓴᖏᓐᓂᒃ ᑲᔪᓯᑎᑦᑎᕙᓪᓕᐊᓂᖏᑎᒍᑦ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᐸᕐᓇᐅᑎᖏᓐᓂᒃ.

ᐃᒃᐱᐊᕐᔪᒻᒦᓐᓂᖏᓐᓂ, ᑲᑐᔾᔨᖃᑎᒌᒃᑯᑦ ᐹᕕᓐᓛᓐᑯᓪᓗ ᐊᖏᕐᓯᓚᐅᕐᒥᔪᑦ ᓯᕗᓪᓕᕐᓂᑦ ᐃᓘᓐᓇᖏᓐᓂᒃ ᐱᔾᔪᑎᓕᓐᓂᑦ ᐊᕐᕌᒍᓕᒫᖅ ᐃᖅᑲᓇᐃᔮᔅᓴᓂᑦ ᐸᕐᓇᐅᑎᓂᑦ ᐊᖏᕈᑎᓄᑦ ᑲᑐᔾᔨᓪᓗᑎᒃ ᐊᖏᕈᑎᓂᑦ ᓯᕗᓕᖅᑏᑦ ᑲᑎᒪᔨᕋᓛᑦ ᑲᑎᒪᓂᖓᓐᓂ.

ᑲᒪᒋᔭᐅᓪᓗᐊᑕᕐᓂᐊᖅᑐᑦ 2017ᒥ ᐊᖏᕈᑎᓂᑦ ᐃᖅᑲᓇᐃᔮᔅᓴᓂᑦ ᐸᕐᓇᐅᑎᓂᑦ ᐅᑯᐊ:  

• ᐱᔭᕇᖅᑕᐅᓗᑎᒃ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᐸᕐᓇᐅᑏᑦ,
• ᐱᔭᕇᖅᑕᐅᓗᑎᒃ ᐃᓄᓐᓄᑦ ᓂᐅᕕᖃᑦᑕᓂᕐᒧᑦ/ᑎᒍᓯᖃᑦᑕᓂᕐᒧᑦ ᐊᒻᒪᓗ ᑳᓐᑐᓛᒃᓯᖃᑦᑕᓂᕐᒧᑦ ᐸᕐᓇᐅᑏᑦ,
• ᐊᖏᕐᓯᓗᑎᒃ ᖄᑦᑏᓐᓇᐅᓂᕐᐹᕆᔪᓐᓇᖅᑕᖏᓐᓂᒃ ᑭᓪᓕᖃᕐᓗᑎᒃ ᐃᓄᓐᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᐸᕐᓇᐅᑎᓂᑦ,
• ᐊᖏᕐᓯᓗᑎᒃ ᐃᖅᑲᓇᐃᔭᕐᓂᕐᒧᑦ ᐃᓕᓐᓂᐊᓂᕐᒧᓪᓗ ᐸᕐᓇᐅᑎᓂᑦ,
• ᐱᕙᓪᓕᐊᑎᑦᑎᓗᑎᒃ ᐱᔭᕇᕐᓯᓗᑎᓪᓗ ᐃᖅᑲᓇᐃᔭᕐᕕᒻᒥ ᖃᓄᐃᓐᓂᐅᔪᓂᑦ ᖃᐅᔨᓴᖃᑦᑕᓂᕐᒥᒃ.

ᐃᓘᓐᓇᖏᓐᓄᑦ ᑐᕌᒐᖃᕐᖓᑕ 2017ᒥ ᐊᖏᕈᑎᓂᑦ ᐃᖅᑲᓇᐃᔮᔅᓴᓂᑦ ᐸᕐᓇᐅᑎᓂᑦ ᐊᒥᓱᕈᕆᐊᒃᑲᓐᓂᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᕐᐸᑦᑐᑦ ᐃᓕᓐᓂᐊᐸᑦᑐᓪᓗ.

ᑲᑐᔾᔨᖃᑎᒌᒃᑯᑦ ᓂᕆᐅᑉᐳᑦ ᑲᑐᔾᔨᖃᑎᖃᖃᑦᑕᕐᓂᐊᕆᐊᔅᓴᖅ ᐹᕕᓐᓛᓐᑯᓐᓂᑦ ᐊᒻᒪᓗ ᐃᓄᓐᓂᑦ ᑲᔪᓯᑎᑦᑎᓂᕐᒥᒃ 2017ᒥ ᐊᖏᕈᑎᓂᑦ ᐃᖅᑲᓇᐃᔮᔅᓴᓂᑦ ᐸᕐᓇᐅᑎᓂᑦ.