ᐃᓅᓱᑦᑐᑦ ᓯᕗᓕᕐᓯᔨᐅᓂᕐᒥᒃ ᐃᓕᓐᓂᐊᖅᑐᑦ
ᕿᑭᖅᑕᓂᒃᑯᑦ ᐃᓅᓱᑦᑐᓂᑦ ᓯᕗᓕᕐᓯᔨᐅᓂᕐᒥᒃ ᐃᓕᓐᓂᐊᑎᑦᑎᓂᖓᑦ ᑲᔪᓯᑎᑕᐅᑦᑎᐊᔪᔪᖅ ᐃᖃᓗᓐᓂ ᒫᑦᓯ 25ᒥ 29ᒧᑦ ᓯᕗᓕᕐᓯᔨᐅᓂᕐᒥᒃ ᐊᑐᖅᑕᐅᓲᓂᑦ ᐃᓕᓐᓂᐊᕐᖓᑕ ᐃᓄᐃᑦ ᐃᓅᓱᑦᑐᐃᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᑦ.
ᑖᓐᓇ ᐃᓕᓐᓂᐊᕈᑕᐅᔪᔪᖅ ᐃᓚᒋᔭᐅᔪᔪᖅ ᐃᓕᓐᓂᐊᑎᑦᑎᖃᑦᑕᓲᖑᒻᒪᑕ ᕿᑭᖅᑕᓂᒃᑯᑦ ᐃᓄᓐᓂᑦ ᐃᓅᓱᑦᑐᓂᑦ ᐃᓕᑉᐸᓪᓕᐊᖁᓪᓗᒋᑦ ᓯᕗᓕᕐᓯᔨᐅᓂᕐᒥᒃ ᐊᑐᖅᑕᐅᓲᓂᑦ ᐊᒻᒪᓗ ᓄᓇᓕᓐᓄᑦ ᐃᓚᒋᔭᐅᒋᐊᒃᑲᓐᓂᖃᑦᑕᖁᓪᓗᒋᑦ.
ᐊᕙᑎᑦ ᐃᓅᓱᑦᑐᐃᑦ ᐅᑯᓇᙶᕐᓯᒪᔪᑦ ᐃᖃᓗᐃᑦ, ᑭᙵᐃᑦ, ᐸᓐᓂᖅᑑᖅ, ᑲᖏᖅᑐᒑᐱᒃ, ᐃᒡᓗᓕᒃ ᐊᒻᒪᓗ ᒥᑦᑎᒪᑕᓕᒃ ᐃᓚᒋᔭᐅᔪᔪᑦ ᐃᓕᓐᓂᐊᓂᕐᒥ. ᑖᒃᑯᐊ ᐃᓅᓱᑦᑐᐃᑦ ᐃᓚᒋᔭᐅᕙᑦᑐᑦ ᓇᒥᑐᐃᓐᓇᖅ ᓄᓇᖏᓐᓂ ᐱᓇᓱᐊᕈᑕᐅᕙᑦᑐᓂᑦ ᓲᕐᓗ ᓯᕗᓕᕐᓯᓂᕐᒥᒃ, ᐱᙳᐊᖅᑐᓕᕆᓂᕐᒥᒃ, ᐊᒻᒪᓗ ᓂᕿᔅᓴᖃᑦᑎᐊᓂᕐᒥᒃ ᐃᑲᔫᑎᐅᕙᑦᑐᓂᑦ.
ᐃᓕᓐᓂᐊᕐᓂᕐᒥ ᐅᓂᒃᑳᖅᑐᖃᖃᑦᑕᔪᒻᒥᔪᖅ ᐅᖃᕆᐊᖅᑐᕐᓯᒪᖃᑦᑕᖅᑐᑎᒃ ᐅᖃᕆᐊᖅᑐᖁᔭᐅᓯᒪᔪᑦ ᓲᕐᓗ ᐅᑯᐊ ᓂᕈᐊᖅᑕᐅᓯᒪᔪᖅ ᑕᐃᕕᑎ ᔪᐊᓇᓯ, ᓂᕈᐊᖅᑕᐅᓯᒪᔪᖅ ᐃᓕᓴᐱ ᓯᐅᑎᐊᐱᒃ, ᔮᓂ ᐃᓴᓗᒃ, ᓯᓖᓇ ᑲᓪᓗᒃ, ᐊᒻᒪᓗ ᐃᓄᑐᖃᕐᓂᑦ ᑭᒡᒐᑐᖅᑏᒃ ᒦᑲ ᒪᐃᒃ ᐊᒻᒪᓗ ᓴᐃᒪᓐ ᓇᑖᖅ. ᐅᖃᕆᐊᖅᑐᕐᓯᒪᔪᑦ ᐅᖃᐅᓯᖃᖃᑦᑕᔪᔪᑦ ᖃᓄᐃᑦᑐᑐᐃᓐᓇᕐᓂᑦ ᐱᔾᔪᑎᖃᐅᖅᑐᑎᒃ ᓲᕐᓗ ᒪᑯᓂᖓ ᐅᔾᔨᕈᓱᓕᕐᐸᓪᓕᐊᓂᕐᒥᒃ ᐃᓄᐃᑦ ᐃᓕᖅᑯᓯᖓᓐᓂᒃ, ᐊᑐᖃᑦᑕᕐᓯᒪᔭᖏᓐᓂᒃ ᐊᒻᒪᓗ ᐊᓐᓇᐅᒪᓂᕐᒧᑦ ᐊᑐᖅᑕᐅᓲᓂᑦ.
ᐃᓕᓐᓂᐊᕐᓂᖅ ᐃᓚᖃᔪᒻᒥᔪᖅ ᐃᓕᓐᓂᐊᓂᕐᒥᒃ ᐃᓚᖓᓂᒃ ᓂᐲᑦ ᐱᕙᓪᓕᐊᔪᓕᐊᖑᕙᑦᑐᑦ ᐊᐱᕐᓱᕐᓂᐅᕙᑦᑐᓄᑦ ᑐᓴᕋᔅᓴᓕᕆᕕᑦᑎᒍᑦ ᐊᒻᒪᓗ ᐊᑐᖃᑦᑕᓂᕐᒥᒃ ᐃᓄᓕᒫᓄᑦ ᑐᓴᕋᔅᓴᓕᕆᒍᑕᐅᕙᑦᑐᓂᑦ ᐊᒻᒪᓗ ᒥᐊᓕ ᑰᓕ ᐃᓕᓐᓂᐊᑎᑦᑎᔪᒻᒥᔪᖅ ᓂᐱᓕᐅᖃᑦᑕᓂᕐᒥᒃ ᑐᓵᔭᐅᔪᔅᓴᓂᑦ. ᐊᐱᖅᑯᑎᒋᔪᒥᓇᖅᑐᓂᓪᓗ ᐊᐱᕐᓱᖃᑦᑕᔪᒻᒥᔪᑦ ᑭᐅᔭᐅᖃᑦᑕᖅᑐᑎᓪᓗ ᐊᒻᒪᓗ ᑲᑎᒻᒪᔪᑦ ᐅᖃᖃᑎᒌᖃᑦᑕᔪᔪᑦ ᐱᕙᓪᓕᐊᑎᑦᑎᓂᕐᒥᒃ ᐱᓕᕆᐊᔅᓴᓂᑦ, ᑮᓇᐅᔭᖅᑑᑎᔅᓴᓂᑦ ᐊᒻᒪᓗ ᓵᙵᑦᑎᓂᕐᒥᒃ ᐱᓇᐃᓗᑕᕐᓂᑦ ᐃᖅᑲᓇᐃᔮᖏᓐᓂᒃ ᐊᒻᒪᓗ ᐃᓅᓯᖏᓐᓂᑦ.
ᑕᒫᓂ ᐊᕐᕌᒍᒥ, ᐃᓕᓐᓂᐊᕐᓂᖅ ᑮᓇᐅᔭᖃᖅᑎᑕᐅᔪᒧᖅ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᖅᑯᑎᒋᓪᓗᒍ ᐅᓇ ᓄᓇᓕᓐᓂᑦ ᐃᓄᒋᐊᓐᓂᕐᓴᓂᑦ ᐱᓕᕆᐊᔅᓴᖃᖅᑎᑦᑎᖃᑦᑕᕐᓂᖅ ᓄᓇᖃᖅᑐᑐᖃᕐᓂᑦ. ᑮᓇᐅᔭᖃᖅᑎᑦᑎᒍᑕᐅᔪᑦ ᐅᕙᑦᑎᓐᓂᒃ ᐃᖅᑲᓇᐃᔮᔅᓴᖃᖅᑎᑎᒃᑲᓂᕐᓂᐊᖅᑐᑦ ᐱᖓᓱᒃᑲᓂᕐᓂᑦ ᐊᕐᕌᒍᓂᑦ. ᑭᖑᓪᓕᕐᒥ ᐃᓕᓐᓂᐊᖅᑐᖃᕈᒫᕐᒥᔪᖅ ᐃᓄᓐᓂᑦ ᐃᓅᓱᑦᑐᓂᑦ ᓯᕗᖠᖅᑎᓂᑦ ᐸᕐᓇᑕᐅᓯᒪᓪᓗᓂ ᐅᑭᐊᔅᓵᖑᓛᖅᑐᒧᑦ 2019.
