ᕿᑭᖅᑕᓂᒃᑯᑦ ᔫᓂᒥ ᑲᑎᒪᔩᑦ ᑲᑎᒪᓂᖓ ᐊᒻᒪᓗ ᓂᕆᕕᔾᔪᐊᕐᓂᖅ ᕿᑭᖅᑕᕐᔪᐊᒥ ᑲᔪᓯᑦᓯᐊᓚᐅᖅᑐᖅ!
ᑲᑎᒪᔩᑦ ᑲᑎᒪᓂᖓ ᕿᑭᖅᑕᕐᔪᐊᒥ ᑲᔪᓯᑦᓯᐊᑐᒻᒪᕆᐅᓚᐅᖅᑐᖅ, ᖁᔭᒋᕙᕗᑦ ᑐᓐᖓᓇᑦᓯᐊᓚᐅᕐᓂᖏᑦ ᓄᓇᓖᑦ. ᐅᓄᖅᑐᓂᒃ ᐱᐊᓂᓚᐅᖅᑐᒍᑦ ᑭᓯᐊᓂᑦᑕᐅᖅ ᐃᓚᖓᒍᑦ ᖁᕕᐊᓇᖅᑐᓂᒃ ᐱᕕᒃᓴᖃᕆᐊᓚᐅᖅᑐᒍᑦ.
ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕌᓂᑦᑐᑦ
ᕿᑭᖅᑕᓂᒃᑯᑦ ᑲᑎᒪᔨᖏᑦ ᖃᐃᖅᑯᔭᐅᓚᐅᖅᑐᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕌᓂᑦᑐᑦ ᓇᓪᓕᐅᓂᕐᓯᐅᕐᓂᖓᓄᑦ ᐊᐃᑉᐱᕐᒥ ᔫᓂ 4. ᐊᖓᔪᖅᑳᕗᑦ ᑐᓂᓯᓚᐅᖅᑐᖅ ᐃᓕᓐᓂᐊᕌᓂᑦᑐᓄᑦ ᖃᕆᓴᐅᔭᕐᓂᒃ ᓴᕐᓕᐊᒐᕐᓂᒃ ᐃᑲᔫᑎᓂᐊᖅᑐᓂᒃ ᐃᓕᓐᓂᐊᖏᓐᓇᓂᐊᕐᓂᖏᓐᓄᑦ. ᐃᓱᓕᑦᓯᔪᑦ ᐃᑉᐱᓇᒻᒪᕆᓚᐅᖅᑐᑦ ᐅᐸᑦᓯᒪᓗᒋᑦ ᐃᓕᓐᓂᐊᖅᑏᑦ ᐅᓂᒃᑳᖃᑦᑕᑎᓪᓗᒋᑦ ᓇᖕᒥᓂᖅ ᐊᖅᑯᓵᖃᑦᑕᓚᐅᖅᑕᒥᓂᒃ ᐊᒻᒪᓗ ᐊᐳᖅᑕᕐᕕᒋᖃᑦᑕᓚᐅᖅᑕᒥᓂᒃ. ᖁᑉᕖᑦ ᐊᒥᓱᑦ ᑲᑕᒐᓚᐅᖅᑐᑦ ᑭᓯᐊᓂ ᖁᕕᐊᓇᕐᓂᖅᑕᖃᒻᒪᕆᓚᐅᖅᑐᖅ ᓄᓇᓖᑦ ᓇᓪᓕᐅᓂᕐᓯᐅᕐᓂᖓᑦ ᑲᔪᓯᓂᕆᓚᐅᖅᑕᖏᓐᓂᒃ ᐃᓕᓐᓂᐊᕌᓂᑦᑐᑦ.
ᓄᓇᓕᓐᓂ ᓂᕆᕕᔾᔪᐊᕐᓂᖅ
ᐱᖓᑦᓯᕐᒥ, ᔫᓂ 5 ᕿᑭᖅᑕᓂᒃᑯᑦ ᖁᔭᓕᔾᔪᑎᒥᓂᒃ ᓄᓇᓕᓐᓂ ᓂᕆᕕᔾᔪᐊᑎᑦᓯᓚᐅᖅᑐᑦ ᕿᑭᖅᑕᕐᔪᐊᒥ ᑐᓐᖓᓴᐃᑦᓯᐊᕐᓂᖏᓐᓄᑦ. ᓂᕆᕕᔾᔪᐊᕐᓂᖅ ᑲᔪᓯᑦᓯᐊᑐᒻᒪᕆᐅᓚᐅᖅᑐᖅ ᐊᒻᒪᓗ ᓂᕆᑦᓯᐊᖅᑐᑕ ᐃᓄᓕᖅᑕᓂᒃ ᓂᕿᓂᒃ ᑕᒪᒃᑯᓂᖓ ᑐᑦᑐᒥᓃᑦ, ᓇᑦᓯᒥᓃᑦ ᐊᒻᒪᓗ ᐃᖃᓗᒥᓃᑦ. ᖁᕕᐊᓇᕐᓂᖓ ᐃᑉᐱᓇᓚᐅᖅᑐᖅ ᓇᓚᐅᑦᓵᕈᑎᒃᑯᑦ ᐊᒧᔭᐅᖃᑦᑕᑎᓪᓗᒋᑦ ᐱᑖᖅᑐᑎᓪᓗᒋᑦ ᓲᕐᓗ ᖃᖓᑦᑕᐅᑏᑦ ᑐᓂᐅᖅᑲᖅᑕᐅᑎᓪᓗᒋᑦ ᐊᒻᒪᓗ ᓇᓪᓕᐅᓂᕐᓯᐅᕐᓂᖅ ᐃᓱᓕᒍᑎᖃᓚᐅᖅᑐᖅ ᐅᖁᒻᒥᐊᒐᕐᓂᒃ ᐸᕐᓚᑎᑦᓯᓂᒃᑯᑦ ᓱᕈᓯᓕᒫᑦ ᒪᒪᖅᑐᑐᕋᑦᓴᖏᓐᓂᒃ.
ᕿᑭᖅᑕᓂᒃᑯᑦ ᑲᑎᒪᔩᑦ ᑲᑎᒪᓂᖓ: ᑕᓪᓗᕈᑎᐅᑉ ᐃᒪᖓ
ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᑦᓴᓄᓪᓗ ᐊᖏᖃᑎᒌᒍᑦ (IIBA) ᐱᓕᕆᐊᖑᓂᖓ ᐱᓇᓱᐊᒐᓪᓗᐊᑕᕆᓯᒪᒐᑦᑎᒍ ᐊᕐᕌᒍᑦᑎᓐᓂ. ᐄᑉᕈᒥ ᐊᑎᓕᐅᓚᐅᖅᑕᕗᑦ ᑐᑭᓯᐅᒪᖃᑎᒌᓐᓂᒃᑯᑦ ᐊᖏᖃᑎᒌᒍᑦ ᑐᕙᐃᔪᐃᑦᑐᒧᑦ, ᐅᑉᕙᓘᓐᓃᑦ ᖁᑦᑎᑦᑑᑉ ᐃᒪᖓᓄᑦ (High Arctic Basin Area), ᒫᓐᓇ ᑲᓱᕐᓯᒪᓕᖅᑐᖅ ᐱᓕᕆᐊᑦᑎᓐᓄᑦ ᑕᓪᓗᕈᑎᐅᑉ ᐃᒪᖓᓄᑦ.
ᐃᖅᑲᓇᐃᔮᖑᓂᖓ ᐆᑦᑐᕋᐅᑎᒃᑯᑦ ᑐᕙᐃᔪᐃᑦᑐᒧᑦ ᐱᒋᐊᓚᐅᖅᑐᖅ ᕕᑉᕗᐊᓕᒥ ᓄᓇᓕᓐᓂ ᕿᒥᕐᕈᑎᑕᐅᓂᒃᑯᑦ ᐱᓕᕆᐊᖑᓪᓗᓂ ᒐᕙᒪᑐᖃᒃᑯᓐᓂᒃ.
ᑕᓪᓗᕈᑎᐅᑉ ᐃᒪᖓᕗᑦ ᓇᐅᑦᑎᕐᓱᖅᑏᑦ ᓇᐅᑦᓯᑐᖅᑎᑐᐃᓐᓇᐅᖏᑦᑐᑦ ᑲᓇᑕᒥ ᑕᕆᐅᖅ ᓴᐳᔾᔭᐅᓯᒪᓂᖓᓄᑦ. ᐃᔨᒋᔭᐅᔪᑦ ᓯᐅᑎᒋᔭᐅᓪᓗᑎᓪᓗ ᑕᓪᓗᕈᑎᐅᑉ ᐃᒪᖓᓄᑦ − ᖃᐅᔨᓴᑐᐃᓐᓇᖃᑦᑕᖏᑦᑐᑦ ᑕᒫᓂ ᑭᓯᐊᓂᓕᑦᑕᐅᖅ ᐊᖑᓇᓱᖃᑦᑕᕐᒥᔪᑦ ᐃᑲᔫᑎᒃᓴᓂᒃ ᓄᓇᓕᖕᓄᑦ.
ᐱᒋᐊᕐᓂᖓᓂ ᐊᕐᕌᒍᒥ ᓇᐅᑦᑎᕐᓱᖅᑏᑦ ᐆᑦᑐᕋᐅᑦ ᐅᔾᔨᓇᕐᓯᒪᔪᖅ ᐊᒃᑐᐃᓯᒪᓂᖓᓂᒃ ᐃᓅᓯᖏᓐᓄᑦ ᒪᑭᒪᔾᔪᑎᖏᓐᓄᓪᓗ ᖃᓄᐃᓐᖏᑦᓯᐊᕈᑎᒃᓴᖏᓐᓄᑦ ᐃᑉᐱᐊᔪᒻᒥᐅᑦ.
ᐃᖃᓗᑉᐲᑦ, ᓇᑦᓰᑦ ᐊᒻᒪᓗ ᐊᓯᖏᑦ ᐆᒪᔪᖅᑕᐅᔪᑦ ᓇᐅᑦᑎᓱᕐᑎᑯᓐᓂᒃ ᐊᕐᕌᓂᓂᒃ ᐊᓐᓂᕐᓲᑕᐅᖃᑦᑕᕐᓯᒪᔪᑦ ᒥᓇᕋᓐᓂᒃᑯᑦ ᓄᓇᓕᓐᓂ ᓂᕆᕕᔾᔪᐊᑎᑦᓯᖃᑦᑕᓂᒃᑯᑦ ᐃᑲᔫᑕᐅᓪᓗᑎᒃ ᑳᒃᑐᓂᒃ.
ᓂᕿᐅᓐᖏᓐᓂᖏᑦ ᐆᒪᔪᑦ ᑐᓂᔭᐅᖃᑦᑕᖅᑎᒃ ᒥᖅᓱᖅᑎᓄᑦ ᐊᒻᒪᓗ ᓴᓇᐅᒐᖅᑎᓄᑦ ᐱᕙᓪᓕᐊᑲᓐᓂᕈᑎᒃᓴᐅᓪᓗᑎᒃ ᓄᓇᓖᑦ ᒪᑭᒪᔾᔪᑎᖏᓐᓄᑦ. ᐃᖃᓗᑉᐱᓐᓂᒃ ᐊᐅᓪᓚᑎᑦᓯᓚᐅᕐᒥᔪᑦ ᐋᑐᕚᒧᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᐅᓚᑕᖓᓄᑦ “ᐆᑦᓯᓂᖅ ᐅᑭᐅᖅᑕᖅᑐᒥᒃ” ᐋᑐᕚᒥ.
ᓇᐅᑦᓯᑐᖅᑏᑦ ᑲᓱᕈᑕᐅᒻᒥᔪᑦ ᐊᐳᖅᑕᕐᕕᒋᕙᑦᑕᖏᓐᓄᑦ ᒪᒃᑯᑦᑐᑦ ᐃᓐᓇᐃᓪᓗ. ᐊᔪᓐᖏᓐᓂᕆᔭᐅᔪᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ ᑎᒍᓚᖃᑦᑕᖅᑕᖏᑦ ᐃᖅᑲᓇᐃᔭᖃᑎᖃᕐᓂᒃᑯᑦ ᐃᓐᓇᕐᓂᒃ ᐃᓕᓐᓂᐊᑎᑦᓯᒍᑕᐅᕙᑦᑐᑦ ᒪᒃᑯᓂᕐᓴᓂᒃ ᐃᓄᓐᓂᒃ ᐃᓕᒃᑲᓐᓂᕈᒪᔪᓂᒃ ᓄᓇᓕᐊᕐᓯᒪᓗᓂ ᐊᔪᓐᖏᓐᓂᕆᔭᐅᒋᐊᓕᓐᓂᒃ.
ᒥᐊᓂᕐᓯᔨᐅᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓂᒃ, ᓇᐅᑦᑎᕐᓱᖅᑏᑦ ᖃᐅᔨᓴᖃᑦᑕᖅᑐᑦ ᑕᕆᐅᖓᓂ ᓯᑯᖓ ᖃᓄᐃᓕᕐᒪᖔᖅ ᐊᑦᑕᓇᓐᖏᑦᑐᒥᒃ ᐊᖅᑯᑎᒃᓴᖃᑦᓯᐊᖁᓪᓗᒋᑦ ᐊᒻᒪᓗ ᐃᑲᔪᖃᑦᑕᖅᑐᑦ ᐸᕐᓴᐃᔪᖃᕆᐊᖃᓕᓚᐃᒻᒪᑦ ᓄᓇᓕᓐᓂ, ᐊᑐᖅᑕᐅᓪᓗᑎᒃ ᖃᐅᔨᒪᓂᖏᑦ ᓄᓇᓖᑦ ᐃᓄᖏᑦ ᓄᓇᖅᑲᑎᒥᓂᒃ ᐊᒻᒪᓗ ᓄᓇᓖᑦ ᓄᓇᖓᓂᒃ ᐃᑲᔫᑕᐅᓪᓗᓂ ᐃᓅᓕᑦᓯᒋᐊᖃᖅᑎᓪᓗᒋᑦ ᐊᐃᑦᓯᕐᓗᑎᒃ ᐃᓄᓐᓂᒃ ᐃᑲᔪᖅᑕᐅᔭᕆᐊᓕᓐᓂᒃ.
ᐃᓛᒃ ᓇᐅᑦᑎᕐᓱᖅᑏᑦ ᐃᖅᑲᓇᐃᔭᕐᓯᒪᒐᓗᐊᖅᑎᓪᓗᒋᑦ ᑕᖅᑭᓂᒃ ᐊᒥᓲᓐᖏᑦᑐᓂᒃ ᐱᕚᓪᓕᑎᑦᓯᓯᒪᔪᒻᒪᕆᐅᔪᑦ ᕿᓚᒥᐊᓗᒃ ᐊᒻᒪᓗ ᓴᖅᑭᔮᖅᑎᑦᓯᓪᓗᑎᒃ ᐱᔭᕆᐊᓕᖕᓂᒃ ᐊᔾᔨᐸᓗᖏᓐᓂᒃ ᐱᓕᕆᐊᓂᒃ ᐊᓯᖏᓐᓂ ᓯᑕᒪᓂ ᑕᓪᓗᕈᑎᐅᑉ ᐃᒪᖓᓂ ᓄᓇᓕᓐᓂᒃ.
ᕿᑭᖅᑕᓂᒃᑯᑦ ᒫᓐᓇᐅᓂᕐᓴᖅ ᓂᕆᐅᒋᔭᖃᑦᓯᐊᕐᐳᑦ ᐅᓪᓘᓂᐊᖅᑐᒥᒃ ᑕᒪᕐᒥᒃ ᑕᓪᓗᕈᑎᐅᑉ ᐃᒪᖓᓂ ᓄᓇᓕᖁᑎᕗᑦ ᐊᔾᔨᐸᓗᖓᓂᒃ ᐊᐅᓚᑦᓯᓂᐊᕐᓂᖏᓐᓂᒃ.
ᓱᓕᒃᑲᓐᓂᖅ, ᐃᑉᐱᐊᔪᒻᒥ ᓇᐅᑦᑎᓱᖅᑎᓄᑦ, ᐱᓕᕆᐊᕆᔭᕗᑦ ᓇᓗᓇᐃᕆᓂᖅ ᐱᖁᑎᕐᔪᐊᑖᓂᐊᕐᓂᖏᓐᓂᒃ ᐊᑐᓂᑦ ᑕᓪᓕᒪᑦ ᑕᓪᓗᕈᑎᐅᑉ ᐃᒪᖓᓂ ᓄᓇᓖᑦ
ᑐᒃᓯᕋᐅᑎᑎᒍᑦ, ᐅᓂᒃᑳᕐᕕᒋᖃᑦᑕᕐᓯᒪᔭᕗᑦ ᑲᓇᑕ ᒐᕙᒪᒃᑯᖏᑦ ᕿᑭᖅᑕᓂᒃᑯᑦ ᐱᓕᕆᐊᖃᕐᓂᖏᑦ ᓇᓗᓇᐃᕈᑎᒃᓴᓂᒃ ᐱᔪᒪᔭᒥᓂᒃ:
- ᐊᐅᓚᑦᓯᔨᐅᓂᕐᒧᑦ ᐋᖅᑭᑦᓯᒪᓂᐅᔪᖅ ᐃᓄᐃᑦ ᓯᕗᓕᖅᑎᓐᖑᕐᐸᓪᓕᐊᒍᑎᒃᓴᖏᓐᓂᒃ, ᐅᔾᔨᓇᕐᓂᐊᖅᑐᖅ ᕿᒪᒋᐊᕈᑕᐅᓂᖓ ᒫᓐᓇ ᑲᑐᔾᔨᔪᓄᑦ ᒥᕐᖑᐃᓯᕐᕕᓕᕆᔩᑦ ᑲᑎᒪᔨᕋᓛᖏᓐᓄᑦ (JPMC) ᒫᓐᓇ ᐊᑐᖅᑕᐅᔪᓂ ᑲᓇᑕᒥ ᒥᕐᖑᐃᓯᕐᕕᖏᓐᓄᑦ
- ᓇᐅᑦᑎᕐᓱᖅᑏᑦ ᐱᓕᕆᐊᖑᔪᖅ ᒥᑦᑎᒪᑕᓕᒻᒥ, ᑲᖏᕐᖢᒑᐱᒃ, ᐃᑉᐱᐊᕐᔪᒃ, ᐊᐅᓱᐃᑦᑐᖅ, ᐊᒻᒪᓗ ᖃᐅᓱᐃᑦᑐᒥ
- ᑕᕆᐅᕐᒥ ᐱᖁᑎᕐᔪᐊᑦ, ᑕᒪᒃᑯᐊ ᓲᕐᓗ ᐅᒥᐊᕋᓛᖑᓂᕐᓴᓄᑦ ᑐᓚᑦᑕᕐᕖᑦ ᑲᖏᕐᖢᒑᐱᒻᒥ, ᐃᑉᐱᐊᕐᔪᒃ, ᐊᐅᓱᐃᑦᑐᖅ, ᐊᒻᒪᓗ ᖃᐅᓱᐃᑦᑐᒥ
- ᐊᔾᔨᒌᓐᖏᑦᑐᓄᑦ−ᐊᑐᕋᑦᓴᒫᑦ ᐱᖁᑎᕐᔪᐊᑦ ᓲᕐᓗ ᐃᓄᓕᖅᑕᓂᒃ ᓂᕿᓕᕆᕖᑦ, ᓯᕐᓗᐊᑦ ᐊᒻᒪᓗ ᐃᖅᑲᓇᐃᔭᕐᕖᑦ ᒥᑦᑎᒪᑕᓕᒻᒥ, ᑲᖏᕐᖢᒑᐱᒃ, ᐃᑉᐱᐊᕐᔪᒃ, ᐊᐅᓱᐃᑦᑐᖅ ᐊᒻᒪᓗ ᖃᐅᓱᐃᑦᑐᒥ
- ᑮᓇᐅᔭᖅᑑᑎᒃᓴᖅᑖᑲᓐᓂᕈᑎᒃᓴᑦ ᒥᑦᑎᒪᑕᓕᒻᒥ ᓴᓇᔭᕆᐅᒃᓴᕕᒻᒧᑦ
- ᐊᒻᒪᓗ ᐃᓪᓗᕋᓛᓕᐅᖃᑦᑕᕐᓂᖅ ᐊᖑᓇᓱᑉᕕᓐᓂ, ᖃᐅᔨᓴᕐᕕᐅᓗᑎᒃ ᐊᒻᒪᓗ ᐃᓄᐃᓪᓚᒥ ᐊᑐᕋᑦᓴᓂᒃ
ᓱᓕᒃᑲᓐᓂᖅ, ᕿᑭᖅᑕᓂᒃᑯᑦ ᕿᓂᕐᒥᔪᑦ ᐱᕙᓪᓕᐊᑎᒍᓐᓇᕋᔭᖅᑐᒥᒃ ᐃᓄᓐᓄᑦ ᐊᐅᓱᐃᑦᑐᒥ ᖃᐅᓱᐃᑦᑐᒥᓗ ᐊᒃᑐᐊᔪᒥᒃ ᐆᑦᑐᕋᐅᑎᒃᓴᒥᒃ ᖃᐅᔨᓴᕐᓂᕐᒧᑦ ᑐᕙᐃᔪᐃᑦᑐᒧᑦ.
ᐆᑦᑐᕋᐅᑎᒃᓴᒥᒃ ᖃᐅᔨᓴᕐᓂᖅ ᐋᖅᑭᑦᓯᒪᔪᖅ ᐃᓄᐃᑦ ᐱᑉᕕᒃᓴᖃᑦᓯᐊᖁᓪᓗᒋᑦ ᖃᐅᔨᓴᖃᑦᑕᓂᕐᒥᒃ ᑕᒫᓂ ᓇᓗᓇᐃᕐᓯᒪᔪᒃᑯᑦ ᓴᐳᔾᔭᐅᓯᒋᐊᖃᕐᒪᖔᖅ, ᑭᒡᓕᓕᐅᖅᑕᐅᓯᒪᒋᐊᖃᕐᒪᖔᖅ ᓇᐅᒃᑯᑦ, ᐊᒻᒪᓗ ᓇᓗᓇᐃᕐᓯᓂᕐᒥᒃ ᑭᓱᒃᑲᓂᕐᓂᒃ ᐱᔪᒐᕆᔭᖃᕐᒪᖔᑕ ᐃᓄᐃᑦ ᑕᒫᓂ ᓯᕗᓂᑦᑎᓐᓂ.
ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑏᑦ
ᐱᓕᕆᔨᕗᑦ ᓯᕗᒧᐊᒃᑎᑦᑎᕙᓪᓕᐊᖏᓐᓇᕋᓱᐊᕐᓯᒪᔪᑦ ᐱᓕᕆᐊᒥᒃ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᑯᓐᓄᑦ. ᑕᒪᓐᓇ ᐱᓕᕆᐊᖑᓂᖓ ᐊᑕᓪᓚᑖᕐᒪᑦ ᑲᓇᑕ ᒐᕙᒪᖓᑕ ᐊᖏᕐᓯᒪᓂᖓᓄᑦ ᓯᕗᒧᐊᒃᑎᑦᓯᕙᓪᓕᐊᓂᕐᒥᒃ ᓴᐃᒻᒪᖃᑎᒌᓐᓂᕐᒥᒃ ᖃᐅᔨᕐᕙᓪᓚᓐᓂᖏᓐᓄᑦ ᐃᓕᖅᑯᓯᕆᓐᖏᑕᖏᓐᓂᒃ ᐊᑐᖅᑎᑦᓯᖃᑦᑕᕐᓯᒪᓂᖏᓐᓄᑦ ᐊᒻᒪᓗ ᐋᖅᑭᑦᓲᑎᒃᓴᓂᒃ ᐆᑦᑐᕈᑎᓂᒃ ᓴᓐᖏᓂᕐᒥᓂᒃ ᑎᒍᓯᒋᐊᒃᑲᓐᓂᕈᑎᒃᓴᖏᓐᓄᑦ ᐃᓄᐃᑦ ᐅᓪᓗᒥ ᐊᒻᒪᓗ ᖃᐅᑉᐸᑦ.
ᕿᑭᖅᑕᓂᒃᑯᑦ ᐅᖃᖃᑎᖃᐃᓐᓇᖅᑐᑦ ᑯᐃᓐ−ᓄᓇᖃᖅᑳᕐᓯᒪᔪᑦ ᐱᓕᕆᐊᖏᓐᓄᑦ ᒥᓂᔅᑕ ᑭᐅᕈᓕᓐ ᐱᐊᓂᑦ ᐊᒻᒪᓗ ᑲᓇᑕᐅᑉ ᐊᖓᔪᖅᑳᕐᔪᐊᖓᑕ ᐊᓪᓚᑉᕕᖓᓂᒃ.
ᐱᓕᕆᐊᕗᑦ ᐱᖓᓱᓂᒃ ᐊᔪᐃᓐᓇᕈᑎᖃᖅᑐᑕ:
- ᓇᓗᓇᐃᕐᓯᒪᔪᒥᒃ ᖃᐅᔨᕐᕙᓪᓚᖁᓪᓗᖏᑦ ᒪᒥᐊᓪᓗᑎᓪᓗ
- ᑐᑭᓯᒪᖃᑎᒌᓐᓂᕐᒧᑦ ᐊᖏᖃᑎᒌᒍᑏᑦ ᓴᖅᑮᒍᑎᒃᓴᖅ ᓴᐃᒻᒪᖃᑎᒌᓐᓂᕐᒧᑦ ᑮᓇᐅᔭᓂᒃ ᓴᓂᕐᕚᕆᕕᒻᒥᒃ
- ᑲᔪᓯᑎᑕᐅᒋᐊᕐᓂᖏᑦ ᐃᓄᐃᑦ ᐊᑐᕐᓯᒪᔭᖏᑦ ᐊᒻᒪᓗ ᓴᓐᖏᓂᕐᒥᓂᒃ ᑎᒍᓯᕙᓪᓕᐊᑲᓐᓂᖁᓪᓗᒋᑦ ᐱᓕᕆᐊᒃᓴᑎᒍᑦ ᐱᓇᓱᐊᒐᖅᑎᒍᓪᓗ
ᓂᕆᐅᒃᑖᕗᑦ ᑕᖅᑭᐅᓂᐊᖅᑐᓂ ᑕᑯᔪᒪᓪᓗᑕ ᐊᐅᓚᓐᖏᑦᑐᒥᒃ ᐊᐅᓚᔾᔭᐃᓯᒪᓂᕐᒥᒃ ᑖᒃᑯᓂᖓ ᐱᖓᓱᓂᒃ. ᕿᑭᖅᑕᓂᒃᑯᑦ ᐃᖅᑲᓇᐃᔮᓖᑦ ᑕᒪᑦᓱᒥᖓ ᐱᑉᕕᒃᓴᖃᓗᐊᕋᑎᒃ ᒐᕙᒪᑐᖃᒃᑯᑦ ᓂᕈᐊᖅᑎᑦᓯᓂᐊᕐᓂᖏᓐᓄᑦ.
ᓄᓘᔮᓐᓂ ᐱᓕᕆᐊᖅ
ᐱᓇᓱᐊᕈᓯᐅᓚᐅᖅᑐᒥ, ᐱᓕᕆᔨᕗᑦ ᑲᖏᕐᖢᒑᐱᒡᒥ ᓄᓘᔮᓐᓄᑦ ᐊᕐᕌᒍᑕᒫᕐᓯᐅᒻᒥᒃ ᕿᒥᕐᕈᓂᖃᓚᐅᖅᑐᑦ. ᐊᕐᕌᒍᑕᒫᕐᓯᐅᑦ ᑲᑎᒪᓂᖓ ᐅᓂᒃᑳᕈᓐᓇᕐᕕᒋᓲᕗᑦ ᐱᓕᕆᐊᕆᓯᒪᔭᑦᑎᓐᓂᒃ ᑕᑉᕙᓂ ᐱᓕᕆᐊᖑᓂᖓᓂᒃ ᐊᒻᒪᓗ ᐱᕕᒃᓴᖃᖅᑎᑦᑐᒋᑦ ᓂᓪᓕᐅᑎᖃᕈᒪᔪᑦ ᐃᓄᐃᑦ ᑕᓪᓕᒪᓂ ᓄᓇᓕᖕᓂ ᐃᓱᒫᓘᑎᖏᓐᓂᒃ ᐅᔭᕋᓐᓂᐅᕕᒻᒨᖓᔪᓂᒃ.
ᐃᖅᑲᓇᐃᔭᖅᑐᒻᒪᕆᐅᖃᑦᑕᕐᓯᒪᔪᒍᑦ ᐱᕙᓪᓕᐊᒍᑎᒃᓴᕆᓗᒍ ᒪᑭᒋᐊᒃᑲᓐᓂᕈᑎᒃᓴᐅᓗᓂ ᐅᖃᖃᑎᒌᓐᓂᒃᑯᑦ ᐃᑲᔫᑎᒃᓴᓂᒃ ᐃᓄᐃᑦ ᐱᔭᕆᐊᖃᕐᓂᖏᓐᓂᒃ IIBA-ᑯᑎᒍᑦ.
ᐋᔩᕋᕈᑕᐅᒃᑲᓐᓂᓚᐅᖅᑎᓪᓗᒍ ᐃᓚᖏᑦ ᑎᑎᕋᕐᓯᒪᔪᑦ ᓄᓘᔮᓐᓄᑦ IIBA−ᓂ ᐸᕕᓐᓛᑯᓐᓄᑦ ᐊᕐᕌᒍᑦᑎᓐᓂ, ᐱᓕᕆᔨᕗᑦ ᐃᖅᑲᓇᐃᔮᓕᒻᒪᕆᐅᖃᑦᑕᕐᓯᒪᔪᑦ ᓄᑖᑦ ᐃᑲᔫᓯᐊᒃᓴᑦ ᐋᔩᕌᕈᑕᐅᔪᑦ ᐃᓄᓐᓅᖃᑦᑕᐅᒍᑎᒃᓴᖏᓐᓂᒃ.
ᕿᑭᖅᑕᓂᒃᑯᑦ ᐱᓇᓱᐊᖃᑕᐅᕕᒋᒻᒥᔭᖏᑦ ᐱᓕᕆᐊᖅ II ᐊᕙᑎᒥᒃ ᖃᐅᔨᓴᕐᓂᕐᒧᑦ ᐊᐅᓚᑕᐅᔪᖅ ᓯᕗᓕᖅᑕᐅᓪᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ (NIRB). ᐱᓕᕆᐊᕗᑦ ᑖᒃᑯᓇᓐᖔᖅᑐᑦ ᓂᐱᖏᓐᓂᒃ ᐱᔪᒪᔭᖏᓐᓂᓪᓗ ᐃᓄᐃᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᓐᓄᑦ.
ᐱᓕᕆᐊᕆᔭᐅᖃᑕᐅᔪᑦ ᑖᑦᓱᒧᖓ ᐊᐅᓚᑦᓯᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᓕᕆᐊᒥᒃ ᐃᑲᔫᑎᓂᐊᖅᑐᒥᒃ ᖃᐅᔨᓴᕐᓂᕐᒥᒃ ᐊᒃᑐᐃᓂᕆᔭᐅᓯᒪᔪᓂᒃ ᐊᖏᓪᓕᕙᓪᓕᕐᓯᒪᓂᖓᓂᒃ ᐱᓕᕆᐊᖑᔪᖅ. ᕿᑭᖅᑕᓂᒃᑯᑦ ᑲᒪᓯᒪᐃᓐᓇᖅᑐᑦ ᐃᓚᓕᐅᔾᔨᓯᒪᓂᕐᒥᒃ ᒥᑦᑎᒪᑕᓕᒻᒥ ᑖᑦᓱᒧᖓ ᐱᓕᕆᐊᒧᑦ ᐊᒻᒪᓗ ᐱᓕᕆᐊᕇᓐᓇᓂᐊᖅᑐᒍ ᑕᖅᑭᐅᓂᐊᖅᑐᓂ.
ᓱᓕᒃᑲᓐᓂᖅ, ᕿᑭᖅᑕᓂᒃᑯᑦ ᐃᓚᓕᐅᔾᔨᕙᓪᓕᐊᓯᒪᓕᖅᑐᑦ ᒪᐃᔭᖏᓐᓂᒃ ᐃᓘᓐᓇᖏᓐᓄᑦ 7 ᐊᒃᑐᖅᑕᐅᓯᒪᔪᓂᒃ ᓄᓇᓕᓐᓂ (ᒥᑦᑎᒪᑕᓕᒃ, ᑲᖏᕐᖢᒑᐱᒃ, ᐃᑉᐱᐊᕐᔪᒃ, ᓴᓕᕋᔭᒃ, ᐃᒡᓗᓕᒃ, ᑭᓐᖓᐃᑦ ᐊᒻᒪᓗ ᑭᒻᒥᕈᑦ).
ᓄᓇᓖᑦ ᐃᓄᖏᑦ ᑐᑭᓯᓇᕐᓯᑎᑦᓯᑦᓯᐊᑲᓐᓂᖁᔨᔪᑦ ᐊᒃᑐᖅᑕᐅᓯᒪᓂᐅᔪᑦ ᐊᖏᓪᓕᒋᐊᖅᑕᐅᓯᒪᓂᖏᓐᓂᒃ ᑕᒪᑦᓱᒥᖓ ᐊᒻᒪᓗ ᖃᐅᔨᔪᒪᔪᑦ ᑭᓱᓂᒃ ᐃᑲᔫᓯᐊᑦᓴᓂᒃ ᐱᔪᓐᓇᓂᐊᕐᒪᖔᕐᒥᒃ ᐱᓕᕆᐊᖅ II ᓯᕗᒧᐊᑦᑎᑕᐅᑉᐸᑦ.
Q-STEP ᐊᒻᒪᓗ ᑐᑦᑕᕐᕕᒃ
ᐱᓇᓱᐊᒐᕗᑦ ᐋᖅᑭᒍᑎᒃᓴᓯᐅᕐᓂᕐᒥᒃ ᐃᓘᓐᓈᒍᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᓄᓘᔮᓐᓂ ᑲᔪᓰᓐᓇᖅᑐᖅ. ᕿᑭᖅᑕᓂ ᐊᔪᕈᓐᓃᕐᓴᐅᑎᓄᑦ ᐱᓕᖕᒪᒃᓴᐅᑎᓄᓪᓗ ᐱᓇᓱᐊᖃᑎᒌᒍᑕᐅᔪᒃᑯᑦ (Q-STEP) ᐃᑲᔪᖅᑐᒍᑦ ᐃᓄᐃᑦ ᐊᔪᕈᓐᓃᕐᓴᐅᑎᒃᓴᖏᓐᓂᒃ ᐃᖅᑲᓇᐃᔮᓄᑦ, ᐱᓗᐊᖅᑐᒥ ᐃᖅᑲᓇᐃᔮᓄᑦ ᐅᔭᕋᓐᓂᐊᕕᓐᓂ.
ᐃᓄᐃᑦ ᐊᑐᐃᓐᓇᖃᐃᓐᓇᖅᑐᑦ ᐱᓕᖕᒪᒃᓴᐅᑎᒃᓴᓂᒃ ᐊᒻᒪᓗ ᐱᓕᕆᕕᖕᒥᓂ ᐃᓕᓐᓂᐊᓂᕐᒥᒃ ᐊᒃᑐᐊᔪᒥᒃ Q-STEP−ᒧᑦ − ᑖᓐᓇ ᐱᓕᕆᐊᒃᓴᖅ ᑲᔪᓯᕙᓪᓕᐊᓯᐊᖅᑐᖅ ᐊᒻᒪᓗ ᐊᔾᔨᐅᔪᖁᑎᑦᓯᐊᕙᐅᔪᖅ ᐊᐅᓚᓐᖏᑦᑐᒥᒃ ᐆᑦᑐᕋᕐᓂᕐᒥᒃ ᐱᕚᓪᓕᕈᑎᒃᓴᖏᓐᓄᑦ ᐃᓄᐃᑦ.
ᖁᕕᐊᒋᔭᕋ ᐅᖃᐅᓯᖃᕆᐊᒃᓴᖅ ᐆᒥᖓ:
- 71 ᐃᓄᐃᑦ ᐱᐊᓂᒃᓯᒪᔪᑦ ᐃᖅᑲᓇᐃᔮᒧᑦ ᐸᕐᓇᓯᒪᒍᑎᒃᓴᒥᒃ
- 60 ᐃᓄᐃᑦ ᐃᓕᓐᓂᐊᕌᓂᑦᓯᒪᔪᑦ ᐅᖁᒪᐃᑦᑐᕐᓂᐅᓯᕆᔨᐅᓂᕐᒥᒃ
- 21 ᐃᓄᐃᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᓴᓇᔨᐅᒋᐅᕐᓴᓂᕐᒧᑦ ᐃᓕᓐᓂᐊᓂᕐᒥᒃ
- 5 ᐃᓄᐃᑦ ᐱᐊᓂᒃᓯᒪᓕᖅᑐᑦ ᐊᔪᕈᓐᓃᕐᓴᕐᓂᑐᐃᓐᓇᕐᒥᒃ
ᑲᑐᔾᔨᖃᑕᐅᓪᓗᓂ Q-STEP, ᕿᑭᖅᑕᓂᒃᑯᑦ ᐃᖅᑲᓇᐃᔮᕆᓯᒪᔭᖓ ᐃᓄᐃᑦ ᐃᖅᑲᓇᐃᔮᓄᑦ ᐊᑐᐃᓐᓇᐅᒪᔪᒃᑯᕕᕗᑦ ᖃᕆᓴᐅᔭᒃᑯᑦ, ᑐᑦᑕᕐᕕᒃ. ᑐᓴᐅᒪᔭᐅᔾᔪᑎᒃᓴᖓᓄᑦ ᐃᖅᑲᓇᐃᔭᖅᑎᑖᕐᓂᒧᓪᓗ ᐱᓇᓱᐊᒐᐅᔪᑦ ᑐᑦᑕᕕᒻᒧᑦ ᐊᐅᓚᐃᓐᓇᕐᓯᒪᔪᑦ ᕿᑭᖅᑕᓂ ᓄᓇᓕᖏᓐᓂ. ᐅᖓᑖᓃᓕᖅᑐᑦ 700 ᐃᓄᐃᑦ ᐊᑎᓕᐅᖅᑕᐅᓯᒪᔪᑦ ᑐᑦᑕᕕᒻᒥ ᐅᓪᓗᒥᒧᑦ.
ᑐᑭᒧᐊᒍᑎᒃᓴᖅ ᐊᕙᑎ ᖃᐅᔨᓴᖅᑕᐅᓂᖓᓄᑦ
ᑕᖅᑭᐅᓚᐅᖅᑐᓂ ᐊᒥᓲᓐᖏᑦᑐᓂ ᓄᓇᓕᕆᔨᒃᑯᓐᓂ ᐱᓕᕆᔨᖁᑎᕗᑦ ᐱᓕᕆᐊᖃᖃᑦᑕᕐᓯᒪᔪᑦ ᑐᓴᖅᑕᐅᑎᑦᓯᓂᕐᒥᒃ ᖃᐅᔨᓚᐅᖅᑕᒥᓂᒃ ᐊᒃᑐᐊᔪᓂᒃ ᑐᑭᒧᐊᒍᑎᒃᓴᓄᑦ ᐊᕙᑎᒥᒃ ᖃᐅᔨᓴᕐᓂᕐᒥᒃ (SEA) ᐅᖅᓱᐊᓗᓐᓂᒃ ᒑᓯᓂᓪᓗ ᐊᐅᓚᑕᐅᕙᑦᑐᓂᒃ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓗᒃ/ᐊᑯᑭᑦᑐᑦ ᐃᑭᖓᓂ.
ᒫᑦᓯᒥ, ᕿᑭᖅᑕᓂᒃᑯᑦ ᓴᖅᑮᓚᐅᖅᑐᑦ ‘ᐅᖃᐅᓯᕆᓯᒪᔭᕗᑦ: ᐅᖃᐅᓯᕆᓯᒪᔭᕗᑦ, ᐃᓄᐃᑦ ᑕᑯᓐᓇᒐᖓ ᖃᓄᖅ ᐅᖅᓱᐊᓗᓕᕆᓂᖅ ᒑᓯᒥᓪᓗ ᐊᒃᑐᐃᓂᖃᕈᓐᓇᕐᓂᖓᓂᒃ ᐃᓅᓯᑦᑎᓐᓂᒃ.’
ᑖᓐᓇ ᓇᐃᓈᕐᓯᒪᓪᓗᓂ ᑎᑎᕋᖅᑕᐅᓯᒪᔪᖅ ᓴᖅᑮᓯᒪᔪᖅ ᖃᐅᔨᔭᐅᓚᐅᖅᑐᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ (NIRB) ᖃᐅᔨᓴᕐᓂᕆᓚᐅᖅᑕᖓᓂᒃ ᑐᑭᒧᐊᒍᑎᒃᓴᓂᒃ ᐊᕙᑎᒥᒃ ᖃᐅᔨᓴᕐᓂᕐᒥᒃ (SEA) ᐅᖅᓱᐊᓗᓐᓂᐊᓂᕐᒧᑦ ᒑᓯᒥᓪᓗ ᐊᐅᓚᑕᐅᔪᓂᒃ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓗᒃ/ᐊᑯᑭᑦᑐᑦ ᐃᑭᖓᓂ.
2016-ᒥ ᒐᕙᒪᑐᖃᒃᑯᑦ ᐋᖅᑮᓚᐅᖅᑐᑦ ᓄᖅᑲᖓᒍᑎᒃᓴᒥᒃ ᓄᑖᓕᒫᓄᑦ ᐅᖅᓱᐊᓗᓐᓂᐊᓂᕐᒧᑦ ᒑᓯᒥᓪᓗ ᐊᐅᓚᑕᐅᔪᓂᒃ ᐃᑭᓕᒫᖏᓐᓂ ᑲᓇᑕᒥ ᐅᑭᐅᖅᑕᖅᑑᑉ ᐃᒪᖏᓐᓂ. ᐃᓱᒪᓕᐅᕈᑕᐅᓯᒪᔪᖅ ᑖᓐᓇ ᕿᒥᕐᕈᔭᐅᒃᑲᓂᕐᓂᐊᖅᑐᖅ 2021-ᒥ.
NIRB ᐱᒋᐊᖅᑎᑦᓯᓚᐅᖅᑐᑦ SEA ᖃᐅᔨᓴᕐᓂᕐᒥᒃ ᑭᒡᒍᑕᐅᓪᓗᓂ ᓄᖅᑲᖓᑎᑕᐅᓂᖓᓄᑦ ᐊᒻᒪᓗ ᑐᑭᓯᒍᒪᓪᓗᑎᒃ ᐊᒃᑐᐊᔪᓂᒃ ᐅᓗᕆᐊᓇᕐᓂᖏᓐᓂᒃ, ᐃᑲᔫᑎᒃᓴᓂᒃ, ᐊᒻᒪᓗ ᐊᐅᓚᑦᓯᒍᑎᒃᓴᓂᒃ ᑐᑭᒧᐊᒍᑎᒃᓴᓄᑦ ᐃᑭᕐᒥ ᐅᖅᓱᐊᓗᓐᓂᐊᓂᕐᒧᑦ ᒑᓯᒥᓪᓗ ᐊᐅᓚᑕᐅᔪᓂᒃ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓗᒃ/ᐊᑯᑭᑦᑐᑦ ᐃᑭᖓᓂ.
SEA ᐅᓂᒃᑳᖅ ᐊᒻᒪᓗ ᑖᒃᑯᓄᓐᖓᖓᔪᑦ ᐊᑐᓕᖁᔨᔾᔪᑏᑦ ᑐᓴᕈᑕᐅᓂᐊᖅᑐᑦ ᒐᕙᒪᑐᖃᒃᑯᑦ ᐃᓱᒪᓕᐅᕈᑎᖓᓂᒃ 2021−ᒥ.
2017−ᒥᓂᒃ, ᕿᑭᖅᑕᓂᒃᑯᑦ ᐃᓚᒋᔭᐅᖃᑦᑕᕐᓯᒪᔪᑦ ᐱᔭᕆᐊᑭᓪᓕᑎᕆᔨᓄᑦ SEA ᖃᐅᔨᓴᕐᓂᕐᒧᑦ. ᑐᕌᒐᓪᓗᐊᑕᕗᑦ ᐃᖅᑲᓇᐃᔭᖃᑎᖃᕐᓂᖅ ᐃᓄᓐᓂᒃ ᓄᐊᑦᓯᓗᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ (ᐱᖅᑯᓯᕐᒥᒍᑦ ᖃᐅᔨᒪᓂᖏᓐᓂᒃ), ᑐᓴᖅᑎᑦᓯᒍᑕᐅᓂᐊᖅᑐᓂᒃ ᑭᖑᓪᓕᐹᕐᓯᐅᑎᓂ ᐊᑐᓕᖁᔨᔾᔪᑎᖏᓐᓂ SEA.
ᐱᓕᕆᐊᖅ ᐃᓚᒋᓪᓗᓂᐅᒃ ᕿᑭᖅᑕᓂᒃᑯᑦ ᓴᖅᑮᓚᐅᖅᑐᑦ 6-ᓂᒃ IQ ᑲᑎᒪᔨᕋᓛᖏᓐᓂᒃ ᐊᐅᓱᐃᑦᑐᒥ, ᐃᑉᐱᐊᕐᔪᒃ, ᒥᑦᑎᒪᑕᓕᒃ, ᑲᖏᕐᖢᒑᐱᒃ, ᕿᑭᖅᑕᕐᔪᐊᖅ ᐊᒻᒪᓗ ᐸᓐᓂᖅᑑᖅ.
ᑖᒃᑯᑎᒎᓇ ᑲᑎᒪᔨᕋᓛᑎᒍᑦ, ᐊᒻᒪᓗ ᓇᖕᒥᓂᖅ ᖃᐅᔨᓴᕐᓂᒃᑯᑦ ᐊᕐᕌᒎᖅᑲᐅᔫᓐᓂ ᒪᕐᕉᓐᓂ, ᕿᑭᖅᑕᓂᒃᑯᑦ ᓄᐊᑦᓯᓚᐅᖅᑐᑦ ᑐᓴᐅᒪᔾᔪᑎᓂᒃ ᐊᒃᑐᐊᔪᓂᒃ ᐊᒃᑐᐃᓯᒪᓂᐅᔪᓂᒃ ᐅᖅᓱᐊᓗᓐᓂᐊᓂᖅ ᐊᒻᒪᓗ ᒑᓯᒥᒃ ᓴᓐᓂᕈᒻᒥ ᐊᒻᒪᓗ ᕿᑭᖅᑖᓗᒃ/ᐊᑯᑭᑦᑐᑦ ᐃᑭᖓᓂ.
ᕿᑭᖅᑕᓂᒃᑯᑦ ᑐᓂᓯᓚᐅᖅᑐᑦ 80−ᓂᒃ ᐊᑐᓕᖁᔨᔾᔪᑎᓂᒃ NIRB-ᑯᓐᓄᑦ. ᕿᑭᖅᑕᓂᒃᑯᑦ ᖃᐅᔨᓴᕐᓂᖓ ᐊᒻᒪᓗ ᐊᑐᓕᖁᔨᔾᔪᑏᑦ ᑐᑭᒧᐊᒃᑎᑕᐅᓚᐅᖅᑐᑦ IQ ᖃᐅᔨᒪᔨᑕᖏᓐᓄᑦ ᐊᒻᒪᓗ ᓄᓇᕗᑦ ᐊᖏᕈᑎᖏᑎᒍᑦ.
ᕿᑭᖅᑕᓂᒃᑯᑦ ᐊᑐᓕᖁᔨᔾᔪᑎᖏᑦ ᑐᓴᖅᑎᑦᓯᒍᕼᐅᓂᐊᖅᑐᑦ NIRB ᑐᑭᒧᐊᒍᑎᒃᓴᑦ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐅᓂᒃᑳᑦ ᑐᓂᔭᐅᓂᐊᖅᑐᑦ ᒥᓂᔅᑕᒧᑦ ᑯᐃᓐ−ᓄᓇᖃᖅᑳᕐᓯᒪᔪᑦ ᐱᓇᓱᐊᖃᑎᒌᓐᓂᖏᓐᓄᑦ ᐊᒻᒪᓗ ᐅᑭᐅᖅᑕᖅᑐᒨᖓᔪᓂᒃ ᑲᓇᑕᒥ.
ᐃᓚᒌᒃᑐᓄᑦ
ᐃᓚᒌᒃᑐᓄᑦ ᑲᑎᒪᔨᕋᓛᑦ ᓯᕗᓪᓕᕐᐹᒥ ᑲᑎᒪᓚᐅᖅᑐᑦ 2019-ᒥ ᐄᑉᕈᒥ. ᑲᑎᒪᔨᕋᓛᑦ ᐊᖏᕈᑎᖃᓚᐅᖅᑐᑦ ᖁᓕᓂᒃ ᑮᓇᐅᔭᖅᑑᑎᒃᓴᓂᒃ ᑐᒃᓯᕋᐅᑎᓂᒃ ᑲᑎᓪᓗᒋᑦ ᐅᖓᑖᓃᑦᑐᓂᒃ $440,000. ᑖᒃᑯᐊ ᑮᓇᐅᔭᓕᑕᐅᒍᑏᑦ ᐋᖅᑭᒋᐊᕐᓯᒪᔪᓂᒃ ᓄᓘᔮᓐᓂ IIBA ᐱᓯᒪᔪᑦ ᐊᑎᓕᐅᖅᑕᐅᓚᐅᖅᑐᒥᒃ ᐆᑦᑑᑉᕙᒥ. ᐃᓚᒌᒃᑐᓄᑦ ᑮᓇᐅᔭᖅᑑᑎᒃᓴᑦ ᐋᖅᑭᑦᓯᒪᓕᖅᑐᑦ ᒫᓐᓇ $1.1 ᒥᓕᔭᖑᓕᖅᑐᑦ ᐊᕐᕌᒎᑕᒫᑦ ᖁᓕᓄᑦ ᐊᕐᕌᒍᓄᑦ.
ᓄᓇᓖᑦ ᒪᒥᓴᕐᓂᕐᒧᑦ ᑲᑎᓐᓂᖓ
ᓄᓇᓖᑦ ᒪᒥᓴᕐᓂᕐᒧᑦ ᑲᑎᓐᓂᖓ ᐃᑉᐱᐊᔪᒻᒧᑦ, ᑲᖏᕐᖢᒑᐱᒃ, ᓴᓂᕋᔭᒃ, ᐃᒡᓗᓕᒃ ᐊᒻᒪᓗ ᒥᑎᑦᒪᑕᓕᒻᒧᑦ, ᓯᕗᓕᖅᑕᐅᓪᓗᓂ ᑐᓐᖓᕕᒃᑯᓐᓂᒃ ᒫᓐᓇ ᐋᖅᑭᑦᑕᐅᓯᒪᓕᖅᑐᑦ ᔫᓂ 2-ᒥᒃ 7-ᒧᑦ ᑲᖏᕐᖢᒑᐱᒡᒥ. ᕿᑭᖅᑕᓂᒃᑯᑦ ᐃᓚᒋᔭᐅᔪᑦ ᐸᕐᓇᑦᑎᓄᑦ ᐃᖅᑲᓇᐃᔭᖃᑎᒋᔭᐅᓪᓗᑎᒃ ᐃᓕᓴᕐᓯᕕᒻᒥ ᐃᖅᑲᓇᐃᔭᖅᑎᖏᑦ.
ᒪᒃᑯᑦᑐᑦ ᓯᕗᓕᖅᑎᐅᓂᕐᒥᒃ ᐃᓕᓐᓂᐊᖃᑎᒌᓐᓂᖓ
ᕿᑭᖅᑕᓂᒃᑯᑦ ᑲᔪᓯᑦᓯᐊᑐᒻᒪᕆᒻᒥᒃ ᒪᒃᑯᑦᑐᑦ ᓯᕗᓕᖅᑎᐅᓂᕐᒥᒃ ᐃᓕᓐᓂᐊᖃᑎᒌᓐᓂᖃᖅᑎᑦᓯᓚᐅᖅᑐᑦ ᐃᖃᓗᓐᓂ ᐅᐱᕐᖓᑦᓵᖅ ᑎᒍᓯᕙᓪᓕᐊᒍᑎᒃᓴᖏᓐᓂᒃ ᓯᕗᓕᖅᑎᐅᓗᓂ ᐊᔪᓐᖏᓐᓂᕆᔭᐅᒋᐊᓕᓐᓂᒃ ᐃᓄᓐᓄᑦ ᒪᒃᑯᑦᑐᓄᑦ ᕿᑭᖅᑕᓂ ᓄᓇᖓᓂ ᐊᒻᒪᓗ ᒪᑭᒋᐊᒃᑲᓐᓂᕈᑎᒃᓴᖏᓐᓂᒃ ᓄᓇᓖᑦ ᐃᓚᓕᐅᔾᔭᐅᓯᒪᓂᖏᓐᓄᑦ.
ᐊᕙᑎᑦ ᒪᒃᑯᑦᑐᑦ ᐃᓚᒋᔭᐅᓚᐅᖅᑐᑦ ᑭᓐᖓᕐᓂᒃ, ᑲᖏᕐᖢᒑᐱᒃ, ᐃᒡᓗᓕᒃ, ᐃᖃᓗᐃᑦ, ᐸᓐᓂᖅᑑᖅ ᐊᒻᒪᓗ ᒥᑦᑎᒪᑕᓕᒃ.
ᐊᕐᕌᒍᑦᑎᓐᓂ, ᐃᓕᓐᓂᐊᖃᑎᒌᓐᓂᖅ ᑮᓇᐅᔭᓕᑕᐅᓯᒪᓚᐅᖅᑐᖅ ᑲᓇᑕ ᒐᕙᒪᒃᑯᖏᓐᓂᒃ ᑖᒃᑯᑎᒎᓇ ᓄᓇᓕᖕᒥᐅᑕᓄᑦ ᐊᐅᓚᔾᔪᑎᒃᓴᑦ ᓄᓇᖃᖅᑳᕐᓯᒪᔪᓄᑦ. ᑮᓇᐅᔭᓕᑕᐅᓯᒪᓂᖓ ᕿᑭᖅᑕᓂᒃᑯᓐᓄᑦ ᑲᔪᓯᑎᑦᓯᒍᑕᐅᒍᓐᓇᓂᐊᖅᑐᖅ ᑖᑦᓱᒧᖓ ᐱᓕᕆᐊᒧᑦ ᐊᕐᕌᒍᓂᒃ ᐱᖓᓱᒃᑲᓂᕐᓂᒃ. ᑭᖑᓪᓕᕐᒥ ᑲᑎᖓᖃᑎᖃᕐᓂᐊᖅᑐᑦ ᐃᓄᓐᓂᒃ ᒪᒃᑯᑦᑐᓂᒃ ᓯᕗᓕᖅᑎᓂᒃ ᐸᕐᓇᑕᐅᓯᒪᔪᖅ ᐅᑭᐊᑦᓵᖓᓂ 2019.
ᐱᓇᓱᐊᖃᑎᒌᒍᑕᐅᔪᑦ QC-ᑯᓐᓂᒃ
ᐱᓕᕆᖃᑎᒌᓐᓇᖅᑕᕗᑦ ᐱᓕᕆᐊᒃᑎᓐᓄᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪᓗ ᕿᑭᖅᑕᕐᔪᐊᖅ ᕼᐊᒻᓚᖓ ᖃᐅᔨᓇᓱᐊᖅᑐᑕ ᐋᖅᑭᓱᐃᔾᔪᑎᒃᓴᓂᒃ ᕿᑭᖅᑕᕐᔪᐊᒥ ᑕᕆᐅᒃᑯᑦ ᐱᖁᑎᕐᔪᐊᓕᐅᕐᓂᕐᒧᑦ ᐱᓇᓱᐊᒐᑦᓴᒥᒃ. ᑖᓐᓇ ᐱᓕᕆᐊᖑᓂᖓ ᓯᕗᒧᐊᒍᑎᒃᓴᖅ ᐸᕐᓇᐅᑎᓄᑦ ᐃᑎᔪᒥ−ᑕᕆᐅᕐᒥ ᑐᓚᑦᑕᕕᖕᒧᑦ ᕿᑭᖅᑕᕐᔪᐊᒥ, ᑖᓐᓇ ᐱᓪᓗᐊᑕᐅᔪᖅ ᐱᑕᖃᕆᐊᓕᓐᓂ ᐱᕈᕐᐸᓪᓕᐊᓂᖓᓄᑦ ᓄᓇᕗᒻᒥ ᐃᖃᓗᓕᕆᓂᖅ ᐊᒻᒪᓗ ᐊᓯᖏᑦ ᑕᕆᐅᕐᒨᖓᔪᓂᒃ ᓴᓇᒡᕕᔾᔪᐊᓂ.
ᕿᑭᖅᑕᓂᒃᑯᑦ ᑲᑎᒪᔨᖏᑦ ᑲᑎᒪᓛᓕᕐᒥᔪᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓗᑎᒃ ᐃᖃᓗᓐᓂ ᐅᑭᐊᑦᓵᖅ.
