ᕿᑭᖅᑕᓂᒃᑯᑦ ᓇᐅᑦᑎᕐᓱᖅᑎᖏᑦ ᕿᑎᕐᒥᐅᓂᑦ ᐋᓐᓂᐊᖅᑐᓕᕆᓂᕐᒧᑦ ᓂᕿᔅᓴᖃᑦᑎᐊᓂᕐᒨᖓᔪᓄᓪᓗ ᐃᓕᓐᓂᐊᑎᑦᑎᓂᖓᓐᓂ ᐃᓚᒋᔭᐅᕗᑦ
ᒪᐃ 3, 4, 5ᒥᓗ, 2022, ᐃᖅᑲᓇᐃᔭᖅᑎᖏᑦ ᕿᑭᖅᑕᓂᒃᑯᑦ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᒧᓪᓗ ᐊᓪᓚᕝᕕᖓᓐᓂ ᐃᓚᒋᔭᐅᔪᔪᑦ ᕿᑎᕐᒥᐅᓂᑦ ᐋᓐᓂᐊᖅᑐᓕᕆᓂᕐᒧᑦ ᓂᕿᔅᓇᖃᑦᑎᐊᓂᕐᒨᖓᔪᓄᓪᓗ ᐃᓕᓐᓂᐊᓂᕐᒥ ᐃᖃᓗᒃᑑᑦᑎᐊᕐᒥ ᐃᓕᓐᓂᐊᕆᐊᖅᑐᑎᒃ ᓂᕿᔅᓴᖃᑦᑎᐊᓂᕐᒨᖓᔪᓂᑦ ᐱᓇᓱᐊᕈᑕᐅᔪᓂᑦ ᕿᑎᕐᒥᐅᓂᑦ ᓄᓇᓕᓐᓂᑦ ᐊᒻᒪᓗ ᑐᑭᓯᔭᖅᑐᖅᑐᑎᒃ ᐱᓇᓱᐊᕋᔅᓴᓂᑦ ᐃᓄᔅᓯᐅᑎᓂᑦ ᓂᕿᓂᑦ ᑕᐅᕐᓰᖃᑦᑕᓂᕐᒧᑦ ᕿᑭᖅᑕᓂ ᕿᑎᕐᒥᐅᓂᓪᓗ ᓄᓇᓕᐅᔪᓂᑦ.
ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᒋᔭᐅᔪᔪᑦ ᐃᓕᓐᓂᐊᓂᕐᒥ ᓄᓇᓕᓐᓂᑦ ᐅᑯᓇᙶᕐᓯᒪᔪᓂᑦ ᐅᖅᓱᖅᑑᖅ, ᑕᓗᕐᔪᐊᖅ, ᐊᒻᒪᓗ ᖁᕐᓗᖅᑑᖅ. ᕿᑭᖅᑕᓂ ᓄᓇᓕᓐᓃᙶᕐᓯᒪᔪᔪᖅ, ᔫ ᐊᒪᕈᐊᓕᒃ, ᓇᐅᑦᑎᕐᓱᖅᑎᓂᑦ ᓄᓇᓕᓐᓂᑦ ᑐᑭᒧᐊᑦᑎᑦᑎᔨ ᖃᐅᓱᐃᑦᑐᕐᒥ, ᐅᖃᐅᓯᖃᔪᔪᖅ ᐊᖑᓇᓱᖃᑦᑕᕐᓂᐅᑉ ᒥᔅᓵᓅᖓᔪᓂᑦ ᐊᒻᒪᓗ ᐃᓄᔅᓯᐅᑎᓂᑦ ᓂᕿᓂᑦ ᐱᔭᕆᐊᓕᖏᓐᓂᒃ ᖃᐅᓱᐃᑦᑐᕐᒥᐅᑦ ᐃᒃᐱᐊᕐᔪᒻᒥᐅᓪᓗ. ᓂᐅᕆ ᐃᖃᓗᔾᔪᐊᖅ, ᓇᐅᑦᑎᕐᓱᖅᑎᓂᑦ ᓄᓇᓕᓐᓂᑦ ᑐᑭᒧᐊᑦᑎᑦᑎᔨ ᐃᒃᐱᐊᕐᔪᒻᒥ, ᐃᓚᒋᔭᐅᔪᔪᖅ ᐃᓕᓐᓂᐊᓂᕐᒥ ᖃᕋᓴᐅᔭᒃᑰᖅᑐᓂ ᐊᒻᒪᓗ ᐃᑲᔪᕐᓰᔪᔪᖅ ᔫ ᐅᓂᒃᑳᖏᓐᓂᒃ ᐅᖃᐅᓯᖃᖅᑐᓂ ᖃᓄᐃᑦᑐᓂᑦ ᐃᓄᔅᓯᐅᑎᓂᑦ ᓂᕿᓂᑦ ᐱᑕᖃᖃᑦᑕᕐᒪᖔᖅ ᐃᒃᐱᐊᕐᔪᒻᒥ ᑕᐅᕐᓰᒍᑕᐅᔪᓐᓇᖅᑐᓂᑦ ᕿᑎᕐᒥᐅᓂᑦ ᓄᓇᓕᓐᓄᑦ. ᐃᓕᓐᓂᐊᓂᕐᒥ ᐃᓚᒋᔭᐅᔪᔪᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᑦ ᐊᒻᒪᓗ ᕿᑎᕐᒥᐅᓂᑦ ᓄᓇᓕᓐᓃᙶᕐᓯᒪᔪᑦ ᐅᓂᒃᑳᔪᔪᑦ ᓄᓇᖓᓐᓂ ᐃᓄᔅᓯᐅᑎᓂᑦ ᓂᕿᑖᕆᒍᒪᕙᑦᑕᖏᓐᓂᒃ, ᐅᖃᐅᓯᖃᖅᑐᓂ ᐃᓄᔅᓯᐅᑎᓂᑦ ᓂᕿᓂᑦ ᓂᕿᒋᓗᐊᕐᐸᑦᑕᖏᓐᓂᒃ, ᐃᓄᔅᓯᐅᑏᑦ ᓂᖀᑦ ᐱᑕᖃᙱᓗᐊᕐᐸᑦᑐᓂᑦ ᐊᒻᒪᓗ ᐱᔪᒪᓗᐊᖅᑕᖏᓐᓂᒃ, ᐊᒻᒪᓗ ᓇᓪᓕᐊᓐᓂᒃ ᐃᓄᔅᓯᐅᑎᓂᑦ ᓂᕿᓂᑦ ᑕᐅᕐᓯᐅᑎᒍᒪᒐᔭᖅᑕᖏᓐᓂᒃ.
ᐋᑕᓖᓐ ᓵᓚᒨᓂ, ᑐᑭᒧᐊᑦᑎᑦᑎᔨ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᒧᓪᓗ, ᐅᖃᐅᓯᖃᔪᔪᖅ ᐱᒻᒪᕆᐅᓂᖏᓐᓂᒃ ᓇᐅᑦᑎᕐᓱᖅᑎᖃᕐᓂᕐᒧᑦ ᐱᓕᕆᐊᕐᒥ ᐊᒻᒪᓗ ᐃᑲᔫᑎᖃᕐᓯᒪᓪᓚᕆᓐᓂᖏᓐᓂᒃ ᓇᐅᑦᑎᕐᓱᖅᑏᑦ ᓂᕿᔅᓴᖃᑦᑎᐊᑎᑦᑎᓂᕐᒧᑦ ᓄᓇᓕᖏᓐᓂᒃ.
ᐃᓚ ᓚᕕᓐ, ᓴᐳᔾᔨᕕᒻᒥ ᒪᑭᒪᓇᓱᐊᕈᑎᓅᖓᔪᓂᑦ ᑲᒪᔨᓪᓗᐊᑕᖅ, ᐅᖃᐅᓯᖃᔪᔪᖅ ᐱᖁᑎᕐᔪᐊᓂᑦ ᐊᐅᓚᔾᔪᑎᔅᓴᓂᑦ ᓴᓇᔭᐅᒍᒫᕐᓂᐊᖅᑐᓂᑦ ᕿᑭᖅᑕᓂ ᐃᑲᔪᕐᓗᑎᒃ ᓇᐅᑦᑎᕐᓱᖅᑎᓂᑦ ᐊᒻᒪᓗ ᓂᕿᔅᓴᖃᑦᑎᐊᓂᕐᒧᑦ ᐱᓇᓱᐊᕈᑎᔅᓴᓂᑦ ᑕᓪᓕᒪᓂᑦ ᑕᓪᓗᕈᑎᐅᑉ ᐃᒪᖓᑕ ᖃᓂᒋᔮᓃᑦᑐᓂᑦ ᓄᓇᓕᓐᓂᑦ.
ᐊᓯᖏᑦ ᐱᔾᔪᑕᐅᔪᔪᑦ ᐅᖃᐅᓯᐅᓪᓗᑎᒃ ᒪᑯᐊ:
- ᐃᓱᒪᔅᓴᕐᓯᐅᕈᑎᖃᕐᓂᖅ ᖃᓄᑐᐃᓐᓇᖅ ᐊᑐᖅᑕᐅᔪᓐᓇᖅᑐᓂᑦ ᐊᑭᓕᐅᑕᐅᖃᑦᑕᓂᐊᖅᑐᓂᑦ ᐊᑭᒋᕙᑦᑕᖏᓐᓄᑦ ᐊᖑᓇᓱᖃᑦᑕᓂᕐᒧᑦ ᐊᒻᒪᓗ ᓂᕿᑖᖅᑎᑦᑎᖃᑦᑕᓂᕐᒧᑦ ᐃᓄᔅᓯᐅᑎᓂᑦ ᓂᕿᓂᑦ,
- ᐊᐅᓚᑦᑎᓂᕐᒥᒃ ᐊᐅᓚᓂᖏᓐᓂᒃ ᐃᓄᔅᓯᐅᑎᓂᑦ ᓂᕿᓕᕆᖃᑦᑕᓂᕐᒥᒃ ᐊᒡᒍᖅᑕᐅᖃᑦᑕᕐᓂᖏᓐᓂᒃ ᐴᖅᑲᖅᑕᐅᖃᑦᑕᕐᓂᖏᓐᓂᓪᓗ ᐃᓪᓗᖁᑎᓂᑦ,
- ᑮᓇᐅᔭᓕᐅᕋᓱᐊᕈᑕᐅᓪᓗᑎᒃ ᐃᖃᓗᓕᕆᕕᐅᕙᑦᑐᑦ,
- ᓄᓇᓕᓐᓂᑦ ᖁᐊᒃᑯᕖᑦ,
- ᐊᒻᒪᓗ ᖃᓄᖅ ᐱᒋᐊᖅᑎᑦᑎᒍᓐᓇᕐᒪᖔᑕ ᐃᓄᔅᓯᐅᑎᓂᑦ ᓂᕿᓂᑦ ᑕᐅᕐᓰᑎᑦᑎᖃᑦᑕᓂᕐᒥᒃ ᓄᓇᓕᓐᓂᑦ ᐊᔾᔨᒌᙱᑐᒡᒍᑎᓂᑦ ᐊᕕᑦᑐᕐᓯᒪᓂᐅᔪᓂᑦ.
1 – ᐋᑕᓕᓐ ᓵᓚᒨᓂ, ᑐᑭᒧᐊᑦᑎᑦᑎᔨ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᒧᓪᓗ, ᐊᒻᒪᓗ ᔫ ᐊᒪᕈᐊᓕᒃ, ᖃᐅᓱᐃᑦᑐᕐᒥ ᓇᐅᑦᑎᕐᓱᖅᑎᓂᑦ ᓄᓇᖓᓐᓂ ᑐᑭᒧᐊᑦᑎᑦᑎᔨ, ᕿᑎᕐᒥᐅᓂᑦ ᐋᓐᓂᐊᖅᑐᓕᕆᓂᕐᒧᑦ ᓂᕿᔅᓴᖃᑦᑎᐊᓂᕐᒨᖓᔪᓂᓪᓗ ᐃᓕᓐᓂᐊᓂᕐᒥ ᐃᖃᓗᒃᑑᑦᑎᐊᕐᒥ
2 – ᐋᑕᓕᓐ ᓵᓚᒨᓂ, ᑐᑭᒧᐊᑦᑎᑦᑎᔨ ᐃᒪᓕᕆᓂᕐᒧᑦ ᐆᒪᔪᓕᕆᓂᕐᒧᓪᓗ, ᐅᓂᒃᑳᑎᓪᓗᒍ ᕿᑎᕐᒥᐅᓂᑦ ᐋᓐᓂᐊᖅᑐᓕᕆᓂᕐᒧᑦ ᓂᕿᔅᓴᖃᑦᑎᐊᓂᕐᒨᖓᔪᓂᓪᓗ ᐃᓕᓐᓂᐊᕐᓂᕐᒥ
3- ᔫ ᐊᒪᕈᐊᓕᒃ, ᖃᐅᓱᐃᑦᑐᕐᒥ ᓄᓇᖓᓐᓂ ᑐᑭᒧᐊᑦᑎᑦᑎᔨ, ᐅᖃᐅᓯᖃᖅᑎᓪᓗᒍ ᐃᓄᔅᓯᐅᑎᓂᑦ ᓂᕿᓂᑦ ᑕᐅᕐᓰᒍᑎᖃᖃᑦᑕᓂᕐᒧᑦ ᐱᓇᓱᐊᕋᔅᓴᓂᑦ ᑕᓗᕐᔪᐊᕐᒥ
4- ᔫ ᐊᒪᕈᐊᓕᒃ, ᖃᐅᓱᐃᑦᑐᕐᒥ ᓄᓇᓕᖓᓐᓂ ᑐᑭᒧᐊᑦᑎᑦᑎᔨ, ᐅᐸᓗᖓᐃᔭᖅᑎᓪᓗᒍ ᐅᓂᒃᑳᓂᐊᖅᑎᓪᓗᒍ ᕿᑎᕐᒥᐅᑎᓂᑦ ᐋᓐᓂᐊᖅᑐᓕᕆᓂᕐᒧᑦ ᓂᕿᔅᓴᖃᑦᑎᐊᓂᕐᒨᖓᔪᓂᓪᓗ ᐃᓕᓐᓂᐊᕐᓂᕐᒥ
