ᕿᑭᖅᑕᓂ ᐃᓄᐃᑦ ᐊᒃᑐᖅᑕᐅᖏᓐᓇᕐᒪᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᒃᑲᔪᐊᓗᖕᒥ ᐆᒪᔪᓄᑦ ᐅᓗᕆᐊᓇᕈᑎᐅᓕᖅᑐᖅ ᐆᒪᔪᓪᓗ ᐊᓐᓇᐅᒪᔾᔪᑎᒋᓪᓚᕆᒃᖢᑎᒍᑦ ᑎᒥᑦᑎᓐᓄᑦ ᐱᖅᑯᓯᑦᑎᓐᓄᓪᓗ.

ᓄᓇᕐᔪᐊᕐᒥ ᐊᓐᓇᐅᒪᔾᔪᑎᓕᕆᔩᑦ ᐅᑭᐅᖅᑕᖅᑑᑉ ᓴᐳᑎᓯᒪᔭᖏᑦ, ᐊᓂᖅᓵᕐᕕᑦᑎᐊᕙᒃᓴᓪᓗ, ᓄᓇᕐᔪᐊᒧᓪᓗ ᐆᓇᕈᓐᓃᕈᑎᕚᓪᓕᕈᑏᑦ, ᐊᒃᑐᐃᒻᒪᕆᖕᒪᑕ ᑕᕆᐅᕐᒧᑦ ᐃᒪᐅᓪᓗ ᐊᐅᓚᓂᖓᓄᑦ, ᑕᒪᕐᒥᒃ ᐊᒃᓱᕈᕐᓇᕈᑕᐅᓕᖕᒪᑕ.

ᓯᑯᖃᕈᓐᓃᖅᐸᓪᓕᐊᓂᖅ ᐅᑭᐊᖅᑕᖅᑑᕐᓗ ᓱᓪᓗᐊ ᑕᕆᐅᑉ ᐊᖅᑯᑎᖓ ᐅᑭᐅᖅᑕᖅᑑᓪᓗ ᑕᕆᐅᖓ ᐊᖅᑯᑎᒋᔭᐅᔪᓐᓇᖅᓯᕙᓪᓕᐊᓂᐊᕐᒪ, ᐃᓄᐃᑦ ᐃᓕᖅᑯᓯᖏᓐᓄᑦ ᓯᖁᒥᔾᔪᑎᕙᓪᓕᐊᓂᐊᖅᑐᑦ ᑲᓇᑕᐅᓪᓗ ᐅᑭᐅᖅᑕᖅᑐᖁᑖᓄᑦ ᐃᓕᓴᕆᔭᐅᔾᔪᑎᐅᓯᒪᔪᖅ ᑕᒪᒃᑯᐊ ᐅᓗᕆᐊᓇᖅᑐᒦᓕᕈᑎᐅᔪᑦ.

ᓄᓇᕐᔪᐊᕐᒥᐅᖃᑎᕗᑦ, ᐱᓗᐊᖅᑐᒥ ᑲᓇᑕ, ᐊᒃᓱᕈᕐᓇᕐᔪᐊᖅᑐᒃᑰᕐᒪᑕ ᑕᒪᓐᓇ ᐱᔾᔪᑎᒋᓪᓗᒍ ᐃᓄᐃᑦ ᖃᐅᔨᒪᔭᖓ, ᐱᓕᕆᔾᔪᓯᖓ, ᐊᔪᖏᑕᖏᓪᓗ ᑲᑎᑕᐅᑦᑎᐊᕐᓗᑎᒃ ᖃᓄᖅᑑᕈᑕᐅᔪᓐᓇᑦᑎᐊᕐᒪᑕ.

ᕿᑭᖅᑕᓃᒃᑯᑦ ᑲᓇᑕᒥ ᐱᓕᕆᖃᑎᒌᖕᓂᖅᓴᐅᔪᒪᔾᔪᑎᒋᕚ ᓴᖅᑭᑦᑏᔪᒪᖕᒪᑕ ᐊᓯᔾᔨᖅᐸᓪᓕᐊᔪᒧᑦ ᐅᓗᕆᐊᓇᖏᓐᓂᖅᓴᐅᔪᒥᓪᓗ ᐅᑭᐅᖅᑕᖅᑑᑉ ᐊᕙᑎᖓ ᓴᐳᔾᔭᐅᑦᑎᐊᖁᓪᓗᒍ ᐃᓄᖕᓂᒃ ᓯᕗᓕᖅᑕᐅᓗᓂ, ᑮᓇᐅᔭᓕᐅᕈᑕᐅᔪᓐᓇᑦᑎᐊᕐᓗᓂᓗ ᓄᓇᓕᖕᒥᐅᓄᑦ, ᐃᓄᖕᓄᓪᓗ ᓯᕗᓕᐅᖅᑕᐅᔪᓐᓇᑦᑎᐊᕐᓗᓂ ᐸᐸᑕᐅᔪᓐᓇᑦᑎᐊᕐᓗᓂᓗ.

ᑲᑐᔾᔨᖃᑎᒌᒡᓗᑕ ᓴᐳᔾᔨᒋᐊᕐᓂᖅ ᐱᓕᕆᖅᑳᖅᑕᐅᔭᕆᐊᖃᖅᐳᖅ ᐊᑐᕐᓗᑎᒃ ᐃᓄᐃᑦ ᖃᐅᔨᒪᔭᖏᓐᓂᒃ, ᒪᓕᒐᖏᓐᓂᒃ, ᐱᖅᑯᓯᖏᓐᓂᒃ ᐊᑐᖅᐸᒃᑕᖏᓐᓂᓪᓗ ᑕᐅᑐᖕᓂᖃᕐᓂᖅᓴᐅᓂᐊᕐᒪᑦ ᐃᓄᐃᑦ ᓇᖕᒥᓂᑦᑎᐊᒻᒪᕆᒃ ᐸᖅᑭᔨᐅᔪᓐᓇᕐᓂᖏᓐᓂᒃ ᐃᓅᓯᖏᓐᓂᒃ ᐊᑐᖅᓯᒪᔭᖏᓐᓂᒡᓗ ᐱᓇᓱᐊᕈᑕᐅᓗᓂ ᐃᓄᐃᑦ ᐱᖅᑯᓯᖏᑦ ᑮᓇᐅᔭᓕᐅᓐᓇᐅᑎᖏᓪᓗ ᓇᖕᒥᓂᖅᓱᕐᓗᑎᒃ.

ᐃᓄᐃᑦ ᓴᐳᔾᔨᔨᐅᖏᓐᓇᐅᔭᕐᒪᑕ ᐊᕙᑎᑦᑎᓐᓂ, ᐱᖅᑯᓯᑦᑎᓐᓄ, ᐃᓕᖅᑯᓯᑦᑎᓐᓄᑦ, ᒪᓕᒐᖅᑎᓐᓄᓪᓗ ᐊᑐᖅᑕᐅᖏᓐᓇᐅᔭᖅᑐᑦ – ᓯᕗᓂᒃᓴᕗᑦ ᑕᒪᒃᑯᓂᖓ ᑕᑎᖃᒻᒪᕆᒃᐳᑦ.

ᐊᑕᖏᕐᓗᒍ ᐅᖃᓕᒫᕈᒪᒍᕕᐅᒃ ᑐᑭᓯᔪᑎ 2022, ᖃᐅᔨᒋᐊᕐᕆᑦ ᐃᑭᐊᕿᕕᒃᑎᓂ: https://www.qia.ca/wp-content/uploads/2022/11/qia-prospectus-2022-inuktitut-final.pdf