ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒍᑎᖃᕐᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒫᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ, ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᖃᕋᓴᐅᔭᒃᑯᓪᓗ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᒃᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᐸᓚᐅᖅᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᓴᐃᒪᓐ ᐊᕙ – ᐊᖓᔪᖅᑳᖅ, 1979–1982
ᓴᐃᒪᓐ ᐊᕙ ᒪᒃᑯᒃᑐᑯᓘᓚᐅᖅᑐᖅ ᐱᖃᑕᐅᕙᓪᓕᐊᓕᖅᑎᓪᓗᒍ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (ᕿᑭᖅᑖᓗᒃ ᐃᓄᐃᑦ ᑲᑐᔾᔨᖃᑎᒌᖏᑦ). ᐊᑐᖅᖢᒍ ᐱᔪᒪᓂᖓ ᐃᑲᔪᕈᒪᓂᖓᓂᒃ ᐃᓄᖕᓂᒃ ᓯᕗᒧᐊᑦᑎᐊᖁᓪᓗᒋᑦ ᐱᔪᓐᓇᐅᑎᒋᔭᖏᑦ ᐊᖅᑯᑎᒋᓪᓗᒍ ᓄᓇᑖᕐᓂᕐᒧᑦ ᐱᓕᕆᐊᖑᕙᓪᓕᐊᓚᐅᖅᑐᓂᒃ. ᓴᐃᒪᓐ ᑕᑯᓚᐅᖅᑐᖅ ᐊᒃᓱᕈᓐᓇᖅᑐᓂᒃ ᐊᒻᒪᓗ ᑎᒥᐅᔪᖅ ᐊᖏᓪᓕᕙᓪᓕᐊᓂᖓᓄᑦ.
ᐊᖓᔪᖅᑳᖑᓚᐅᖅᑐᖅ 1979ᒥᑦ 1982ᓱᑦᒪ ᓯᑕᒪᐃᓐᓇᕐᓂᓗ ᐃᖅᑲᓇᐃᔭᖅᑎᖃᖅᖢᓂ. ᑕᒃᑯᐊ ᐊᕐᕌᒍᑦ ᐱᒋᐊᓕᖅᓴᑎᓪᒍ ᐊᒃᓱᕈᓚᐅᖅᑐᑦ ᐱᓕᕆᖃᑦᑕᖅᖢᑎᒃ ᑮᓇᐅᔭᖅᑖᕋᓱᐃᓐᓇᖃᑦᑕᖅᖢᑎᒃ ᐊᐅᓚᔾᔪᑎᒋᔭᐅᓂᐊᖅᑐᓄᑦ ᑎᒥᐅᔪᒥᒃ. ᓴᐃᒪᓐ ᐅᖃᖅᑐᖅ ᕿᑭᖅᑕᓃᒃᑯᑦ ᑎᒥᐅᓂᖓ ᓯᕗᒧᐊᖅᓯᒪᓕᕐᓂᖓᓂᒃ 150ᓂᒃ ᐅᖓᑖᓂᓗ ᐃᖅᑲᓇᐃᔭᖅᑎᖃᓕᖅᖢᓂ ᐅᓪᓗᒥ, ᐊᒻᒪᓗ ᐱᕙᓪᓕᐊᔪᓕᕆᔨᖏᑦ ᐊᒻᒪᓗ ᐊᓯᖏᑦ ᑎᒥᐅᔪᓂᒃ ᓴᖅᑭᑕᐅᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ.
ᓴᐃᒪᓐ ᐃᖅᑲᐅᒪᔪᖅ ᖃᓄᖅ ᐊᒃᓱᕈᓐᓇᖅᑎᒋᓚᐅᕐᒪᖔᑦ ᓄᓇᑖᕐᓂᕐᒧᑦ ᐋᔨᕋᖃᑦᑕᖅᑎᓪᓗᒋᑦ, ᐊᒥᓱᓂᒃ ᑐᓗᖅᑕᕈᑎᖃᖅᖢᓂ. ᑭᓯᐊᓂ ᐅᒃᐱᕈᓱᒃᑐᖅ ᐃᓄᐃᑦ ᑲᔪᓯᑎᑦᑎᔪᓐᓇᓚᐅᖅᑐᑦ ᓴᐱᓕᖃᑦᑕᙱᖦᖢᑎᒃ “ᐊᒡᒑᖅᑕᐅᒐᓗᐊᖅᑎᓪᓗᒋᑦ” “ᐃᓄᐃᑦ ᖃᐅᔨᒪᖏᒻᒪᑕ ᑭᓲᖕᒪᖔᖅ “ᐋᒡᒐ”−ᐊᔭᐅᖏᓐᓇᓚᐅᖅᑐᒍᑦ ᐅᒃᐱᕆᔭᑦᑎᓐᓂ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ.” ᐃᖅᑲᐅᒪᔪᖅ ᖃᓄᖅ ᒐᕙᒪᑐᖃᒃᑯᑦ ᑕᐃᔅᓱᒪᓂ ᐃᓚᐅᖁᔨᓗᐊᖅᑑᔭᓚᐅᙱᑦᑐᑦ ᐱᖃᓯᐅᔾᔭᐅᓂᖓᓂᒃ ᐱᙳᖅᑎᑕᐅᑉᐸᑕ ᓄᓇᕗᑦ ᐊᒻᒪᓗ ᒐᕙᒪᖓᓗ ᐊᖏᕈᑎᓂᒃ. ᓗᐃ ᐱᓚᑲᑉᓯᐅᓚᐅᖅᑐᖅ ᒐᕙᒪᑐᖃᒃᑯᑦ ᐋᔩᕋᖅᑎᖏᓐᓂᒃ ᐅᖃᓚᐅᖅᑐᖅ, “ᐃᓚᐅᖁᔨᙱᒃᑯᕕᐅᒃ ᐱᖃᓯᐅᑎᔭᐅᓂᖓ ᓄᓇᕗᑦ ᐊᒻᒪᓗ ᒐᕙᒪᒃᓴᖅ, ᐅᑕᖅᑭᔪᓐᓇᖅᑐᒍᑦ ᑭᖑᓪᓕᕐᒥ ᒐᕙᒪᐅᓂᐊᖅᑐᓂᑦ ᐊᒻᒪᓗ ᐋᔩᕋᖃᑎᒋᖔᕐᓗᒋᑦ.” ᓴᐃᒪᓐ ᐅᖃᖅᑐᖅ ᑖᓐᓇ ᐱᓚᑲᑉᓯᐅᑉ ᐅᖃᖅᑕᖓ ᓴᙱᓚᐅᖅᑐᖅ ᐊᒻᒪᓗ ᐋᔩᕋᕐᓂᖅ ᐊᓯᔾᔨᖅᖢᓂ, ᓴᖅᑭᔮᖅᑎᑦᑎᓪᓗᓂ ᐱᔪᒪᔭᐅᔪᓄᑦ ᐃᓄᖕᓄᑦ ᑕᐅᑐᙳᐊᖅᑕᖓᓂᑦ ᓯᕗᓂᒃᓴᒥ.
ᐃᓱᒪᒋᓪᓗᓂᐅᒃ ᕿᑭᖅᑕᓃᒃᑯᑦ ᐱᕈᕐᓂᕆᔭᖓ, ᓴᐃᒪᓐ ᐅᖃᖅᑐᖅ ᖃᓄᖅ ᐱᒻᒪᕆᐅᖕᒪᖔᑦ ᑲᑐᔾᔨᖃᑎᒌᑦᑎᐊᖃᑎᖃᕐᓂᕐᒥᒃ ᐃᓄᐃᑦ ᑎᒥᖁᑎᖏᓐᓂᑦ, ᒐᕙᒪᐅᔪᓂᒃ ᐊᒻᒪᓗ ᐃᓄᖕᓄᑦ ᑭᒡᒐᖅᑐᖅᑐᓂᒃ ᑎᒥᐅᔪᓪᓗ. ᐅᖃᖅᑐᖅ ᐱᐅᒃᓴᙱᓐᓂᖅ ᒐᕙᒪᒃᑯᓐᓂ ᐃᓚᖏᓐᓂᒃ ᐃᓄᐃᑦ ᐱᔪᒪᖏᑦ ᓯᕗᒧᐊᕈᑎᒋᔭᐅᓯᒪᙱᑦᑐᑦ, ᑭᓯᐊᓂ ᐃᖅᑲᓇᐃᔭᖃᑎᒌᑦᑎᐊᕐᓗᓂ ᑲᔪᓯᑎᑦᑎᔪᓐᓇᖅᑐᖃᖅᑐᖅ. ᑲᔪᖏᖅᓴᐃᕗᖅ ᐃᓄᐃᑦ ᑎᒥᖁᑎᖏᓐᓂᑦ ᐃᑲᔪᖅᑕᐅᔪᒪᓗᑎᒃ, ᑮᓇᐅᔭᖃᑦᑎᐊᓕᕐᒪᑕ ᐊᒻᒪᓗ ᐃᖅᑲᓇᐃᔭᖅᑎᖃᑦᑎᐊᓕᖅᖢᑎᓪᓗ ᓴᖅᑭᑎᑦᑎᔪᓐᓇᖅᖢᑎᒃ ᐊᒥᓱᓂᒃ ᐱᓕᕆᐊᒃᓴᓂ ᓄᓇᑖᖃᑕᐅᓯᒪᔪᓄᑦ. ᐊᑕᐅᑦᑎᒃᑯᑦ, ᐊᔭᐅᖅᑐᐃᕗᖅ ᐃᓄᐃᑦ ᑎᒥᖁᑎᖏᓐᓂᒃ ᐱᓕᕆᑦᑎᐊᒃᑲᓐᓂᖁᓪᓗᒋᑦ ᑐᓴᐅᒪᖃᑦᑕᐅᑎᓂᕆᔭᖓ ᐃᓄᖕᓂᒃ ᓴᙱᓕᖅᑎᑦᑎᒃᑲᓐᓂᕈᓐᓇᕐᓂᐊᕐᒪᑦ ᐊᒃᑐᐊᓂᕆᔭᖓᓂᑦ ᐃᓄᐃᑦ ᓄᓇᖏᓐᓂᑦ.
ᓯᕗᒧᑦ ᕿᒥᕐᕈᓪᓗᓂ, ᓴᐃᒪᓐ ᐅᖃᖅᑐᖅ ᐱᕙᓪᓕᐊᔪᓕᕆᓂᖅ ᐱᒻᒪᕆᐋᓘᓂᖓᓂᒃ ᓄᓇᕘᑉ ᓯᕗᓂᒃᓴᖓᓄᑦ, ᑭᓯᐊᓂ ᐱᑦᑎᐊᔪᓴᖅᑕᐅᔭᕆᐊᖃᖅᑐᖅ ᐊᕙᑎᒥᒃ ᒥᐊᓂᕆᔭᖃᑦᑎᐊᕐᓂᕐᒥᒃ. ᐱᓗᐊᖅᑐᒥ, ᐅᖃᖅᑐᖅ, ᐃᓄᐃᑦ ᑲᔪᓯᑎᑦᑎᒋᐊᖃᖅᑐᖅ ᓂᕿᒃᓴᖅᓯᐅᕐᓂᕆᕙᒃᑕᖏᓐᓂᑦ ᐆᒪᔪᓂᒃ ᒪᓕᓪᓗᒍ ᓄᓇᑖᕐᓂᕐᒧᑦ ᐊᖏᕈᑎᖓ: “ᐃᓕᖅᑯᓯᕗᑦ ᐱᔪᓐᓇᐅᑎᕗᓪᓗ ᐊᒃᑐᐊᖓᔪᑦ ᓄᓇᒧᑦ ᐆᒪᔪᓄᓪᓗ. ᓴᐳᔾᔨᓯᒪᒋᐊᖃᖅᑕᕗᑦ ᐊᑕᐅᑦᑎᒃᑯᓪᓗ ᐱᕕᒃᓴᓕᐅᖅᓯᓐᓈᕐᓗᑕ ᐃᓄᖁᑎᑦᑎᓐᓂ.”
