ᑭᙵᐃᑦ, ᓄᓇᕗᑦ, ᔫᓐ 2, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᓕᐊᓚᐅᒍᓱᒃᑐᑦ ᓴᖅᑭᑦᑏᔪᓐᓇᖅᓯᖕᒪᑕ 2022-2026ᒧᑦ ᖃᓄᖅᑑᕈᑎᖏᑕ ᐸᒃᓇᐅᑎᖏᓐᓂᒃ. ᑎᑎᕋᖅᓯᒪᓪᓗᑎᒃ ᓴᖅᑭᑕᐅᔪᑦ ᕿᑭᖅᑕᓃᒃᑯᑦ ᐱᓕᕆᔨᖏᓐᓄᑦ ᓄᓇᓕᖕᓂ ᓯᕗᓕᖅᑎᐅᑎᓪᓗᒋᑦ ᐃᖅᑲᓇᐃᔭᖅᑎᖃᐅᖅᑎᓪᓗᒋᓪᓗ, ᐃᓕᓯᒪᓕᖅᑕᒥᖕᓂᒃ ᐊᑐᖅᖢᑎᒃ, ᑭᓱᓗ ᑲᔪᓯᓂᖃᑦᑎᐊᕈᓐᓇᓛᖑᖕᒪᖔ ᐃᓚᓕᐅᔾᔨᓯᒪᓪᓗᑎᒃ ᐃᓄᖕᓂᒃ ᑐᓴᖅᑕᖏᓐᓂᒃ ᓄᓇᒋᔭᖏᓐᓂᒃ.

ᕿᑭᖅᑕᓃᒃᑯᑦ ᖃᓄᖅᑑᕈᑎᖏᑕ ᐸᕐᓇᐅᑎᖏᑦ ᑐᕌᒐᕆᔭᖏᓐᓄᑦ ᐱᓇᓱᐊᖅᑕᖏᓐᓄᓪᓗ ᑐᕌᖓᓂᓖᑦ ᐊᕐᕌᒍᓄᑦ ᑕᓪᓕᒪᓄᑦ ᐊᑐᖅᑕᐅᓂᐊᖅᖢᑎᒃ, ᑲᔪᓯᓂᖃᑦᑎᐊᖅᑐᑦᑕᐅᖅ ᐊᕐᕌᒍᑦ ᑕᓪᓕᒪᑦ ᐃᓗᐊᓂ ᐃᓚᓕᐅᔾᔭᐅᓯᒪᒋᓪᓗᑎᒃ, ᕿᑭᖅᑕᓃᒃᑯᑦ ᐱᕈᖅᐹᓪᓕᖅᓯᒪᕐᔪᐊᕐᒪᑕ ᐊᖏᓂᖅᓴᓂᒃ ᐱᓕᕆᐊᖃᓕᖅᖢᑎᒃ, ᑕᑎᒋᔭᐅᔪᓐᓇᖅᐹᓪᓕᕐᓂᕐᒧᑦ ᐱᕙᓪᓕᐊᑎᑦᑎᓂᕐᒧᓪᓗ ᖃᐅᔨᓴᐅᑎᖏᑦ ᐃᓄᐃᓪᓗ ᓄᓇᖏᑦ ᓴᐳᔾᔭᐅᒋᐊᖁᓪᓗᒋᑦ.

“ᖁᕕᐊᒋᑦᑎᐊᖅᑕᕋ ᐅᐱᒋᑦᑎᐊᖅᖢᒋᓪᓗ ᕿᑭᖅᑕᓃᒃᑯᑦ ᐱᓕᕆᐊᖏᑦ, ᐊᓕᐊᓇᐃᒍᓱᒃᖢᖓᓗ ᑐᕌᒐᕆᔭᕗᑦ ᐱᕙᓪᓕᐊᓂᐊᓕᕋᑦᑎᒍᑦ, ᐊᑐᕐᓗᒋᑦ ᖃᓄᖅᑑᕈᑏᑦ ᐸᕐᓇᓚᐅᑎᖏᑦ ᑕᐅᑐᖕᓂᖃᐃᓐᓇᕐᓗᑕ ᑲᑐᔾᔨᖃᑎᒌᒡᕕᒃᑕ ᑐᕌᒐᕆᔭᖏᓐᓂᒃ ᐱᓇᓱᐊᕈᒪᔭᖏᓐᓂᒡᓗ” ᐅᓛᔪᒃ ᐊᑭᓱᒃ ᐅᖃᖅᑐᑦ, ᕿᑭᖅᑕᓃᒃᑯᓐᓄᑦ ᐊᖓᔪᖅᑳᖅ.

ᓂᕆᐅᓂᖃᑦᑎᐊᖅᑐᖓ ᐃᑲᔪᖃᑎᒌᖏᓐᓇᕐᓂᐊᕋᑦᑕ ᐱᓕᕆᖃᑎᒌᖏᓐᓇᕐᓗᑎᒍᓪᓗ ᓄᓇᓖᑦ, ᐱᓕᕆᖃᑎᒌᑦᑎᐊᕐᓂᕗᑦ ᐃᓄᐃᓪᓗ ᐅᒃᐱᕈᓱᓕᕐᓂᖅᓴᐅᔪᓐᓇᕐᓂᖏᑦ ᐱᐅᔪᒥᒃ ᓴᖅᑭᑦᑏᓂᐊᕐᒪᑕ ᐃᓄᖕᓄᑦ ᕿᑭᖅᑕᓃᒃᑐᓄᑦ.

ᕿᑭᖅᑕᓃᒃᑯᑦ ᖃᓄᖅᑑᕈᑎᖓᑕ ᐸᕐᓇᐅᑎᖓ 2022-2026ᒧᑦ ᑕᑯᔭᐅᔪᓐᓇᖅᓯᓂᐊᖅᑐᖅ ᐃᑭᐊᖅᑭᕕᑎᒍᑦ: https://www.qia.ca/wp-content/uploads/2022/06/qia-strategic-plan-2022_final.pdf

ᑐᓴᕆᐊᒃᑲᓐᓂᕈᒪᒍᕕᑦ, ᑐᓴᕆᐊᕐᕕᒋᔪᓐᓇᖅᑕᑦ:

ᑭᐅᕋᓐ ᕕᓕᐅᕋᑎ
ᑐᑭᒧᐊᒃᑎᑦᑎᔨ, ᖃᓄᖅᑑᕈᑎᓕᕆᓂᕐᒧᑦ ᑐᓴᐅᒪᔾᔪᑎᓂᒃ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(ᐅ) 867.975.8398 ᐊᑭᖃᖏᑦᑐᒃᑯᓪᓘᓐᓃᑦ 1.800.667.2742
kflaherty@qia.ca