ᐃᖃᓗᐃᑦ, ᓄᓇᕗᑦ, ᐊᒃᑑᕝᕙ 7, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐅᓪᓗᒥ ᑲᔪᓯᑎᑦᑎᖅᑲᐅᕗᑦ ᐊᔾᔨᐅᖏᑦᑐᒻᒪᕆᑦᑎᒍᑦ ᐱᖁᔨᕗᖔᕈᑎᑎᒍᑦ ᐋᖅᑭᒋᐊᖅᑕᐅᖁᔨᓪᓗᑎᒃ ᓄᑖᕈᕆᐊᖅᑕᐅᖁᔨᓪᓗᑎᓪᓗ ᕿᑭᖅᑕᓂᒃᑯᑦ ᒪᓕᒐᕋᓛᖁᑎᖓᓂᑦ ᓈᓴᐅᑎᓕᒻᒥᑦ 06−ᒥᑦ, ᑕᐃᔭᐅᖃᑦᑕᓲᖑᒻᒥᔪᒥᒃ ᕿᑭᖅᑕᓂᒃᑯᑦ ᑮᓇᐅᔭᓄᑦ ᐃᓯᖅᑐᓄᑦ ᐊᑐᐊᒐᖅ.

ᑖᓐᓇ ᓄᑖᕐᒃ ᑮᓇᐅᔭᐃᑦ ᐃᓯᖅᑐᑦ ᑭᓱᓄᑦ ᐊᑐᖅᑕᐅᔪᒃᓴᒫᑦ ᐊᑐᐊᒐᖃᕐᓗᓂ ᐊᒻᒪᓗ ᑐᖅᑯᖅᓯᕙᓪᓕᐊᓂᕐᒧᑦ ᑮᓇᐅᔭᓂᒃ ᐊᑐᐊᒐᖓ ᐊᓯᔾᔨᕐᒃᑕᐅᓯᒪᓂᐊᕐᒃᑐ ᑭᖑᕝᕕᖅᑎᒋᔭᐅᓂᐊᖅᑐ   ᑐᖅᑯᖅᑕᐅᕙᓪᓕᐊᔪᓂᒃ ᑮᓇᐅᔭᓂᑦ ᐊᒻᒪᓗ ᐃᑲᔫᓯᐊᒃᓴᓂᑦ ᑮᓇᐅᔭᓂᑦ.  ᑖᒃᑯᐊ ᓄᑖ ᐊᑐᐊᒐᐃᑦ ᖃᓄᖅ ᕿᑭᖅᑕᓂᒃᑯᑦ ᑮᓇᐅᔭᓕᐊᖏᑦ ᓄᐊᑦᑕᐅᕙᓪᓕᐊᓲᖑᒻᒪᖔᑕ,  ᑮᓇᐃᔭᐃᔭᕈᑎᐅᓲᖑᒻᒪᖔᑕ, ᐊᒻᒪᓗ ᖃᓄᕐᒃ ᐅᓂᒃᑳᓕᐅᕆᒋᐊᖃᕐᒪᖔᑕ.

ᑖᒃᑯᐊ ᒪᕐᕉᒃ ᓄᑖᒃ ᐊᑐᐊᒑᒃ ᐱᔪᓐᓇᑎᑦᑎᓂᐊᓕᕐᒪᑎᒃ ᓴᖑᑎᑦᑎᔪᓐᓇᓂᖅᓴᐅᓂᕐᒥᒃ ᑕᐃᒫᒃ ᕿᑭᖅᑕᓂᒃᑯᑦ ᐋᖅᑭᒋᐊᖅᓯᖃᑦᑕᕈᓐᓇᓂᐊᕐᒪᑦ ᓯᕗᓂᑦᑎᓐᓂ ᖃᐅᔨᒪᓇᓱᐊᖏᓐᓇᕐᓗᑎᒃ ᑮᓇᐅᔭᓂᒃ ᓄᐊᑦᑎᕙᓪᓕᐊᖏᓐᓇᕋᓗᐊᕐᒪᖔᑕ ᑐᕌᖓᔪᓂᒃ ᓯᕗᓂᕆᓛᖅᑕᑎᓐᓂ ᐃᓅᖃᑦᑕᓛᖅᑐᓄᑦ. ᕿᑭᖅᑕᓂᒃᑯᑦ ᐊᖏᖅᓯᒪᓕᖅᐳᖅ ᒪᕐᕉᓐᓂᒃ ᑮᓇᐅᔭᐃᔭᕈᑎᐅᓂᐊᖅᑑᓐᓂᒃ, ᓄᓇᓕᓐᓂᑦ ᐃᓯᖅᑎᒐᒃᓴᐅᔪᑦ ᑎᒍᔭᒃᓴᐅᔪᓪᓗ ᐊᒻᒪᓗ ᐱᕙᓪᓕᐊᔪᓕᕆᓂᕐᒥ ᐊᔾᔨᒌᙱᑦᑐᓄᑦ ᒪᑭᒪᐅᑎᓄᑦ ᑐᕌᖓᑎᑦᑎᓂᕐᒥᒃ.

“ᑕᒫᓂᐸᓘᖅᑐᑦ 43 ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑦ ᑲᑎᒪᖃᑎᖃᖅᐸᓚᐅᖅᑐᑦ ᐃᓛᒃᑯᑦ ᕿᑭᖅᑕᓂ ᓄᓇᓕᖏᓐᓂ ᐊᐅᔭᐅᑎᓪᓗᒍ ᖃᓄᖅ ᐃᓱᒪᖃᖅᕕᐅᒻᒪᖔᑕ ᐋᖅᑭᒋᐊᖅᑕᐅᒍᒪᔪᑦ ᒪᓕᒐᕋᓛᖅ 06-ᒥ ᖃᐅᔨᒋᐊᖅᑐᑎᒃ. ᑐᓴᖅᐸᓚᐅᖅᑐᒍᑦ ᑐᑭᓯᓇᑦᑎᐊᓪᓚᕆᑦᑐᓂᒃ ᕿᑭᖅᑕᓂᒥᐅᑕᕐᓂᒃ ᐃᓄᓐᓂᒃ ᐊᓯᔾᔩᒋᐊᖃᓕᕐᒪᑕ ᖃᓄᖅ ᖃᓄᐃᑦᑐᑎᒍᓪᓗ ᕿᑭᖅᑕᓂᒃᑯᑦ ᐃᑲᔪᖅᐸᒻᒪᖔᖅ. ᕿᑭᖅᑕᓂᒃᑯᑦ ᐊᖏᔪᖅᑳᖓ ᐅᓛᔪᒃ ᐊᑭᓱᒃ ᖁᕕᐊᒋᔭᖃᕕᐅᑎᓐᓂᕋᓚᐅᖅᑐᖅ ᑕᒪᓐᓇ ᑭᓱᑐᐃᓐᓇᕐᓂᒃ ᓴᖅᑭᖅᓯᓚᕿᖅᓯᔾᔪᑎᐅᔪᓐᓇᕐᒪᑦ ᐃᓄᓐᓄᑦ ᕿᑭᖅᑕᓂ.”

ᓄᓇᓕᓐᓂᑦ ᐃᓚᐅᑎᑦᑎᒋᐊᕐᓃᑦ ᐊᑐᖅᑕᐅᓚᐅᖅᑐᑦ ᐊᑯᓐᓂᖓᓂ ᔫᓐ ᐊᒻᒪᓗ ᓯᑎᐱᕆ 2022-ᒥ ᐃᓚᐅᕕᐅᓪᓗᓂ ᐃᖃᓗᓐᓂ ᐃᖅᑲᓇᐃᔭᖅᑎᑎᓐᓄᑦ, ᓂᕈᐊᖅᑕᐅᓯᒪᔪᓄᑦ ᓄᓇᓖᑦ ᑲᑎᒪᔨᖏᓐᓄᑦ ᐊᒻᒪᓗ ᓄᓇᓖᑦ ᑐᑦᑕᖅᕕᖏᓐᓄᑦ ᐃᖅᑲᓇᐃᔭᖅᑎᓄᑦ.

ᕿᑭᖅᑕᓂᒃᑯᑦ ᖁᔭᓐᓇᒦᕈᒪᔪᑦ ᓄᓇᓕᓐᓂ ᐃᓚᒋᔭᐅᖃᑕᐅᔪᓄᑦ ᕿᑭᖅᑖᓗᒻᒥ ᐃᓚᐅᔪᓐᓇᓚᐅᕐᒪᑕ ᐃᓕᐅᖅᑲᐃᖃᑕᐅᓪᓗᑎᓪᓗ ᐱᓕᕆᑎᓪᓗᒋᑦ. ᑐᑭᓯᒋᐊᒃᑲᓐᓂᕈᒪᒍᒃᓯ ᐱᔾᔪᑎᖃᖅᑐᓂᒃ ᑮᓇᐅᔭᑦ ᐃᓯᖅᑐᑦ ᒪᓕᒐᕋᓛᖏᑕ ᐊᖅᑭᒋᐊᖅᑕᐅᓂᖏᓐᓄᑦ, ᐅᕗᖓ ᖃᕋᓴᐅᔭᒃᑯᑦ ᐃᑭᐊᖅᑭᕕᒻᒧᑦ ᐳᓛᕆᐊᕆᒃᓯ:  www.qia.ca/resourcerevenue

ᑐᑭᓯᒋᐊᕈᒪᒍᒃᓯ, ᐅᓇ ᖃᐅᔨᒃᑲᖅᓯᐅᒃ:

 ᑭᐅᕋᓐ ᕙᓚᐅᕋᑎ
ᐊᖏᔪᖅᑳᖓ ᑐᓴᐅᒪᖃᑎᒌᑦᑐᓕᕆᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(ᐅᖄᓚᐅᑖ) 867.975.8398 ᐅᕝᕙᓘᓐᓃᑦ ᐊᑭᖃᓐᖏᑐᒃᑯᑦ 1.800.667.2742
ᖃᕋᓴᐅᔭᒃᑯᑦ: kflaherty@qia.ca