ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐅᖃᐅᓯᑦᓴᖓ ᐃᖃᓗᐃᑦ ᓄᒃᑭᑦᓴᐅᑏᑦ ᐆᒻᒪᖅᑯᓯᐅᕐᓂᕐᒧᑦ ᐱᓕᕆᐊᑉ ᒥᑦᓵᓄᑦ
ᐃᖃᓗᐃᑦ, ᓄᓇᕗᑦ, ᓅᕙᐃᕙ 10, 2026 – ᑖᒃᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᓕᑕᖅᓯᓯᒪᔪᑦ ᐱᒻᒪᕆᐅᓂᖓᓂᒃ ᐱᕙᓪᓕᐊᑎᑦᓯᓂᕐᓂᒃ ᐊᑐᖅᑕᐅᖔᕈᓐᓇᖅᑐᓂᒃ ᐱᐅᓂᖅᓴᓂᒃ ᐅᖅᓱᐊᓗᖅᑐᖏᑦᑐᓂᒃ ᐆᒻᒪᖅᑯᑎᖃᕈᓐᓇᐅᑎᓂᒃ ᓄᓇᕗᒻᒥ. ᐃᓄᐃᑦ ᐊᐅᓚᑦᓯᔭᕆᐊᖃᖅᐳᑦ ᐋᖅᑭᑦᓱᐃᔨᐅᓗᑎᒃ ᐱᓕᕆᐊᑦᓴᓂᒃ ᐊᑑᑎᖃᕐᓂᐊᖅᑐᓂᓪᓗ ᐱᕙᓪᓕᐊᔭᖏᑎᒍᑦ.
ᓅᕙᐃᕙ 4ᖑᑎᓪᓗᒍ, 2026, ᑖᓐᓇ ᓄᓇᕗᑦ ᐱᕙᓪᓕᐊᓂᒃᑯᑦ ᐊᑦᑐᖅᑕᐅᓇᔭᕐᓂᖓᓄᑦ ᕿᒥᕐᕈᔩᑦ (NIRB−ᑯᑦ) ᐊᑐᓕᖁᔨᓯᒪᔪᑦ ᑐᒃᓯᕋᖅᑕᐅᓯᒪᔪᖅ ᐃᖃᓗᐃᑦ ᓄᒃᑭᒃᓴᐅᑏᑦ ᐱᓕᕆᐊᖑᒍᒪᓂᖓ ᑲᔪᓯᑎᑕᐅᖁᓪᓗᒍ ᐃᓄᓕᒫᖅᑎᑦᓯᒍᑕᐅᓗᓂ ᕿᒥᕐᕈᔭᐅᖏᒃᑲᓗᐊᖅᑎᓪᓗᒍ, ᒪᓕᓪᓗᒋᑦ ᑐᑭᖏᑦ ᐊᒻᒪᓗ ᐊᑐᕆᐊᓖᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᒋᔭᖃᖅᐳᑦ ᓄᓇᕗᑦ ᐱᕙᓪᓕᐊᓂᒃᑯᑦ ᐊᑦᑐᖅᑕᐅᓇᔭᕐᓂᖓᓄᑦ ᕿᒥᕐᕈᔩᑦ ᐱᒻᒪᕆᐊᓗᒻᒥᒃ ᐱᔭᑦᓴᖃᕐᓂᖏᓐᓂᒃ ᐃᖅᑲᓇᐃᔭᕐᕕᐅᓪᓗᓂ ᑭᒃᑯᑐᐃᓐᓇᕐᓄᑦ ᒐᕙᒪᓄᑦ ᐱᒋᐊᖅᑎᑕᒥᓂᖅ ᒪᓪᑦᓱᒍ ᓄᓇᕘᑖᓂᕐᒧᑦ ᐊᖏᕈᑦ. ᐊᑐᓕᖁᔭᓕᐊᖑᓯᒪᔪᑦ ᒫᓐᓇ ᒥᓂᔅᑕᒨᖅᑕᐅᓯᒪᓕᖅᑐᑦ, ᓱᓕ ᐃᓱᒪᓕᐅᕈᑎᒋᔭᕆᐊᓕᖓ ᑐᑭᑖᕈᑎᒋᓗᒍᓗ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᒥᕐᕈᓂᖃᓕᖅᑐᑦ ᓄᓇᕗᑦ ᐱᕙᓪᓕᐊᓂᒃᑯᑦ ᐊᑦᑐᖅᑕᐅᓇᔭᕐᓂᖓᓄᑦ ᕿᒥᕐᕈᔩᑦ ᐅᓂᒃᑳᓕᐊᒥᓂᖓᓂᒃ ᐃᓱᒪᑦᖅᓴᖅᓯᐅᕈᑎᒋᓪᓗᒍᓗ ᖃᓄᐃᒋᐊᕈᑕᐅᓂᐊᕐᓂᖏᑦ ᑭᖑᓖᑦ.
ᑖᓐᓇ ᐱᓕᕆᐊᖅ, ᑐᒃᓯᕋᖅᑕᐅᓯᒪᔪᖅ ᓄᓇᕗᑦ ᓄᒃᑭᒃᓴᐃᑏᑦ ᑯᐊᐳᕇᓴᖓᓄᑦ (NNC), ᐱᖃᓯᐅᔾᔨᔪᖅ ᐆᒻᒪᖁᑎᖃᕐᕕᐅᓂᐊᖅᑐᒥᒃ ᑎᑭᐅᑎᒍᓐᓇᖅᑐᓂᒃ 30ᓄᑦ ᓯᕿᕐᖑᔭᐅᔭᒃᑯᑦ ᑰᒑᓗᖕᒥ ᐊᐅᓚᑕᐅᓗᓂ, ᐃᒪᖅ, 7,136 ᑭᑉᐹᕆᑦᑐᑦ ᒦᑕᐃᑦ ᐆᑦᑑᑎᑦ, ᐊᖅᑯᓯᐅᕐᕕᐅᓗᓂᓗ ᐊᒻᒪᓗ ᐅᐊᔭ ᐆᒻᒪᖅᑯᑎᖃᐅᑦ ᑕᑭᓂᓕᒃ 66 ᑭᓛᒥᑕᓂᑦ. ᑐᒃᓯᕋᖅᑕᐅᓯᒪᓂᖓ ᑕᐃᒪᐃᓕᖓᐃᓐᓇᖅᑐᖅ ᑎᑎᖅᑐᒐᖅᑕᐅᓯᒪᓂᖓᑕ ᓯᕗᓪᓕᖅᑦᐹᒥ, ᖃᐅᔨᓴᖅᑕᐅᓂᖃᒃᑲᓂᖅᓯᒪᔪᖅ ᐊᒻᒪᓗ ᐱᓕᕆᐊᖑᒍᒪᔪᖅ ᐃᓗᓕᖏᑕ ᓇᓗᓇᐃᔭᖅᑕᐅᓯᒪᓂᖏᑦ ᓱᓕ ᐃᖅᑲᓇᐃᖅᑕᐅᔭᕆᐊᓖᑦ.
ᓄᓇᕗᑦ ᐱᕙᓪᓕᐊᓂᒃᑯᑦ ᐊᑦᑐᖅᑕᐅᓇᔭᕐᓂᖓᓄᑦ ᕿᒥᕐᕈᔩᑦ ᕿᒥᕐᕈᓂᖃᖅᑎᓪᓗᒋᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᒥᒃ ᑲᔪᓯᑎᑕᐅᖁᔨᔪᒥᓃᑦ ᑭᒃᑯᑐᐃᓐᓇᕐᓄᑦ ᕿᒥᕐᕈᔭᐅᓂᖃᑦᓯᐊᕐᓗᓂ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᓗᓇᐃᔭᐃᔪᒥᓃᑦ ᑐᓴᐅᒪᔾᔪᑎᑦᓴᑲᓐᓂᖅᑕᖃᕆᐊᖃᕐᓂᖓᓂᒃ ᑐᑭᓯᐅᒪᔾᔪᑕᐅᓂᐊᖅᑐᓂᒃ ᐊᑦᑐᖅᑕᐅᒐᔭᕐᓂᖏᓐᓂᒃ ᑰᑦᑐᑦ ᐃᒪᑦᓯᐊᕙᐅᓂᖓᓗ, ᐃᖃᓗᐃᑦ ᐊᒻᒪᓗ ᐆᒪᔪᐃᑦ, ᐃᓄᐃᑦ ᐊᖑᓇᓱᐊᕈᓯᖓ, ᓄᓇᒃᑯᑦ ᐃᖏᕐᕋᒍᓯᖓ ᓄᓇᒥᓪᓗ ᐊᑐᕈᓯᖓᑦ, ᓄᓇᓖᓪᓗ ᐊᑦᑐᖅᑕᐅᓂᖃᕈᓐᓇᖅᑐᑦ ᑖᑦᓱᒧᖓ ᐱᓕᕆᐊᒧᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓱᓕᔪᖅᓴᖅᑐᑦ ᐃᓱᒪᓕᐅᕈᑕᐅᔪᑦ ᑐᑭᑖᕈᑕᐅᓪᓗᑎᒃ ᑕᐃᒫᒃ ᐊᖏᔫᑎᓪᓗᒍ ᑐᑭᓯᑎᑕᐅᒍᑎᒥᖕᓂᒃ ᐊᑐᕆᐊᖃᕆᐊᑦᓴᖅ, ᐃᓄᐃᑦ ᖃᐅᔨᒪᓂᖏᑎᒍᑦ ᑐᑭᓕᒻᒥᓪᓗ ᐱᖃᑕᐅᓂᖏᓐᓂᒃ ᐊᑦᑐᖅᑕᐅᓂᐅᓴᔪᑦ ᐃᓄᐃᑦ, ᐱᓗᐊᖅᑐᒥ ᐃᖃᓗᖕᒥᐅᑦ ᐸᓐᓂᑑᕐᒥᐅᓪᓗ.
ᒪᓕᑦᑐᖅ ᐊᑐᖅᑕᐅᖁ.ᐅᔪᒥᒃ ᑲᑎᒪᔨᖏᓐᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᕙᒌᔭᖅᐸᓪᓕᐊᔪᑦ ᓄᓇᓕᖕᒥ ᐃᓚᐅᑎᑦᓯᓂᕐᒥᒃ ᐃᖃᓗᓐᓂ ᐸᓐᓂᑑᒥᓗ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᒥᕐᕈᓂᖃᕐᓂᐊᖅᑐᑦ ᓄᓇᕗᑦ ᐱᕙᓪᓕᐊᓂᒃᑯᑦ ᐊᑦᑐᖅᑕᐅᓇᔭᕐᓂᖓᓄᑦ ᕿᒥᕐᕈᔩᑦ ᐊᑐᓕᖁᔭᓕᐊᕆᓯᒪᔭᖓᓂᒃ ᐃᓱᒪᑦᓴᖅᓯᐅᕈᑎᖃᕐᓗᑎᓪᓗ ᖃᓄᐃᒋᐊᕈᑕᐅᓂᐊᖅᑐᓂᒃ ᑭᖑᓪᓕᕐᓂᒃ, ᐃᓕᑕᖅᓯᓯᒪᓂᖃᖅᓱᑎᒃ ᑖᓐᓇ ᓄᓇᕗᑦ ᐸᕐᓇᐅᓯᐅᕐᓂᖅ ᐊᒻᒪᓗ ᐱᓕᕆᐊᒥᒃ ᖃᐅᔨᓴᕐᓂᕐᒧᑦ ᐱᖁᔭᖅ (NuPPAA) ᐱᒋᐊᖅᑎᑦᓯᓯᒪᒻᒪᑦ ᖃᖓᒃᑯᑦ ᑭᐅᔭᕆᐊᖃᕐᓂᖓᓂᒃ ᒥᓂᔅᑕ ᑕᒪᑦᓱᒪ ᒥᑦᓵᓄᑦ. ᓯᕗᓪᓕᐅᑎᔭᕗᑦ ᐱᕙᓪᓕᐊᔭᐅᓂᖓᑕ ᓄᑖᑉ ᐆᒻᒪᖅᑯᑎᖃᐅᑎᖅ ᐱᕚᓪᓕᕈᑎᑦᓴᖅ ᓴᐳᑎᖃᓯᐅᑎᑦᓱᒋᑦ ᐃᓄᐃᑦ ᐱᔪᓐᓇᐅᑎᖏᑦ, ᐊᕙᑎ, ᓯᕕᑐᔪᒧᓪᓗ ᐃᓄᐃᓪᓗ ᓄᓇᓕᖏᑕ ᐱᔪᒪᔭᖏᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᓗᒍ:
ᒫᑯᓯ ᖃᐅᕐᓂᖅ
ᑭᖑᕝᕖᓯᒪᑲᐃᓐᓇᖅᑐᖅ/ᐊᐅᓚᑦᑎᔨ, ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8413 ᐅᕝᕙᓘᓐᓂᑦ ᐊᑭᖃᖏᑦᑐᒧᑦ 1.800.667.2742
mqaunirq@qia.ca
