ᐃᖃᓗᐃᑦ, ᓄᓇᕗᑦ – ᐅᑐᐱᕆ 31, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐱᒃᑯᒍᓱᑉᐳᑦ ᐃᑲᔫᑎᖃᕆᐊᔅᓴᖅ ᑮᓈᐅᔭᓂᑦ ᑲᑎᓕᒫᖅᑐᒋᑦ $2.6 ᒥᓕᐊᓐᓂᑦ ᑕᒪᒃᑮᓐᓄᑦ YWCA−ᐊᒡᕕᒃ ᑲᑐᔾᔨᖃᑎᒌᒃᑯᓐᓄᑦ ᐊᒻᒪᓗ ᐅᖂᑕᖅ ᑲᑐᔾᔨᖃᑎᒌᒃᑯᓐᓄᑦ. ᑖᒃᑯᐊ ᑮᓇᐅᔭᑦ ᑐᓂᔭᐅᓯᒪᔪᑦ ᐃᑲᔫᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᖃᖅᑳᖅᑐᑦ ᓄᓇᓕᖏᓐᓄᑦ ᐃᑲᔫᑏᑦ ᑮᓇᐅᔭᑦ (ICSF).

ᑕᒪᒃᑮᒃ ᑎᒥᐅᔫᒃ “ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᒻᒪᑎᒃ” ᐃᑲᔪᕐᓱᐃᕙᑦᑐᑦ ᐃᑲᔪᕐᐸᑦᑐᑎᓪᓗ ᓄᓇᓕᓐᓂᑦ ᐅᑕᖅᑭᕕᖃᖅᑎᑎᓪᓗᑎᒃ ᐃᓪᓗᒥᒃ, ᓇᔪᕋᔅᓴᖃᖅᑎᑦᑎᕙᑦᑐᑎᒃ ᐊᒻᒪᓗ ᐃᑲᔪᕐᐸᑦᑐᑎᒃ ᐊᕐᓇᓂᑦ ᓱᕈᓯᕐᓂᓪᓗ.

ᐅᖂᑕᖅ ᑲᑐᔾᔨᖃᑎᒌᑦ ᑐᓂᓯᔭᐅᓯᒪᔪᑦ $1.3 ᒥᓕᐊᓐᓂᑦ ᓂᐅᕕᕈᓐᓇᓂᐊᕐᖓᑕ ᒪᕐᕉᓐᓂᒃ ᓄᓈᓐᓂᒃ ᐃᖃᓗᓐᓂ. ᑖᒃᑯᐊ ᓄᓈᒃ ᐊᑐᖅᑕᐅᒐᔭᖅᑑᒃ ᐃᑲᔫᑕᐅᓗᑎᒃ ᐃᑲᔪᕐᐸᑦᑕᖏᓐᓄᑦ ᐊᓂᕙᓪᓕᐊᔪᓄᑦ ᐅᑕᖅᑭᕕᐅᕙᑦᑐᒥ ᐃᓪᓗᒥ ᐊᒻᒪᓗ ᐊᖅᑭᐅᒪᑎᑦᑎᖁᓪᓗᒋᑦ ᐊᑐᖅᑕᐅᖃᑦᑕᕈᓐᓇᕐᓂᖓᓂᒃ.

YWCA-ᐊᒡᕕᒃ ᑐᓂᓯᔭᐅᓯᒪᒻᒥᔪᑦ $1.3 ᒥᓕᐊᓐᓂᑦ ᓂᐅᕕᕈᓐᓇᓂᐊᕐᖓᑕ ᑎᓴᒪᓂᑦ ᐊᑕᐅᑦᑎᒥ ᑲᑎᙵᔪᓕᒻᒥᑦ ᐃᓪᓗᒥᑦ ᐃᖃᓗᐃᑦ ᖃᖅᑲᒥᐅᑦ ᓄᓇᖓᓂ ᐋᖅᑮᔪᓐᓇᓂᐊᕐᖓᑕ ᐃᓪᓗᔅᓴᒥᒃ ᐊᕐᓇᓄᑦ ᕿᑐᕐᖓᖏᓐᓄᓪᓗ ᑐᕌᖓᔪᒥᒃ ᕿᒫᕙᑦᑐᓄᑦ.

ᕿᑭᖅᑕᓂᒃᑯᓐᓂ, ᑐᑭᓯᔪᒍᑦ ᐃᑲᔫᑏᑦ ᐅᑕᖅᑭᑯᓐᓄᑦ ᐃᓪᓗᓄᑦ ᐊᒻᒪᓗ ᐃᓚᒌᓄᑦ ᐱᔭᕆᐊᑐᔪᒃᑰᐸᑦᑐᓂᑦ ᐱᑕᖃᕆᐊᖃᓪᓚᕆᒻᒪᑕ. ICSF ᑐᓂᓯᒃᑲᓂᕐᓂᖏᑦ ᑖᒃᑯᓂᖓ ᐃᑲᔫᑎᓂᑦ ᑖᒃᑯᓄᖓ ᒪᕐᕉᓐᓄᒃ ᑲᑐᔾᔨᖃᑎᒌᓄᑦ ᐊᒻᒪᓗ ᐃᑲᔪᒃᑲᓐᓂᖃᑦᑕᕈᓐᓇᖁᓪᓗᒋᑦ ᐊᒥᓲᓂᕐᓴᓂᑦ ᐃᓱᒫᓗᓇᖅᑐᒦᖃᑦᑕᖅᑐᓂᑦ ᑕᐃᒫᑦᑎᐊᖅ ᐃᑲᔪᕐᓂᐅᒻᒪᑦ.

ᑐᑭᓯᓂᐊᕋᕕᑦ ᖃᓄᖅ ᐃᑲᔪᕈᓐᓇᕐᒪᖔᕐᐱᑦ ᑖᒃᑯᓄᖓ ᐃᑲᔫᑕᐅᕙᑦᑐᓄᑦ, ᐊᑏ ᐅᖃᕐᕕᒋᒃᑭᑦ ᐅᑯᐊ:

ᓗᐊᕈᓪ ᒪᒃᑯᐊᕆᔅᑕᓐ

ᑐᑭᒧᐊᑦᑎᑦᑎᔨ

ᐅᖂᑕᖅ ᓇᔪᒐᕐᒥ

lmccorriston@uquutaq.org

ᓯᐅᕆ ᕌᐳᑦᓴᓐ

ᑐᑭᒧᐊᑦᑎᑦᑎᔨ

YWCA-ᐊᒡᕕᒃ ᑲᑐᔾᔨᖃᑎᒌᒃᑯᓐᓂ

srobertson@ywca-agvik.org

ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᒍᔅᓯ, ᐊᑏ ᑐᑭᓯᒋᐊᕐᕕᐅᖃᑦᑕᕐᓕ ᐅᓇ:

ᑭᐊᕋᓐ ᕙᓚᕋᑎ

ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥ ᐊᑭᖃᙱᑐᒃᑯᓘᓐᓃᑦ 1.800.667.2742

kflaherty@qia.ca