ᐅᓪᓗᒥ ᐊᕐᓇᐃᑦ ᐅᓪᓗᕆᒪᒃᔪᒃ ᓄᓇᕐᔪᐊᓕᒫᒥ. ᑕᑯᒃᓴᐅᑎᑦᑎᒐᑦᑕ ᒪᑯᒃᑐᒥᒃ ᐱᙳᐊᕐᑎᒥᒃ ᐃᖃᓗᒃᒥᐅᑕᕐᒥᒃ  ᓵᓚᒃᓴᓚᐅᕐᑐᒥᒃ ᒎᓗᑖᕐᓯᒪᔪᒥᒃ ᐅᔭᒥᒃᓂᒃ ᐱᙳᐊᕐᕕᒃᔪᐊᕐᑐᓗᒋᑦ ᐅᑭᐅᕐᑕᕐᑐᒥᐅᑕᑦ.

17−ᓂᒃ ᐅᑭᓕᒃ ᐊᑯᑕᕐᒃ ᕕᓕᐊᒻᓴᓐ−ᕚᑐᕆ ᓯᐊᕐᕆᔮᖃᑕᓕᓚᐅᕐᓯᒪᔪᕐᒃ ᐊᕌᒍᐃᑦ 11 ᑭᖑᓂᑦᑎᓐᓂ ᐊᒻᒪᓗ ᑎᓯᒪᐃᕐᓱᕐᓱᓂ ᐅᑭᐅᒃᑯᑦ ᐱᙳᐊᕕᒃᔪᐊᕐᑐᓂᒃ ᐃᓚᐅᓯᒪᓕᕐᑐᕐᒃ ᐊᒻᒪᓗ ᒪᕐᕈᐃᓱᕐᓱᓂ ᐅᑭᐅᕐᑕᕐᑐᒥ ᐱᙳᐊᕕᒃᔪᐊᕐᑎᓪᓗᒋᑦ ᐱᖃᑕᐅᓯᒪᒋᓪᓗᓕ ᐊᒻᒪᓗ ᒪᕐᕈᐊᕐᑎᓱᓂ ᑲᓇᑕᒥ ᐅᑭᐅᒃᑯᑦ ᐱᙳᐊᕐᕕᔪᐊᕐᑐᓂᒃ ᐃᓚᐅᓂᑰᓪᓗᓂ. ᐊᒥᓱᐃᕐᓱᓕᕐᑐᕐᒃ ᐃᓚᐅᕙᒃᓂᖓ ᐱᙳᐊᕕᒃᔪᐊᑐᓂᒃ ᑲᑎᑦᓱᒋᑦ ᐅᔭᒥᒃᑕᐅᓂᖏᑦ 22-ᖑᓕᕐᑐᑦ.

ᐊᑯᑕᕐᒃ ᐅᖃᓚᐅᕐᑐᕐᒃ ᑲᔪᖏᕐᓴᐃᔭᐅᖃᑕᕐᓂᕐᓂᒃ ᐃᑲᔪᕐᓱᕐᑕᐅᓂᕐᒥᓂᒃᓗ ᐃᓚᒥᓄᑦ. ᐅᖃᐅᓯᒃᓴᖓ ᒪᒃᑯᒃᑐᓄᑦ ᐃᓄᑑᖏᒻᒪᑕ ᐊᒻᒪᓗ ᓇᓪᓕᒋᔭᐅᓗᑎᒃ ᓄᓇᓕᒃᒥᐅᑕᓂᒃ ᐃᑲᔪᕈᓇᕐᑐᓂᒃ ᐊᒻᒪᓗ ᐃᕐᒃᑲᐃᑎᑦᑎᔪᒪᓪᓗᓂ ᒪᒃᑯᒃᑐᓂᒃ ᖁᕕᐊᓱᒍᑎᖃᕐᐸᓪᓗᑎᒃ ᐅᐱᒍᓱᒃᓗᑎᒃᓗ ᓵᓚᖃᕐᓂᕐᒥᓂᒃ ᖃᓄᑐᐃᓇᕐᒃ ᐊᖏᔫᒐᓗᐊᕐᐸᑕ ᒥᑭᔫᒐᓗᐊᕐᐸᑕ ᐊᒻᒪᓗ ᐃᓕᓴᕐᓯᓗᑎᒃ ᓴᙱᓂᕐᒥᓂᒃ ᐱᔪᓇᕐᓂᕐᒥᓂᒃᓗ ᐸᐸᑦᑎᒃᒪᑕ.

ᐊᑯᑕᕐᒃ ᐃᓚᒋᔭᐅᓕᕐᑐᕐᒃ ᓂᕈᐊᕐᑕᐅᓛᕐᓂᑯᑦ ᐃᓕᓐᓂᐊᕆᐊᕐᑲᓂᕐᓂᒧᑦ ᐊᑐᕐᓂᐊᕐᑐᓂᒃ Loran Scholarship, ᐊᑭᖃᕐᓗᐊᕐᑐᕐᒃ $100,000, ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕐᓂᕐᒧᑦ. ᑎᒥᐅᔪᑦ ᐃᓕᓴᕐᓯᕙᒃᑐᑦ ᓇᓗᓇᐃᕐᓯᓪᓗᑎᒃᓗ ᐃᑲᔪᕐᑐᕐᓱᑎᒃ ᒪᒃᑯᒃᑐᓂᒃ ᐃᓅᓯᖃᑦᑎᐊᕋᓱᒃᑐᓂᒃ ᐊᒻᒪᓗ ᓯᕘᕋᑕᐃᓕᓂᕐᒧᑦ ᐅᖁᒪᐃᑦᑐᓂᒃ ᐃᓱᒪᕐᓴᕐᓯᐅᕆᐊᖃᕐᓂᕐᒥᒃ, ᐊᒻᒪᓗ ᐊᔪᐃᓐᓇᕐᓂᒃᒥᒃ ᐱᓇᓱᐊᕐᓂᒃᑯᑦ.  Loran Scholarships ᑎᒥᐅᔪᑦ ᑮᓇᐅᔭᓕᐅᙱᑦᑐᑦ ᑐᓂᓯᕙᒃᑐᑦ ᑮᓇᐅᔭᕐᓂᒃ ᐊᐅᓚᑕᐅᓗᑎᒃᓗ ᑲᑎᒪᔨᓄᑦ ᐃᕐᒃᑲᓇᐃᔭᖃᑎᖃᕐᒃᐸᒋᓗᑎᒃ ᓯᓚᕐᑐᕐᒃᓴᕐᕕᓂᒃ, ᑮᓇᐅᔭᕐᑖᕐᑎᑦᑎᕙᒃᑐᓂᒃ ᐊᒻᒪᓗ ᐊᑭᓕᕐᓱᕐᑕᐅᙱᑐᑦ ᐃᑲᔪᕐᒃᐸᒃᑐᑦ.

ᐃᓄᒃᓱᒃ ᐃᓕᓐᓂᐊᕐᕕᒥ ᐃᓕᓐᓂᐊᕈᑎᖏᑕ ᐃᓄᓕᕆᓂᕐᒥᒃ ᐱᓕᕆᓚᐅᕐᒪᑦ ᑕᐃᔭᐅᔪᕐᒃ ᐃᓅᖃᑎᒌᑦᓯᐊᕐᓂᕐᒃ ᑐᒃᓯᕋᕈᑎ ᐊᑦᑕᕐᓇᕐᑐᒦᑐᓂᒃ ᒪᒃᑯᒃᑐᓂᒃ ᐃᖃᓗᒃᓂ ᑲᒪᒋᔭᐅᔪᓂᒃ ᐃᓄᓕᕆᔨᒃᑯᓐᓂ. ᑮᓇᐅᔭᕐᑖᕐᑎᑕᐅᓪᓗᓂ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓂᑦ, ᑐᒃᓯᕋᕈᑎᒋᓚᐅᕐᑕᖓ ᐊᑐᕐᓂᐊᓕᕐᑐᕐᒃ ᐊᐅᔭᐅᓂᐊᕐᑐᒥᒃ. ᐊᑐᕐᓕᕈᓂ ᐱᕕᖃᕐᑎᑦᑎᓂᐊᕐᑐᕐᒃ ᐃᓂᖃᕐᑎᑦᑎᓂᕐᒃᒥᒃ ᓱᕈᕐᓯᓄᑦ ᒪᒃᑯᒃᑐᓄᓪᓗ ᐃᓄᐃᑦ ᐃᓕᕐᒃᑯᓯᖏᓐᓂᒃ ᑲᑎᒋᐊᕐᓂᕐᒥᒃ, ᐊᔪᕈᓐᓃᕐᓴᓂᕐᒥᒃᓗ ᖃᓄᑐᐃᓐᓇᕐᒃ ᐱᓕᐊᕐᓴᒃᑯᑦ ᖃᓄᐃᓕᐅᕈᑎᒃᓴᑯᓪᓗ ᐃᑲᔪᕐᑕᐅᓗᑎᒃ ᓄᓇᓕᒃᒥᐅᑕᓂᒃ.