ᑲᓇᑕᒥ ᓄᓇᖃᖅᑳᖅᑐᓄᑦ ᐅᓇᑕᖃᑕᐅᓚᐅᕐᓯᒪᔪᓄᑦ ᐅᓪᓗᖅ ᐃᖅᑲᐅᒪᑦᑎᕕᐅᓲᖑᒻᒪᑦ ᑲᓇᑕᒥ ᖁᔭᒋᓪᓗᒋᑦ ᓄᓇᖃᖅᑳᖅᑐᑦ ᐃᑲᔪᕐᓯᒪᓂᖏᓐᓂᒃ ᐅᓇᑕᖅᑎᓂᑦ, ᐱᓗᐊᖅᑐᒥᑦ ᓯᕗᓪᓕᕐᒥ ᑐᖏᓕᐊᓂᓗ ᓄᓇᕐᔪᐊᓕᒫᒥ ᐅᓇᑕᖅᑐᖃᖅᑎᓪᓗᒍ ᐊᒻᒪᓗ ᑯᕆᐊᓐᒥ ᐅᓇᑕᖅᑎᓪᓗᒋᑦ.

Hᐃᐊᓐᓄᓕ ᑰᒪᓐ ᐃᓅᓂᑯ ᐸᓐᓂᖅᑑᒥ ᑭᓯᐊᓂ ᐱᕈᕐᓴᓯᒪᔪᖅ ᐃᓕᓐᓂᐊᕐᓂᑰᓪᓗᓂᓗ ᐃᖃᓗᓐᓂ.

ᐃᓚᒋᔭᐅᓕᓚᐅᕐᓯᒪᔪᖅ ᐸᓖᓯᒃᑯᓐᓄᑦ 1993ᖑᑎᓪᓗᒍ ᐊᒻᒪᓗ ᐸᓖᓯᐅᖃᑦᑕᕐᓯᒪᓪᓗᓂ ᓇᒥᑐᐃᓐᓇᖅ ᓄᓇᓕᓐᓂᑦ ᓲᕐᓗ ᐅᑯᓇᓂ ᕿᑭᖅᑕᕐᔪᐊᖅ, ᑲᖏᖅᖠᓂᖅ ᐊᒻᒪᓗ ᔨᐊᓗᓇᐃᕝ ᐃᖅᑲᓇᐃᔮᖃᕐᓂᕐᒧᑦ ᓈᕆᓇᓱᓐᓂᖓᓂ ᐸᓖᓯᒃᑯᓐᓂ 2018ᒥ. ᐊᑖᑕᑦᑎᐊᖓ, ᔪᐊᓇᓯ ᑎᐊᓚ, ᐸᓖᓯᒥᐅᑕᐅᓚᐅᕐᓯᒪᒻᒪᑦ 23ᓂᑦ ᐊᕐᕌᒍᓂᑦ, ᑖᔅᓱᒥᖓ ᐱᔾᔪᑎᖃᖅᑐᓂ ᐸᓖᓯᒃᑯᓐᓂ ᐸᓖᓯᐅᖃᑕᐅᓕᕈᒪᓕᓚᐅᕐᓯᒪᔪᖅ.

ᐱᕕᔅᓴᖃᓕᕐᖓᑦ ᐃᖅᑲᓇᐃᔭᕆᐊᕐᓂᕐᒧᑦ ᐋᕝᒑᓂᔅᑖᓐᒧᑦ, ᐱᓇᓱᓚᐅᕐᓯᒪᔪᖅ ᐊᖏᖅᑕᐅᓪᓗᓂᓗ. Hᐃᐊᓐᓄᓕ ᐋᑐᕚᓕᐊᖅᑎᑕᐅᓚᐅᕐᓯᒪᔪᖅ ᑕᐅᕗᖓ ᐊᐅᓪᓚᕈᒫᕐᓂᐊᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᓂ ᒪᕐᕉᓐᓂᒃ ᐱᓇᓱᐊᕈᓰᓐᓂᒃ ᐊᒻᒪᓗ ᐊᐅᓪᓚᖅᑎᑕᐅᓯᓚᐅᕐᓯᒪᔪᖅ ᒪᕐᕉᒃ ᑕᖅᑮᒃ ᓈᒻᒪᑎᒃ. ᐃᓕᓐᓂᐊᕈᑎᒋᓚᐅᕐᓯᒪᔭᖏᑦ ᒪᑯᐊ ᐃᓕᑦᑐᕐᓂᖅ ᖃᓄᖅ ᐅᓇᑕᖅᑐᔅᓴᐃᑦ ᐊᐅᓚᓂᖃᓲᖑᒻᒪᖔᑕ ᐊᒻᒪᓗ ᐃᓕᓐᓂᐊᖅᑐᓂ ᖃᓄᖅ ᐊᑐᖅᑕᐅᓲᖑᒻᒪᖔᑕ ᐅᓇᑕᖅᑐᓄᑦ ᓱᒋᐅᑏᑦ ᐅᓇᑕᖅᑐᖃᖅᑎᓪᓗᒍ.

ᑰᒪᓐ ᐊᐅᓪᓚᖅᑎᑕᐅᓚᐅᕐᓯᒪᔪᖅ ᒫᑦᓯ 2007ᒥ ᐊᕐᕌᒍᓕᒫᖅ ᑕᐅᕙᓃᓐᓂᐊᖅᑐᓂ. ᑎᑭᒻᒪᑦ ᐋᕝᒑᓂᔅᑖᓐᒧᑦ, ᐃᓚᒋᔭᐅᓚᐅᕐᓯᒪᔪᖅ ᐱᓕᕆᖃᑎᒌᓄᑦ ᐃᓕᓐᓂᐊᓂᕐᒥ ᐋᕝᒑᓐ ᐸᓖᓯᒃᑯᓐᓂᑦ ᒪᑯᓂᖓ ᐸᓖᓰᑦ ᐃᓕᓯᒪᔭᕆᐊᓕᖏᓐᓂᒃ, ᐋᓐᓂᖅᑐᓕᕆᓂᕐᒥᒃ ᐊᒻᒪᓗ ᐱᓕᒻᒪᓴᕐᓂᕐᒥᒃ. ᐃᓚᒋᔭᐅᓚᐅᕐᓯᒪᒻᒥᔪᖅ ᖃᐅᔨᓴᖃᑦᑕᓂᕐᒥᒃ ᐊᔾᔨᒌᙱᑐᒡᒍᑎᓂᑦ ᐸᓖᓯᒃᑯᑦ ᐊᓪᓚᕝᕕᖏᓐᓂᒃ ᑳᓐᑕHᐊᒥ ᓄᓇᓕᓐᓂᑦ.

ᓯᕗᓪᓕᕐᐹᒥ Hᐃᐊᓐᓄᓕ ᐅᔾᔨᕈᓱᓚᐅᕐᓯᒪᔪᖅ ᒥᒃᑲᒥᒃ ᐋᕝᒑᓂᔅᑖᓐᒧᑦ ᐅᖅᑰᔪᐊᓘᓂᖓᓂᒃ! ᐅᖃᖅᑐᖅ ᐅᓐᓄᒻᒪᑦ ᑭᐊᒃᑕᕐᓂᕐᐹᓘᓚᐅᕐᓯᒪᔪᕉᖅ ᐊᓐᓄᕌᕐᓯᒪᓚᐅᖅᑐᓂ ᐅᓇᑕᖅᑐᕐᓯᐅᑎᓂᑦ ᐅᓪᓗᓕᒫᖅ.

ᐊᑐᓚᐅᕐᓯᒪᔭᖏᑦ ᑕᕆᐅᑉ ᐊᑭᐊᓃᑦᑐᓂ ᖁᔭᓕᔾᔪᑎᒋᕙᑦᑕᖏᑦ ᑭᓱᓕᒫᑦᑎᐊᓂᑦ ᐊᑐᐃᓐᓇᖃᕋᑦᑕ ᑕᒫᓂ ᑲᓇᑕᒥ ᐊᒻᒪᓗ ᐅᖃᐅᓯᕆᓪᓗᓂᒋᑦ ᐊᑐᕆᐊᖏᑦ, ᐃᓕᓴᕕᖏᑦ, ᕿᒫᕕᖏᓪᓗ.

ᐅᖃᖅᑐᖅ ᐅᐱᒍᓱᓐᓂᕋᖅᑐᓂ ᐃᓚᒋᔭᐅᔪᓐᓇᕐᓯᒪᒐᒥ ᐱᓕᕆᖃᑎᒌᓄᑦ ᐃᑲᔪᖅᑐᓂ ᐋᕝᒑᓐᒥᐅᓂᑦ ᐊᒻᒪᓗ ᖁᕕᐊᓱᑦᑐᓂ ᐃᓚᒋᔭᐅᓐᓂᕋᒥ ᐃᑲᔪᕆᐊᕐᓯᒪᔪᓂᑦ. ᐃᓚᒋᔭᐅᓯᒪᔪᖅ ᑕᒻᒫᕐᓯᒪᕕᖓᓂ ᓇᐃᑕᓂ ᓯᒥᔅ, ᑳᓐᑕHᐊᒥ ᐊᕕᑦᑐᕐᓯᒪᓂᖏᓐᓂ ᓴᓇᒃᑲᓐᓂᖃᑦᑕᓂᕐᒧᑦ ᐱᓕᕆᖃᑎᒌᓂᑦ ᑕᒪᓐᓇ ᐃᓚᖃᕐᓯᒪᔪᖅ ᖃᐅᔨᓇᓱᖃᑦᑕᓂᕐᒥᒃ ᐃᓄᖏᑦ ᑖᕙᓂ ᑭᓱᓂᑦ ᐱᔭᕆᐊᖃᕐᒪᖔᑕ ᐊᒻᒪᓗ ᐃᑲᔪᖃᑦᑕᓂᕐᒥᒃ ᓴᓇᒃᑲᓐᓂᖃᑦᑕᓂᕐᒥᒃ ᐊᐅᓚᔾᔪᑎᔅᓴᕆᒋᐊᖃᓪᓚᕆᑦᑕᖏᓐᓂᒃ.

Hᐃᐊᓐᓄᓕ ᐱᒃᑯᒍᓱᓗᐊᕐᓯᒪᔪᖅ ᑭᒡᒐᖅᑐᐃᔭᕆᐊᔅᓴᖅ ᓄᓇᕗᒻᒥᐅᓂᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓐᓂᒃ. ᐅᖃᖅᑐᖅ ᐃᖅᑲᐃᑎᖃᖃᑦᑕᖅᑐᒥᓂᐅᓂᕋᖅᑐᓂ ᐊᔾᔨᒌᐸᓗᑦᑎᐊᕐᖓᑕ ᖃᐃᖁᔭᐅᒐᒥ ᐱᕈᖅᑐᒥᓂᕐᒥᒃ ᓰᕐᓇᑐᖅᑐᕆᐊᖅᑐᖁᔭᐅᒐᒥ ᑖᒃᑯᐊ ᐊᒡᒍᕐᓯᒪᔪᒥᓂᐅᓪᓗᑎᒃ ᕿᑐᒪᔪᒥᒃ ᐃᑦᑎᕐᕕᐅᔭᒥᓂᕐᒥᒃ ᓵᒦᑦᑐᑎᒃ ᐊᒻᒪᓗ ᑲᑐᑎᓪᓗᑎᒃ ᓂᕆᖃᑎᒌᓐᓂᕐᖓᑕ ᓇᑎᕐᒥ ᐃᔅᓯᕚᖅᑐᑎᒃ.

ᑕᕝᕙᓂ ᓄᓇᖃᖅᑳᖅᑐᓄᑦ ᐅᓇᑕᖃᑕᐅᓚᐅᕐᓯᒪᔪᓄᑦ ᐅᓪᓗᕐᒥ, Hᐃᐊᓐᓄᓕ ᖁᕕᐊᓱᑦᑐᖅ ᓄᓇᖃᖅᑳᖅᑐᑦ ᐃᓚᒋᔭᐅᑎᑕᐅᒻᒪᑕ ᐊᒻᒪᓗ ᖁᔭᒋᔭᐅᒻᒪᑕ ᐃᑲᔪᕐᓯᒪᓂᖏᓐᓄᑦ, ᐃᓚᒋᔭᐅᓯᒪᓂᖏᓐᓄᑦ ᐊᒻᒪᓗ ᑭᒡᒐᖅᑐᐃᓯᒪᓂᖏᓐᓄᑦ ᑲᓇᑕᒥᐅᑦ ᐃᓕᖅᑯᓯᖓᓐᓂᒃ.

Hᐃᐊᓐᓄᓕ ᓄᓕᐊᓕᒃ ᐋᓕᓴᓐ ᑰᒪᓐᒥᒃ ᐊᒻᒪᓗ ᒪᕐᕉᓐᓂᒃ ᐃᓐᓇᐅᓕᖅᑑᓐᓂᒃ ᐸᓂᖃᖅᑐᑎᒃ, ᒫᓐᓇ ᐃᖅᑲᓇᐃᔭᖅᑐᖅ ᓄᓇᕗᑦ ᒐᕙᒪᒃᑯᖏᓐᓂ ᓯᐊᒻᒪᐸᓪᓕᐊᑎᑦᑎᓂᕐᒧᑦ ᐊᓪᓚᕕᒻᒥ. ᐱᔭᕇᕐᓯᓯᒪᒻᒥᔪᖅ ᐃᓕᓐᓂᐊᓚᐅᕐᓯᒪᓪᓗᓂ ᓄᓇᕗᒻᒥ ᓯᕗᓪᓕᕐᐹᖓᓐᓂ ᐊᑭᑦᓯᕋᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕈᒻᒥ ᑕᕝᕙᓂ ᐱᔭᕇᕐᓯᓚᐅᕐᓯᒪᔪᖅ 2005ᖑᑎᓪᓗᒍ  .

ᖁᔭᓐᓇᒦᕈᒪᔭᕗᑦ Hᐃᐊᓐᓄᓕ ᑰᒪᓐ ᐃᑲᔪᕐᓯᒪᓂᖓᓄᑦ ᐊᒻᒪᓗ ᖁᔭᓐᓇᒦᖅᑐᒍ ᐃᑲᔪᕐᓯᒪᓂᖓᓄᑦ ᓄᓇᕗᒻᒥᐅᓂᑦ.