QIA ELECTIONS - Our homeland, our future, our vote. Remember to cast your ballot. Learn More

ᕿᑭᖅᑕᓃᒃᑯᑦ ᓂᕈᐊᕐᓂᖓ - ᐊᖏᕐᕋᕗᑦ, ᓯᕗᓂᒃᓴᕗᑦ ᐊᒻᒪᓗ ᓂᕈᐊᕐᓂᕗᑦ. ᓂᕈᐊᕆᐊᖅᑐᕐᓂᐊᖅᐳᑎᑦ. ᑐᑭᓯᒃᑲᓐᓂᕆᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓄᑖᒥᒃ ᐊᖏᕐᕋᖃᓕᖅᐳᑦ ᖃᐅᓱᐃᑦᑐᒥ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓄᑖᒥᒃ ᐊᖏᕐᕋᖃᓕᖅᐳᑦ ᖃᐅᓱᐃᑦᑐᒥ

 In blog-inuk

ᒪᐃ 25, 2022-ᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᐅᕕᓚᐅᕐᒪᑕ ᐱᑐᖃᕐᒥᒃ ᑯᐊᐸᒃᑯᑦ ᑐᔪᕐᒥᕕᖓᓂᒃ ᖃᐅᓱᐃᑦᑐᒥ ᐊᑐᖅᖢᑎᒃ ᑲᓇᑕᐅᑉ ᒐᕙᒪᖏᓐᓂᑦ ᑮᓇᐅᔭᖅᑑᑎᓂᒃ ᑕᓪᓗᕈᑎᐅᑉ ᐃᒪᖓᑕ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᒃᓴᖏᓐᓄᓪᓗ ᐊᖏᖃᑎᒌᒍᑎᐅᑉ ᐊᑖᓂ ᐊᒃᑐᐊᔪᓄᑦ ᐱᖁᑎᕐᔪᐊᓄᑦ ᑮᓇᐅᔭᖅᑑᑏᑦ ᐊᑖᓂ. ᐃᒡᓗ ᐊᖏᕋᕆᔭᐅᓂᐊᓕᖅᑐᖅ ᐊᒻᒪᓗ ᑭᓱᑐᐃᓐᓇᕐᓄᑦ-ᐊᑐᖅᑕᐅᔪᓐᓇᖅᑐᓄᑦ ᓴᓇᕕᐅᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓇᐅᑦᑎᖅᓱᖅᑏᑦ ᐃᓄᐃᑦ ᐸᖅᑭᒃᓯᖅᑎᖏᓐᓄᑦ.

ᓄᑕᕈᖅᑎᑕᐅᓂᖓᓄᑦ ᐃᒡᓘᑉ ᐸᕐᓇᐃᕙᓪᓕᐊᔪᑦ ᐊᐅᔭᐅᓂᐊᖅᑐᒧᑦ ᐊᒻᒪᓗ ᐅᑭᐊᒃᓵᖅ, ᐊᒻᒪᓗ ᐱᔭᕇᖅᑕᐅᒃᐸᑕ ᓄᑖᖑᔪᖅ ᑭᓱᑐᐃᓐᓇᕐᓄᑦ-ᐊᑐᖅᑕᐅᔪᓐᓇᖅᑐᓄᑦ ᓴᓇᕝᕕᒃ ᐃᓂᒋᔭᐅᓛᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑎᑎᕋᕐᕕᖏᓐᓄᑦ, ᓴᓇᕝᕕᖕᒥᒃ, ᐱᖁᑎᓄᑦ ᑐᖅᑯᐃᓯᒪᕝᕕᖕᒥᒃ, ᐱᖓᓱᓄᑦ-ᓄᓇᓯᐅᑎᓄᑦ ᓄᓇᒃᑰᕈᑎᒃᑯᕕᖕᒥᒃ, ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᑎᑎᕋᕐᕕᖓᓂᒃ ᐊᒻᒪᓗ ᐳᓚᕋᑦᑐᓕᕆᕕᖕᒥᒃ. ᐃᓂᒃᓴᐅᒃᑲᓐᓂᕈᓐᓇᖅᑐᓂᒃ ᐊᑐᐃᓐᓇᖅᑕᖃᓛᕋᓱᒋᔭᐅᔪᖅ.

ᓂᐅᕕᖅᑕᐅᑎᓪᓗᒍ ᑖᓐᓇ ᓄᑖᖅ ᐃᒡᓗ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᐅᒃᑐᑦ ᑲᔪᓯᑎᑦᑎᔪᒪᓪᓗᑎᒃ ᐱᒻᒪᕆᐅᔪᓂᒃ ᐱᓕᕆᐊᓂᒃ ᓴᖅᑭᑦᑐᓂᒃ ᑕᓪᓗᕈᑎᐅᑉ ᐃᒪᖓᑕ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᒃᓴᖏᓐᓄᓪᓗ ᐊᖏᖃᑎᒌᒍᑎᐅᑉ ᐊᑖᓂ. ᐃᖅᓇᐃᔮᓂᒃ ᐊᑐᐃᓐᓇᕈᐃᓪᓗᓂ ᐊᐅᓚᑦᑎᓂᕐᒧᑦ, ᐊᕙᑎᒥᒃ ᐸᐃᖅᓯᔨᐅᓂᕐᒧᑦ, ᖃᐅᔨᓴᕐᓂᕐᒧᑦ, ᖃᐅᔨᓴᖅᐸᓪᓕᐊᖃᑦᑕᕐᓂᕐᒧᑦ, ᖃᐅᔨᒪᔭᒥᒃ ᐊᒥᖅᑳᕐᓂᕐᒥᒃ ᐊᒻᒪᓗ ᐊᔪᕆᖅᓱᐃᓂᕐᒥᒃ.

ᑖᒃᑯᐊ ᐃᖅᑲᓇᐃᔮᒃᓴᐃᑦ ᑐᕌᒐᖃᕐᑐᑦ ᑲᒪᒋᓗᒋᑦ ᐃᓄᖕᓂᑦ ᐱᒻᒪᕆᐅᒋᔭᐅᔪᑐᖃᐃᑦ ᐊᒻᒪᓗ ᐊᔪᖏᓐᓂᕆᔭᐅᔪᑦ ᐊᒻᒪᓗ ᒪᓂᓴᕐᓗᒋᑦ ᐃᓕᓐᓂᐊᖅᑐᓕᕆᓂᕐᒨᖓᔪᑦ ᐊᒻᒪᓗ ᐱᓕᒻᒪᒃᓴᕐᓂᕐᒨᒻᒐᔪᑦ. ᑖᓐᓇ ᓄᑖᖑᔪᖅ ᐃᒡᓗ ᑲᔪᓯᑎᑦᑎᔪᓐᓇᕐᓂᐊᕐᒪᑦ ᓇᐅᑦᑎᖅᓱᖅᑎᓂᒃ ᑲᔪᓰᓇᖁᓪᓗᒋᑦ ᐱᒻᒪᕆᐅᔪᒥᒃ ᐱᓕᕆᐊᒥᓂᒃ ᐊᖅᑯᑎᒋᔭᐅᓗᑎᒃ ᐃᓄᑐᖃᕐᓂᑦ ᐊᒻᒪᓗ ᒪᒃᑯᒃᑐᓂᑦ ᐊᑐᐃᓐᓇᖃᖅᑎᑦᑎᓂᒃᑯᑦ ᐃᓂᐅᔪᒥᒃ ᐃᓄᐃᑦ ᑲᑎᑦᑐᓐᓇᕐᓗᑎᒃ ᐊᒻᒪᓗ ᐊᒥᖅᑳᕐᓗᑎᒃ ᖃᐅᔨᒪᓂᕐᒥᓂᒃᒃ ᐊᒻᒪᓗ ᓴᓇᔪᓐᓇᕐᓂᕐᒥᖕᓂᒃ.

ᓱᓕᒃᑲᓐᓂᖅ, ᓂᕆᐅᒋᔭᐅᔪᖅ ᑖᓐᓇ ᓄᑖᖅ ᐱᖁᑎᕐᔪᐊᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᑦ ᓇᖕᒥᓂᕆᔭᐅᓗᓂ ᐊᑯᓂᐅᓂᖅᓴᒥᒃ ᐊᑐᖅᑕᐅᔪᓐᓇᕐᓂᐊᕐᒪᑦ, ᐱᒻᒪᕆᐅᔪᑦ ᓴᓇᔭᐅᔭᕆᐊᓖᑦ ᐱᓕᕆᐊᖑᔪᓐᓇᕐᓂᐊᕐᒪᑕ ᐊᑲᕐᕆᓇᖅᑐᒦᓪᓗᓂ, ᐊᒻᒪᓗ ᓴᓇᕐᕈᑏᑦ, ᐊᑐᖅᑕᐅᔪᓐᓇᕐᑐᑦ ᐊᒻᒪᓗ ᐃᓂᐅᔪᑦ ᐊᑐᐃᓐᓇᐅᓗᑎᒃ ᓄᓇᖃᕐᑐᓂᑦ ᐊᑐᖅᑕᐅᔪᓐᓇᕐᓂᐊᕐᒪᑕ ᐊᒻᒪᓗ ᐃᓕᑦᑎᔾᔪᑕᐅᓗᑎᒃ.

ᐊᖏᖃᑎᖃᕐᓂᒃᑯᑦ ᑲᓇᑕᐅᑉ ᒐᕙᒪᖏᓐᓂᒃ, $190 ᒥᓕᐊᓐ ᐅᖓᑖᓄᑦ ᐊᖏᖃᑎᒌᒍᑕᐅᓚᐅᖅᑐᖅ ᐱᖁᑎᕐᔪᐊᓄᑦ ᑮᓇᐅᔭᖃᖅᑎᑕᐅᓂᕐᒧᑦ ᐊᒃᑐᖅᑕᐅᓯᒪᔪᓄᑦ ᑕᓪᓗᕈᑎᐅᑉ ᐃᒪᖓᓂ ᓄᓇᓕᐅᔪᓄᑦ.

ᐸᕐᓇᐅᑎᓕᐅᖅᐸᓪᓕᐊᔪᒍᑦ ᐊᓯᖏᓐᓂ ᕿᑭᖅᑕᓂ ᓄᓇᓕᐅᔪᓄᑦ ᐊᔾᔨᖏᓐᓂᒃ ᐃᒡᓗᖃᐅᖅᑐᓂᒃ ᐊᒻᒪᓗ ᓂᕆᐅᒃᐳᒍᑦ ᑐᓴᕆᐊᖅᑎᑦᑎᓛᕐᓂᑦᑎᓐᓂᒃ ᐃᓕᔅᓯᓐᓂᒃ ᑖᒃᑯᓂᖓ ᐱᒻᒪᕆᐅᔪᓂᒃ ᓴᖅᑭᑉᐸᓪᓕᐊᔪᓂᒃ.

 

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ