ᐃᖃᓗᐃᑦ, ᓄᓇᕗᑦ, ᓅᕙᐃᒻᕙ 19, 2025 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᖁᕕᐊᒃᑯᔾᔨᕗᑦ ᓄᓇᕗᑦ ᓯᕗᓕᖅᑎᑖᖓᓄᑦ ᓂᕈᐊᖅᑕᐅᔪᒧᑦ, ᓯᕗᓕᖅᑎ ᔮᓐ ᒪᐃᓐ, ᐊᒻᒪᓗ ᒥᓂᔅᑕᓂᒃ ᑲᑎᒪᔨᓂᒃ 7-ᒋᓕᖅᑕᖏᓐᓄᑦ ᒪᓕᒐᓕᐅᕐᕕᖕᒧᑦ.
ᕿᑭᖅᑕᓂᒃᑯᑦ ᐃᓕᓴᖅᓯᔪᑦ ᐱᖕᒪᕆᐅᓂᖓᓂᒃ ᓄᑖᖑᓂᖓᓂᒃ ᓄᓇᕗᒻᒥ ᐊᐅᓚᔾᔪᑎᑦ ᐊᒻᒪᓗ ᓂᕆᐅᒋᔭᓖᑦ ᐃᖅᑲᓇᐃᔭᖃᑎᖃᑦᓯᐊᓂᐊᓂᕐᒥᒃ ᓯᕗᓕᖅᑎ ᒪᐃᓐᒥᒃ ᒥᓂᔅᑕᖁᑎᖏᓐᓂᓪᓗ ᑲᑐᔾᔭᐅᔪᓄᑦ ᓯᕗᓪᓕᐅᑎᔭᕆᐊᓕᖕᓄᑦ ᓲᕐᓗ ᓯᕗᒧᐊᒃᑎᑦᑎᓂᖅ ᐃᓪᓗᓕᕆᓂᕐᒥᒃ ᐱᖁᑎᕐᔪᐊᓕᕆᓂᕐᒥᓪᓗ, ᐃᑲᔪᕐᓂᖅ ᐱᕙᓪᓕᐊᑎᑕᐅᓂᖏᓐᓂᒃ ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᔪᑦ ᐊᒻᒪᓗ ᒥᐊᓂᕆᔭᐅᔪᓄᑦ ᓄᓇᓄᑦ, ᓴᖅᑭᖅᑕᐅᓂᖓ ᓄᓇᕗᒻᒥ ᐃᓄᐃᑦ ᑕᑯᔭᒐᖃᕐᕕᖓ, ᓴᕐᖓᑎᑦᓯᓂᖅ ᓂᕿᖃᑦᓯᐊᖃᑦᑕᓂᕐᒥᒃ ᐊᒻᒪᓗ ᐃᖢᐊᖅᓴᐃᔾᔪᑎᓂᒃ ᐋᓐᓂᐊᖅᑐᓄᑦ, ᐊᒻᒪᓗ ᐱᕚᓪᓕᑎᑦᓯᓂᕐᒥᒃ ᐃᓕᓐᓂᐊᓂᕐᒥᒃ, ᐅᖃᐅᓯᕐᒥᒃ, ᐊᒻᒪᓗ ᐃᓕᓐᓂᐊᕈᑎᒃᓴᓂᒃ.
ᑖᒃᑯᐊ ᓯᕗᓪᓕᐅᔾᔭᐅᔪᒪᔪᑦ, ᐃᓚᖃᖅᑐᑎᒃ ᐃᑲᔪᖅᓯᒪᐃᓐᓇᕈᑎᒃᓴᓂᒃ ᒪᑭᑉᐸᓪᓕᐊᑎᑦᓯᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ, ᓄᓇᓖᑦ ᖃᓄᐃᙱᑦᓯᐊᕐᓂᖏᓐᓂᒃ, ᐊᒻᒪᓗ ᓴᐳᔾᔨᓯᒪᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᐅᖃᐅᓯᖓᓂᒃ, ᐊᒻᒪᓗ ᐃᓕᖅᑯᓯᖓᓂᒃ ᕿᑭᖅᑕᓂ ᓄᓇᓕᒫᖓᓂ, ᑐᙵᕕᐅᖏᓐᓇᖁᓪᓗᒋᑦ ᕿᑭᖅᑕᓂᒃᑯᑦ ᐱᓕᕆᐊᖏᓐᓄᑦ.
ᕿᑭᖅᑕᓂᒃᑯᑦ ᐊᖏᖅᓯᒪᒍᑎᖃᐃᓐᓇᖅᑐᑦ ᓴᕐᖓᑎᑦᓯᓂᕐᒥᒃ ᐱᓕᕆᖃᑎᖃᕐᓂᕐᒥᒃ ᓄᓇᕗᑦ ᒐᕙᒪᖓᓂᒃ ᐃᑲᔪᕐᓂᒃᑯᑦ ᐃᑲᔫᑎᓕᖕᓂᒃ ᐃᓱᒪᓕᐅᕈᑎᖃᕐᓂᕐᒧᑦ ᐊᒻᒪᓗ ᓇᓗᓇᐃᕈᑎᓂᒃ ᐃᓄᐃᑦ ᓂᐱᖏᑦ ᑐᑭᒧᐊᒍᑕᐅᖏᓐᓇᖁᓪᓗᒋᑦ ᐱᓕᕆᐊᑦᓴᓄᑦ, ᐱᔨᑦᓯᕈᑎᓄᑦ, ᐊᒻᒪᓗ ᐊᑯᓂᐅᔪᒧᑦ ᐸᕐᓇᐅᔾᔨᓂᕐᒧᑦ ᓄᓇᕗᒻᒥᐅᓂᒃ.
ᕿᑭᖅᑕᓂᒃᑯᑦ ᓇᑯᖅᓴᕐᒥᔪᑦ ᒪᓕᒐᓕᐅᖅᑎᓕᒪᓂᒃ ᑐᓂᓯᒪᑦᓯᐊᕐᓂᖏᓐᓂᒃ ᐱᔨᑦᓯᓂᕐᒧᑦ ᓄᓇᕗᒻᒥᒃ. 7-ᒋᓕᖅᑕᖓᓂ ᒪᓕᒐᓕᐅᕐᕕᖕᒥ ᐱᒋᐊᓕᖅᑎᓪᓗᒋᑦ ᐱᓕᕆᐊᒥᓂᒃ, ᕿᑭᖅᑕᓂᒃᑯᑦ ᓂᕆᐅᒋᔭᓖᑦ ᐱᓕᕆᖃᑎᖃᐃᓐᓇᓂᐊᕐᓂᕐᒥᒃ ᓯᕗᒧᐊᑦᑎᑦᓯᓂᕐᒧᑦ ᐃᓗᓯᕐᒧᑦ, ᒪᑭᒪᑦᓯᐊᓂᕐᒧᑦ, ᐊᒻᒪᓗ ᓇᖕᒥᓂᖅ− ᐱᓇᓱᐊᕐᓂᖏᓐᓂᒃ ᐃᓄᐃᑦ.
