ᑐᔅᓯᕋᐅᓯᐅᕐᕕᔅᓴᐅᓕᕐᒥᔪᖅ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎᓂᑦ 2025-2026
ᐃᖃᓗᐃᑦ, ᓄᓇᕗᑦ, ᐋᒡᒌᓯ 18, 2025- ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᑐᔅᓯᕋᐅᓯᐅᖃᑦᑕᖁᔨᓕᕐᒥᔪᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᕐᒧᑦ (QCAP) ᐊᕐᕌᒍᒧᑦ 2025-2026 ᑮᓇᐅᔭᓄᑦ ᐊᐅᓚᕕᖓᓐᓄᑦ, ᐅᑭᐊᔅᓵᖅ/ᐅᑭᐅᖅ ᐱᓕᕆᐊᔅᓴᓄᑦ.
ᐊᑐᓂᑦ ᐃᓄᐃᑦ ᐊᒻᒪᓗ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᑦᑐᑦ ᓄᓇᓕᓐᓂᑦ ᑲᑐᔾᔨᖃᑎᒌᑦ ᓇᓕᑐᐃᓐᓇᖏᓐᓂᒃ ᕿᑭᖅᑕᓂ ᓄᓇᓕᓐᓂᑦ ᑐᙵᓱᑦᑎᑕᐅᕗᑦ ᑐᓂᓯᖃᑦᑕᖁᔭᐅᓪᓗᑎᒃ ᑐᔅᓯᕋᐅᑎᓂᑦ ᐱᓕᕆᐊᔅᓴᖏᓐᓄᑦ ᐊᐅᓚᓂᖃᕋᔭᖅᑐᓄᑦ ᐊᑯᓐᓂᖏᓐᓂ ᐅᑐᐱᕆ 1, 2025 ᐊᒻᒪᓗ ᒫᑦᓯ 31, 2026.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᖅ ᑮᓇᐅᔭᖃᖅᑎᑦᑎᓲᖅ ᓄᓇᓕᓐᓃᑦᑐᓂᑦ ᐱᓕᕆᐊᖑᓂᐊᖅᑐᓂᑦ ᓄᓇᓕᓐᓄᑦ ᐃᓚᐅᕕᐅᖃᑦᑕᓂᐊᖅᑐᓂᑦ ᐃᓕᓐᓂᐊᕐᕕᐅᖃᑦᑕᓂᐊᖅᑐᓂᓪᓗ ᐱᖅᑯᓯᖅᑎᒍᑦ ᓴᓇᑐᓕᓴᕈᑕᐅᓲᓂᑦ, ᓲᕐᓗ ᒪᑯᓂᖓ ᑭᓯᐊᓂ ᑕᒪᒃᑯᓂᖓᐃᓐᓇᐅᖏᑦᑐᖅ ᒥᖅᓱᖃᑦᑕᕐᓂᖅ, ᐊᖑᓇᓱᖃᑦᑕᕐᓂᖅ, ᐊᒻᒪᓗ ᐊᐅᓪᓚᕐᓯᒪᓗᓂ ᐱᓕᕆᓂᐅᕙᑦᑐᓂᑦ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑎ ᑮᓇᐅᔭᖃᖅᑎᑕᐅᕙᑦᑐᖅ ᕿᑭᖅᑕᓂᒃᑯᑦ ᑐᖅᑯᖅᑕᐅᕙᓪᓕᐊᔪᓂᑦ ᑮᓇᐅᔭᖏᓐᓂᒃ. ᑖᒃᑯᐊ ᑐᖅᑯᖅᑕᐅᕙᓪᓕᐊᔪᑦ ᑮᓇᐅᔭᑦ ᐊᒥᓱᕈᕐᐸᓪᓕᐊᑎᓪᓗᒋᑦ, ᑮᓇᐅᔭᑦ ᐃᓵᕙᑦᑐᑦ ᐃᑲᔫᓯᐊᔅᓴᓄᑦ ᑮᓇᐅᔭᓄᑦ ᑐᕌᖃᑦᑕᕐᖓᑕ ᐊᒥᓱᕈᒃᑲᓐᓂᖃᑦᑕᖁᓪᓗᒋᑦ ᐱᓕᕆᐊᑦ ᐃᑲᔫᑕᐅᕙᑦᑐᑦ ᐃᓄᓐᓄᑦ.
ᑐᔅᓯᕋᐅᑏᑦ ᑲᒪᒋᔭᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᐅᕙᓂ https://www.qia.ca/qcap-application/, ᐅᕝᕙᓘᓐᓃᑦ ᐃᑲᔪᖅᑎᒋᓗᒍ ᓄᓇᔅᓯᓐᓂ ᑐᓴᐅᒪᑎᑦᑎᔨᓯ.
ᑐᑭᓯᑦᑎᐊᑲᓐᓂᕈᒪᒍᕕᑦ, ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᖃᕈᕕᑦ ᑎᑎᕋᕐᓂᕐᒥᒃ ᖃᕋᓴᐅᔭᒃᑯᑦ ᐅᕝᕙᓘᓐᓃᑦ ᐸᐃᑉᐹᑎᒍᑦ ᑎᑎᕋᕐᕕᒋᒋᐊᓕᓐᓂᑦ ᑐᔅᓯᕋᐅᑎᓂᑦ, ᐅᖄᓚᒍᓐᓇᖅᑐᑎᑦ ᑖᓯ ᓇᐅᓪᓚᕐᒧᑦ ᐅᕗᖓ 867-975-8435 ᑎᑎᕋᕐᓗᑎᓪᓘᓐᓃᑦ ᐃᕐᖐᓈᖅᑕᐅᑎᒃᑯᑦ ᐅᕗᖓ qcap@qia.ca.
ᒪᑐᕕᔅᓴᓕᒃ ᑐᔅᓯᕋᐅᑎᓂᑦ ᑐᓂᓯᖃᑦᑕᓂᕐᒧᑦ ᑖᓐᓇ ᐋᒡᒌᓯ 29, 2025ᒥ 11:59ᒨᖅᑲᑦ ᐅᓐᓄᐊᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᔾᔪᑎᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ
(ᐅ) 867.975.8398 ᐅᖓᓯᑦᑐᒥᓪᓘᓐᓃᑦ ᐊᑭᖃᙱᑐᒃᑯᑦ 1.800.667.2742 kflaherty@qia.ca
