ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒃᑐᑦ ᑲᑐᔾᔨᔭᕆᐊᒃᓴᖅ ᐱᕙᓪᓕᐊᔪᖏᓐᓂ 21 ᓄᑖᑦ ᐃᒡᓗᐃᑦ ᐊᖏᕐᕋᑦᓴᖏᑦ ᐃᓄᓐᓄᑦ ᓴᓇᔭᐅᓛᕐᒪᑕ ᑎᓴᒪᓂᒃ ᖁᑦᑎᒃᑐᖅ ᓄᓇᓕᖏᓐᓂ: ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᐊᒻᒪᓗ ᒥᑦᑎᒪᑕᓕᒃ.
ᑖᓐᓇ ᐱᒋᐊᓕᑕᐃᓐᓇᖅᑐᖅ. ᑖᒃᑯᐊ ᐊᖏᕐᕋᒃᓴᐅᔪᑦ ᐃᓚᒋᔭᐅᕗᑦ ᐊᖏᓂᖅᓴᒥᒃ, ᐊᑯᓂᐅᓂᖅᓴᖅ ᐸᕐᓇᐅᑎᒧᑦ ᐃᓄᖕᓄᑦ−ᓯᕗᒃᑲᖅᑖᖑᓪᓗᑎᑦ ᐃᒡᓗᓕᐊᕆᔭᐅᓛᖅᑐᑦ ᑕᒪᐃᓐᓂ ᕿᑭᖅᑖᓗᒻᒥ ᓄᓇᓕᖏᓐᓂ 2030 ᓇᓪᓕᖅᐸᑦ.
ᖃᓄᐃᑦᑑᓛᕐᒪᑕ ᐃᒡᓗᐃᑦ ᓴᓇᔭᐅᓛᖅᑐᑦ?
ᓄᑖᑦ ᐊᖏᕐᕋᑦᓴᑦ ᓴᓇᔭᐅᓯᒪᕗᑦ ᐃᓄᒻᒪᕇᑦ ᐃᓚᒌᑦᑐᑦ ᐊᒻᒪᓗ ᐃᓅᓯᖏᑦ ᐃᓱᒪᒋᔭᐅᓯᒪᓪᓗᑎᑦ. ᐊᑐᓂ ᐃᒡᓗ ᐃᓛᒃᑰᖓᔪᖅ ᐃᓚᒌᓄᑦ ᐊᖏᕐᕋᑦᓴᖅ, ᐃᒪᓐᓇᐸᓗᒃ ᐊᖏᓂᓕᒃ 1,700 ᑭᑉᐹᕆᒃᑐᑦ ᐃᓯᒐᑦ ᐊᒥᓲᓂᖏᑦᑕ ᑕᑭᓂᖏᑦ, ᒪᑐᓯᒪᐅᙱᑦᑐᒡᒍᑕᐅᓪᓗᑎᑦ ᐊᒻᒪᓗ ᐃᓱᒪᒋᔭᐅᑦᑎᐊᖅᓯᒪᔪᓂᒃ ᐋᖅᑭᒃᓯᒪᓂᖃᐅᖅᑐᑎᑦ:
- ᒪᑐᖃᐅᙱᑦᑐᒐᓚᐅᓪᓗᑎᑦ ᐳᓛᕐᕕᖏᑦ ᐃᓚᒌᑦ ᑲᑎᑦᑐᓐᓇᕐᕕᒋᓂᐊᕐᒪᒋᑦ ᐊᒻᒪᓗ ᓄᓇᓕᒻᒥᐅᑦ ᖃᓄᐃᓕᐅᕐᓂᖃᖅᑎᓪᓗᒋᑦ ᓂᐅᕐᕈᐊᖃᐅᕐᕕᐅᖃᑦᑕᕐᓂᐊᕐᒪᑕ.
- ᓂᒡᓕᖕᓇᖅᑐᑦ ᑐᖅᓲᖏᑦ ᑐᖅᑯᐃᖁᓪᓗᒋᑦ ᐃᒋᕐᕈᑎᓂᒃ ᐊᒻᒪᓗ ᓯᓚᒦᑦᑐᖅᓯᐅᑎᓂᒃ.
- ᐃᓂᖃᐅᖅᑐᑦ ᐃᓄᓕᖅᑕᓄᑦ−ᓂᕿᓕᕆᕝᕕᐅᓗᑎᑦ, ᓴᓗᒻᒪᖅᓴᐃᕕᐅᓗᑎᑦ, ᑐᖅᑯᐃᕕᐅᓗᑎᑦ, ᐊᒻᒪᓗ ᑲᑐᔾᔨᕕᐅᓗᑎᑦ ᓂᕐᔪᑎᓂᒃ ᐊᖑᔭᒥᓂᕐᓂᒃ.
ᐊᖏᓛᓂᒃ ᐊᖏᕐᕋᑦᓴᓕᐅᕈᓐᓇᖁᓪᓗᑕ ᒪᓕᓪᓗᒋᑦ ᐃᓱᒪᓕᐅᕈᑕᐅᓯᒪᔪᑦ ᑮᓇᐅᔭᖅᑐᕈᑎᒃᓴᑦ, ᐊᖏᕐᕋᑦ ᓴᓇᔭᐅᔪᑦ ᐋᖅᑭᒃᓱᕆᐊᓖᑦ ᓴᓇᔭᐅᓗᑎᑦ ᒪᓕᑦᑕᐅᓗᓂ. ᐅᐸᓗᖓᐃᖅᑕᐅᓲᑦ ᐋᓐᑎᐅᕆᔪᒥ, ᐅᓯᔭᐅᓪᓗᑎᑦ ᐊᖏᔪᒡᒍᑏᑦ ᐅᒥᐊᕐᔪᐊᒃᑯᑦ, ᐊᒻᒪᓗ ᑲᑎᖅᓱᖅᑕᐅᓕᖅᑐᑎᑦ ᐊᑐᓂ ᓄᓇᓕᐅᔪᒥ.
ᖃᑦᑎᑦ ᐊᖏᕐᕋᑦ ᑎᑭᑎᑕᐅᓛᕐᒪᑕ?
ᓯᕗᓪᓕᖅᐹᒥᒃ ᐱᕙᓪᓕᐊᒍᑎᒋᔭᐅᓂᖓ ᐱᖃᓯᐅᔾᔨᔪᑦ 21-ᓂᒃ ᓄᑖᕐᓂᒃ ᐊᖏᕐᕋᓂᒃ:
- 8 ᐊᖏᕐᕋᐃᑦ ᒥᑦᑎᒪᑕᓕᒻᒥ
- 5 ᐊᖏᕐᕋᐃᑦ ᑲᖏᖅᑐᒑᐱᖕᒥ
- 5 ᐊᖏᕐᕋᐃᑦ ᐃᒃᐱᐊᕐᔪᖕᒥ
- 3 ᐊᖏᕐᕋᐃᑦ ᐊᐅᓱᐃᑦᑐᕐᒥ
ᐃᒡᓗᒃᓴᑦ ᑎᑭᓯᒪᓕᖅᑐᑦ ᐅᒥᐊᕐᔪᐊᒃᑯᑦ ᐊᒻᒪᓗ ᓴᓇᔭᐅᓯᒋᐊᓛᖅᑐᑎᑦ ᐃᒡᓗᐃᑦ ᒫᓐᓇᕈᓗᒃ.
ᓄᑖᖅ ᓯᕗᒧᐊᒍᑎᒋᔭᐅᔪᖅ ᐃᓄᒻᒪᕇᑦ ᐃᒡᓗᓕᐅᖅᑕᐅᓂᖏᑕ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖃᑎᖃᑦᑎᐊᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᑕᒪᔅᓱᒥᖓ ᐱᓕᕆᐊᕐᒥᒃ ᐃᖅᑲᓇᐃᔮᖃᖅᑐᑎᑦ ᐃᓚᒋᔭᐅᓪᓗᓂ ᐊᖏᕐᕋᑦᓴᓕᐅᓚᐅᖅᑕ − ᓄᓇᕗᒻᒥ ᐃᓄᒻᒪᕇᑦ ᐃᒡᓗᓕᐅᖅᑕᐅᓂᖏᑦᑕ ᖃᓄᐃᓕᐅᕈᑎᒋᔭᐅᓂᖏᑦ ᐸᕐᓇᐅᑎ. ᑖᓐᓇ ᐸᕐᓇᐅᑎ ᑲᒪᒋᔭᖃᓗᐊᖅᑐᖅ ᐊᑦᑕᕐᓇᙱᑦᑐᓂᒃ, ᐃᓕᖅᑯᓯᕐᒥᓅᖓᓂᖃᐅᑦᑎᐊᖅᑐᓂᒃ ᐃᓄᒻᒪᕆᓐᓄᑦ, ᐊᒻᒪᓗ ᐊᑭᑐᓗᐊᙱᑦᑐᓂᒃ ᐃᒡᓗᖃᖅᑎᑦᑎᔪᑦ ᐃᓄᒻᒪᕆᖕᓄᑦ, ᐅᖓᑕᐅᔨᓪᓗᓂ ᐅᓪᓗᒥᐅᔪᖅ ᐃᓄᖕᓄᑦ ᑭᒃᑯᑐᐃᓐᓇᕐᓄᑦ ᐃᒡᓗᓕᕆᔾᔪᓯᕐᒥᒃ ᑲᒪᒋᔭᐅᓲᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᙵᓄᑦ.
ᑮᓇᐅᔭᑦ ᑖᒃᑯᓄᖓ 21 ᐊᖏᕐᕋᑦᓴᐅᔪᓄᑦ ᑐᓂᔭᐅᓯᒪᕗᑦ ᑖᒃᑯᑎᒎᓇᖅ ᓄᓇᕗᑦ ᑐᙵᕕᒃ ᑎᒥᖓᒍᑦ ᐊᒻᒪᓗ ᑲᓇᑕᒥ ᐊᑐᖅᑐᐊᕐᓂᕐᒧᑦ ᐃᒡᓗᑖᕐᓗᓂ ᐊᒻᒪᓗ ᐃᒡᓗᓕᕆᔨᕐᔪᐊᒃᑯᑦ ᑯᐊᐳᕇᓴᙵᓄᑦ.
ᑕᒪᑦᑕ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᑲᒪᖏᔭᖃᕐᓂᐊᕐᓂᕋᖅᓯᒪᔪᑦ ᓴᓇᓗᑎᑦ ᓄᑖᕐᓂᒃ ᐊᖏᕐᕋᑦᓴᓂᒃ ᑕᒪᐃᓐᓂ ᕿᑭᖅᑖᓗᒻᒥ ᓄᓇᓕᐅᔪᓂ 2030 ᐊᓂᒍᓚᐅᖅᑎᓐᓇᒍ.
ᐅᑕᖅᑭᓗᑎᑦ ᑐᓴᕋᑦᓴᓂᒃ ᓴᖅᑭᓛᖅᑐᓂᒃ
ᐱᓇᓱᐊᕈᓯᐅᓂᐊᖅᑐᓂᒃ ᐊᒡᒋᖅᑐᓂ, ᑲᑐᔾᔨᓛᖅᑐᒍᑦ ᑐᑭᓯᒋᐊᕈᑎᒃᑲᓐᓂᕐᓂᒃ ᐃᒡᓗᓕᕆᓂᑦᑎᓐᓂ ᕿᑭᖅᑖᓗᒻᒥᐅᑦ ᐃᓄᒻᒪᕆᖏᖕᓄᑦ. ᖃᐅᔨᒋᐊᖃᑦᑕᕐᓗᒍ ᕙᐃᔅᕗᒃ−ᕗᑦ ᒪᑉᐱᒐᖓ ᐊᒻᒪᓗ ᐃᑭᐊᖅᑭᕕᕗᑦ ᖃᐅᔨᒃᑲᓐᓂᖁᓪᓗᑎᑦ.
