ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑯᕕᐊᓱᒍᑎᖃᕐᒃᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒪᑕᒪᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ ᐊᒻᒪᓗ ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᐊᒻᒪᓗ ᖃᕋᓴᐅᔭᒃᑯᑦ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᕐᑐᓂᒃ ᐅᖃᓯᖃᕐᐸᓚᐅᕐᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᕐᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᐃᓄᑭ ᐃᖅᑭᑦᑐᖅ – ᑲᑎᒪᔨ, 1990ᖏᓐᓂ
1990ᓂᑦ ᐃᓄᑭ ᐃᖅᑭᑦᑐᖅ ᑲᑎᒪᔨᐅᓚᐅᖅᑐᖅ ᓯᑕᒪᓄᑦ ᐊᕐᕌᒍᓄᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ, ᒪᓕᒐᓕᐅᖅᑎᙳᓚᐅᙱᑎᓪᓗᒍ ᐊᒥᑦᑐᕐᒧᑦ. ᑲᑎᒪᔨᐅᓂᕆᓚᐅᖅᑕᖓ ᕿᑭᖅᑕᓃᒃᑯᓐᓂ ᐃᓱᒪᒋᓪᓗᓂᐅᒃ ᐃᖅᑲᐅᒪᔪᖅ ᑎᒥᐅᔪᖅ ᐱᕈᖅᐸᓪᓕᐊᓂᕆᓚᐅᖅᑕᖓᓂᑦ ᐊᒻᒪᓗ ᐊᒃᓱᕈᓐᓇᖅᑐᒃᑰᖃᑦᑕᕐᓂᖏᓐᓂᑦ, ᑖᓐᓇ ᑎᒥᐅᔪᖅ ᓱᓕ ᓄᑖᐸᓘᓚᐅᖅᑎᓪᓗᒍ ᐊᒻᒪᓗ ᓴᓇᔭᐅᕙᓪᓕᐊᓪᓗᓂ ᑐᙵᕕᒋᔭᐅᓂᐊᖅᑐᓂᑦ.
ᐃᓄᑭ ᐅᖃᖅᑐᖅ ᐱᒻᒪᕆᐊᓗᖕᓂ ᐱᓕᕆᐊᒃᓴᑦ ᐱᒋᐊᖅᑕᐅᓯᒪᓕᕐᓂᖏᑦ ᕿᑭᖅᑕᓃᒃᑯᑦ ᑎᒥᙳᓵᐸᓗᒃᑎᓪᓗᒋᑦ, ᐊᒻᒪᓗ ᐱᙳᖅᑎᑦᑎᓪᓗᑎᒃ ᕿᑭᖅᑖᓗᒃ ᑯᐊᐸᕇᓴᒃᑯᓐᓂ, ᕿᑭᖅᑕᓃᒃᑯᑦ ᐱᕙᓪᓕᐊᔪᓕᕆᔨᒋᓂᐊᖅᑕᖓᓄᑦ, ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᖏᓐᓂᓗ ᐱᓕᕆᐊᒃᓴᖃᕐᓂᐊᖅᖢᑎᒃ ᐃᓕᓐᓂᐊᖅᑎᑦᑎᓂᕐᒥᒃ ᐃᖅᑲᓇᐃᔭᖅᑐᓕᕆᓂᕐᒥᒃ ᐊᒻᒪᓗ ᓇᖕᒥᓂᓕᕆᓂᕐᒧᑦ ᐃᑲᔫᑎᒃᓴᖃᖅᑎᑦᑎᓪᓗᑎᒃ ᐃᓄᖕᓄᑦ.
ᐃᖅᑲᐅᒪᔪᖅ ᑲᑎᒪᑎᓪᓗᒋᑦ − ᐱᓗᐊᖅᑐᒥᒃ ᐊᕐᕌᒍᑕᒫᖅᓯᐅᑎᓂᒃ ᑲᑎᒪᑎᓪᓗᒋᑦ − ᑲᑎᒪᔾᔪᑎᒃᓴᑦ ᐅᓄᖃᑦᑕᓚᐅᖅᑐᑦ, ᑭᒡᒐᖅᑐᐃᔨᑕᖃᖃᑦᑕᖅᖢᓂ ᐊᔾᔨᒌᙱᑦᑐᓂᙶᖅᑐᓂᑦ ᒐᕙᒪᒃᑯᓐᓂᑦ ᐃᓄᐃᑦ ᑎᒥᖁᑎᖏᓐᓂᓗ ᐅᖃᕆᐊᖅᑐᖃᑦᑕᖅᖢᑎᒃ ᐊᒻᒪᓗ ᐊᐱᖅᑯᑎᖏᔭᐅᔪᓂᑦ ᑭᐅᖃᑦᑕᖅᖢᑎᒃ. ᑕᐃᔅᓱᒪᓂ, ᕿᑭᖅᑕᓃᒃᑯᑦ ᐊᑐᐊᒐᖃᑦᑎᐊᓚᐅᙱᒻᒪᑕ, ᐱᖃᓯᐅᑎᓗᒋᑦ ᑲᑎᒪᔩᑦ ᐃᓕᖅᑯᓯᕆᒋᐊᖃᖅᑕᖏᓐᓂᑦ, ᐊᒻᒪᓗ ᑮᓇᐅᔭᐃᑦ ᒥᒃᓵᓄᑦ ᐊᔪᕐᓇᖃᑦᑕᓚᐅᖅᑐᖅ ᐱᑕᖃᑦᑎᐊᙱᓐᓂᑯᖏᓐᓂᑦ. ᑕᒪᒃᑯᐊᖑᒐᓗᐊᖅᑎᓪᓗᒋᑦ, ᐃᓄᑭ ᐅᖃᖅᑐᖅ ᖁᕕᐊᓇᓚᐅᖅᑐᖅ ᑭᒡᒐᖅᑐᖅᖢᒋᑦ ᐃᓄᐃᑦ ᐊᒻᒪᓗ ᓴᐳᔾᔨᓗᒋᑦ ᐱᔪᓐᓇᐅᑎᖏᑦ ᐱᔪᒪᔭᖏᓪᓗ.
ᐃᓄᑭ ᐊᑕᐅᓯᕐᒥ ᐃᖅᑲᐅᒪᓗᐊᖅᑐᖅ ᓱᕐᓗ ᕿᑭᖅᑕᓃᒃᑯᑦ ᐅᐸᒃᑕᐅᓚᐅᖅᓯᒪᓂᖏᑦ ᑲᑎᕕᒃ ᒐᕙᒪᖓᓄᑦ ᑐᒃᓯᕋᐅᑎᓕᔭᖅᖢᑎᒃ ᓂᐅᕕᕈᒪᓪᓗᑎᒃ ᕘᔅᑦ ᐃᐊᒃᑯᓐᓂ. ᑖᓐᓇ ᐃᓱᒪᒋᔭᐅᔪᖅ ᑲᔪᓯᑎᑕᐅᔪᓐᓇᓚᐅᙱᑦᑐᖅ ᑮᓇᐅᔭᑭᓪᓕᐅᕐᓂᖏᓐᓂᑦ ᑕᐃᔅᓱᒪᓂ. ᐅᐱᒍᓱᐃᓐᓇᖅᑐᖅ ᑕᐃᒃᑯᐊ ᑲᑎᒪᔨᐅᒋᐊᕐᖓᓚᐅᖅᑐᑦ ᓴᙱᔪᓂᒃ ᑐᙵᕕᓕᐅᓚᐅᖅᓯᒪᓂᖏᓐᓂᑦ ᐃᓄᖕᓂᒃ ᐱᕕᖃᖅᑎᑦᑎᓂᐊᖅᑐᒥᒃ ᐃᑲᔫᓯᐊᖅᑖᕐᕕᒋᔪᓐᓇᕐᓗᒋᑦ ᑕᐃᒃᑯᐊ ᐱᓕᕆᐊᖑᓚᐅᖅᑐᑦ.
ᓇᓗᓇᐃᖅᑐᖅ ᓂᖏᖅᑕᐅᔪᑦ ᐅᔭᕋᕐᓂᐊᕐᕕᖕᓂᑦ ᐊᖏᕈᑎᓂᙶᖅᑐᓂᑦ, ᐱᕈᖅᓯᒪᓂᖏᑦ ᕿᑭᖅᑕᓃᒃᑯᑦ ᐱᓕᕆᐊᒃᓴᖏᑦ, ᐊᒻᒪᓗ ᓴᙱᓂᖅᓴᐅᓕᖅᖢᓂ ᓯᕗᒧᐊᖅᑎᑕᐅᓂᖓ ᐃᓄᐃᑦ ᖃᐅᔨᒪᔭᑐᖃᖏᑦ ᐆᒃᑑᑎᒋᓪᓗᒋᑦ ᖃᓄᖅ ᕿᑭᖅᑕᓃᒃᑯᑦ ᐱᕈᖅᐸᓪᓕᐊᖏᓐᓇᕐᓂᖓᓄᑦ ᐊᒻᒪᓗ ᐋᖅᑭᒃᐸᓪᓕᐊᓂᖓᓂᒃ. ᐃᓄᑭ ᐅᖃᖅᑐᖅ ᐃᓄᐃᑦ ᐃᓕᖅᑯᓯᖓ ᐅᖃᐅᓯᖓᓗ ᓴᐳᔾᔭᐅᓯᒪᒋᐊᖃᕐᒪᑕ, ᐱᓗᐊᖅᑐᒥᒃ ᐊᓯᓂᙶᖅᑐᑦ ᑕᒪᐅᙵᖅᐸᓪᓕᐊᓕᖅᑎᓪᓗᒋᑦ. ᐅᒃᐱᕈᓱᒃᑐᖅ ᕿᑭᖅᑕᓃᒃᑯᑦ ᐱᒻᒪᕆᐅᔪᒥᒃ ᐱᓕᕆᐊᒃᓴᖃᕐᒪᑕ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗᓂ ᓴᙱᔫᖏᓐᓇᖁᓪᓗᒋᑦ ᓯᕗᓂᒃᓴᓄᑦ ᑭᖑᕚᕇᓄᓪᓗ.
“ᐅᐱᒋᓪᓚᕆᒃᑕᒃᑲ ᐱᓕᕆᐊᖑᔪᓄᑦ ᕿᑭᖅᑕᓃᒃᑯᓐᓄᑦ ᐊᒻᒪᓗ ᑲᔪᓯᑎᑦᑎᓪᓗᑎᒃ ᐃᑲᔫᓯᐊᒃᓴᖃᖅᑎᑦᑎᓂᕐᒥᒃ ᐃᓄᖕᓂ”. “ᐃᓕᖅᑯᓯᖅ ᐊᓯᐅᒋᐊᖃᙱᑦᑐᖅ. ᐃᓄᐃᑦ ᐊᒃᓱᕈᕆᐊᓖᑦ ᐅᖃᐅᓯᕗᑦ ᐱᐅᓯᕗᓪᓗ ᐆᒪᑎᑕᐅᖏᓐᓇᕐᓗᑎᒃ − ᕿᑭᖅᑕᓃᒃᑯᑦ ᑕᒪᑐᒥᖓ ᐃᑲᔪᖃᑕᐅᓪᓗᑎᒃ.”
