ᐃᖃᓗᐃᑦ, ᓄᓇᕗᑦ – ᒪᐃ 9, 2025- ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᑭᙴᒪᑦᑎᒻᒪᑕ ᑲᑎᒪᔨᐅᖃᑕᐅᒍᒪᒐᔭᖅᑐᓂᑦ ᐃᓄᓐᓂᑦ ᑎᓴᒪᓂᑦ−ᐊᕐᕌᒍᓂᑦ ᑲᑎᒪᔨᐅᖃᑕᐅᒐᔭᖅᑐᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᕐᓄᑦ (CLARC).
ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᐃᓚᒋᔭᐅᒻᒪᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᓇᓕᓐᓃᑦᑐᓂᑦ ᑐᑭᑖᕈᑎᖃᕐᐸᑦᑐᓂᑦ ᐋᖅᑭᓯᒪᓂᖃᖅᑐᑎᒃ ᐊᒻᒪᓗ ᑖᒃᑯᐊ ᐊᐅᓚᓂᖃᕐᐸᑦᑐᑦ ᐊᑐᓂᑦ ᕿᑭᖅᑕᓂ ᓄᓇᓕᓐᓂᑦ. ᐃᑲᔪᕐᐸᑦᑐᑦ ᐱᔨᑦᑎᕋᐅᑎᖃᖃᑦᑕᓂᕐᒥᒃ ᐱᓕᕆᐊᓂᑦ ᐃᑲᔫᑎᓂᑦ ᑮᓇᐅᔭᖅᑖᖅᑎᑕᐅᓯᒪᔪᓂᑦ ᕿᑭᖅᑕᓂᒃᑯᑦ ᑮᓇᐅᔭᓄᑦ ᐃᓯᕐᐸᑦᑐᓄᑦ ᓴᓂᕐᕙᐃᖃᑦᑕᓂᕐᒧᑦ ᐊᑐᐊᒐᖅᑎᒍᑦ, ᐃᓚᒋᔭᐅᓪᓗᑎᒃ ᓄᓇᓕᓐᓂᑦ ᐊᑐᕋᔅᓴᐃᑦ ᐊᒻᒪᓗ ᐱᓇᓱᐊᕋᔅᓴᐃᑦ ᐃᑲᔫᓯᐊᔅᓴᑦ, ᐊᒻᒪᓗ ᓄᓇᓕᓐᓂᑦ ᑕᓯᐅᖅᑎᒋᔭᐅᕙᑦᑐᑎᒃ ᐱᔾᔪᑎᒋᓪᓗᒋᑦ ᓄᓇᐃᑦ, ᓴᐳᔾᔨᕖᑦ, ᐊᒻᒪᓗ ᓇᐅᑦᑎᕐᓱᖃᑦᑕᓂᕐᒧᑦ ᐱᔾᔪᑕᐅᕙᑦᑐᑦ. ᐊᑐᓂᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᑐᑭᒧᐊᑦᑎᑕᐅᕙᑦᑐᑦ ᕿᑭᖅᑕᓂᒃᑯᓐᓂᑦ ᓄᓇᓕᓐᓂᑦ ᑲᑎᒪᔨᖏᓐᓄᑦ, ᑲᑎᒪᔨᖃᕐᐸᑦᑐᑎᒃ ᑎᓕᔭᐅᓯᒪᔪᓂᑦ Hᐊᒪᓚᒃᑯᓐᓂᑦ ᐆᒪᔪᕐᓂᐊᑎᒃᑯᓂᓪᓗ, ᑕᒪᕐᒥᒃ ᓄᓇᓖᑦ ᑲᑎᒪᔨᐅᖃᑕᐅᔪᑦ ᑭᒡᒐᖅᑐᐃᕙᑦᑐᑦ ᐃᓐᓇᕆᔭᐅᔪᓂᑦ, ᐃᓅᓱᑦᑐᓂᑦ, ᐊᕐᓇᓂᑦ ᐊᒻᒪᓗ ᐃᓄᓕᒫᓂᑦ.
ᑲᒪᒋᔭᔅᓴᒫᖃᕐᐸᑦᑐᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᒪᑯᓂᖓ:
- ᐃᓚᒋᔭᐅᖃᑦᑕᓂᕐᒥᒃ ᑲᑎᒪᓂᖏᓐᓂᑦ, ᖃᑦᑏᓐᓇᐅᓂᕐᐹᕆᔪᓐᓇᖅᑐᒋᑦ ᑎᓴᒪᐃᕋᖅᑐᑎᒃ ᑲᑎᒪᖃᑦᑕᓲᑦ ᐊᕐᕌᒍᑕᒫᑦ, ᑲᑎᒪᒍᑎᖃᖃᑦᑕᓂᐊᕐᖓᑕ ᑐᑭᑖᕈᑎᖃᖃᑦᑕᕐᓗᑎᓪᓗ ᓄᓇᓕᓐᓄᑦ ᑐᓂᔭᐅᓯᒪᔪᓂᑦ.
- ᕿᒥᕐᕈᖃᑦᑕᓂᐊᕐᖓᑕ ᑐᔅᓯᕋᐅᑎᓂᑦ ᐃᓯᕈᒪᔪᖃᖅᑎᓪᓗᒍ ᖃᓂᒋᔭᖏᓐᓄᑦ ᐃᓄᐃᑦ ᓄᓇᖁᑎᖏᑕ.
- ᕿᒥᕐᕈᖃᑦᑕᓂᕐᒧᑦ ᑮᓇᐅᔭᓂᑦ ᑐᔅᓯᕋᐅᑎᓂᑦ ᐅᕝᕙᓘᓐᓃᑦ ᓄᓇᓖᑦ ᑭᙴᒪᒋᕙᑦᑕᖏᓐᓂᒃ ᐱᔾᔪᑎᓕᓐᓂᑦ ᕿᑭᖅᑕᓂᒃᑯᑦ ᐱᓕᕆᐊᕆᕙᑦᑕᖏᓐᓂᒃ.
- ᐃᑲᔪᖃᑦᑕᓂᕐᒥᒃ ᑐᑭᓯᓇᑦᑎᐊᕐᓗᑎᒃ, ᓈᒻᒪᑦᑐᒥᒃ, ᐊᒻᒪᓗ ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᑐᑭᑖᕈᑎᖃᕐᐸᑦᑐᑎᒃ ᓄᓇᖓᓐᓂ..
ᐱᖃᑕᐅᔪᒪᔪᑦ, ᐱᓇᓱᑦᑐᑦ ᐃᒪᐃᑦᑑᔭᕆᐊᓖᑦ:
- ᐃᓅᓗᑎᑦ ᐊᑎᓕᐅᖅᑕᐅᓯᒪᓗᑎᑦ ᓄᓇᕗᑦ ᐊᖏᖃᑎᒌᒍᑎᖏᓐᓂ ᐊᒻᒪᓗ ᓄᓇᖃᕐᓗᑎᑦ ᓄᓇᓕᓐᓂᑦ ᑭᒡᒐᖅᑐᐃᕕᒋᔪᒪᔭᕐᓂᒃ.
- ᐊᖏᕐᓯᒪᑦᑎᐊᕐᓗᑎᑦ ᐃᓚᒋᔭᐅᖃᑦᑕᓂᐊᕐᓂᕋᕐᓗᑎᑦ ᓄᓇᓕᓐᓂᑦ ᑲᑎᒪᓕᕋᐃᑉᐸᑕ ᐊᒻᒪᓗ ᑐᑭᑖᕈᑎᖃᕐᓂᐊᓕᕋᐃᑉᐸᑕ.
- ᐊᖏᕐᓯᒪᓗᑎᑦ ᑐᑭᓯᕙᓪᓕᐊᓂᐊᕐᓂᕋᕐᓗᑎᑦ ᕿᑭᖅᑕᓂᒃᑯᑦ ᐊᑐᐊᒐᖏᓐᓂᒃ, ᐃᓄᐃᑦ ᐱᔪᓐᓇᐅᑎᖏᑕ ᒥᔅᓵᓄᑦ, ᐊᒻᒪᓗ ᕿᑭᖅᑕᓂ ᐱᓕᕆᐊᖑᕙᑦᑐᑦ ᒥᔅᓵᓄᑦ.
- ᓇᒻᒥᓂᕐᓱᕐᓗᑎᑦ, ᐃᓚᐃᓐᓈᖃᑦᑕᖏᓪᓗᑎᑦ ᐊᒻᒪᓗ ᑭᒡᒐᖅᑐᐃᔪᓐᓇᕐᓗᑎᑦ ᑭᙴᒪᒋᕙᑦᑕᖏᑦ ᐃᓄᓕᒫᑦ ᐱᔾᔪᑎᒋᓪᓗᖏ ᓄᓇᔅᓯᓐᓂ.
ᐃᓕᓐᓂᐊᖅᑎᑕᐅᒐᔭᖅᑐᑎᑦ ᑐᑭᓯᑎᑕᐅᓗᑎᓪᓗ ᕿᑭᖅᑕᓂᒃᑯᓐᓂᑦ. ᐊᒻᒪᓗᑦᑕᐅᖅ, ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᑲᑎᒪᔾᔪᓯᐊᖅᑖᖃᑦᑕᓲᖑᒻᒥᔪᑦ ᑲᑎᒪᖃᑕᐅᒥᓂᐅᑎᓪᓗᒋᑦ. ᐊᑭᓕᖅᑕᐅᓲᑦ ᐊᑐᓂᑦ ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᐊᔾᔨᒌᓂᑦ ᐊᒻᒪᓗ ᐃᒫᒃ ᐋᖅᑭᓯᒪᓪᓗᑎᒃ:
ᐅᓪᓘᑉ ᓇᑉᐸᖓᓂ – $250.00 ᐅᓪᓗᓕᒫᖅ – $550.00
ᐱᓇᓲᑎᓂᑦ ᑎᑎᕋᕐᕕᔅᓴᓂᑦ ᐱᔪᒪᒍᕕᑦ, ᐅᕝᕙᓘᓐᓃᑦ ᑐᑭᓯᑦᑎᐊᑲᓐᓂᕈᒪᒍᕕᑦ ᐃᓐᓄᒋᐊᓖᑦ ᒥᔅᓵᓄᑦ ᓄᓇᔅᓯᓐᓂ ᐊᑏ ᐅᖃᕐᕕᒋᓂᐊᖅᑲᑦ ᓄᓇᔅᓯᓐᓂ ᑐᓴᐅᒪᑎᑦᑎᔨᓯ (CLO).
ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕈᒪᒍᕕᑦ, ᑐᑭᓯᒋᐊᕐᕕᒋᓗᒍ: ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥᓪᓗ ᐊᑭᖃᙱᑐᒃᑯᑦ 1.800.667.2742
ᓄᓇᓕᓐᓂᑦ ᓄᓇᓕᕆᓂᕐᒧᑦ ᑲᑎᒪᔨᕋᓛᑦ ᒥᔅᓵᓄᑦ ᑐᑭᓯᒋᐊᕈᒪᒍᕕᑦ, ᑐᑭᓯᒋᐊᕐᕕᒋᓗᒍ:
Hᐃᓚᓐ−ᕉᔅ ᓱᓗᕋᔪᒃ−ᐃᙵᓚᓐ
ᐅᖃᐅᔾᔨᒋᐊᖅᑎᓪᓗᐊᑕᖅ, ᑮᓇᐅᔭᓄᑦ ᐃᓯᕐᐸᑦᑐᓄᑦ ᓴᓂᕐᕙᖅᑕᐅᓯᒪᔪᑦ ᒥᔅᓵᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8363 ᐅᖓᓯᑦᑐᒥᓪᓗ ᐊᑭᖃᙱᑐᒃᑯᑦ 1.800.667.2742
hsulurayok-england@qia.ca
