ᖁᔭᓐᓇᒦᒃ ᒥᑦᑎᒪᑕᓖᒃ!
ᓯᑉᑎᒻᒪ 25ᖑᑎᓪᓗᒍ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᑐᓐᖓᓱᑦᑎᑦᓯᓚᐅᕐᖓᑕ ᒪᑐᐃᖅᓯᓂᖏᓐᓂ ᖃᐅᔨᓴᕐᕕᑦᓴᒥᖕ ᐱᓕᒻᒪᑦᓴᐃᕕᑦᓴᒥᓪᓗ ᒥᑦᑎᒪᑕᓕᖕᒥ. ᖃᐅᔨᓴᕐᕕᒃ ᐱᓕᒻᒪᑦᓴᕐᕕᓪᓗ ᓄᑖᓂᖕ ᐱᓇᓱᕝᕕᖃᕐᓂᐊᓕᕐᖓᑕ ᐃᓄᓐᓄᑦ ᓄᓇᕗᒻᒥᐅᓄᑦ ᐃᓕᓐᓂᐊᕐᓂᒃᑯᑦ, ᐱᓕᒻᒪᑦᓴᕐᓂᒃᑯᑦ ᐊᒻᒪ ᐊᔪᕈᕐᓃᖅᓴᕐᑕᐅᓂᒃᑯᑦ ᐊᖏᕐᕋᒥᓄᑦ ᖃᓂᓐᓂᖅᓴᐅᓗᑎᖕ.
“ᖃᐅᔨᓴᕐᕕᒃ ᐱᓕᒻᒪᑦᓴᕐᕕᓪᓗ ᐃᓪᓗᑐᐃᓐᓇᐅᖏᒻᒪᓐ. ᐱᓇᓱᕝᕕᑦᓴᐅᓂᐊᕐᖓᑦ − ᐃᓄᓐᓄᑦ ᐃᓕᓐᓂᐊᕐᕕᐅᓗᓂ, ᐊᔪᕈᕐᓃᓴᕐᕕᐅᓗᓂ, ᖃᐅᔨᓴᕐᕕᐅᓗᓂ ᐊᒻᒪ ᓄᑖᓂᖕ ᓴᓇᒍᒥᓇᕐᑐᓂᒃ ᖃᓄᖅᑑᕈᓐᓇᕐᓯᓪᓗᑎᖕ ᐊᖏᕐᕋᒥᓄᑦ ᖃᓂᓐᓂᖅᓴᐅᒻᒪᕆᑦᑐᑎᖕ.”
– ᐅᓛᔪᒃ ᐊᑭᓱᒃ, ᐊᖏᔪᖅᑳᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ
ᕿᑭᖅᑕᓃᒃᑯᑦ ᐃᓕᑕᕐᓯᔪᒪᕗᑦ ᑲᑐᔾᔨᖃᑎᒌᓂᑦ ᐃᓄᓐᓂᓪᓗ ᐃᑲᔪᓚᐅᕐᑐᓂᑦ ᓴᓇᖃᑕᐅᓂᒃᑯᑦ ᐊᒻᒪ ᐃᑲᔫᑎᑦᓴᒃᑯᑦ ᖃᐅᔨᓴᒃᕕᒃ ᐱᓕᒻᒪᑦᓴᕐᕕᓪᓗ ᒪᑐᐃᖅᑕᐅᓕᕐᑎᓪᓗᒍ, ᐃᓚᒋᔭᐅᓪᓗᑎᖕ ᓴᐅᓂᖅ ᑐᔪᕐᒥᕕᒃ, ᒥᑦᑎᒪᑕᓕᐅᑉ ᕼᐋᒪᓚᖓᑦ, ᒥᑦᑎᒪᑕᓕᖕᒥ ᐊᖑᓇᓱᑦᑐᓕᕆᔩᑦ ᑲᑐᔾᔨᖃᑎᒌᖏᑦ. ᑕᐃᒃᑯᐊᓗ ᓂᖅᑎᐅᓚᐅᖅᑐᑦ ᐃᓄᐃᑦ ᓂᕿᖏᓐᓂᑦ ᐊᒻᒪ ᓂᕆᕕᔾᔪᐊᕐᑎᑦᓯᔪᑦ, ᓂᖅᑎᐅᓚᐅᕐᑐᓪᓗ ᐸᓚᐅᒐᔾᔨᐅᕐᑐᑦ ᓰᕐᓇᕐᑐᓂᓪᓗ ᑕᒧᓗᒐᑦᓴᓕᐅᕐᑐᑦ, ᐱᐅᔫᑎᐊᓗᖕᓂᑦ ᐊᒡᒐᒧᑦ ᓴᓇᐅᒐᕐᓂᑦ ᓵᓚᖃᐅᓯᐊᑦᓴᓂᑦ, ᐃᑲᔪᓚᐅᕐᑐᑦ ᐃᓂᓪᓚᑦᓴᕆᐊᓕᓐᓄᑦ ᖃᓂᓐᖒᑎᓂᓪᓗ ᓂᐱᖃᐅᑎᓂᑦ, ᐊᒻᒪ ᑕᑯᑦᓴᐅᖏᑦᑐᒃᑯᑦ ᐃᑲᔪᓐᖑᐊᑕᕐᓯᓇᕐᑐᑦ − ᐃᑲᔪᓚᐅᕋᑦᓯ ᓄᓇᖅᑲᑎᒌᓃᓐᖔᓚᑦᑖᖅᑐᓂ ᖁᕕᐊᓱᖃᑎᒌᑎᑦᓯᓪᓗᓯ.
ᖁᔭᓐᓇᒦᓪᓚᕆᑦᑕᕗᑦ ᕿᑭᖅᑕᓃᒃᑯᑦ ᑲᑐᔾᔨᖃᑎᒋᕙᑦᑕᖏᑦ ᐃᑲᔪᓐᖑᐊᑕᕐᓯᓐᓇᓚᐅᕐᖓᑕ: ᓄᓇᕗᒥ ᓯᓚᑦᑐᖅᓴᕐᕕᒃ, ᒥᓂᔅᑕ ᑕᐃᕕᑦ ᐊᕿᐊᕈᖅ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ, ᕿᑭᖅᑖᓗᖕᒥ ᐅᔭᕋᓐᓂᐊᕐᑎᒃᑯᑦ ᕚᐱᓐᓛᓐ, ᐊᒻᒪ ᑳᓐᓄᐊ ᐅᑭᐅᖅᑕᖅᑐᓕᕆᔨᖏᑦ.
ᖁᔭᓐᓇᒦᕆᕙᕗᑦ ᕿᑭᖅᑖᓗᖕᒥ ᓴᓇᔩᑦ ᓕᒥᑎᑦ (QIL) ᑐᓂᓯᓐᖑᐊᑕᕐᓯᓐᓇᓚᐅᕐᖓᑕ ᐃᑲᔫᑎᖏᓐᓂᖕ ᒪᕐᕉᓐᓂᒃ ᑲᓇᐃᑎᐊᓐ ᓄᐊᑦᑯᑎᒍᑦ ᖃᖓᑦᑕᐅᑏᓐᓂᒃ ᒪᑐᐃᖅᓯᓕᕈᑦᑕ ᓵᓚᖃᐅᓯᐊᑦᓵᓐᓂᖕ, ᐊᒻᒪ ᐃᑲᔪᐃᓐᓇᕐᓂᖏᓐᓄᑦ ᖃᐅᔨᓴᒃᕕᒃ ᐱᓕᒻᒪᑦᓴᕐᕕᓪᓗ ᓴᓇᔭᐅᓂᖓᓂ ᐱᔨᑦᓯᕐᓯᒪᓂᖏᓐᓄᑦ. ᑰᖃᕐᕕᒻᒥᐅᑦ ᓴᓗᒻᒪᖅᓴᐃᔩᓪᓗ ᐅᐊᑦᑎᖏᓪᓗ ᐊᒻᒪ ᖃᐅᑕᒫᑦᓯᐊᑦ ᐊᐅᓚᑦᑎᕙᑦᑐᑦ, ᕿᑭᖅᑖᓗᖕᒥ ᓴᓇᔩᑦ ᓕᒥᑎᑦ ᐃᑲᔪᕐᓯᒪᓂᖏᓐᓄᑦ ᑲᔪᓯᑎᑦᓯᓯᐊᓚᖓᒻᒪᑕ ᖃᐅᔨᓴᕐᕕᒃ ᐱᓕᒻᒪᑦᓴᕐᕕᓪᓗ ᐸᖅᑭᔭᐅᑦᓯᐊᕐᓂᖓᓄᑦ ᒫᓐᓇ ᐊᒻᒪ ᓯᕗᓂᑦᑎᓐᓂ ᐃᓕᓐᓂᐊᕐᑎᑕᐅᔪᒫᕐᑐᓂᑦ.
ᖁᔭᓐᓇᒦᒻᒪᕆᐊᓗᒃ ᓇᑖᓴ ᒪᑉᓕᒃ−ᓴᐃᒨᓂ, ᐅᖃᖅᑎᒋᓚᐅᕐᑕᕗᑦ ᑐᓐᖓᓱᑦᑎᑦᓯᔨ, ᖁᕕᐊᓱᖃᑎᒌᑦᑎᓪᓗᑕ ᐃᖏᕐᕋᑎᑦᓰᓐᓇᕐᑐᓂ ᐊᒻᒪ ᑐᓐᖓᓇᕐᓂᖓᓄᑦ ᐊᑲᕐᕆᔮᖅᑎᑎᓪᓗᓂ ᐅᓪᓗᓕᒫᖅ ᐊᒻᒪ ᒥᐊᓕ ᒪᒃᐸ ᖁᓪᓕᕐᒥ ᐃᑯᒻᒪᑦᓴᓚᐅᕐᓂᖓᓄᑦ, ᐊᑦᓱᐊᓗᖕ ᑐᑦᑖᕈᑎᒋᑦᓯᐊᓚᐅᕐᒪᒍ ᐱᒋᐊᕈᑎᒋᓪᓗᑎᒍ ᒪᑐᐃᖅᓯᓂᑦᑎᓐᓂ.
ᖁᔭᓕᒻᒥᔪᒍᑦ ᑕᐃᒃᑯᐊ ᐊᔪᓐᖏᑦᑐᐊᓗᐃᑦ ᐱᖃᑕᐅᔪᓐᓇᓚᐅᕐᖓᑕ, ᐃᓚᒋᔭᐅᓪᓗᑎᖕ ᑎᐅᕆ ᐃᔨᕋᖅ ᐊᒻᒪ ᐋᓕᓐ ᑲᖑᒃ, ᐊᒻᒪ ᐱᖃᑕᐅᓚᐅᕐᑐᑦ ᐱᓐᖑᐊᕐᑎᑦᓯᑎᓪᓗᒋᑦ ᐃᓕᖅᑯᓯᑐᖃᒃᑯᑦ ᐊᒻᒪ ᓂᔾᔭᐅᓯᔭᕐᑐᑦ ᖁᕕᐊᓲᑎᖃᕐᓂᑎᓐᓂ.
ᓯᓂᑦᓴᔭᐅᔭᒥᑦ ᒪᑐᐃᖅᓯᔾᔪᑎᒥᖕ ᑭᐱᓯᒐᒥ ᐊᒻᒪ ᖃᐅᔨᓴᕐᕕᒃ ᐱᓕᒻᒪᑦᓴᕐᕕᓪᓗ ᒪᑐᐃᖓᓕᖅᐳᖅ. ᖃᐅᔨᖃᑦᑕᕈᒪᓂᐊᕐᓕᕐᑐᒍᑦ ᐃᓕᓐᓂᐊᕐᑐᓂᑦ, ᐱᓕᒻᒪᑦᓴᕐᑐᓂᑦ ᖃᐅᔨᓴᕐᑐᓂᑦ ᐊᒻᒪ ᐱᓇᓱᐊᖃᑕᐅᔪᓂᑦ ᑖᒃᑯᐊ ᐃᓪᓗᕈᓯᖏᓐᓂ − ᐊᑦᑐᐃᓂᖃᕐᓂᐊᕐᓂᖓ ᐃᓕᓐᓂᐊᕐᓂᑎᓂᑦ, ᐃᓚᒌᓂᑦ ᓄᓇᕗᒥᐅᓪᓗ ᓄᓇᖏᓐᓂᑦ ᐊᕐᕌᒍᓂᑦ ᐊᒡᒋᕐᑐᓂᑦ.
