ᕿᑭᖅᑕᓃᒃᑯᑦ ᑐᓂᔭᐅᒍᒪᓕᕐᒥᔪᑦ ᑐᑦᓯᕋᐅᑎᓂᑦ 2026-2027 ᓯᓚᑦᑐᖅᓴᕐᕕᓐᓄᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᓂ
ᐃᖃᓗᐃᑦ, ᓄᓇᕗᑦ – ᐊᒡᒌᓯ 7, 2026 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᑦᑐᑎ ᑐᓴᖅᑎᑦᓯᕗᑦ ᑐᑦᓯᕋᐅᑎᓕᐅᕈᑏᑦ ᒪᑐᐃᖓᓕᕐᒥᒻᒪᑕ 2026–2027 ᓯᓚᑦᑐᖅᓴᕐᕕᓐᓄᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᓄᑦ. ᐱᔪᓐᓇᕐᓂᓖᑦ ᐃᓕᓐᓂᐊᖅᑏᑦ ᑐᑦᓯᕋᕈᓐᓇᖅᑐᑦ ᕿᑭᖅᑕᓃᒃᑯᑦ ᐊᑕᐅᓯᕐᒨᖓᑎᑕᐅᔪᒥ, ᐱᔭᕆᐊᑭᓪᓕᑎᑕᐅᓯᒪᔪᖅ ᖃᕋᑕᐅᔭᒃᑯᑦ ᑐᑦᓯᕋᐅᑎᒥ ᑕᑕᑎᕆᓂᕐᒥ ᑕᒪᒃᑮᓐᓄᑦ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᖓᓄᑦ ᐊᒻᒪᓗ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᑦᓴᖓᓄᑦ.
ᑕᕝᕙᓂ ᐊᕐᕌᒍᒥ ᖁᕕᐊᓇᓪᓚᕆᑦᑐᒥ ᑎᑭᐅᑎᓯᒪᒐᑦᑕ: ᐊᕐᕌᒍᓂᑦ ᖁᓕᓂᑦ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᓂᒃ ᑐᓂᓯᖃᑦᑕᖅᓯᒪᓕᕐᖓᑕ − ᑮᓇᐅᔭᐃᔭᒃᑲᓐᓂᖅᓯᒪᔪᑦ ᐃᓄᐃᑦ ᐃᓕᓐᓂᐊᕐᓂᖏᓐᓄᑦ. ᑮᓇᐅᔭᑦ ᐊᑐᖅᑐᑦᓴᑦ ᐃᓚᒋᐊᖅᑕᐅᓯᒪᓪᓗᑎ, ᕿᑭᖅᑕᓃᒃᑯᑦ ᐅᐱᒍᓱᓪᓚᕆᑦᑐᑦ ᐃᑲᔪᒃᑲᓐᓂᕈᒪᓪᓗᑎ ᐃᓄᓐᓂᒃ ᐃᓕᓐᓂᐊᖅᑎᓂ. ᑲᑎᓪᓗᒋᑦ 150 ᐃᓕᓐᓂᐊᖅᑏᑦ ᑐᓂᔭᐅᓛᖅᑐᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᓂ ᑲᑎᓪᓗᒋᑦ $450,000, ᖄᒃᑲᓐᓂᐊᒍᑦ ᐊᕐᕌᒍᑕᒫᑦ $10,000 ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᑦᓴᖓᓄᑦ, ᐅᐱᒍᓱᓐᓂᖃᖅᑐᑦ ᔮᓐ ᐊᒪᕈᐊᓕᒃ ᓯᕗᓕᖅᑎᐅᖃᑕᐅᓂᖓᓂ ᓯᕗᒻᒧᐊᑎᑦᓯᓂᕐᒥ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᐅᓚᑦᓯᓂᕐᒥᓪᓗ ᓄᓇᕗᒻᒥ.
“ᑮᓇᐅᔭᖃᖅᑎᑦᓯᓂᖅᓴᐅᓂᕐᒥ ᐃᓄᐃᑦ ᐃᓕᓐᓂᐊᕐᓂᖏᓐᓄᑦ ᑮᓇᐅᔭᑦ ᐊᑐᖅᑐᑦᓴᑦ ᐃᓚᒋᐊᖅᑕᐅᓯᒪᓪᓗᑎ, ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᖏᑦ ᐃᑲᔪᕐᓂᐊᖅᑐᑦ ᐊᒥᓲᓂᖅᓴᓂ ᕿᑭᖅᑕᓂ ᐃᓕᓐᓂᐊᖅᑎᖏᓐᓂᒃ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕐᓂᖏᓐᓄᑦ.” ᐅᖃᖅᑐᖅ ᐊᖓᔪᖅᑳᖅ ᐅᓛᔪᒃ ᐊᑭᓱᒃ, “ᑖᒃᑯᐊ ᐃᓕᓐᓂᐊᕆᐊᒃᑲᓐᓂᕈᑎᑦᓴᑦ ᐱᔪᓐᓇᖅᑎᑦᓯᔪᑦ ᕿᑭᖅᑕᓂ ᐃᓄᐃᑦ ᐃᓕᓐᓂᐊᖅᑎᖏᑦ ᐊᑦᓱᕈᙱᓐᓂᖅᓴᐅᓗᑎ ᐃᓕᓐᓂᐊᕐᓂᕐᒧᑦ ᐊᑭᓕᒋᐊᖃᖅᑕᖏᓐᓂᒃ.”
ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᑦᓴᖏᑦ ᐊᑐᐃᓐᓇᐅᑎᑦᓯᔪᑦ 150ᓂᒃ ᑐᓂᖅᑯᓯᐊᕐᓂᒃ $3,000 ᐊᑐᓂ, ᑐᓂᐅᖅᑲᖅᑕᐅᓲᑦ ᓯᕗᓪᓕᖅᐹᒥ ᑕᑕᑎᖅᑳᖅᑐᓄᑦ ᐃᓄᓐᓄᑦ ᕿᑭᖅᑕᓂᕐᒥᐅᑕᐅᔪᓄᑦ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᕐᓂᐅᓴᔪᓄᑦ.
ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᑦᓴᖅ, ᐊᑭᖃᖅᑐᖅ $10,000, ᑐᓂᔭᐅᓛᖅᑐᖅ ᐃᓕᓐᓂᐊᖅᑐᒧᑦ ᐃᓕᓐᓂᐊᕐᓂᕆᔭᖓ ᐃᑲᔪᖅᓱᕐᓗᓂ ᐃᓄᐃᑦ ᐅᖃᐅᓯᖓᓂ ᐃᓕᖅᑯᓯᖓᓂᓪᓗ. ᑐᑦᓯᕋᖅᑐᑦ ᑐᓂᓯᖃᓯᐅᑎᒋᐊᓖᑦ 500ᓂᒃ ᐅᖃᐅᓯᓕᓐᓂᒃ ᐅᓂᒃᑳᓕᐅᕐᓗᑎᒃ ᖃᓄᖅ ᐱᔪᒪᓂᖏᑦ ᓴᖅᑭᓯᒪᒻᒪᖔᑕ ᔮᓐ ᐊᒪᕈᓕᒃ ᐱᔾᔪᑎᒋᓪᓗᒍ ᐊᒻᒪᓗ ᓄᓇᕗᑦ ᐊᖏᕈᑎᖓᑕ ᒥᑦᓵᓄᑦ.
ᐃᓕᓐᓂᐊᖅᑏᑦ ᑕᑕᑎᕆᒍᓐᓇᖅᑐᑦ ᖃᕋᑕᐅᔭᒃᑯᑦ ᐅᕙᓂ: https://www.qia.ca/scholarship-application/
ᐃᓕᓐᓂᐊᖅᑏᑦ ᐃᑲᔪᖅᑕᐅᒋᐊᖃᖅᑐᑦ ᑕᑕᑎᕆᓂᕐᒥ ᖃᕋᑕᐅᔭᒃᑯᑦ ᑐᑦᓯᕋᐅᑎᒥ, ᖃᐅᔨᒋᐊᕈᓐᓇᖅᑐᑦ ᓄᓇᓕᖓᓂ ᑐᓴᐅᒪᑎᑦᓯᔨᖓᓄᑦ ᐃᑲᔪᖅᑕᐅᓂᐊᕐᒪᑕ.
ᑐᑦᓯᕋᐅᑎᓄᑦ ᐃᓱᓕᕝᕕᑦᓴᖓ: ᐊᐃᑉᐱᖅ, ᐊᒡᒌᓯ 31, 2026.
ᐱᕙᓪᓕᐊᔪᓄᑦ ᑐᑭᓯᒋᐊᕐᓂᕐᒧᑦ, ᖃᐅᔨᒋᐊᕐᕕᒋᓗᒍ:
ᒫᑯᓯ ᖃᐅᓐᓂᖅ
ᑐᑭᒧᐊᑦᑎᑦᓯᔨᐅᑲᐃᓐᓇᖅᑐᖅ, ᑐᑭᒧᐊᒍᑎᑦᓴᓂᑦ ᑐᓴᐅᒪᑎᑦᓯᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑎ) 867.975.8413 ᐅᕝᕙᓘᓐᓃᑦ ᐊᑭᖃᙱᑦᑐᖅ 1.800.667.2742(ᐃᕐᖐᓐᓈᖅᑕᐅᑎ)
mqaunirq@qia.ca