ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᕿᑭᖅᑖᓗᖕᒥ ᑯᐊᐳᕆᓴᒃᑯᑦ ᐊᒻᒪ ᓄᓇᕗᑦ ᒐᕙᒪᖓ ᐱᒋᐊᖅᑎᑦᑎᕗᑦ ᓅᑎᕆᓂᕐᒧᑦ ᐱᓕᕆᔾᔪᓯᕐᒥᒃ ᕿᑭᖅᑕᕐᔪᐊᕐᒥ ᑐᓚᒃᑕᕐᕕᓕᐅᕐᓂᕐᒧᑦ
ᐃᖃᓗᐃᑦ, ᓄᓇᕗᑦ (ᓯᑎᐱᕆ 18, 2025) – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐊᒻᒪ ᕿᑭᖅᑖᓗᖕᒥ
ᑯᐊᐳᕇᓴᒃᑯᑦ (QC) ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᐸᕐᓇᐅᑎᓂᒃ ᑲᒪᒋᔭᖃᓕᕈᒪᓪᓗᑎᒃ ᐱᕙᓪᓕᐊᑎᑦᑎᓂᕐᒥᒃ
ᐅᒥᐊᕐᔪᐊᓄᑦ ᑐᓚᒃᑕᕐᕕᒃᓴᒥᒃ ᕿᑭᖅᑕᕐᔪᐊᕐᒥ ᐃᓄᖕᓄᑦ−ᐊᐅᓚᑕᐅᓗᓂ ᑲᑐᔾᔨᖃᑎᒌᒍᑕᐅᓗᓂ.
ᕿᑭᖅᑖᓗᖕᒥ ᑯᐊᐳᕆᓴᒃᑯᑦ ᐱᒋᐊᖅᑎᓯᒪᔭᖓ ᐱᕈᖅᑎᑦᑎᓂᐊᖅᐳᖅ ᑕᐅᑦᑐᒃᓴᖓᓄᑦ ᐱᓕᕆᐊᖑᓯᒫᓂᒃᑐᒥᒃ
ᓄᓇᕗᑦ ᒐᕙᒪᒃᑯᖏᓐᓂᑦ, ᑐᕌᕆᔭᖃᕐᓗᑎᒃ ᓱᒃᑲᒃᑎᒋᐊᖅᑎᑦᑎᔪᒪᓪᓗᑎᒃ ᓴᓇᔭᐅᓂᒃᓴᖓᓂᒃ ᑕᒪᑐᒧᖓ
ᐱᒻᒪᕆᐅᓪᓗᓂ ᐊᐅᓚᔪᓐᓇᐅᑎᒧᑦ ᓄᓇᕗᒻᒥ.
ᓄᓇᕗᑦ ᒐᕙᒪᒃᑯᑦ ᓯᕗᒻᒧᐊᒃᑎᑦᑎᕙᓪᓕᐊᖏᓐᓇᖅᐳᑦ ᐱᓕᕆᐊᑉ ᑕᐅᑦᑐᒃᓴᖓᓂᒃ ᕿᑭᖅᑕᕐᔪᐊᕐᒥ
ᑐᓚᒃᑕᕐᕕᖕᒥᑦ, ᓂᕆᐅᒋᔭᐅᔪᖅ ᐱᐊᓂᒃᑕᐅᓛᕋᓱᒋᔭᐅᓪᓗᓂ ᐅᑭᐊᒃᓵᖅ.
ᑲᑐᔾᔨᖃᑎᒌᒃᖢᑎᒃ ᓇᖕᒥᓂᖃᕐᓂᖅ ᐅᓄᕐᓂᖅᓴᓂᒃ ᓇᖕᒥᓂᕆᔭᐅᓂᐊᖅᐳᖅ ᐊᐅᓚᑕᐅᓗᓂᓗ ᕿᑭᖅᑖᓗᖕᒥ
ᑯᐊᐳᕆᓴᓐᑯᓐᓄᑦ, ᓇᖕᒥᓂᖃᕐᓂᕐᒧᑦ ᐱᕙᓪᓕᐊᑎᑦᑎᔨ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ,
ᐱᓕᕆᖃᑎᖃᕐᓗᑎᒃ ᐊᐅᓚᔪᓐᓇᐅᑎᓕᕆᔨᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᑦ ᑯᐊᐳᕇᓴᓐᑯᓐᓂ (AEDC).
ᐱᐊᓂᒃᑕᐅᒃᐸᑦ, ᓅᑎᕆᓂᖅ ᖃᐅᔨᒪᔾᔪᑕᐅᓂᐊᖅᐳᖅ ᐱᓕᕆᐊᖅ ᐃᓄᖕᓄᑦ−ᐊᐅᓚᑕᐅᓗᓂ ᐊᒻᒪ
ᐋᖅᑭᒃᓯᒪᑦᑎᐊᓕᕐᓗᓂ ᐊᑯᓂᐅᔪᒃᑯᑦ ᑲᔪᓯᑦᑎᐊᕈᓐᓇᕐᓗᓂ.
ᑖᓐᓇ ᓇᓗᓇᐃᒃᑯᑕᖅ ᓇᓗᓇᐃᖅᓯᕗᖅ ᐅᔾᔨᕐᓇᖅᑐᒥᒃ ᐊᓪᓗᕆᐊᕐᓂᕐᒥᒃ ᐱᐅᓯᒋᐊᖅᑎᑦᑎᕙᓪᓕᐊᓂᕐᒥᒃ ᐃᓄᐃᑦ
ᑮᓇᐅᔭᓕᐅᕋᓱᖕᓂᕐᒧᑦ ᓯᕗᓕᖅᑎᐅᓂᕐᒥᒃ, ᐋᖅᑭᒃᓱᐃᕙᓪᓕᐊᓂᕐᒥᒃ ᐱᒻᒪᕆᐊᓗᖕᓂᒃ ᐅᑭᐅᖅᑕᖅᑐᒥ
ᓇᑉᐸᖅᑎᖅᑕᐅᓯᒪᔪᓂᒃ, ᓴᙱᒃᑎᒋᐊᖅᑎᑦᑎᓂᕐᒥᒡᓗ ᑲᓇᑕᐅᑉ ᐊᐅᓚᑦᑎᔪᓐᓇᕐᓂᕆᔭᖓᓂᒃ. ᕿᑭᖅᑕᕐᔪᐊᕐᒥ
ᑐᓚᒃᑕᕐᕕᒃ ᐃᑲᔪᖅᑐᐃᓪᓚᕆᖕᓂᐊᖅᑐᖅ ᑲᓇᑕᒥ ᓇᐅᑦᑎᖅᓱᖅᑎᓄᑦ, ᕿᓂᖅᑎᓄᑦ, ᐃᒪᒃᑯᑦ ᓴᐳᓐᓂᐊᖅᑎᓄᑦ,
ᐊᒻᒪ ᑲᔪᓰᓐᓇᕈᓐᓇᖅᑐᓄᑦ ᐱᕙᓪᓕᐊᑎᑦᑎᓂᕐᒧᑦ ᓄᓇᕗᒻᒥ ᑮᓇᐅᔭᓕᐅᕈᑎᒃᓴᖏᓐᓄᑦ.
“ᑖᓐᓇ ᓅᑎᕆᓂᖅ ᐃᓂᑖᖅᑎᑦᑎᕗᖅ ᕿᑭᖅᑕᕐᔪᐊᕐᒥ ᑐᓚᒃᑕᕐᕕᖕᒧᑦ ᐱᓕᕆᐊᖑᔪᒥᒃ
ᑲᔪᓯᓂᖃᑦᑎᐊᕈᓐᓇᕐᓂᕐᒧᑦ,” ᐅᖃᓚᐅᖅᐳᖅ ᐅᓛᔪᒃ ᐊᑭᓱᒃ, ᐊᖓᔪᖅᑳᖅ ᕿᑭᖅᑕᓂ ᐃᓄᐃᑦ
ᑲᑐᔾᔨᖃᑎᒌᖏᓐᓄᑦ. “ᐃᓄᐃᑦ ᓯᕗᓕᖅᑎᒋᔭᐅᑦᑎᐊᕐᓗᑎᒃ, ᓱᓕᓂᕋᐃᕗᒍᑦ ᐱᓕᕆᐊᖅ ᑐᕌᒐᕆᔭᒥᓂᒃ
ᑲᔪᓯᑎᑦᑎᓂᐊᕐᓂᖓᓂᒃ ᐃᓄᐃᑦ ᐱᕙᓪᓕᐊᔪᓕᕆᔾᔪᓯᖏᓐᓂᒃ ᓴᓇᓯᓐᓈᑦ ᐱᕐᔪᐊᓂᒃ ᐊᐅᓚᔪᓐᓇᐅᑎᓂᒃ
ᓄᓇᕗᒻᒧᑦ ᑲᓇᑕᒧᓪᓗ.”
“ᕿᑭᖅᑖᓗᖕᒥ ᑯᐊᐳᕇᓴᒃᑯᑦ, ᐱᓕᕆᖃᑎᒋᔭᖏᓪᓗ AEDC-ᑯᑦ, ᓯᕗᒻᒧᐊᒃᐸᓪᓕᐊᑐᐃᓐᓇᕆᐊᖃᓕᖅᑐᑦ,”
ᐅᖃᓚᐅᖅᐳᖅ ᕼᐃᐅᕆ ᕙᓚᐅᕆᑎ, ᐊᐅᓚᑦᑎᔨᒻᒪᕆᒃ ᕿᑭᖅᑖᓗᒃ ᑯᐊᐳᕆᓴᓐᑯᓐᓄᑦ. “ᐱᕙᓪᓕᐊᑎᑕᐅᓂᖓ
ᕿᑭᖅᑕᕐᔪᐊᕐᒥ ᑐᓚᒃᑕᕐᕕᒃ ᐱᕈᖅᑎᑦᑎᓂᐊᖅᐳᖅ ᕿᑭᖅᑕᓂ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ,
ᒥᒃᖠᒋᐊᖅᑎᑦᑎᓗᓂ ᑕᑎᖃᕐᓂᕐᒥᒃ ᑲᓇᑕᐅᑉ ᓯᓚᑖᓂᙶᖅᑐᓂᒃ ᑐᓚᒃᑕᕐᕕᖕᓂᒃ, ᓴᙱᒃᑎᒋᐊᕐᓗᒍᓗ ᑲᓇᑕᐅᑉ
ᓇᖕᒥᓂᖃᕐᓂᕆᔭᖓ ᐅᑭᐅᖅᑕᖅᑐᒥ ᕿᑭᖅᑕᖏᓐᓂ ᐊᒻᒪ ᑲᓇᖕᓇᖅᐸᓯᐊᓂ ᐃᓯᕆᐊᕐᕕᖓᓂ ᑕᓪᓗᕈᑎᐅᑉ
ᐃᒪᖓᒍᑦ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ.”
ᑐᓚᒃᑕᕐᕕᒃ ᐱᐅᓯᒋᐊᖅᑎᑦᑎᖕᒥᔪᖅ ᑲᓇᑕᐅᑉ ᐃᒪᕐᒥᐅᑕᓂᒃ ᓂᕆᖃᑦᑕᐅᑎᕙᖕᓂᖏᓐᓂᒃ,
ᐊᑐᕈᓐᓇᑦᑎᐊᕐᓗᑎᒃ ᓂᕿᒃᓴᖅᓯᐅᖅᑕᐅᖏᓐᓇᕈᓐᓇᖅᑐᓂᑦ ᐅᑭᐅᖅᑕᖅᑐᒥ ᐃᖃᓗᓕᕆᓂᕐᒥᒃ. ᓄᓇᕗᑦ
ᒐᕙᒪᖓ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᕿᑭᖅᑖᓗᖕᒥ ᑯᐊᐳᕆᓴᒃᑯᑦ ᐊᖏᖃᑎᒌᒃᓯᒪᔪᑦ
ᓅᑎᑦᑎᑲᐅᖅᑐᕈᒪᓪᓗᑎᒃ ᐱᕙᓪᓕᐊᓂᖓ ᑲᔪᓯᔪᓐᓇᖁᓪᓗᒍ ᑭᖑᕙᓯᙱᓪᓗᑎᒃ.
ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:
ᑲᐃᑎ ᓲᑲᑦ
ᐊᐅᓚᑦᑎᔨᒻᒪᕆᒃ
ᕿᑭᑦᑖᓗᖕᒥ ᑯᐊᐳᕇᓴᒃᑯᓐᓄᑦ
867-222-0949
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑎᒌᑦᑎᐊᕐᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
867-979-3238
ᑮᓯ ᓚᓱᑦ
ᑐᑭᒧᐊᒃᑎᑦᑎᔨ, ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᒐᕙᒪᖓ
867-975-6004
