ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑮᓇᐅᔭᓂᒃ ᐊᑐᕐᓂᐊᖅᑐᑦ ᐃᒪᓐᓇᒃᑲᓐᓂᕐᓂᒃ $5 ᒥᓕᐊᓐ ᑮᓇᐅᔭᓂᒃ ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᒻᒧᑦ ᑕᑯᔭᒐᖃᕐᕕᒃᓴᒧᑦ
ᐃᖃᓗᐃᑦ, ᓄᓇᕗᑦ – ᔫᓂ 3, 2026. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑮᓇᐅᔭᓂᒃ ᐊᑐᕐᓂᐊᖅᑐᑦ ᐃᒪᓐᓇᒃᑲᓐᓂᕐᓂᒃ $5 ᒥᓕᐊᓐ ᑮᓇᐅᔭᓂᒃ ᐊᑐᖅᑕᐅᔪᒫᖅᑐᑦ ᓴᓇᔭᐅᓂᖓᓄᑦ ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᖓᓄᑦ ᐃᖃᓗᓐᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᓕᒫᖅᑐᒋᑦ ᐃᑲᔫᑎᒋᓂᐊᓕᖅᑕᖏᑦ ᐱᓕᕆᐊᕐᒧᑦ ᐃᒪᓐᓇᐅᓂᐊᓕᖅᑐᑎᑦ $10 ᒥᓕᐊᓐ ᑮᓇᐅᔭᑦ.
ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᓯᕗᓕᖅᑎᐅᓯᒪᕗᑦ ᐱᓇᓱᐊᒐᖏᖕᓂᒃ ᐅᑎᖅᑎᑕᐅᖁᓪᓗᒋᑦ ᐅᖓᑖᓃᑦᑐᑦ 200,000 ᐃᓄᐃᑦ ᐱᖁᑎᖏᑦ, ᐱᖃᓯᐅᑎᓪᓗᒋᑦ ᐃᑦᑕᕐᓂᓴᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓅᖓᔪᓂᒃ ᓱᓇᒃᑯᑖᑦ, ᐅᑎᖅᑎᑕᐅᓗᑎᑦ ᓄᓇᕗᒻᒧᑦ, ᐱᓇᓱᐊᒐᕆᔭᐅᖏᓐᓇᖅᑐᓂ ᑕᒪᒃᑯᐊ ᓯᕗᒧᐊᑦᑎᑕᐅᖁᓪᓗᒍ ᐊᕕᑦᑐᖅᓯᒪᓂᖓ 33 ᓄᓇᕗᑦ ᐊᖏᕈᑎᖓᓂ. ᑕᒪᒃᑯᐊ ᐱᕐᔪᐊᕌᓘᔪᑦ ᐃᓄᐃᑦ ᐱᖁᑎᖏᑦ ᑐᙵᕕᒋᔭᐅᓛᖅᑐᑦ ᖃᓄᐃᓕᐅᕈᑕᐅᖃᑦᑕᕐᓗᑎᑦ ᐱᖅᑯᓯᑐᖃᒃᑯᕕᓕᕆᕝᕕᒻᒥ ᑲᒪᒋᔭᖃᐃᓐᓇᕐᓗᑎᑦ, ᑲᑐᔾᔨᓗᑎᑦ ᐊᒻᒪᓗ ᓴᙵᑦᑎᑕᐅᓗᑎᑦ ᐃᓄᐃᑦ ᐃᓕᖅᑯᓯᑦᑎᐊᕚᓗᐊ, ᖃᐅᔨᒪᓂᖏᑦ ᐊᔪᙱᓐᓂᖏᑦ ᐊᒻᒪᓗ ᑕᐅᑦᑐᓐᓂᖏᑦ ᓯᕗᕚᒃᓴᕆᔭᐅᔪᓄᑦ ᐊᑐᐃᓐᓇᐅᖏᓐᓇᓛᕐᒪᑕ.
“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇ ᑐᓂᓂᓯᒪᓕᖅᑐᑦ ᑲᑎᓕᒫᖅᑐᒋᑦ $10 ᒥᓕᐊᓐ ᑮᓇᐅᔭᓂᒃ ᓴᓇᔭᐅᓂᒃᓴᖓᓄᑦ ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᖓᑕ ᐱᓕᕆᐊᕐᒧᑦ. ᒐᕙᒪᕗᑦ ᖃᓄᐃᓕᐅᕈᑎᖃᑦᓯᐊᕐᓗᑎᑦ ᐱᓕᕆᐊᒃᓴᖃᕆᐊᖃᓕᕐᒪᑕ ᑲᒪᒋᔭᐅᓂᐊᕐᓂᕋᖅᓯᒪᔪᓂᒃ ᑕᐃᒪᙵᓂᑦ 33 ᐊᕐᕌᒎᓚᐅᖅᓯᒪᔪᓂᑦ ᓄᓇᕗᑦ ᐊᖏᕈᑎᖓᒍᑦ ᐊᒻᒪᓗ ᐋᖅᑭᒃᑕᐅᑎᓪᓗᒍ ᓄᓇᕗᑦ”, ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐅᓛᔪᖅ ᐊᑭᓱᒃ.
ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᖓ ᐱᔾᔪᑎᖃᕐᓗᓂ ᓴᓇᔭᐅᒐᔭᖅᑐᖅ ᐃᒡᓗᕐᔪᐊᖅ ᐃᒪᓐᓇᐸᓗᒃ ᐊᖏᑎᒋᓂᓕᒃ 6,200 ᑭᑉᐹᕆᒃᑐᑦ ᒦᑕ ᐊᖏᓂᖏᑦ, ᑕᑯᒃᓴᐅᑎᑦᑎᕕᖃᕐᓗᓂ, ᐃᓕᖅᑯᓯᕐᒨᖓᔪᓂᒃ ᐊᒻᒪᓗ ᑕᐅᑐᕋᓐᓈᕐᕕᖃᕐᓗᒍ, ᖃᐅᔨᓴᕐᕕᖃᕐᓗᓂ ᐊᒻᒪᓗ ᐱᓕᕆᖃᑎᒌᕝᕕᒻᒥ, ᐊᒻᒪᓗ ᐊᒡᒐᓐᓄᑦ ᐊᑐᕐᓗᑎᑦ ᐱᓕᒻᒪᒃᓴᕐᕕᐅᒍᓐᓇᕋᔭᖅᑐᒥᒃ ᐃᒡᓗᕈᓯᖃᕐᒥᓗᓂ. ᐱᖅᑯᓯᑐᖃᒃᑯᕕᓕᕆᕝᕕᒃ ᐃᑲᔪᖅᑐᐃᓂᖃᕋᔭᖅᑐᖅ ᐃᓄᐃᑦ ᖃᐅᔨᒪᓂᖏᓐᓂᒃ ᐊᔪᙱᑕᕐᒥᓂᓪᓗ, ᐱᖃᓯᐅᑎᓪᓗᒋᑦ ᒥᖅᓱᕐᓂᕐᒥᒃ, ᓱᒋᐅᑎᓕᐅᕐᓂᕐᒥᒃ ᐊᒻᒪᓗ ᓱᓇᒃᑯᑖᓕᐅᕐᓂᕐᒧᑦ ᐊᔪᙱᓐᓂᕆᔭᐅᔪᑦ ᐃᑲᔪᖅᑐᐃᓂᖃᐅᖅᑐᑦ ᓄᓇᑐᐃᓐᓇᕐᒥ ᖃᓄᐃᓕᐅᕈᑕᐅᔪᓂᒃ ᐃᓕᓐᓂᐊᕐᕕᐅᖃᑦᑕᕐᓗᓂ.
ᑕᑯᔭᒐᖃᕐᕕᑐᐃᓐᓇᐅᙱᓪᓗᓂᓗ, ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᖓ ᒪᒥᓴᕐᕕᐅᒐᔭᖅᑐᖅ, ᖃᓄᐃᑦᑕᐃᓕᒪᓂᕐᒨᖓᔪᓂᒃ ᐱᓕᕆᐊᖃᕐᕕᐅᓗᓂ, ᐃᓕᓐᓂᐊᕐᕕᐅᓗᓂ, ᐊᒻᒪᓗ ᐃᓕᖅᑯᓯᕐᒥᒃ ᑕᓱᐃᑎᑦᑎᓂᖃᕋᔭᖅᑐᓂ − ᓴᙵᑎᑦᑎᔪᑦ ᐃᓄᐃᑦ ᑭᒃᑰᓂᖏᓐᓂᒃ ᐊᒻᒪᓗ ᖃᐅᔨᒪᓇᑦᑎᐊᖅᑎᑦᑎᒐᔭᖅᑐᓂ ᐅᓂᒃᑳᖅᑐᐊᑦ ᐅᓂᒃᑲᐅᑕᐅᒐᓗᐊᕐᒪᖔᑖ ᐃᓄᒻᒪᕆᓐᓄᑦ. ᐃᖃᓗᓐᓃᒃᑲᔭᕋᓗᐊᖅᑐᓂ, ᑐᑦᑕᕐᕕᐅᔪᖅ ᐃᓕᖅᑯᓯᕐᒧᑦ ᐱᕙᓪᓕᐊᒍᑎᒋᔭᖅ ᐱᓕᕆᖃᑎᖃᐅᕋᔭᖅᑐᑎᑦ ᓄᓇᓕᓐᓂ ᐃᒡᓗᕐᔪᐊᖃᐅᖅᑐᓂᒃ ᐊᒻᒪᓗ ᐱᔨᑦᑎᕐᓂᖃᖁᓪᓗᒍ ᐃᓄᓐᓂᒃ ᓄᓇᕗᓕᒫᕐᒥᒃ ᑕᑯᒃᓴᐅᑎᑦᑎᓂᖃᖃᑦᑕᕐᓗᑎᑦ ᓄᓇᓖᑦ, ᐱᓕᕆᐊᖃᐅᕐᓗᑎᑦ, ᖃᐅᔨᓴᕐᕕᒃᑕᖃᖃᑦᑕᕐᓗᓂ, ᐊᒻᒪᓗ ᐃᖅᑲᓇᐃᔭᖃᑎᖃᕐᓗᑎᑦ ᑲᓱᖅᑎᑦᑎᓂᖃᖅᑐᓂᓗ ᓄᓇᕗᓕᒫᕐᒥ.
“ᐃᓐᓇᒻᒪᕆᖁᑎᕗᑦ ᖃᐅᔨᒪᔨᒋᒐᑦᑎᒍᑦ. ᑎᑎᕋᕆᐊᖃᖅᑕᕗᑦ, ᓴᐳᒻᒥᐅᓯᕐᓗᒋᑦ ᐊᒻᒪᓗ ᐃᓕᓐᓂᐊᖅᑕᐅᒃᑲᕐᓗᒋᑦ ᖃᐅᔨᒪᓂᖏᑦ, ᐊᒻᒪᓗ ᑖᓐᓇ ᑕᑯᔭᒐᖃᕐᕕᒃ ᐊᔪᕐᓇᕈᓐᓃᖅᑎᑦᑎᒐᔭᖅᑐᓂ ᑕᒪᒃᑯᓂᖓ. ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᒃ ᐱᕕᖃᖅᑎᑦᑎᓕᕋᔭᕐᒥᔪᖅ ᐃᓐᓇᒻᒪᕆᑦᑎᓐᓂᒃ ᒪᒃᑯᑦᑐᖁᑎᑦᑎᓐᓂᓗ ᐃᓕᓐᓂᐊᖃᑎᒌᓪᓗᑎᑦ ᐊᒻᒪᓗ ᓴᙵᑦᑎᑕᐅᓗᓂ ᐃᓄᐃᑦ ᐃᓕᖅᑯᓯᖓ, ᐅᖃᐅᓯᖓ, ᐊᒻᒪᓗ ᖃᐅᔨᒪᓂᖏᑦ ᑭᖑᕚᖑᓂᐊᖅᑐᓄᑦ.” ᐅᖃᖅᑐᓂ ᐊᖓᔪᖅᑳᖅ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ, ᓘᒃ ᓱᓗᒃ.
ᐊᑭᑐᔫᑎᐅᔪᑦ ᐊᑭᖏᑦ ᓄᓇᕗᒻᒥ ᐃᓄᐃᑦ ᐱᖅᑯᓯᑐᖃᒃᑯᕕᓕᕆᕝᕕᖓ ᓇᓚᐅᒃᑖᖅᑕᐅᓯᒪᕗᖅ ᐃᒪᓐᓇᐸᓘᒐᔭᕐᒪᑕ ᐊᑭᖏᑦ $175 ᒥᓕᐊᓐ ᑮᓇᐅᔭᑦ, ᐃᒪᓐᓇᒃᑲᓐᓃᑦ $50 ᒥᓕᐊᓐ ᑮᓇᐅᔭᑦ ᓂᕆᐅᒋᔭᐅᓪᓗᑎᑦ ᐃᒡᓗᒥᐅᑕᓄᑦ, ᐃᒡᓗᒥ ᐋᖅᑭᒃᓯᒪᔭᕆᐊᓕᓐᓄᑦ, ᓱᓇᒃᑯᑖᓄᑦ, ᑕᑯᒃᓴᐅᑎᑦᑎᕕᒻᒥ ᓴᓇᔭᐅᓂᖏᓐᓄᑦ, ᐊᒻᒪᓗ ᑐᕌᖓᔪᑦ ᑭᓱᑐᐃᓐᓇᕐᓄᑦ ᐃᒡᓗᓕᐅᕐᓗᓂ ᐊᑭᖏᑦ ᑖᒃᑯᐊᖑᓛᕐᓂᐊᕋᓱᒋᔭᐅᓪᓗᑎᑦ.
ᐅᓪᓗᒥᒧᓪᓕ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᑮᓇᐅᔭᓂᒃ ᐱᔪᓐᓇᖅᓯᒪᓕᖅᑐᑦ $75 ᒥᓕᐊᓐᓂᒃ ᑮᓇᐅᔭᓂᒃ ᐱᓕᕆᐊᕐᒧᑦ. ᐊᑭᑐᔫᑎᓄᑦ ᑮᓇᐅᔭᖅᑖᒃᑲᕈᑎᑦ ᓇᓗᓇᐃᖅᑕᐅᓚᐅᖅᑎᓪᓗᒍᓗ ᑕᒪᓐᓇ ᐊᒥᐊᒃᑯᖏᑦ ᐊᑭᑐᔫᑎᓄᑦ ᑮᓇᐅᔭᖏᑦ, ᓴᓇᔭᐅᓂᒃᓴᖓ ᓂᕆᐅᒋᔭᐅᕗᖅ ᐱᒋᐊᓛᕐᓗᓂ ᐊᐅᔭᖅ 2027−ᒥ, ᑕᑯᔭᒐᖃᕐᕕᒃ ᐱᖅᑯᓯᑐᖃᕐᓂᒃ ᒪᑐᐃᓛᕐᓗᓂ 2030 ᓇᓪᓕᖅᐸᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:
ᑭᐊᕋᓐ ᕙᓚᕋᑎ
ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᑐᑭᒧᐊᕐᒃᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅ) 867.975.8398 ᐊᑭᖃᙱᑦᑐᖅ 1.800.667.2742
kflaherty@qia.ca
ᑭᐊᕙᓐ ᖃᑉᓗᑦᓯᐊᖅ
ᐊᖓᔪᖅᑳᖅ, ᐊᑖᑕ ᑐᓴᐅᒪᔪᓕᕆᔨᖏᑕ ᑎᒥᖓ
ᑐᓴᐅᒪᑎᑦᑎᓂᕐᒧᑦ ᐅᖃᐅᔾᔨᒋᐊᖅᑎ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ
kkablutsiak@ihti.ca