ᐃᖃᓗᐃᑦ, ᓄᓇᕗᑦ, ᓯᑎᐱᕆ 12, 2025 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᐊᒻᒪᓗ ᐹᕕᓐᓛᓐᑦ ᐅᔭᕋᖕᓂᐊᖅᑏᑦ (ᐹᕕᓐᓛᓐᑦ) ᑲᑎᒪᑎᑦᑎᓛᕐᖓᑕ ᓄᓘᔮᓕᕆᓂᕐᒥᒃ ᐊᕐᕌᒍᓕᒫᕐᓯᐅᑎᓂᑦ ᕿᒥᕐᕈᓂᕐᒧᑦᐃᒃᐱᐊᕐᔪᖕᒥᑦ ᐅᑐᐱᕆ 21ᒥᑦ 23ᒧᑦ, 2025.
ᑖᓐᓇ ᑲᑎᒪᓂᐅᓂᐊᖅᑐᖅ ᐊᑐᖅᑕᐅᔭᕆᐊᖃᕐᖓᑦ ᒪᓕᑦᑐᒋᑦ ᓄᓘᔮᓕᕆᓂᕐᒥ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᔅᓴᖏᓐᓄᓪᓗ ᐊᖏᕈᑎᓂᑦ (IIBA). ᐱᕕᖃᕈᑕᐅᕙᒻᒪᑦ ᑲᑎᒪᒍᑎᖃᕈᓐᓇᓂᕐᒧᑦ ᐱᓕᕆᐊᕐᒨᖓᔪᓂᑦ ᐱᔾᔪᑕᐅᕙᑦᑐᓂᑦ ᓄᓘᔮᓕᕆᓂᕐᒥ ᓄᓇᓕᓐᓂᑦ ᑭᒡᒐᑐᖅᑎᐅᔪᓂᑦ ᐅᖃᐅᓯᖃᖃᑦᑕᓂᐊᕐᖓᑕ ᐃᓱᒪᒋᔭᖏᓐᓂᒃ ᕿᑭᖅᑕᓂᒃᑯᓐᓄᑦ ᐹᕕᓐᓛᓐᑯᓐᓄᓪᓗ ᐱᔾᔪᑎᒋᓪᓗᒋᑦ ᐊᕙᑎᓕᕆᓂᕐᒥ ᐊᑑᑎᓂᖏᑦ, ᐸᓚᕐᔫᒥᑎᑦᑎᒋᐊᕈᑎᔅᓴᓂᑦ, ᓇᐅᑦᑎᕐᓱᕐᓂᕐᒧᑦ ᐸᕐᓇᐅᑎᓂᑦ, ᐊᒻᒪᓗ ᐊᑐᓕᖁᔨᔾᔪᑕᐅᓯᒪᔪᓂᑦ ᐃᓘᓐᓇᖏᓐᓂᒃ ᐱᓕᕆᐊᕐᒥ ᐋᖅᑭᒋᐊᕈᑎᔅᓴᓂᑦ.
ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ ᑭᒡᒐᑐᖅᑎᑖᕈᒪᒻᒪᑕ ᐃᓐᓇᕆᔭᐅᔪᓄᑦ ᐃᓅᓱᑦᑐᓄᓪᓗ ᑭᒡᒐᑐᖅᑎᓵᓐᓂᒃ ᐃᓘᓐᓇᖏᓐᓂᒃ ᐊᑑᑎᕕᐅᔪᓂᑦ ᓄᓇᓕᓐᓂᑦ ᒥᑦᑎᒪᑕᓕᒻᒥ, ᐃᒃᐱᐊᕐᔪᒻᒥ, ᑲᖏᖅᑐᒑᐱᒻᒥ, ᓴᓂᕋᔭᒻᒥ ᐃᒡᓗᓕᒻᒥᓗ. ᐃᓅᓱᑦᑐᓄᑦ ᑲᑎᒪᔩᑦ ᐅᑭᐅᖃᕆᐊᓖᑦ 18ᓂᑦ−30ᒧᑦ, ᐃᓐᓇᕆᔭᐅᔪᓪᓕ 55ᓂᑦ ᐅᖓᑖᓄᑦ ᐅᑭᐅᖃᕆᐊᖃᖅᑐᑎᒃ.
ᓄᓇᓖᑦ ᑲᑎᒪᔨᐅᖃᑕᐅᒍᒪᒐᔭᖅᑐᑦ ᐃᓐᓇᕆᔭᐅᔪᓄᑦ ᐃᓅᓱᑦᑐᓄᓪᓗ ᑲᑎᒪᔨᐅᓗᑎᒃ ᑎᓕᐅᖅᑕᐅᕗᑦ ᑐᓂᓯᖃᑦᑕᖁᔭᐅᓪᓗᑎᒃ ᐊᑎᖏᓐᓂᒃ ᓄᓇᖓᓐᓂ ᕿᑭᖅᑕᓂᒃᑯᓐᓄᑦ ᑐᓴᐅᒪᑎᑦᑎᔨᓄᑦ ᐅᕝᕙᓘᓐᓃᑦ ᐹᕕᓐᓛᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖓᓐᓄᑦ ᓯᑎᐱᕆ 24, 2025ᖑᓚᐅᙱᓐᓂᖓᓂ.
ᐊᖏᕈᑎᓂᑦ IIBA ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐃᖅᑲᓇᐃᔭᖅᑏᑦ ᑕᒪᒃᑮᓐᓂᒃ ᕿᑭᖅᑕᓂᒃᑯᓐᓂᑦ ᐹᕕᓐᓛᓐᑯᓐᓂᓪᓗ ᕿᒥᕐᕈᓂᕐᒦᓛᖅᑐᑦ ᐅᓂᒃᑳᕆᐊᖅᑐᕐᓯᒪᓗᑎᒃ ᐊᒻᒪᓗ ᑭᐅᔾᔪᑕᐅᔪᓂᑦ ᑐᓵᔭᖅᑐᕐᓯᒪᓗᑎᒃ ᓄᓇᓕᓐᓂᑦ ᑭᒡᒐᖅᑐᐃᔨᐅᔪᓂᑦ.
ᑐᓴᕆᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᒍᒃ:
ᑭᐅᕋᓐ ᕙᓚᕋᑎ
ᑐᑭᒧᐊᒍᑎᒃᓴᓄᑦ ᑐᓴᐅᒪᖃᑦᑕᐅᑎᔾᔪᑎᓄᑦ ᑐᑭᒧᐊᖅᑎᑦᑎᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐅᖓᓯᑦᑐᒥᓪᓘᓐᓃᑦ ᐊᑭᖃᙱᑐᒃᑯᑦ 1.800.667.2742
kflaherty@qia.ca