ᕿᑭᖅᑕᓂᒃᑯᑦ ᐸᕕᓐᓛᓐᑯᓪᓗ ᖃᐅᔨᒪᑎᑦᑎᕗᑦ ᓄᓘᔮᒃ ᐅᔭᕋᕐᓂᐊᕐᕕᖓᓂᑦ ᐊᕐᕌᒍᑕᒫᑦ ᕿᒥᕐᕈᖃᑦᑕᕐᓂᖏᓐᓄᑦ ᑲᑎᒪᓂᐊᕐᓂᖏᑦ
ᐃᖃᓗᐃᑦ, ᓄᓇᕗᑦ ᔫᓐ 26 2026 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐸᕕᓐᓛᓐ ᓴᕕᕋᔭᒃᓴᓕᕆᓂᕐᒧᑦ ᐅᔭᕋᕐᓂᐊᕐᕕᓕᕆᔨᒃᑯᓪᓗ (ᐸᕕᓐᓛᓐᑯᑦ) ᑲᑐᔾᔨᓗᑎᒃ ᓄᓘᔮᓕᕆᓂᕐᒥᒃ ᐊᕐᕌᒍᑕᒫᕐᒥ ᑲᑎᒪᑎᑦᑎᓂᐊᓕᕐᒥᒻᒪᑕ (ᑲᑎᒪᓂᖅ) ᐃᒃᐱᐊᕐᔪᖕᒥᑦ ᓯᑎᐱᕆ 22ᒥᑦ ᓯᑎᐱᕆ 24ᒧᑦ, 2026ᒥ.
ᑖᓐᓇ ᑲᑎᒪᓂᖅ ᑲᔪᓯᖃᑦᑕᕆᐊᖃᕐᒪᑦ ᒪᓕᒃᓗᒍ ᓄᓘᔮᓕᕆᓂᕐᒧᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᖓ. ᑖᓐᓇ ᑲᑎᒪᓂᖅ ᐱᕕᖃᖅᑎᑦᑎᓂᐊᕐᒪᑦ ᐅᖃᐅᓯᕆᔭᐅᔪᒪᔪᓂᒃ ᓄᓘᔮᒃ ᐅᔭᕋᕐᓂᐊᕐᕕᖓ ᐱᔾᔪᑎᒋᓗᒍ ᐊᒻᒪᓗ ᐊᒃᑐᐃᓂᐅᔪᓂᑦ ᑕᓪᓕᒪᐅᔪᓂᑦ ᐊᒃᑐᖅᑕᐅᓯᒪᔪᓂᑦ ᓄᓇᓕᖕᓂᑦ. ᑖᓐᓇ ᑲᑎᒪᓂᖅ ᑲᑎᒪᔭᖅᑐᖅᑐᓄᑦ ᐅᖃᓪᓚᖃᑦᑕᕈᓐᓇᕐᓂᐊᕐᓗᑎᒃ ᐊᒥᖅᑳᖃᑎᖃᖃᑦᑕᕐᓗᑎᓪᓘᓐᓃᑦ ᐅᖃᐅᓯᖃᕐᓗᑎᑦ ᐊᒃᑐᐃᒍᑕᐅᔪᓂᒃ ᐊᕙᑎᒧᑦ, ᐋᖅᑭᒋᐊᕈᑎᒃᓴᓂᒃ, ᓇᐅᑦᑎᖅᓱᕐᓂᕐᒧᑦ ᐸᕐᓇᐅᑎᓂᒃ ᐅᕝᕙᓘᓐᓃᑦ ᐊᑐᓕᖁᔨᔾᔪᑎᓕᐅᕈᓐᓇᕐᓗᑎᒃ ᐱᓕᕆᐊᕐᒧᑦ ᐋᖅᑭᒋᐊᕈᑎᒃᓴᐅᒐᔭᖅᑐᓂᒃ.
ᕿᑭᖅᑕᓃᒃᑯᑦ ᐸᕕᓐᓛᓐᑯᓪᓗ ᕿᓂᕐᒪᑕ ᐃᓐᓇᕐᓂᒃ ᒪᒃᑯᒃᑐᓂᓪᓗ ᑲᑎᒪᔭᖅᑐᕈᒪᒐᔭᖅᑐᓂᒃ ᒥᑦᑎᒪᑕᓕᖕᒥᑦ, ᐃᒃᐱᐊᕐᔪᖕᒥᑦ, ᑲᖏᖅᑐᒑᐱᖕᒥᑦ, ᓴᓂᕋᔭᖕᒥᑦ ᐃᒡᓗᓕᖕᒥᓪᓗ. ᒪᒃᑯᒃᑐᑦ ᑲᑎᒪᖃᑕᐅᔪᒪᓂᐊᖅᑐᑦ ᐅᑭᐅᖃᕆᐊᓖᑦ 18−ᓂᑦ 30ᓄᑦ, ᐃᓐᓇᐃᓪᓗ ᐅᑭᐅᖃᕆᐊᖃᖅᖢᑎᒃ 55ᓂᒃ ᐅᖓᑖᓂᓘᓐᓃᑦ.
ᓄᓇᓕᖕᓂᑦ ᑲᑎᒪᔭᖅᑐᖃᑕᐅᔪᒪᓂᐊᖅᑐᑦ ᐃᓐᓇᐃᑦ ᒪᒃᑯᒃᑐᓪᓘᓐᓃᑦ ᑐᓂᓯᖁᔭᐅᕗᑦ ᐊᑎᖏᓐᓂᒃ ᓄᓇᓕᖕᒥ ᑐᓴᐅᒪᑎᑦᑎᔨᒧᑦ ᐅᕝᕙᓘᓐᓃᑦ ᐸᕕᓐᓛᓐᑯᑦ ᑐᓴᐅᒪᑎᑦᑎᔨᖓᓄᑦ ᔪᓚᐃ 22, 2026−ᖑᓚᐅᙱᓐᓂᖓᓂᑦ.
ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓂᒃ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᓂᑦ ᐊᑐᓕᖅᑎᑦᑎᔨᐅᔪᑦ ᐃᖅᑲᓇᐃᔭᖅᑏᑦ ᕿᑭᖅᑕᓃᒃᑯᓐᓂᑦ ᐸᕕᓐᓛᓐᑯᓐᓂᓗ ᑲᑎᒪᖃᑕᐅᒐᔭᖅᑐᑦ ᓴᖅᑭᑎᑦᑎᔪᒫᕐᓂᐊᕐᓗᑎᒃ ᐊᔾᔨᒌᙱᑦᑐᓂᒃ ᐊᒻᒪᓗ ᑐᓵᓗᒋᑦ ᐅᖃᐅᓯᐅᔪᑦ ᑲᑎᒪᔭᖅᑐᓯᒪᔪᓂᑦ ᓄᓇᓕᖕᓂᑦ.
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓂᑦ ᑐᓴᐅᒪᖃᑦᑕᐅᑎᓄᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ ᐅᖄᓚᓗᑎᑦ 1.800.667.2742
kflaherty@qia.ca
