ᐃᒪᓐᓇᐃᑎᓪᓗᒍ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒍᑎᖃᕐᒪᑕ ᐊᕐᕌᒍᖃᓕᕐᓂᕐᒥᓂᒃ 50ᓂᒃ ᐊᕐᕌᒍᔪᒥ ᑕᒫᓂ 2025, ᑕᑯᒃᓴᐅᑎᑦᑎᓂᐊᕋᑦᑕ ᑭᖑᓂᑦᑎᓐᓂ, ᒫᓇᐅᔪᕐᒃ ᑲᑎᒪᔨᐅᔪᓂᒃ ᐊᒻᒪᓗ ᐊᖓᔪᖄᖑᔪᓂᒃ ᐃᑭᐊᕿᕕᒃᑯᑦ ᖃᕋᓴᐅᔭᒃᑯᓪᓗ ᑕᑯᒃᓴᐅᕝᕕᒋᕙᒃᑕᑦᑎᒍᑦ.
ᖁᔭᓕᕗᒍᑦ ᑖᑯᐊ ᐱᕕᖃᕐᒃᑎᑦᑎᕙᓚᐅᕐᑐᕐᒃ ᐊᒻᒪᓗ ᑐᓴᕈᒥᓇᖅᑐᓂᒃ ᐅᖃᐅᓯᖃᖅᐸᓚᐅᖅᑐᑦ ᖃᓄᕐᒃ ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᖃᓄᑎᒋ ᐱᕈᕐᓯᒪᓕᕐᒪᖔᑦ ᑕᐃᒪᖓᓂᑦ ᐱᒋᐊᖓᓚᐅᕐᓯᒪᑎᓪᓗᒋᑦ.
ᐅᖃᓕᒫᑦᑎᐊᕐᓂᕐᐊᐳᓯ!
ᐹᓪ ᐊᒪᕈᐊᓕᒃ – ᖃᐅᓱᐃᑦᑐᖅ
ᐹᓪ ᐊᒪᕈᐊᓕᒃ ᑲᑎᒪᔨᐅᒋᐊᕐᖓᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ 1980ᓂᑦ, ᓱᓕ ᖃᐅᔨᒪᔭᐅᑎᓪᓗᒍ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ. ᐃᖅᑲᐅᒪᔪᖅ ᐃᓄᐃᑦ ᐱᒋᐊᖅᐸᓪᓕᐊᓚᐅᕐᓂᖏᓐᓂᒃ ᒐᕙᒪᓕᕆᕙᓪᓕᐊᓕᖅᖢᑎᒃ, ᐅᖃᐅᓯᕆᔭᐅᑐᐃᓐᓇᖃᑦᑕᓚᐅᕋᓗᐊᖅᖢᓂ ᓄᓇᕗᑖᕈᒪᓪᓗᑎᒃ.
ᐹᓪ−ᓕ,ᑎᒥᐅᔪᖅ ᐃᓄᖕᓂᒃ ᓂᐱᖃᖅᑎᑦᑎᔪᓐᓇᖅᓯᓚᐅᖅᑐᖅ ᐊᒻᒪᓗ ᓇᓗᓇᐃᖅᓯᖃᑦᑕᕈᓐᓇᖅᓯᓪᓗᑎᒃ ᑕᐅᑐᙳᐊᖅᑕᖏᓐᓂᒃ ᓯᕗᓂᒃᓴᒧᑦ, ᑕᐃᔅᓱᒪᓂ ᐃᓅᓯᖏᑦ ᐊᐅᓚᑕᐅᓂᖅᓴᐅᓚᐅᕐᒪᑦ ᒐᕙᒪᒃᑯᑦ ᑐᑭᑖᕈᑎᒋᔭᖏᓐᓂᑦ. “ᖁᕕᐊᓇᖅᓯᕙᓪᓕᐊᓚᐅᖅᑐᖅ, ᐊᒻᒪᓗ ᐱᕕᒃᓴᖃᓕᖅᖢᑕ ᐃᓚᐅᔪᓐᓇᕐᓂᕐᒥᒃ,” “ᓴᖅᑭᔮᖅᑎᑦᑎᓪᓗᓂ ᐃᓄᐃᑦ ᐱᔪᓐᓇᕐᓂᖃᑦᑎᐊᕐᓂᖏᓐᓂᒃ ᐃᑲᔪᕋᓱᒃᖢᒋᑦ ᐃᓄᐃᑦ. ᑕᐃᔅᓱᒪᓂ ᐱᒋᐊᖅᑎᑦᑎᕙᓪᓕᐊᓕᖅᖢᑎᒃ.”
ᐹᓪ ᐅᖃᖅᑐᖅ ᐃᓄᐃᑦ ᐃᓕᖅᑯᓯᖃᑎᒌᒃᖢᑎᒃ ᐃᓅᖃᑎᒌᒃᑐᑦ, ᐋᖅᑭᒃᓯᒪᑦᑎᐊᖅᖢᓂ−ᓱᖏᐅᑎᓪᓗᑎᒃ ᐊᒻᒪᓗ ᒪᑭᑕᒍᓐᓇᖅᖢᑎᒃ ᓂᓪᓚᓱᒃᑐᐊᓗᖕᒥ, ᑖᖅᑐᐊᓗᖕᒥ, ᐊᒻᒪᓗ ᐱᔭᕆᑐᔪᒥᒃ ᐊᕙᑎᒥ ᐃᖏᕐᕋᕐᕕᖃᕈᓐᓇᖅᖢᑎᒃ ᐅᑭᐅᖅᑕᖅᑐᒥ. ᐃᓅᓯᖅ ᐱᔭᕆᐊᑭᓚᐅᙱᒻᒪ, ᐃᓄᐃᑦ ᖃᓄᖅᑑᖃᑦᑕᖅᖢᑎᒃ ᖃᓄᐃᑦᑐᒥᒃ ᐃᓅᓯᖃᕈᒪᓂᐊᕐᒪᖔᑖᒃ, ᓇᒧᙵᐅᔪᒪᖕᒪᖔᑖᒃ ᐊᒻᒪᓗ ᖃᓄᐃᑦᑐᒥᒃ ᓯᕗᓂᒃᓴᖃᕈᒪᓂᐊᕐᓂᖏᑦ. ᑖᒃᑯᐊ ᑲᑐᔾᔨᖃᑎᒌᒃᑯᑦ, ᐊᑐᖅᑕᐅᔪᓐᓇᖅᓯᓚᐅᖅᑐᖅ ᐃᓄᐃᑦ ᑎᒍᓯᕙᓪᓕᐊᒍᓐᓇᖅᖢᑎᒃ ᐊᐅᓚᑦᑎᔪᓐᓇᕐᓂᕐᒥᒃ ᐃᓅᓯᖕᓐᓂᒃ ᓇᒧᓪᓗ ᑐᕌᕈᒪᓂᐊᕐᓂᖏᓐᓄᑦ.
ᕿᒥᕐᕈᓪᓗᓂ ᑭᖑᕚᖑᓚᐅᖅᑐᓂᑦ, ᐹᓪ ᐊᔭᐅᖅᑐᐃᕗᖅ ᒪᒃᑯᒃᑐᓂᒃ ᐃᓚᐅᕙᓪᓕᐊᓗᑎᒃ ᓇᐅᒃᑯᓕᒫᖅ ᐃᓅᓯᕐᓂᑦ—ᐱᙳᐊᖅᑐᓕᕆᓂᕐᒥᑦ ᒐᕙᒪᓕᕆᓂᕐᒧᑦ—ᐱᔾᔪᑎᒋᓪᓗᒍ ᑐᑭᑖᕈᑎᒋᔭᐅᔪᑦ ᐱᒻᒪᕆᐊᓘᖕᓂᑦ ᐃᑲᔪᕐᓂᐊᖅᑐᖅ ᐋᖅᑭᒃᓱᐃᖃᑕᐅᓂᖏᓐᓂᒃ ᐃᓄᐃᑦ ᓯᕗᓂᒃᓴᖏᓐᓂᑦ. ᐅᖃᕐᒥᔪᖅ ᐊᔾᔨᒌᙱᑐᓂᒃ ᐊᒃᓱᕈᖃᑦᑕᕐᓂᖏᑦ ᖁᑦᑎᒃᑐᒥᐅᑕᐃᑦ, ᑖᒃᑯᐊ ᓄᓇᕐᔪᐊᕐᒥᐅᑦ ᐱᔪᒪᓂᖏᑦ ᐊᖏᓪᓕᕙᓪᓕᐊᑎᓪᓗᒍ ᐊᒻᒪᓗ ᐊᒥᓱᓃᖅᓴᐅᓕᕐᓂᖏᑦ ᐅᒥᐊᖅᐸᑦ ᐃᖏᕐᕋᔪᓄᑦ ᑕᑉᐸᐅᖓ. ᐃᓄᖕᓄᓪᓕ, ᐃᓚᐅᓂᖏᑦ ᓯᕗᓕᕐᓂᖏᓪᓗ ᐱᒻᒪᕆᐅᓂᖅᓴᐅᓂᐊᖅᑐᖅ ᓴᐳᔾᔨᓗᒋᑦ ᓄᓇᓖᑦ ᐊᕙᑎᖏᓪᓗ.
