ᓯᕗᓪᓕᖅᐹᑦ ᐱᓕᒻᒪᒃᓴᐅᑎᒃᓴᑦ ᑐᓴᖅᑎᑦᑎᔾᔪᑕᐅᔪᑦ ᐅᔨᓴᖅᑐᓕᕆᓂᕐᒧᑦ ᐱᓕᒻᒪᒃᓴᕐᕕᖕᒧᑦ ᒥᑦᑎᒪᑕᓕᖕᒥ
ᐃᖃᓗᐃᑦ, ᓄᓇᕗᑦ (ᔫᓂ 3, 2026) – ᓄᓇᕗᒻᒥ ᓯᓚᑦᑐᖅᓴᕐᕕᒃ (NAC) ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓱᒃᐳᑦ ᐅᖃᐅᓯᖃᕈᓐᓇᕐᒪᑕ ᓯᕗᓪᓕᖅᐹᑦᑎᐊᒥᒃ ᐃᓕᓐᓂᐊᕐᓂᕐᒧᑦ ᐊᔪᕈᓐᓃᖅᓴᕐᓂᕐᒧᓪᓗ ᐱᓕᕆᐊᖑᕙᒃᑐᓂᒃ ᑲᔪᓯᑎᑕᐅᓂᐊᖅᑐᒥᒃ ᓄᑖᒥ ᖃᐅᔨᓴᖅᓯᓂᕐᒧᑦ ᐊᔪᕈᓐᓃᖅᓴᕐᓂᕐᒧᑦ ᐃᓂᒋᔭᐅᔪᒥ ᒥᑦᑎᒪᑕᓕᖕᒥ.
ᑖᓐᓇ ᑐᓴᖅᑎᑦᑎᔾᔪᑕᐅᔪᖅ ᒪᓕᒃᐳᖅ ᐱᓕᕆᖃᑎᒌᖏᓐᓇᕐᓂᕐᒥᒃ ᑖᒃᑯᓇᙵᑦ ᒪᕐᕉᖕᓂᑦ ᐱᓕᕆᖃᑎᒌᓂᒃ ᑕᐃᒪᙵᑦ ᒫᔾᔨ 5, 2025−ᖑᓚᐅᖅᑎᓪᓗᒍ, ᐊᑎᓕᐅᖅᑕᐅᓚᐅᖅᑎᓪᓗᒍ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᖅ ᐊᖏᒡᓕᒋᐊᖅᑎᑦᑎᔪᒪᓪᓗᓂ ᐊᑐᕈᓐᓇᕐᓂᕐᒥᒃ ᐃᓕᓐᓂᐊᕐᕕᖕᓂ ᐃᓐᓇᐃᑦ ᐃᓕᓐᓂᐊᕐᕕᖏᓐᓂᑦ ᐊᔪᕈᓐᓃᖅᑕᐅᕙᒃᑐᓂᒡᓗ ᐱᓕᒻᒪᒃᓴᕐᓂᒃᑯᑦ ᓄᓇᕗᒻᒥ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇ ᓴᓇᕙᓪᓕᐊᕗᑦ $34 ᒥᓕᐊᓂᒃ ᐃᒡᓗᕐᔪᐊᒥᒃ ᐃᓕᓐᓂᐊᕐᓂᖅ, ᐊᔪᕈᓐᓃᖅᓴᕐᓂᖅ ᐊᔪᙱᓐᓂᕆᔭᐅᔪᓂᒡᓗ ᐋᖅᑭᒃᓱᐃᕙᓪᓕᐊᓂᖅ ᐱᕕᒃᓴᐅᓂᖅᓴᐅᖁᓪᓗᒍ ᐃᓄᖕᓄᑦ. ᑖᔅᓱᒪ ᓴᓇᔭᐅᓂᖓ ᓂᕆᐅᒋᔭᐅᔪᖅ ᐱᐊᓂᒃᑕᐅᓂᐊᕋᓱᒋᔭᐅᓪᓗᓂ ᔫᓂ 2026−ᒥ.
ᓄᓇᕗᒻᒥ ᓯᓚᑦᑐᖅᓴᕐᕕᒃ ᓇᓗᓇᐃᖅᓯᓚᐅᖅᐳᑦ ᐅᑯᐊ ᐱᓕᕆᐊᒃᓴᑦ ᐸᕐᓇᒃᑕᐅᓯᒪᓂᖏᓐᓂᑦ ᐱᒋᐊᓛᕐᓂᖏᓐᓂᒃ ᒥᑦᑎᒪᑕᓕᖕᒥ ᓯᑎᐱᕆ 2026−ᒥ:
• ᐃᓄᖕᓂᑦ ᐃᑲᔪᖅᑎᐅᓂᕐᒧᑦ ᐃᖅᑲᓇᐃᔭᖅᑎᙳᕆᐅᖅᓴᔪᑦ
• ᑐᓵᔨ/ᑐᑭᓕᐅᕆᔨ (ᐊᕐᕌᒍ 1)
• ᐊᒥᓕᕆᓂᖅ/ᕿᓯᓕᕆᓂᖅ (ᐊᕐᕌᒍ 1)
“ᐱᒃᑯᒍᓱᒃᐳᖓ ᑖᔅᓱᒥᖓ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ, ᐅᒃᐱᕆᔭᖃᖅᖢᖓᓗ ᑖᓐᓇ ᐱᓕᕆᖃᑎᒌᖕᓂᖅ ᐱᒻᒪᕆᐅᓂᖓᓂᒃ ᐱᐅᓛᒃᑯᑦ ᐆᒃᑑᑎᑦᑎᐊᕙᐅᓂᖓᓂᒃ ᑲᑎᙵᔪᓂᒃ ᓴᙱᓂᕆᔭᐅᔪᓂᒃ ᐊᑐᖅᑕᐅᔪᓐᓇᖅᑐᓂᒡᓗ ᑲᑐᔾᔨᖃᑎᒌᖑᔪᓂ ᐊᓯᔾᔨᖅᓯᔪᒪᓪᓗᑎᒃ ᐃᓄᖕᓄᑦ ᓄᓇᓕᑦᑎᓐᓂ.” ᑕᐃᒪᓐᓇ ᒪᓕᒐᓕᐅᖅᑎ ᑕᐃᕕᑦ ᐊᕿᐊᕈᖅ ᐅᖃᖅᖢᓂ, ᒥᓂᔅᑕ ᑲᒪᒋᔭᒃᓴᖃᖅᑎᑕᐅᓪᓗᓂ ᓄᓇᕗᒻᒥ ᓯᓚᑦᑐᖅᓴᕐᕕᖕᒧᑦ.
“ᐃᓕᓐᓂᐊᕐᓂᖅ ᐊᒻᒪ ᐱᓕᒻᒪᒃᓴᕐᓂᖅ ᐱᒻᒪᕆᐅᕗᑦ ᐱᕈᖅᑎᑦᑎᕙᓪᓕᐊᓂᕐᒧᑦ ᑲᔪᓰᓐᓇᕈᓐᓇᖅᑐᒥᒃ ᑮᓇᐅᔭᓕᐅᕋᓱᖕᓂᕐᒧᑦ ᓄᓇᕗᒻᒧᑦ. ᐱᓕᕆᖃᑎᒌᒃᑯᑦᑕ ᑲᑐᔾᔨᖃᑎᒌᒡᓗᑕ, ᓴᖅᑭᑦᑎᔪᓐᓇᖅᐳᒍᑦ ᐱᕕᒃᓴᒃᑲᓐᓂᕐᓂᒃ ᐃᓄᖕᓄᑦ ᐃᑲᔪᕐᓗᑕᓗ ᐱᐅᔪᓂᒃ ᐊᓯᔾᔨᖅᓯᓂᕐᒥᒃ ᓄᓇᓕᑦᑎᓐᓄᑦ. ᑕᒪᓐᓇ ᐱᒋᐊᕐᓂᑐᐃᓐᓇᐅᕗᖅ,” ᐅᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓ ᐅᓛᔪᒃ ᐊᑭᓱᒃ.
ᑖᓐᓇ ᖃᐅᔨᓴᕐᕕᒃᓴᖅ ᐱᓕᒻᒪᒃᓴᕐᕕᒃ $34-ᒥᓕᐊᓐ ᑮᓇᐅᔭᓂᑦ ᐊᑭᖃᖅᑐᖅ ᐱᓕᕆᐊᒃᓴᖅ ᑮᓇᐅᔭᖃᖅᑎᑕᐅᓂᒃᑯᑦ ᓄᓘᔮᓂᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔪᖅᑕᐅᔾᔪᑎᒃᓴᖏᓐᓄᓪᓗ ᐊᖏᕈᑎᖓᑎᒍᑦ, ᐊᒻᒪᓗ ᐃᓄᖕᓅᖓᔪᑦ ᐱᖁᑎᕐᔪᐊᕐᓄᑦ ᑮᓇᐅᔭᖅᑖᕈᓯᐊᑦ ᑐᓂᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂ.
###
ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:
ᑲᐃᕋ ᕼᐅᐊᖕ
ᐊᐅᓚᑦᑎᔨ, ᓂᐅᕕᐊᒃᓴᓕᕆᓂᕐᒧᑦ, ᑐᓴᐅᒪᔪᓕᕆᓂᕐᒧᑦ ᐃᖅᑲᓇᐃᔭᖅᑎᑖᕐᓂᕐᒧᓪᓗ
ᓄᓇᕗᒻᒥ ᓯᓚᑦᑐᖅᓴᕐᕕᒃ
867-979-7318
kara.hoang@arcticcollege.ca
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑎᒌᑦᑎᐊᕐᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(p) 867-975 8398 (TF) 1-800-667-2742
kflaherty@qia.ca