ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ 21ᓂᒃ ᓄᑖᓂᒃ ᐋᖅᑭᔅᓱᑐᐃᓐᓇᕆᐊᓕᓐᓂᑦ ᐃᓪᓗᔅᓴᓂᑦ ᑎᑭᑎᑦᑎᓂᐅᓴᔪᑦ ᐃᒃᐱᐊᕐᔪᒻᒧᑦ, ᑲᖏᖅᑐᒑᐱᒻᒧᑦ, ᐊᐅᓱᐃᑦᑐᕐᒧᑦ, ᒥᑦᑎᒪᑕᓕᒻᒧᓪᓗ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᐱᒍᓱᑦᑐᑦ ᑐᓴᖅᑎᑦᑎᔭᕆᐊᔅᓴᖅ ᐃᓪᓗᔅᓴᐃᑦ 21ᓂᒃ ᓄᑖᓂᑦ ᐃᓪᓗᓕᐅᕈᑕᐅᓂᐊᖅᑐᑦ ᑎᑭᓯᒪᓕᕐᖓᑕ ᐃᒃᐱᐊᕐᔪᒻᒧᑦ, ᑲᖏᖅᑐᒑᐱᒻᒧᑦ, ᐊᐅᓱᐃᑦᑐᕐᒧᑦ, ᒥᑦᑎᒪᑕᓕᒻᒧᓪᓗ.
ᑖᒃᑯᐊ ᐃᓪᓗᔅᓴᐃᑦ ᓇᓗᓇᐃᒃᑯᑕᐅᕗᑦ ᓯᕗᓪᓕᕐᐹᖑᓂᐊᕐᖓᑕ ᐊᖏᓂᕐᓴᒥᒃ ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᐃᓪᓗᓕᕆᓂᕐᒧᑦ ᑲᒪᒋᔭᐅᕙᓪᓕᐊᓂᐊᖅᑐᓂᑦ ᐊᒥᓱᕈᖅᑎᑦᑎᑲᓐᓂᕈᑕᐅᓂᐊᖅᑐᓂᑦ ᓄᓇᕗᒻᒥ ᓄᓇᓕᓐᓂᑦ ᓯᕗᓂᔅᓴᑎᓐᓂ. ᑐᑭᓯᓯᒪᓪᓗᑕ ᐃᓪᓗᑖᕆᐊᖃᓪᓚᕆᓕᕐᓂᖏᓐᓂᒃ ᓄᓇᓕᕗᑦ, ᕿᑭᖅᑕᓂᒃᑯᑦ ᑲᒪᓴᕋᐃᒋᐊᔪᒻᒪᑕ ᐃᓪᓗᓕᐅᖅᑎᑦᑎᓂᕐᒥᒃ ᐊᒻᒪᓗ ᓈᒻᒪᔅᓯᒍᑎᖃᕈᓐᓇᔪᓪᓗᑎᒃ ᑲᓇᑕᒥ ᐃᓪᓗᖁᑎᑖᕐᐸᓪᓕᐊᓂᕐᒧᑦ ᐊᒻᒪᓗ ᐃᓪᓗᓕᕆᔨᕐᔪᐊᑯᓐᓂᑦ ᐊᑭᓕᐅᑕᐅᓂᐊᖅᑐᓂᑦ ᑕᒫᓃᑦᑐᓂᑦ 60% ᐃᓪᓗᓕᐅᖅᑎᑦᑎᓂᕐᒧᑦ ᐊᑭᒋᓂᐊᖅᑕᖏᓐᓄᑦ ᑖᒃᑯᓂᖓ ᓯᕗᓪᓕᕐᐹᖏᓐᓂᒃ 21ᓂᒃ ᐃᓪᓗᔅᓴᓂᑦ.
ᑲᒪᑦᑕᐅᑎᒋᒋᐊᖅᑐᑎᒃ, ᕿᑭᖅᑕᓂᒃᑯᑦ ᐃᑲᔪᖅᑐᑦ ᓯᕗᓪᓕᕐᐹᖏᓐᓂᒃ 21ᓂᒃ ᐃᓪᓗᔅᓴᓂᑦ ᐃᓪᓗᓕᐅᖅᑎᑦᑎᓂᕐᒧᑦ ᐊᑐᖅᑕᐅᖔᕈᓐᓇᕐᓯᓂᐊᕐᖓᑕ ᐃᓄᓐᓄᑦ ᐃᓪᓗᒋᔭᐅᓗᑎᒃ. ᑖᒃᑯᐊ ᕿᑐᕐᖓᕇᓄᑦ ᐃᓪᓗᔅᓴᐃᑦ ᐃᓕᖅᑯᓯᖓᓐᓄᑦ ᓈᒻᒪᑎᕐᓯᒪᓂᐊᖅᑐᑎᒃ ᐊᒻᒪᓗ ᐊᑭᖃᕐᓗᑎᒃ ᐅᓇᒻᒥᓇᕐᔫᒥᔪᓂᑦ ᓴᓂᐊᓂ ᑕᑯᓪᓗᒋᑦ ᒫᓐᓇ ᓂᐅᕐᕈᑎᖃᕐᕕᒻᒥ ᐊᑐᖅᑕᐅᔪᓐᓇᐸᑦᑐᑦ.
ᑕᒪᓐᓇ ᑲᒪᒋᔭᐅᕗᖅ ᐃᑲᔪᖅᑎᒌᑦᑐᑎᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓪᓗ (ᑐᙵᕕᒃᑯᑦ) ᐊᖅᑯᑎᒋᓪᓗᒍ ᐊᖏᕐᕋᑦᓴᓕᐅᓚᐅᖅᑕ − ᓄᓇᕗᒻᒥᐅᓄᑦ ᐃᓄᓐᓄᑦ ᐃᓪᓗᓕᕆᓂᕐᒧᑦ ᖃᓄᖅᑑᕈᑏᑦ ᐸᕐᓇᐅᑏᑦ, ᑖᒃᑯᐊ ᐱᔾᔪᑎᖃᓗᐊᖅᑐᑦ ᐃᓪᓗᓕᐅᕐᓂᕐᒥᒃ ᐊᑭᓕᓐᓂᑦ ᐅᓇᒻᒥᓇᕐᔫᒥᔪᓂᑦ ᐊᑐᖅᑕᐅᖃᑦᑕᕈᓐᓇᓂᐊᖅᑐᓂᑦ ᐃᓄᓐᓄᑦ ᐊᓯᖏᓐᓂᒃ ᒫᓐᓇ ᑭᒃᑯᑐᐃᓐᓇᕐᓄᑦ ᐃᓪᓗᓕᕆᔾᔪᑕᐅᕙᑦᑐᓂᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑎᒍᑦ (NHC).
ᒫᓐᓇ, ᐃᓄᓕᒫᐸᓗᐃᑦ ᒪᕐᕉᓐᓂᒃ ᓇᓖᕌᕋᔅᓴᖃᖃᑦᑕᕐᖓᑕ ᐊᑐᕈᓐᓇᖅᑕᖏᓐᓂᒃ: ᐊᑭᑭᓪᓕᒋᐊᖅᑕᐅᓯᒪᕙᑦᑐᑦ ᐃᓪᓗᐃᑦ ᓄᓇᕗᒻᒥ ᐃᓪᓗᓕᕆᔨᕐᔪᐊᒃᑯᑎᒍᑦ, ᐅᕝᕙᓘᓐᓃᑦ ᐊᑐᖅᑕᐅᔪᓐᓇᐸᑦᑐᑦ ᐅᕝᕙᓘᓐᓃᑦ ᓂᐅᕕᐊᖑᖃᑦᑕᕈᓐᓇᖅᑐᑦ ᐃᓪᓗᐃᑦ ᐊᑭᖃᖅᑐᓂ ᐊᑭᒋᒐᔭᖅᑕᓕᒫᖓᓂᒃ. ᑖᓐᓇ ᓄᑖᖅ ᐱᓇᓱᐊᕈᑕᐅᔪᖅ ᐋᖅᑮᒍᑕᐅᒻᒪᑦ ᐱᖓᔪᐊᓂᒃ ᐊᑯᓐᓂᖓᓃᑦᑐᒥᒃ ᐊᑐᖅᑕᐅᖃᑦᑕᕈᓐᓇᓂᐊᖅᑐᒥᒃ, ᒫᓐᓇ ᑕᐃᒪᐃᑦᑐᒥᒃ ᐱᑕᖃᙱᒻᒪᑦ ᓄᓇᓕᓐᓂᑦ. ᑖᒃᑯᐊ ᐃᓪᓗᔅᓴᐃᑦ ᐊᑐᐃᓐᓇᐅᑎᑦᑎᒍᑕᐅᓂᐊᕐᖓᑕ ᐊᑐᖅᑕᐅᖔᖃᑦᑕᕈᓐᓇᓂᐊᖅᑐᓂᑦ ᐃᓄᓐᓄᑦ ᐃᓚᒌᓄᑦ ᐃᓪᓗᒥᒃ ᐊᑐᕋᔅᓴᕐᓯᐅᐸᑦᑐᓄᑦ.
ᑲᒪᒋᔭᖃᕐᓂᐊᕐᖓᑕ ᐊᒻᒪᓗ ᐊᒥᓱᕈᖅᑎᑦᑎᕙᓪᓕᐊᓂᐊᕐᖓᑕ ᑕᒪᑐᒥᖓ ᓄᑖᕐᒥᒃ ᐃᓪᓗᓕᕆᓂᕐᒧᑦ ᐊᑐᖅᑕᐅᖃᑦᑕᓂᐊᓕᖅᑐᒥᒃ, ᓄᓇᕗᑦ ᑐᙵᕕᒃᑯᑦ ᐋᖅᑮᓂᐅᓴᔪᑦ ᖃᑭᒪᒍᑎᔅᓴᓕᐅᕋᓱᐊᖅᑎᐅᖏᑦᑐᓂᑦ ᑎᒥᐅᓂᐊᖅᑐᓂᒃ ᑕᐃᔭᐅᓂᐊᖅᑐᑎᒃ ᐃᒫᒃ ᐃᒡᓗᕗᑦ, ᐃᒫᒃ ᑐᑭᓕᒃ “ᐃᒡᓗᕗᑦ.” ᑖᒃᑯᐊ ᐃᒡᓗᕗᑦ ᐋᖅᑭᓯᒪᓕᖅᑲᑕ, ᓇᒻᒥᓂᕆᔭᐅᓂᐊᕐᓂᖏᑦ ᐊᐅᓚᑕᐅᓂᐊᕐᓂᖏᓪᓗ ᑖᒃᑯᐊ ᐃᓪᓗᔅᓴᐃᑦ ᓴᓇᔭᐅᓂᐊᖅᑐᑦ ᕿᑭᖅᑕᓂᒃᑯᓐᓂᑦ ᑐᓂᔭᐅᓂᐊᖅᑐᑦ ᐃᒡᓗᕗᑦ ᑎᒥᐅᔪᒧᑦ. ᐃᓄᐃᑦ ᐊᑎᓕᐅᖃᑦᑕᕈᓐᓇᓂᐊᖅᑐᑦ ᐃᓪᓗᖃᖅᑎᐅᒍᒪᓗᑎᒃ ᑖᒃᑯᓄᖓ ᐃᓪᓗᓄᑦ, ᐊᒻᒪᓗ ᐃᓗᓕᖏᑦ ᑭᒃᑯᑦ ᐱᓇᓱᐊᖃᑕᐅᖃᑦᑕᕈᓐᓇᐊᓂᕐᒪᖔᑕ, ᐊᑭᓕᕐᓱᐃᔾᔪᑕᐅᖃᑦᑕᓂᐊᖅᑐᓂᑦ, ᐊᒻᒪᓗ ᐊᒥᓱᕈᖅᑎᑕᐅᕙᓪᓕᐊᓂᐊᕐᓂᖏᓐᓂᒃ ᑐᓴᐅᒪᑎᑦᑎᒍᑕᐅᓛᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ ᐱᔭᕇᖅᑕᐅᑉᐸᑕ.
ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᐊᕕᑦᑐᕐᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᑦ ᓱᓕ ᐱᓕᕆᖃᑎᒌᑦᑐᑦ ᐋᖅᑭᔅᓱᐃᓪᓗᑎᒃ ᐊᑐᐊᒐᕆᓂᐊᖅᑕᖏᓐᓂᒃ ᐱᐅᓯᕆᔭᐅᖃᑦᑕᓂᐊᖅᑐᓂᓪᓗ ᑐᑭᒧᐊᒍᑕᐅᖃᑦᑕᓂᐊᖅᑐᓂᑦ ᐃᒡᓗᕗᑦ ᑎᒥᖓᓐᓂ ᐊᒻᒪᓗ ᓯᕗᓂᔅᓴᑎᓐᓂ ᐃᓪᓗᓕᕆᓂᕐᒥᒃ ᐱᕙᓪᓕᐊᑎᑦᑎᓂᕐᒧᑦ.
ᑖᓐᓇ ᐱᓕᕆᐊᖅ ᓄᓇᓕᓐᓂᑦ−ᐱᔾᔪᑎᓕᒃ ᐊᒻᒪᓗ ᐋᖅᑭᔅᓱᐃᒍᑕᐅᓂᐊᖅᑐᓂ ᐊᑯᓂ−ᐊᑐᕐᓂᐊᖅᑐᓂᑦ ᐊᑑᑎᑎᑦᑎᒍᒪᓪᓗᑎᒃ. ᑖᒃᑯᐊ ᓯᕗᓪᓕᕐᐹᑦ ᐃᓪᓗᔅᓴᐃᑦ ᐱᔭᕇᖅᑕᐅᑉᐸᑕ ᐊᒻᒪᓗ ᑭᖑᓂᐊᒍᑦ ᐊᓯᖏᓐᓂᒃ ᐃᓪᓗᓕᐅᖅᑐᖃᒃᑲᓐᓂᖃᑦᑕᓕᖅᑲᑦ ᓄᓇᕗᒻᒥ ᓄᓇᓕᓕᒫᓂᑦ, ᐊᒥᓲᓂᕐᓴᐃᑦ ᐃᓄᐃᑦ ᐃᓪᓗᖃᖃᑦᑕᕈᓐᓇᕐᓯᓂᐊᕐᖓᑕ ᐊᑭᓕᓐᓂᑦ ᐅᓇᒻᒥᓇᕐᔫᒥᔪᓂᑦ, ᐱᐅᔪᓂᑦ ᐃᓪᓗᓂᑦ ᐊᒻᒪᓗ ᐊᔾᔨᒌᙱᑐᒡᒍᑎᐅᓂᕐᓴᐅᓗᑎᒃ ᐊᑐᖅᑕᐅᖃᑦᑕᕈᓐᓇᓂᐊᖅᑐᑦ ᓄᓇᖏᓐᓂ ᐊᒻᒪᓗ ᐃᓪᓗᖃᐅᓯᖏᓐᓂᒃ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᑕᑯᓂᐊᕋᔅᓴᖅ ᑖᓐᓇ ᐊᖏᕐᕋᔅᓴᓕᐅᓚᐅᖅᑕ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᒻᒥ, ᐅᖃᓕᒫᕐᓗᒋᑦ ᓴᖅᑭᕆᐊᙵᔪᔭᕗᑦ ᑕᒪᑐᒪ ᒥᔅᓵᓄᑦ “ᐃᓪᓗᓴᒃᑲᓐᓃᑦ ᕿᑭᖅᑕᓂ ᓄᓇᓕᓐᓄᑦ ᐃᓚᒌᓄᑦ,” ᐊᒻᒪᓗ ᑐᓴᐅᒪᕕᒌᓐᓇᕐᓗᒋᑦ ᕙᐃᔅᐳᒃᑯᑦ ᐃᑭᐊᖅᑭᕕᕗᑦ ᑭᓱᓂᑦ ᑐᓴᕋᔅᓴᖅᑕᖃᓕᕐᒪᖔᑕ ᐃᓪᓗᓕᐅᕐᐸᓪᓕᐊᓂᖏᑦ ᒥᔅᓵᓄᑦ.
