ᐃᖅᑲᓇᐃᔭᖅᑎᓄᑦ/ᐃᓄᓕᒫᓄᑦ ᐃᖅᑲᓇᐃᔮᔅᓴᖅ
ᐃᖅᑲᓇᐃᔮᖅ: ᑲᒪᔨ, ᐃᓕᓐᓂᐊᓕᓵᖅᑐᓂ ᓱᕈᓰᓪᓗ ᐃᓕᓐᓂᐊᕐᓂᖏᓐᓄᑦ ᐱᓕᕆᐊᔅᓴᑦ
ᖃᓄᐃᓕᖓᓂᖓ: ᐃᖅᑲᓇᐃᔮᖑᐃᓐᓇᕐᓂᐊᖅᑐᖅ
ᓄᓇᓕᒻᒥ: ᐃᖃᓗᐃᑦ, ᓄᓇᕗᑦ
ᒪᑐᐃᖓᔪᖅ: ᓄᓇᕗᒻᒥᐅᑦ ᐃᓄᐃᑦ ᐃᓚᒋᔭᐅᔾᔪᑎᓖᑦ ᓄᓇᕗᑦ ᐊᖏᕈᑎᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐃᓄᒻᒥᒃ ᐃᖅᑲᓇᐃᔭᖅᑎᔅᓴᓯᐅᖅᑐᑦ ᑲᒪᔨ, ᐃᓕᓐᓂᐊᓕᓵᖅᑐᓂᑦ ᓱᕈᓰᓪᓗ ᐃᓕᓐᓂᐊᕐᓂᖏᓐᓄᑦ ᐱᓕᕆᐊᔅᓴᒥ (ELCD) ᓯᕗᓕᕋᔭᖅᑐᖅ ᑲᒪᔨᐅᓂᕐᒥᑦ ᑖᒃᑯᓂᖓ ᐃᓄᓐᓄᑦ−ᑐᕌᖓᔪᓄᑦ ᐃᓕᓐᓂᐊᕈᑎᓕᐅᕐᓂᕐᒥᑦ. ᑖᓐᓇ ᐃᖅᑲᓇᐃᔮᖅᑖᖅᑐᖅ ᐱᓕᕆᐊᖃᓪᓗᐊᑕᕋᔭᖅᑐᖅ ᑖᒃᑯᐊ ᐱᓕᕆᐊᔅᓴᓕᐊᕈᓯᒪᔭᖏᑦ ᐃᓕᓐᓂᐊᓕᓵᖅᑐᓂᑦ ᓱᕈᓰᓪᓗ ᐃᓕᓐᓂᐊᕐᓂᖏᓐᓄᑦ ᑲᒪᒋᔭᐅᖁᓪᓗᒋᑦ ᐃᓕᖅᑯᓯᖅᑎᒍᑦ ᑐᙵᓂᖃᑦᑎᐊᕐᓗᓂ, ᓄᓇᓕᓐᓅᖓᔪᓄᑦ, ᐊᒻᒪᓗ ᐱᓕᕆᐊᖏᓐᓃᖔᖅᑐᓂᑦ ᓴᖅᑭᑎᑦᑎᓂᕐᒥᑦ−ᑐᕌᒐᕆᓗᒍ.
ᑲᒪᔭᕆᐊᓕᖏᓐᓂᑦ ᑕᕝᕙᓂ ᐃᖅᑲᓇᐃᔮᒥᑦ ᐃᓚᖃᖅᑐᖅ ᐱᓕᕆᖃᑎᖃᕐᓂᕐᒥᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓕᕆᕝᕕᖁᑎᖏᓐᓂ, ᐱᓕᕆᖃᑕᐅᔪᓂᑦ ᐊᒻᒪᓗ ᓄᓇᓕᓐᓃᑦᑐᑦ ᑲᑐᔾᔨᖃᑎᒌᖑᔪᓂᑦ, ᓯᓚᑖᓃᑦᑑᑦ ᐱᓕᕆᐊᔅᓴᓂᑦᑎᑕᐅᓯᒪᔪᑦ, ᐃᓕᓐᓂᐊᑎᑦᑎᔩᑦ/ᑲᑎᒪᑎᑦᑎᔩᑦ, ᐱᖃᑕᐅᔪᑦ, ᓯᓚᑖᖔᖓᔪᓂᑦ ᑮᓇᐅᔭᖃᖅᑎᑦᑎᔨᐅᔪᓂᑦ. ᑖᓐᓇ ᐃᖅᑲᓇᐃᔮᖅ ᑲᒪᒋᔭᖃᖅᑐᖅ ᐊᑐᐃᓐᓇᕈᖅᓴᐃᓂᕐᒥᑦ ᐱᓕᕆᕝᕕᒻᒨᖓᔪᓂᑦ ᐅᓂᒃᑳᓕᐅᕐᓂᕐᒥᑦ ᐊᒻᒪᓗ ᐃᑲᔪᕐᓂᕐᒥᑦ ᓯᓚᑖᓅᖓᔪᓂᑦ ᐅᓂᒃᑳᓕᐅᕐᓂᕐᒥᑦ. ᑖᓐᓇ ᐃᖅᑲᓇᐃᔮᖅ ᐃᑲᔪᖃᑦᑕᖅᑐᖅ ᐅᓂᒃᑳᓕᐅᕐᓂᕐᒥᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑲᑎᒪᔨᕋᓛᖏᓐᓄᑦ ᐊᒻᒪᓗ ᑲᑎᒪᔨᖏᓐᓄᑦ ᑲᒪᒋᔭᖏᓐᓂᑦ ᐊᒻᒪᓗ ᖃᓄᐃᓕᖓᓂᖏᓐᓂᑦ ᑖᒃᑯᐊ ᐃᓕᓐᓂᐊᓕᓵᖅᑐᓂᑦ ᓱᕈᓰᓪᓗ ᐃᓕᓐᓂᐊᕐᓂᖏᓐᓄᑦ−ᑐᕌᖓᔪᑦ ᐱᓕᕆᔅᓴᓕᐊᖑᓯᒪᔪᑦ ᑖᒃᑯᓄᖓᖃᑦᑕᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐅᕝᕙᓘᓐᓃᑦ ᑐᓂᔭᖏᑦ, ᑮᓇᐅᔭᖅᑖᕈᓯᐊᑦ.
ᐊᔪᙱᓐᓂᕆᔭᕆᐊᓕᖏᑦ ᑲᒪᔨᐅᓂᐊᕐᓗᓂ ᐃᑲᔪᖅᓱᐃᒍᓐᓇᖁᓪᓗᒍᓪᓗ ᐱᕙᓪᓕᐊᑎᑦᑎᓂᕐᒧᑦ, ᐱᓕᕆᐊᖃᕐᓂᕐᒧᑦ, ᖃᐅᔨᓴᕐᓂᕐᒧᓪᓗ ᑐᕌᖓᔪᓂᑦ ᐱᓕᕆᐊᔅᓴᖏᑦ ᐃᓄᐃᑦ ᓱᕈᓯᖏᓐᓂᑦ ᐃᓚᒌᓄᓪᓗ ᐱᔨᑦᑎᕈᑕᐅᔪᓂᑦ. ᑖᓐᓇ ᐃᖅᑲᓇᐃᔮᖅᑖᖅᑐᖅ ᐃᑲᔪᕋᔭᖅᑐᖅ ᐸᕐᓇᐅᑎᓕᐅᕐᓂᕐᒥᑦ ᐊᑐᓕᖅᑎᑦᑎᓂᕐᒥᓪᓗ ᐱᓕᕆᐊᔅᓇᖏᓐᓂᑦ, ᐅᓪᓗᖏᑕ ᐋᖅᑭᓱᖅᓯᒪᓂᖏᓐᓂᑦ, ᐱᓕᕆᔾᔪᑎᔅᓴᖏᓐᓂᓪᓗ, ᐊᒻᒪᓗ ᐱᓕᕆᔾᔪᑕᐅᔪᓐᓇᖅᑐᓂᑦ. ᑖᓐᓇ ᑲᒪᔨ ᓯᕗᓪᓕᖅᐹᖑᓗᓂ ᐃᑲᔪᖅᑎᒋᔭᐅᔪᖅ ᐊᒻᒪᓗ ᑕᓯᐅᖅᓯᓗᓂ ᐃᓄᐃᑦ ᐃᑲᔪᖅᑕᐅᔪᑦ ᐊᒻᒪᓗ ᓄᓇᓖᑦ ᐱᓕᕆᖃᑎᒋᔭᖏᓐᓂᑦ ᑲᒪᔨᐅᓗᓂ, ᐃᑲᔪᕐᓗᓂ ᖃᓄᐃᓕᐅᕈᑕᐅᓂᐊᖅᑐᓂᑦ ᐸᕐᓇᐅᑎᓕᐅᕐᓂᕐᒥᑦ ᐊᒻᒪᓗ ᐋᖅᑭᒍᑎᔅᓴᓂᑦ, ᖃᐅᔨᓇᓱᕐᓂᕐᒧᑦ ᖃᐅᔨᓴᖃᑦᑕᕐᓗᓂ ᓱᕋᓰᑦ ᐃᓕᓐᓂᐊᓕᓵᖅᑐᑦ ᐱᔭᕆᐊᓕᖏᓐᓂᑦ, ᐃᓄᐃᑦ ᖃᓄᐃᑦᑑᓂᖏᓐᓄᑦ ᐊᒻᒪᓗ ᓇᒦᓐᓃᖏᓐᓄᑦ ᐊᒻᒪᓗ ᐃᓄᐃᑦ ᑮᓇᐅᔭᓕᐅᕋᓱᐊᕐᓂᖏᓐᓄᑦ ᖃᐅᔨᓴᕐᓂᕐᒥᑦ. ᑲᑐᔾᔨᓂᒃᑯᑦ ᐱᓕᕆᖃᑎᒌᖑᔪᓂᑦ ᐃᑲᔪᕐᓗᓂᓗ ᐊᒻᒪᓗ ᐱᓕᕆᕝᕕᐅᑉ ᐃᓗᐊᓂ ᓯᓚᑖᓂᓗ ᑲᒪᖃᑎᒌᓐᓂᖏᓐᓂᑦ ᓯᕗᒧᒍᓐᓇᖁᓪᓗᒋᑦ ᑐᕌᒐᓕᐊᕆᓯᒪᔭᖏᑦ ᐊᒻᒪᓗ ᐋᖅᑭᓱᑦᑎᐊᖅᓯᒪᓗᒋᑦ ᐊᒻᒪᓗ ᐊᑐᖅᑕᐅᒐᓐᓂᖅᑑᓗᑎᑦ ᖃᕆᓴᐅᔭᒃᑰᖓᔪᓂᑦ ᑎᑎᖅᑲᖏᑦ ᑮᓇᐅᔭᓕᕆᔾᔪᑏᑦ, ᑕᑎᒋᔭᐅᓗᓂ ᐅᖃᐅᔾᔨᒋᐊᖅᑎᐅᓗᓂ ᐊᒻᒪᓗ ᐊᐅᓚᑦᑎᓂᕐᒥᑦ ᐱᖁᑎᖏᓐᓂᑦ ᐱᓕᕆᐊᔅᓴᒥᑦ ᐊᒻᒪᓗ ᐱᔨᑦᑎᕋᕐᓂᕐᒧᑦ ᑲᒪᒋᔭᐅᔪᓂᑦ. ᖃᓄᖅᑑᕐᓂᒃᑯᓪᓗ ᐋᖅᑭᒋᐊᕈᑎᔅᓴᓕᐅᖃᑦᑕᕐᓗᑎᑦ ᐱᐅᓯᒋᐊᕈᑎᔅᓴᓂᓪᓗ ᐱᓕᕆᐊᑦ ᐊᐅᓚᓂᖏᑕ ᓄᓇᓕᓐᓂᓪᓗ ᐃᓚᒋᔭᐅᑎᑦᑎᓂᕐᒨᖓᔪᓂᑦ. ᐃᓄᑦᑎᑑᕈᓐᓇᑦᑎᐊᕆᐊᓕᒃ ᑖᔅᓱᒥᖓ ᐃᖅᑲᓇᐃᔭᖅᑎᐅᓗᓂ.
ᑖᔅᓱᒥᖓ ᐃᖅᑲᓇᐃᔮᒥ ᓯᓚᑦᑐᓴᕐᒥᕕᒻᒥᑦ ᐃᓕᓐᓂᐊᖅᓯᒪᓂᕐᒧᑦ ᓇᓗᓇᐃᒃᑯᑕᖃᕆᐊᓕᒃ: ᐅᑦᑑᑎᒋᓗᒍ, ᓄᓇᕗᑦ ᓯᕗᓂᒃᓴᕗᑦ, ᑕᒪᒃᑯᐊᓘᓐᓃᑦ ᐊᔾᔨᖏᑦ ᐃᓕᓐᓂᐊᖅᓯᒪᓃᑦ. ᓯᓚᑦᑐᓴᕐᕕᒻᒥᑦ ᓱᕈᓯᓕᕆᔨᐅᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᓪᓗ ᐃᓕᓐᓂᐊᖅᓯᒪᓗᓂ ᐱᐅᒋᔭᐅᓪᓗᓂ ᑭᓯᐊᓂ ᖃᓄᐃᙱᑦᑐᖅ ᐱᓯᒪᙱᓪᓗᒋᑦ. ᐃᓕᓐᓂᐊᖅᓯᒪᓂᖏᑦ ᐊᒻᒪᓗ/ᐅᕝᕙᓘᓐᓃᑦ ᐃᖅᑲᓇᐃᔭᖃᑦᑕᖅᓯᒪᓂᖓᓄᑦ ᓈᒻᒪᒋᔭᐅᔪᓐᓇᕐᒥᔪᑦ. ᐱᕋᔭᖃᑦᑕᕐᓂᑰᒻᒪᖔᖅ ᖃᐅᔨᓴᖅᑕᐅᔾᔪᑎᒥ ᑐᓂᓯᔭᕆᐊᓕᒃ.
ᑮᓇᐅᔾᔭᔅᓵᖏᑦ ᐃᖅᑲᓇᐃᔮᒧᑦ ᐱᒋᐊᖅᓯᒪᕕᖃᕈᓐᓇᖅᑐᑦ $84,275-ᒥ $101,068-ᒧ ᐊᕐᕌᒍᓕᒫᒧᑦ ᑲᑎᓪᓗᒋᑦ.
ᐊᒻᒪᓗ ᐅᑭᐅᖅᑕᖅᑐᒥᐅᑕᐅᓂᖓᓄᑦ ᐃᓚᒍᑕᖏᑦ $27,600.00 ᐊᕐᕌᒍᓕᒫᒧᑦ.
ᐃᓪᓗᔅᓴᖃᖅᑎᑕᐅᙱᑦᑐᖅ.
ᐊᐱᕐᓱᖅᑕᐅᒍᒪᒐᔭᖅᑐᑦ ᑭᓯᐊᓂ ᐅᖃᕐᕕᐅᖃᑦᑕᓛᕐᒥᔪᑦ.
ᐃᖅᑲᓇᐃᔭᖅᑖᕋᓲᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᓇᔅᓯᐅᑎᓗᒋᑦ ᐅᕗᖓ:
Human Resources ᐃᕐᖐᕐᓈᑦᑕᐅᑎᒃᑯᑦ: Resumes@qia.ca
Qikiqtani Inuit Association ᐅᖄᓚᐅᑎᒃᑯᑦ: (867) 975-8400
200-922 Sivumigiaq Street ᓱᑲᔪᒃᑯᑦ: (867) 979-3238
Igluvut building, 2nd floor ᑕᑯᓂᐊᕐᓗᒍ: Tuttarvik.qia.ca
Iqaluit, NU X0A 3H0
ᒪᑐᕕᔅᓴᖓᑕ ᐅᓪᓗᖓ: ᒪᑐᐃᖓᓂᐊᖅᑐᖅ ᐃᓐᓄᒐᓱᓐᓂᖓᓂ