ᐃᖅᑲᓇᐃᔭᖅᑎᓄᑦ/ᐃᓄᓕᒫᓄᑦ ᐃᖅᑲᓇᐃᔮᔅᓴᖅ ᐃᖅᑲᓇᐃᔮᖅ: ᑐᑭᒧᐊᑦᑎᑦᑎᔨᒧᑦ ᐃᑲᔪᖅᑎ, ᓄᓇᓕᕆᔨᒃᑯᑦ ᐊᓪᓚᕝᕕᐊᓂ

ᐃᖅᑲᓇᐃᔭᖅᑎᓄᑦ/ᐃᓄᓕᒫᓄᑦ ᐃᖅᑲᓇᐃᔮᔅᓴᖅ ᐃᖅᑲᓇᐃᔮᖅ: ᑐᑭᒧᐊᑦᑎᑦᑎᔨᒧᑦ ᐃᑲᔪᖅᑎ, ᓄᓇᓕᕆᔨᒃᑯᑦ ᐊᓪᓚᕝᕕᐊᓂ

 In jobs-inuk

ᐃᖅᑲᓇᐃᔭᖅᑎᓄᑦ/ᐃᓄᓕᒫᓄᑦ ᐃᖅᑲᓇᐃᔮᔅᓴᖅ
ᐃᖅᑲᓇᐃᔮᖅ: ᑐᑭᒧᐊᑦᑎᑦᑎᔨᒧᑦ ᐃᑲᔪᖅᑎ, ᓄᓇᓕᕆᔨᒃᑯᑦ ᐊᓪᓚᕝᕕᐊᓂ
ᖃᓄᖅ ᐋᖅᑭᓯᒪᓂᐊᖅᑲ: ᐃᖅᑲᓇᐃᔮᖑᐃᓐᓇᓂᐊᖅᑐᖅ
ᓇᒥ: ᐃᖃᓗᐃᑦ
ᒪᑐᐃᖓᔪᖅ: ᓄᓇᕗᒻᒥᐅᓄᑦ ᐃᓄᓐᓄᑦ ᐃᖅᑲᓇᐃᔮᔅᓴᕐᓯᐅᖅᑐᓄᑦ ᑭᓯᐊᓂ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᓇᓗᓇᐃᖅᑕᐅᓯᒪᓪᓗᑎᒃ ᐃᓄᓐᓄᑦ ᑲᑐᔾᔨᖃᑎᒌᖑᒻᒪᑕ ᓄᓇᓕᕆᔨᐅᓂᕐᒧᑦ ᐃᓄᐃᑦ ᓄᓇᖁᑎᖏᓐᓂᒃ (IOL) ᕿᑭᖅᑕᓂ. ᓄᓇᓕᕆᔨᒃᑯᑦ ᐊᓪᓚᕝᕕᐊ (DLRM) ᖃᐅᔨᒪᒋᐊᖃᑦᑕᓲᑦ ᐃᓯᖅᑕᐅᖃᑦᑕᕈᓐᓇᕐᓂᖏᑦ ᐃᓄᐃᑦ ᓄᓇᖁᑎᖏᑦ ᐋᖅᑭᓯᒪᑦᑎᐊᖃᑦᑕᕋᓗᐊᕐᒪᖔᖅ ᐱᕙᓪᓕᐊᔪᓕᕆᓂᕐᒧᑦ, ᓴᐳᔾᔨᓂᕐᒧᑦ ᐊᒻᒪᓗ ᐃᑉᐱᒍᓱᑦᑎᐊᓂᕐᒧᑦ ᐃᓄᐃᑦ ᓄᓇᒥᒃ ᐊᑐᖃᑦᑕᕐᓂᖏᓐᓂᒃ ᓄᓇᕗᒥ ᓇᓗᓇᐃᖅᑕᐅᓯᒪᓂᖓᓂ.

ᑐᑭᒧᐊᑦᑎᑦᑎᔨᒧᑦ ᐃᑲᔪᖅᑎ ᐃᖅᑲᓇᐃᔮᓕᒃ ᐊᐅᓚᓂᖏᓐᓄᑦ ᐊᑑᑎᖃᓪᓗᐊᑕᖅᑐᒥᒃ ᐊᒻᒪᓗ ᐊᐅᓚᓂᕆᕙᑦᑕᖏᓐᓄᑦ ᐱᓕᕆᐊᕐᒥ ᓯᕗᓕᖅᑎᓪᓗᐊᑕᐅᓪᓗᓂ ᐊᓪᓚᕕᒻᒥ; ᑕᕝᕙᓂ ᐃᖅᑲᓇᐃᔮᕐᒥ ᑲᒪᒋᔭᖃᖃᑦᑕᓂᐊᖅᑐᖅ ᓄᓇᓕᕆᔨᒃᑯᑦ ᐊᓪᓚᕝᕕᐊᓂ ᐱᓕᕆᐊᔅᓴᓂᑦ ᐱᓕᕆᐊᓂᓪᓗ, ᑎᓕᓯᖃᑦᑕᕐᓗᓂ ᐃᖅᑲᓇᐃᔮᖑᓂᐊᖅᑐᓂᑦ ᐊᒻᒪᓗ ᑐᑭᒧᐊᑦᑎᑦᑎᖃᑦᑕᕐᓗᓂ ᐃᖅᑲᓇᐃᔭᖅᑎᓂᑦ. ᑐᑭᒧᐊᑦᑎᑦᑎᔨᖃᕐᓗᓂ ᑐᑭᒧᐊᑦᑎᑦᑎᔨᖓᓐᓂᒃ, ᑕᕝᕙᓂ ᐃᖅᑲᓇᐃᔮᕐᒥ ᐃᑲᔪᖃᑦᑕᓂᐊᕐᒥᔪᖅ ᐱᕙᓪᓕᐊᑎᑦᑎᓂᕐᒥᒃ ᐊᑐᐊᒐᕐᓂᑦ ᐋᖅᑭᓱᖅᑕᐅᓯᒪᔪᓂᑦ ᐋᖅᑭᐸᓪᓕᕈᑎᔅᓴᐅᔪᓂᑦ ᕿᑭᖅᑕᓂᒃᑯᑦ ᐊᐅᓚᑦᑎᒍᓐᓇᖃᑦᑕᕐᓂᖏᓐᓂᒃ ᐅᓪᓗᒥ ᓯᕗᓂᔅᓴᑎᓐᓂᓗ ᐱᕙᓪᓕᐊᑎᑕᐅᔪᓂᑦ ᐱᓕᕆᐊᕐᓂᑦ. ᐊᒻᒪᓗᑦᑕᐅᖅ, ᑕᕝᕙᓂ ᐃᖅᑲᓇᐃᔮᕐᒥ ᖃᐅᔨᒪᒋᐊᑦᑎᐊᖃᑦᑕᓂᐊᕐᒥᔪᖅ ᑲᑦᑐᖓᐃᕈᑕᐅᓯᒪᔪᑦ ᐊᒻᒪᓗ ᐊᑐᖅᑕᐅᔭᕆᐊᓖᑦ ᐊᖏᖃᑎᒌᒍᑎᑎᒍᑦ ᐊᒻᒪᓗ ᑳᓐᑐᓛᑎᒍᑦ ᐱᔾᔪᑎᒋᓪᓗᒋᑦ ᐊᖏᔫᑏᑦ ᐱᓕᕆᐊᑦ, ᕿᑭᖅᑕᓂᒃᑯᑦ ᑲᑐᔾᔨᖃᑕᐅᕕᖏᓐᓂ, ᑲᔪᓯᑎᑕᐅᑦᑎᐊᖃᑦᑕᕋᓗᐊᕐᒪᖔᑕ ᓈᒻᒪᓈᕐᓯᒪᔪᒥᒃ ᐊᑑᑎᖃᑦᑎᐊᖅᑐᒥᓪᓗ.

ᑐᑭᒧᐊᑦᑎᑦᑎᔨᒧᑦ ᐃᑲᔪᖅᑎ ᑲᒪᒋᔭᖃᖃᑦᑕᓂᐊᖅᑐᖅ ᖃᐅᔨᓴᖃᑦᑕᕐᓗᓂ ᐱᓕᕆᓂᐅᔪᓂᑦ ᐊᒻᒪᓗ ᐱᓕᕆᓂᖏᓐᓂᒃ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᑕ ᑳᓐᑐᓛᒃᓯᒪᔭᖏᑕᓗ ᐃᓘᓐᓇᖏᓐᓂᒃ ᐱᓕᕆᐊᔅᓴᓂᑦ ᐱᓕᕆᐊᓂᓪᓗ ᓄᓇᓕᕆᓂᕐᒨᖓᔪᓂᑦ ᐃᓄᐃᑦ ᓄᓇᖁᑎᖏᓐᓂᒃ ᐊᒻᒪᓗ ᓄᓘᔮᓕᕆᓂᕐᒥᒃ, ᑖᓐᓇ ᐊᖏᔪᒥᒃ ᓴᕕᕋᔭᔅᓴᒥᒃ ᐅᔭᕋᓐᓂᐊᕐᕕᐅᔪᖅ. ᑕᒪᒃᑯᐊ ᐃᖅᑲᓇᐃᔮᕆᖃᑦᑕᓂᐊᖅᑕᖏᑦ ᒪᑯᓂᖓ ᐃᓚᓖᑦ ᐋᖅᑭᔅᓱᐃᖃᑦᑕᓂᕐᒥᒃ ᐃᖅᑲᓇᐃᔮᔅᓴᓂᑦ ᐸᕐᓇᐅᑎᓂᑦ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐱᕙᓪᓕᐊᑎᑕᐅᒐᓗᐊᕐᒪᖔᖅ, ᓇᐅᑦᑎᕐᓱᖅᑕᐅᖃᑦᑕᕋᓗᐊᕐᒪᖔᖅ, ᒪᓕᖃᑦᑕᕋᓗᐊᕐᒪᖔᑕ, ᐊᒻᒪᓗ ᐅᓂᒃᑳᓕᐅᖃᑦᑕᕋᓗᐊᕐᒪᖔᑕ ᐱᓕᕆᐊᑦ ᒥᔅᓵᓄᑦ ᓈᒻᒪᓈᕐᓯᒪᔪᒥᒃ ᐊᑑᑎᖃᑦᑎᐊᖅᑐᒥᓪᓗ.

ᒪᑭᑕᑎᑦᑎᑎᐊᕐᓂᐊᖅᑐᖅ ᑕᕝᕙᓂ ᐃᖅᑲᓇᐃᔮᕐᒥ ᖃᐅᔨᒪᔭᖃᑦᑎᐊᕐᓗᓂ ᒐᕙᒪᓕᕆᓂᕐᒥᒃ, ᐃᓅᓯᕐᒨᖓᔪᓂᑦ ᐊᒻᒪᓗ ᐱᕙᓪᓕᐊᔪᓕᕆᓂᕐᒨᖓᔪᓂᑦ ᓄᓇᕗᒻᒥ, ᐊᒻᒪᓗ ᐅᔾᔨᕈᓱᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᔾᔪᑎᖓᓐᓂᒃ, ᐅᑉᐱᕆᔭᖏᓐᓂᒃ ᑐᕌᒐᖏᓐᓂᓪᓗ. ᖃᐅᔨᒪᔭᖃᑦᑎᐊᕆᐊᓕᒃ ᓄᓘᔮᓕᕆᓂᕐᒥᒃ, ᓄᓇᕗᒥ ᐊᖏᖃᑎᒌᒍᑎᓂᑦ ᐊᒻᒪᓗ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ. ᑕᕝᕙᓂ ᐃᖅᑲᓇᐃᔮᕐᒥ ᓯᕗᓕᖅᑎᐅᒍᓐᓇᑦᑎᐊᕆᐊᓕᒃ, ᐃᑲᔪᕐᓱᐃᒍᓐᓇᑎᐊᕐᓗᓂᓗ ᐊᒻᒪᓗ ᐱᓕᕆᖃᑎᒌᓐᓂᕐᒥᒃ ᐱᕙᓪᓕᐊᑎᑦᑎᓂᕐᒥᒃ ᑲᒪᒋᔭᖃᕈᓐᓇᕐᓗᓂ, ᕿᒥᕐᕈᔪᓐᓇᕐᓗᓂᓗ ᑎᑎᖅᑲᓂᑦ ᐊᒻᒪᓗ ᖃᐅᔨᓴᕈᓐᓇᕐᓗᓂ ᑐᑭᓯᐅᒪᔾᔪᑎᔅᓴᓂᑦ. ᑕᕝᕙᓂ ᐃᖅᑲᓇᐃᔮᕐᒥ ᑐᑭᓯᐅᒪᖃᑦᑕᐅᑎᖃᑎᖃᕈᓐᓇᑦᑎᐊᕆᐊᓕᒃ ᐊᒻᒪᓗ ᑐᓴᐅᒪᖃᑎᖃᕈᓐᓇᑎᐊᕐᓗᓂ ᐃᓄᒃᑎᑐᑦ ᐊᑑᑎᖃᑦᑎᐊᕋᔭᕐᒥᔪᖅ. ᐃᖅᑲᓇᐃᔮᖅᑖᕋᓱᑦᑐᑦ ᑕᑯᑎᑦᑎᔭᕆᐊᓖᑦ ᑕᓪᓕᒪᓂᑦ (5) ᐊᕐᕌᒍᓂᑦ ᐃᖅᑲᓇᐃᔮᖃᕐᓯᒪᓂᖏᓐᓂᒃ ᐱᓕᕆᐊᓕᕆᓂᕐᒥᒃ ᐊᒻᒪᓗ ᐱᖓᓱᓂᑦ (3) ᐊᕐᕌᒍᓂᑦ ᐃᖅᑲᓇᐃᔮᖃᕐᓯᒪᓂᖓᓂᒃ ᑐᑭᒧᐊᑦᑎᑦᑎᔨᐅᓂᕐᒥᒃ ᐊᒻᒪᓗ ᐱᓕᕆᓂᖏᓐᓂᒃ ᐊᐅᓚᑦᑎᖃᑦᑕᓂᕐᒥᒃ ᐃᖅᑲᓇᐃᔭᖅᑎᓂᑦ.

ᐊᑐᖅᑕᐅᒐᔪᑦᑐᖅ, ᐱᔭᕇᕐᓯᓯᒪᔭᕆᐊᓕᒃ ᐊᕙᑎᓕᕆᓂᕐᒥᒃ ᖃᐅᔨᓴᖅᑐᓕᕆᓂᕐᒥᒃ ᐅᕝᕙᓘᓐᓃᑦ ᑕᒪᑐᒪ ᒥᔅᓵᓄᑦ ᐃᓕᓐᓂᐊᕈᑕᐅᓲᒥᑦ. ᐱᓕᕆᐊᕐᒥ ᐊᐅᓚᑦᑎᓂᕐᒧᑦ ᐸᐃᑉᐹᖅᑖᕐᓯᒪᓗᓂ ᐃᓕᓐᓂᐊᕐᓯᒪᓂᖓᓂᒃ ᐊᑑᑎᖃᑦᑎᐊᕋᔭᖅᑐᖅ. ᑕᒪᒃᑮᓐᓂᒃ ᑕᒪᑐᒪ ᒥᔅᓵᓄᑦ ᐃᓕᓐᓂᐊᕐᓯᒪᑉᐸᑦ ᐊᒻᒪᓗ ᐃᖅᑲᓇᐃᔮᖃᕐᓯᒪᑉᐸᑦ ᑐᑭᓯᔭᐅᓯᒪᓂᐊᕐᒥᔪᖅ ᓈᒻᒪᓐᓂᖓᓂᒃ ᓇᓕᒧᑦᑎᓂᖓᓄᑦ ᑕᒪᑐᒥᖓ. ᓈᒻᒪᑦᑐᒥᒃ ᐱᕋᔭᓚᐅᕐᓯᒪᓂᑰᙱᒃᑲᓗᐊᕐᒪᖔᖅ ᖃᐅᔨᓴᖅᑕᐅᔾᔪᑎᖃᕆᐊᖃᕐᒥᔪᖅ.

ᑮᓇᐅᔾᔭᔅᓵᖏᑦ ᑕᕝᕙᓂ ᐃᖅᑲᓇᐃᔮᕐᒥ ᐊᒥᓲᓂᓖᑦ $105,840ᓂᑦ $155,230ᓄᑦ ᐊᕐᕌᒍᑕᒫᑦ, ᐊᒻᒪᓗᑦᑕᐅᖅ ᓄᓇᕗᒥ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᓯᐊᖅᑖᖃᑦᑕᕋᔭᖅᑐᖅ ᐊᒥᓲᓂᓕᓐᓂᑦ $27,600 ᐊᕐᕌᒍᑕᒫᑦ. ᐃᓪᓗᖃᖅᑎᑦᑎᒍᑕᐅᔾᔮᖏᑦᑐᖅ.

ᐃᖅᑲᓇᐃᔭᖅᑖᕋᓲᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᓇᔅᓯᐅᑎᓗᒋᑦ ᐅᕗᖓ:

Human Resources            ᐅᖄᓚᐅᑖ: (867) 975-8400
Qikiqtani Inuit Association       ᓱᒃᑲᔪᒃᑰᕈᑖ: (867) 979-3238
Igluvut building, 2nd floor
P.O. Box 1340                  ᐃᕐᖐᓈᖅᑕᐅᑖ: Resumes@qia.ca
Iqaluit, NU X0A 0H0

ᒪᑐᕕᔅᓴᖓ ᐅᓪᓗᖅ: ᐋᒡᒌᓯ 19, 2022 5:00 ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ

Recent Posts

ᑐᑭᓯᒋᐊᕐᕕᐅᑕ

ᑐᑭᓯᒋᐊᕆᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ