ᐊᓲᔪᓯ,

ᐅᕙᖓ ᓄᓇᑦᑎᓐᓂ ᑲᑎᒪᔨᐅᔪᖓ/ᓄᓇᑦᑎᓐᓂ ᑐᓴᐅᒪᑎᑦᑎᔨᐅᔪᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐊᒥᓲᓪᓗᓯ ᑐᓴᐅᒪᓕᕋᔅᓯ ᑐᓴᕈᒥᓇᖅᑐᐊᓘᓚᐅᖅᑐᒥᒃ ᓄᓇᕗᒥ ᐳᕝᕕᕆᓂᕐᒧᑦ ᖃᓂᒪᓇᖅᑐᖃᙱᓐᓂᖏᓂᒃ (ᓄᕙᕐᔪᐊᓇᖅᑐᒥᒃ).

ᖁᔭᓕᔪᒍᑦ ᐋᓐᓂᐊᖅᑐᓕᕆᔨᒃᑯᑦ ᐅᐸᓘᖅᑲᓇᖅᑐᖅᑕᖃᖅᑎᓪᓗᒍ ᑲᒪᔨᒋᕙᑦᑕᖏᑦ. ᒥᑦᑎᒪᑕᓕᓕᐊᔪᒻᒪᑕ ᖃᐅᔨᓴᕆᐊᖅᑐᖅᑐᑎᒃ ᐳᕝᕕᕆᓇᖅᑐᖅᑕᖃᕆᐊᔅᓴᖓᓂᒃ.

ᖁᔭᓐᓇᒦᒃ ᐊᔅᓱᕈᐊᖃᖅᑐᑎᒃ ᐃᖅᑲᓇᐃᔮᖃᕐᐸᒻᒪᑕ, ᖃᐅᔨᔭᐅᔪᒻᒪᑦ ᑖᓐᓇ ᓱᓕᙱᒋᐊᔅᓴᖓᓂᒃ ᑕᒻᒪᕐᓯᒪᔪᒥᓂᐅᓪᓗᓂ..

ᐱᕙᓪᓕᐊᔪᒃᑰᕈᑕᐅᓚᐅᖅᑎᓪᓗᒍ, ᐱᒻᒪᕆᐅᕗᖅ ᓱᓕ ᐊᓯᖏᓐᓂᒃ ᖃᓄᖅᑑᕈᑕᐅᔪᓂᒃ ᐊᑐᖃᑦᑕᕆᐊᖃᕐᓂᑎᓐᓂᒃ ᐋᓐᓂᐊᖅᑐᓕᕆᔨᓄᑦ ᐊᑐᖅᑕᐅᖁᔭᐅᓯᒪᔪᓂᑦ.

ᐊᒡᒐᓯ ᐅᐊᓴᕐᔫᒥᔭᐃᓐᓇᕐᓗᒋᑦ, ᖃᓂᒋᔭᖃᓗᐊᖅᑕᐃᓕᓗᓯ ᐊᓯᔅᓯᓐᓂᒃ, ᐊᖏᕐᕋᕐᓯᒪᐃᓐᓇᕋᓱᔾᔫᒥᓗᓯ.

ᐊᒥᓲᓪᓗᓯ ᑐᓴᐅᒪᒐᔅᓯ ᓄᓇᕗᑦ ᒐᕙᒪᒃᑯᖏᑦ ᐊᓯᔾᔩᓯᒪᒻᒪᑕ ᑐᑭᑖᕈᑎᒋᔪᔭᖓᓐᓂᒃ ᑭᒃᑯᑐᐃᓐᓇᐃᑦ ᓇᒻᒥᓂᖅ ᐊᑭᓖᖃᑦᑕᕆᐊᖃᕐᓂᐊᕐᓂᖏᓐᓂᒃ ᓇᒻᒥᓂᖅ ᐊᑐᖅᑕᐃᓴᐃᓐᓇᕆᐊᓕᒻᒥᒃ ᐊᓂᑦᑕᐃᓕᑲᐃᓐᓇᕆᐊᖃᖃᑦᑕᓂᐊᕐᓂᖏᓐᓂᒃ ᐅᑎᕐᐸᓪᓕᐊᓂᐅᓴᑎᓪᓗᒋᑦ ᓄᓇᕗᒧᑦ.

ᐱᖓᑦᑎᕐᒥ ᓇᓗᓇᐃᕐᓯᔪᒻᒪᑕ ᓱᓕ ᐊᑭᓖᓯᒪᖃᑦᑕᓂᐊᕐᓂᖏᓐᓂᒃ ᓄᓇᕗᒻᒥᐅᓂᑦ ᐊᓂᑦᑕᐃᓕᑲᐃᓐᓇᖃᑦᑕᕆᐊᖃᕐᓂᐊᖅᑐᓂᑦ ᐅᓪᓗᓂᑦ 14ᓂᑦ ᐅᑎᓚᐅᙱᓐᓂᖏᓐᓂ ᓄᓇᕗᒧᑦ.

ᓯᕗᓕᖅᑎ ᓴᕕᑲᑖᖅ ᐊᓯᖏᓪᓗ ᒐᕙᒪᒃᑯᓐᓂ ᐊᖏᔪᖅᑲᐅᑏᑦ ᑎᓕᐅᕆᒻᒪᑕ ᓄᓇᕗᒻᒥᐅᓂᑦ ᐊᐅᓪᓚᖃᑦᑕᖁᔨᙱᑲᓚᐅᖅᑐᑎᒃ ᒫᓐᓇᐅᔪᖅ. ᓄᓇᕗᒻᒥᐅᓂᑦ ᐊᐅᓪᓚᖃᑦᑕᖁᔨᒻᒪᑕ ᑭᓯᐊᓂ ᐊᐅᓪᓚᕆᐊᖃᓪᓚᕆᑦᑎᓪᓗᒋᑦ.

ᕿᑭᖅᑕᓂᒃᑯᑦ ᐃᓱᒫᓗᓇᕐᓯᓯᒪᑎᓪᓗᒍ ᐳᕝᕕᕆᓂᕐᒧᑦ ᖃᓂᒪᓇᖅᑐᖅ (ᓄᕙᕐᔪᐊᓇᖅᑐᖅ) ᐃᑲᔫᑎᖏᑦ ᓱᓕ ᐃᑲᔫᑎᐅᒻᒪᑕ ᕿᑭᖅᑕᓂ ᓄᓇᓕᓕᒫᓄᑦ.

ᕿᑭᖅᑕᓂ ᐃᓄᐃᑦ ᑐᔅᓯᕋᖃᑦᑕᕈᓐᓇᖅᑐᑦ ᐅᕙᒍᑦ  ᐃᓱᒫᓗᓇᕐᓯᓯᒪᑎᓪᓗᒍ ᐊᖑᓇᓱᑦᑎᓄᑦ ᐃᑲᔫᑎᖏᓐᓄᑦ  ᐃᓄᓕᓐᓃᕋᔭᙱᑲᐃᓐᓇᓂᐊᕐᖓᑕ ᐊᐅᓪᓚᕐᓯᒪᓗᑎᒃ. ᑖᒃᑯᐊ ᐃᑲᔫᑏᑦ ᐱᓇᓱᐊᕋᔅᓴᐅᕗᑦ ᔫᓂ 30ᒧᑦ ᑎᑭᓪᓗᒍ.

ᐃᓄᐃᑦ ᐅᑭᐅᓖᑦ 60 ᐅᖓᑕᓂ ᐃᑲᔫᓯᐊᖃᑦᑕᕈᓐᓇᕐᒥᔪᑦ ᐃᓄᑐᖃᕐᓄᑦ ᓂᕿᑖᕈᑎᔅᓴᓂᑦ ᓂᐅᕕᐅᑎᔅᓴᓂᑦ ᐃᓪᓗᓯᐅᑎᒐᓛᓐᓂᑦ ᐊᑐᕆᐊᖃᕐᐸᑦᑕᖏᓐᓂᒃ. ᐃᓘᓐᓇᑎᒃ ᕿᑭᖅᑕᓂᒥᐅᑦ ᐃᓄᑐᖃᐃᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᓐᓂ ᐊᑎᓕᐅᖅᑕᐅᑦᑕᐅᑎᒋᕙᑦᑐᑦ ᑖᒃᑯᓄᖓ ᐃᑲᔫᑎᓄᑦ. ᑭᖑᓪᓕᕐᒥ ᑐᓂᓯᔭᐅᓛᓕᕐᒥᔪᑦ ᒪᐃ 12ᖑᓕᖅᑲᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᐃᑲᔫᑏᑦ ᒥᔅᓵᓄᑦ ᐊᑏ ᑎᑎᕋᖃᑦᑕᕆᔅᓯ ᐃᕐᖐᓈᖅᑕᐅᑎᑦᑎᓐᓄᑦ: COVID-19@qia.ca ᐅᖄᓚᖃᑦᑕᕐᓗᓯᓘᓐᓃᑦ ᐅᕗᖓ: 1-867-975-8383.

ᓇᓪᓕᓐᓇᒥᐅᒐᓗᐊᖅ ᓇᓗᓇᐃᕐᓯᔭᕆᐊᖃᓚᐅᕋᑦᑕ  ᐃᓅᔪᓐᓃᕐᓂᖓᓂᒃ ᓄᓇᓕᓐᓂ ᑲᑎᒪᔨᒋᓚᐅᖅᑕᑯᓗᑉᐳᑦ ᐃᒡᓗᓕᖕᒥᐅᑕᖅ, ᔮᓂ ᒪᓚᐃᔭ ᑯᑉᓗ.

ᓯᕗᓕᕐᓯᑦᑎᐊᕐᓂᐊᓗᒋᓚᐅᖅᑕᖓ ᐊᒻᒪᓗ ᐃᑉᐱᒍᓱᓪᓚᕆᓐᓂᕆᓚᐅᖅᑕᖓ ᐊᑐᖅᑕᐅᖏᓐᓇᖁᓪᓗᒋᑦ ᐱᖅᑯᓯᖅᑎᒍᑦ ᖃᐅᔨᒪᓂᕆᔭᐅᔪᑦ ᐱᕙᓪᓕᐅᑎᑎᑦᑎᓯᒪᔪᑦ ᕿᑭᖅᑕᓂ ᓄᓇᓕᓕᒫᓄᑦ ᐃᓄᓐᓄᑦ.

ᕿᑭᖅᑕᓂᒃᑯᑦ ᓇᓪᓕᒍᓱᑉᐳᑦ ᐃᓚᖏᓐᓂᒃ, ᐱᖃᑎᖏᓐᓂᒃ ᓄᓇᖅᑲᑎᖏᓐᓂᓪᓗ.

ᐱᔭᕇᕈᑎᒋᓗᒍ, ᐃᖅᑲᐅᒪᓂᐊᖅᑯᓯ . . . ᓯᐊᒻᒪᖁᓇᒍ ᐳᕝᕕᕆᓂᕐᒧᑦ ᖃᓂᒪᓇᖅᑐᖅ:

• ᐅᐊᓴᕐᔫᒥᔭᒐᖃᑦᑕᕐᓯᐅᒃ ᐊᒡᒐᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ (ᑕᓕᕐᓯᓐᓄᑦ ᐃᑯᓯᑉᐱᑦ ᓇᓛᓄᑦ)
• ᐊᑐᕐᔫᒥᓇᓱᓪᓗᓯ ᐃᓅᖃᑎᔅᓯᓐᓂᒃ ᖃᓂᒋᔭᖃᓗᐊᖅᑕᐃᓕᖃᑦᑕᓂᕐᒥᒃ
• ᐊᖏᕐᕋᕐᓯᒪᐃᓐᓇᕋᓱᔾᔫᒥᓗᓯ
• ᐊᓪᓚᑎᕐᔫᒥᔭᒐᓪᓗᒋᑦ ᑭᓱᑐᐃᓐᓇᐃᑦ ᐲᕐᓴᐅᑎᓕᒻᒧᑦ

ᐱᔪᓐᓇᕐᓂᖃᕐᓂᕐᓴᐅᕗᒍᑦ ᑲᑐᔾᔨᓗᑕ:

• ᓇᓪᓕᑦᑎᒌᓪᓗᓯ
• ᓴᐳᑎᓗᒋᑦ ᐃᓱᒫᓗᓇᕐᓂᕐᓴᐃᑦ
• ᐃᑲᔪᕐᓗᓯ ᓄᓇᖅᑲᑎᔅᓯᓐᓂᒃ

ᑕᐃᒪᐃᒍᓐᓇᕋᐃᒍᔅᓯ, ᖃᐅᔨᒋᐊᕐᔫᒥᔭᒐᖃᑦᑕᕐᓗᒋᑦ ᐃᓄᑐᖃᐃᑦ ᐅᕝᕙᓘᓐᓃᑦ ᐃᓱᒫᓗᓇᖅᑐᒦᓐᓂᕐᓴᐃᑦ ᐱᖃᑎᓯ ᐅᕝᕙᓘᓐᓃᑦ ᐃᓚᓯ ᐃᑲᔪᖅᑕᐅᒋᐊᖃᙱᒃᑲᓗᐊᕐᒪᖔᑕ.

ᐅᖄᓚᕕᒋᖃᑦᑕᕐᓗᒋᑦ, ᐃᓄᔅᓯᐅᑎᓂᑦ ᓂᕿᓂᑦ ᐸᔪᖃᑦᑕᕐᓗᒋᑦ ᑭᓱᑐᐃᓐᓇᓂᓪᓘᓐᓃᑦ ᐹᖓᓅᕈᔾᔨᖃᑦᑕᕐᓗᓯ, ᑭᓯᐊᓂ ᐳᓛᖅᑕᐃᓕᓗᓯ.

ᐊᑏ ᖃᐅᔨᒋᐊᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓄᑦ ᐅᕗᖓ qia.ca ᑐᑭᓯᒋᐊᒃᑲᓐᓂᕈᒪᒍᔅᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᕐᓂᑦ ᐱᕙᓪᓕᐊᔪᓂᑦ ᖃᐅᔨᒋᐊᖃᑦᑕᕈᓐᓇᕐᒥᔪᓯ ᐊᒻᒪᓗ ᑐᑭᓯᑎᑦᑎᒋᐊᕈᑎᓂᑦ ᐅᑯᓇᙵᑦ ᖃᕋᓴᐅᔭᒃᑯᑦ ᐃᑭᐊᖅᑭᔾᔪᑎᒋᕙᑦᑕᑎᓐᓂᒃ ᕙᐃᔅᐳᒃ Facebook, ᑐᐃᑐ Twitter ᐊᒻᒪᓗ ᐊᔾᔨᙳᐊᓕᕆᔾᔪᑎ Instagram.

ᖁᔭᓐᓇᒦᓪᓚᕆᐊᓘᔪᓯ ᐱᕕᖃᖅᑎᑕᐅᑲᐃᓐᓇᕋᒪ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᙱᑦᑎᐊᖁᓇᕆᕗᓯᓗ.