ᐃᖃᓗᐃᑦ, ᓄᓇᕗᑦ – ᔪᓚᐃ 7, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᑐᓂᓯᐅᖅᑲᐃᓂᐊᖅᑐᑦ $100,000ᓂᑦ ᐊᖑᓇᓱᑦᑐᓕᕆᔨᖏᓐᓄᑦ (ᐆᒪᔪᕐᓂᐊᑎᒃᑯᓐᓄᑦ) ᑕᓪᓕᒪᓄᑦ ᑕᓪᓗᕈᑎᐅᑉ ᐃᒪᖓᑕ ᑲᓇᑕᒥ ᐃᒪᓂ ᓴᐳᔾᔨᕕᐅᑉ ᐊᕙᑖᓂ ᓄᓇᓕᐅᔪᓄᑦ ᐅᑯᓄᖓ ᐃᒃᐱᐊᔪᒃ, ᑲᖏᖅᑐᒑᐱᒃ, ᐊᐅᓱᐃᑦᑐᖅ, ᒥᑦᑎᒪᑕᓕᒃ ᐊᒻᒪᓗ ᖃᐅᓱᐃᑦᑐᖅ.

ᑮᓇᐅᔭᑦ ᐃᓚᒋᔭᐅᕗᑦ ᐱᕚᓪᓕᕈᑎᔅᓴᓄᑦ ᐋᔩᕋᕈᑕᐅᓯᒪᔪᓄᑦ ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᓄᑦ (IIBA) ᑲᓇᑕᐅᑉ ᒐᕙᒪᒃᑯᖏᓐᓄᑦ ᐋᒡᒌᓯ 2019ᖑᑎᓪᓗᒍ.

“ᖁᕕᐊᓱᓪᓚᕆᑦᑐᖓ ᑕᑯᔭᕆᐊᔅᓴᖅ ᐱᓪᓚᑦᑖᓂᑦ ᐱᕚᓪᓕᕈᑎᔅᓴᓂᑦ, ᐋᔩᕋᕈᑕᐅᓯᒪᔪᓂᑦ ᑕᓪᓗᕈᑎᐅᑉ ᐃᒪᖓᓂ ᐊᖏᖃᑎᒌᒍᑎᓄᑦ, ᓄᓇᓕᓐᓄᑦ ᑐᕌᖅᑐᓂᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑐᕌᒐᖃᕋᑦᑕ ᑖᒃᑯᐊ ᐊᖏᖃᑎᒌᒍᑏᑦ ᐊᖅᑯᑎᒋᓪᓗᒋᑦ ᓴᐳᔾᔨᓂᑐᐃᓐᓇᐅᓂᐊᙱᑦᑐᒥᒃ ᐃᒪᑦᑎᓐᓂᒃ ᑭᓯᐊᓂᓕ ᐱᓇᓱᐊᕋᔅᓴᖃᖁᓪᓗᒋᑦᑕᐅᖅ ᓄᓇᓕᖁᑎᕗᑦ. ᐊᖑᓇᓱᑦᑐᓕᕆᔨᒃᑯᑦ ᐃᒻᒧᐊᓃᒻᒪᑕ ᕿᑭᖅᑕᓂ ᓄᓇᓕᐅᔪᓂᑦ, ᐊᑑᑎᖃᕐᓂᕐᐹᖑᕙᒻᒪᑕ ᐱᖅᑯᓯᖅᑎᒍᑦ ᐃᓕᓯᒪᔭᑦᑎᓐᓂᒃ ᐆᒪᑎᑦᑎᓂᕐᒥᒃ, ᓇᐅᑦᑎᕐᓱᖃᑦᑕᓂᕐᒥᒃ ᐊᕙᑎᑦᑎᓐᓂᒃ ᐊᒻᒪᓗ ᓂᕆᑎᑦᑎᖃᑦᑕᓂᕐᒥᒃ ᓄᓇᓕᑦᑎᓐᓂᒃ.”

ᑮᓇᐅᔭᐃᑦ ᐃᑲᔫᑎᐅᒍᒫᕐᓂᐊᕐᓯᒪᒻᒪᑕ ᐊᖑᓇᓱᑦᑐᓕᕆᔨᒃᑯᓐᓄᑦ ᐱᔪᓐᓇᕐᓯᑎᑕᐅᒋᐊᒃᑲᓐᓂᖁᓪᓗᒋᑦ ᖃᓄᖅᑑᕈᑎᖃᖃᑦᑕᕈᓐᓇᓂᕐᒥᒃ ᕿᓄᕕᐅᒋᐊᒃᑲᓐᓂᖃᑦᑕᓕᖅᑎᓪᓗᒋᑦ ᐃᖅᑲᓇᐃᔮᖏᓐᓅᖓᔪᓂᑦ ᒪᓕᑦᑐᒋᑦ ᓄᓇᕗᑦ ᐊᖏᖃᑎᒌᒍᑎᖏᑦ, ᓴᖅᑭᖅᑐᑦ ᐋᖅᑭᑦᑕᐅᓂᖓᓄᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒃ.

ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᑎᒍᑦ ᑕᓪᓕᒪᑦ ᐊᖑᓇᓱᑦᑐᓕᕆᔨᒃᑯᑦ ᑐᓂᓯᔭᐅᖃᑦᑕᓂᐊᖅᑐᑦ $250,000ᓂᑦ ᐊᕐᕌᒍᑕᒫᑦ ᑮᓇᐅᔭᓄᑦ ᐊᐅᓚᕖᑦ ᒪᓕᑦᑐᒋᑦ. $100,000 ᐊᑐᓂᑦ ᐊᖑᓇᓱᑦᑐᓕᕆᔨᒃᑯᓐᓄᑦ ᑐᓂᔭᐅᓂᐊᖅᑐᑦ 2019-2020ᒥ ᐊᒻᒪᓗ 2020-2021ᒥ ᑮᓇᐅᔭᓄᑦ ᐊᐅᓚᕖᓐᓄᒃ ᐊᕐᕌᒎᓐᓄᒃ.

ᕿᑭᖅᑕᓂᒃᑯᑦ ᑐᑭᓯᒋᐊᕐᕕᖃᔪᔪᑦ ᐊᑐᓂᑦ ᐊᖑᓇᓱᑦᑐᓕᕆᔨᒃᑯᓐᓂᑦ ᔮᓐᓄᐊᓕᐅᑎᓪᓗᒍ ᕖᕝᕗᐊᓕᐅᑎᓪᓗᒍᓗ 2020 ᐱᔾᔪᑎᒋᓪᓗᒋᑦ ᐃᑲᔪᖅᑕᐅᔾᔪᑎᒋᒋᓕᐊᖏᑦ ᐊᒻᒪᓗ ᐸᕐᓇᐅᑎᖏᑦ ᑖᒃᑯᓄᖓ ᑮᓇᐅᔭᓄᑦ. ᐊᒥᓱᑦ ᐊᖑᓇᓱᑦᑐᓕᕆᔨᒃᑯᑦ ᐸᕐᓇᑦᑐᑦ ᐊᑐᕈᒫᕐᓂᐊᖅᑐᑎᒃ ᑮᓇᐅᔭᓂᑦ ᐋᖅᑭᒋᐊᕈᑕᐅᓗᑎᒃ ᐊᓪᓚᕝᕕᖃᕐᕕᖏᓐᓄᑦ, ᓂᐅᕕᐅᑕᐅᓗᑎᒃ ᓱᓇᒃᑯᑖᖅᑖᕆᒋᐊᓕᖏᓐᓂᒃ, ᖃᐅᔨᓴᕈᑎᖃᕐᓂᕐᒧᑦ ᐊᒻᒪᓗ ᐋᖅᑭᔅᓯᓂᕐᒧᑦ ᓄᓇᓕᓐᓄᑦ ᖃᓄᐃᓕᐅᖅᑎᑦᑎᒍᑕᐅᖃᑦᑕᓂᐊᖅᑐᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,

ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413 ᐅᕝᕙᓘᓐᓃᑦ

1.800.667.2742