ᐃᖃᓗᐃᑦ ᓄᓇᕗᑦ – ᓄᕖᕝᕙ 4, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᒃᓯᕋᐅᑎᓕᐅᕈᒪᔪᓂᒃ ᒪᑐᐃᖓᑎᑦᑎᓕᕐᒥᖕᒪᑕ ᐆᒧᖓ  ᓄᑖᖑᔪᒥᒃ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓂᒃ ᐃᑲᔫᑕᐅᓂᐊᖅᑐᓄᑦ ᐃᓄᖕᓂᑦ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ-19.

ᕿᑭᖅᑕᓃᒃᑯᑦ ᓴᓂᕐᕙᐃᖅᓯᓯᒪᔪᑦ $2.65 ᒥᓕᔭᓂᒃ ᐃᑲᔫᑕᐅᓂᐊᖅᑐᓂᒃ ᐱᔾᔪᑎᒋᓪᓗᒍ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ. ᐊᑐᓂ ᐃᒡᓗᖃᖅᑎ ᑮᓇᐅᔭᖅᑖᕈᓐᓇᖅᑐᖅ ᑭᒡᓕᖃᕐᓗᓂ $1,500ᓂ. ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᔪᓐᓇᖅᑐᑦ ᐊᖑᓇᓱᒋᐊᕈᑎᓄᑦ, ᓂᕿᑖᕐᓂᕐᒧᑦ, ᒥᖅᓱᒐᒃᓴᖅᑖᕐᓂᕐᒧᓪᓘᓐᓃᑦ.

“ᑖᒃᑯᐊ ᕿᑭᖅᑕᓂ ᐃᓚᒌᓄᑦ ᐃᑲᔫᑎᑦ ᐱᒻᒪᕆᐊᓗᒃᑯᑦ ᐃᑲᔪᕐᓂᐊᖅᑐᑦ ᐃᓄᖕᓂᑦ ᐊᒃᑐᖅᑕᐅᓯᒪᑎᓪᓗᑕ ᐊᐃᑉᐸᕆᔭᖓᓂᑦ ᓄᕙᓐᓇᕐᔪᐊᖅ-19ᒥ,” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐊ ᐊᕿᐊᕈᖅ, “ᑖᒃᑯᐊ ᑮᓇᐅᔭᐃᑦ ᐃᑲᕐᓂᐊᖅᑐᑦ ᐃᓚᒌᓂ ᐊᖑᓇᓱᒋᐊᕈᓐᓇᕐᓂᕐᒥᒃ ᓂᕿᒃᓴᖃᑦᑎᐊᕐᓂᐊᕐᒪᑕ, ᓂᕿᑖᕈᑎᒋᔭᐅᓗᑎᒡᓘᓐᓃᑦ ᐱᖃᓯᐅᑎᓗᒋᑦ ᓴᓗᒻᒪᖅᓴᐅᑎᑦ ᐊᒻᒪᓗ ᒥᖅᓱᒐᒃᓴᖅᑖᕈᑎᒋᓗᒋᑦ ᐅᑭᐅᖅᓯᐅᑎᓂᒃ ᐊᓐᓄᕌᓂᒃ ᓴᓇᓗᑎᒡᓘᓐᓃᑦ.”

ᑖᓐᓇ ᐱᒋᐊᕈᑎᑦ ᐅᐃᒍᒋᔭᐅᔪᖅ ᕿᑭᖅᑕᓃᒃᑯᑦ ᓯᕗᓂᐊᓂ ᓴᖅᑭᑎᓚᐅᖅᑕᖓᓂᑦ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ ᐅᐸᓗᖓᐃᔭᐅᑎᒋᔭᐅᓚᐅᖅᑐᓄᑦ ᐊᖑᓇᓱᒃᑎᓄᑦ/ᓅᓯᒪᓂᕐᒧᓪᓗ ᓴᖅᑭᑕᐅᓚᐅᖅᑐᒥᒃ ᐄᐳᓪ 2020ᒥ.  ᐃᑲᔪᕈᓐᓇᓚᐅᖅᑐᑦ ᕿᑭᑕᓂ ᐃᓚᒌᓂ $2 ᒥᓕᔭᓂᒃ ᓅᓯᒪᓗᑎᒃ ᖃᓂᒌᓗᐊᖅᑕᐃᖁᓇᒋᑦ ᐊᒻᒪ ᓂᕿᒃᓴᖅᓯᐅᖁᓪᓗᒋᑦ.

ᑐᒃᓯᕋᐅᑎᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓄᑦ ᐊᑐᐃᓐᓇᐅᑎᑕᐅᓂᐊᖅᑐᑦ ᓄᕖᕝᕙ 4, 2020ᒥᑦ ᕖᕝᕗᐊᓕ 26, 2021ᒧᑦ, ᐅᕝᕙᓘᓐᓃᑦ ᑮᓇᐅᔭᐃᑦ ᓄᖑᑕᐅᓯᒪᓕᖅᐸᑕ.  ᑐᒃᓯᕋᐅᑎᑦ ᑕᑕᑎᖅᑕᐅᔪᓐᓇᖅᑐᑦ/ᐱᔭᐅᔪᓐᓇᖅᑐᑦ ᖃᕆᓴᐅᔭᒃᑯᑦ ᐅᕗᙵᕈᕕᑦ https://www.qia.ca/qikiqtani-family-support-initiative/ .

ᑖᒃᑯᐊ ᑮᓇᐅᔭᐃᑦ ᕿᑭᖅᑕᓂ ᓄᕙᓐᓇᕐᔪᐊᖅ-19ᒧᑦ ᑭᐅᔾᔪᑎᒋᔭᐅᔪᓄᑦ ᐸᕐᓇᐅᑎᑦ ᑐᓂᔭᐅᓯᒪᔪᑦ ᓄᓇᖃᖅᑐᑐᖃᓕᕆᓂᕐᒧᑦ ᓄᓇᓕᖕᓂᑦ ᐃᑲᔫᑎᒋᔭᖏᓐᓄᑦ ᓇᓗᓇᐃᖅᑕᐅᓚᐅᖅᑐᓄᑦ ᒐᕙᒪᑐᖃᒃᑯᓐᓂᑦ.  ᕿᑭᖅᑕᓃᒃᑯᑦ ᑐᓂᔭᐅᓯᒪᔪᓂᒃ ᑖᒃᑯᓇᙵᑦ ᑮᓇᐅᔭᓂᑦ $4,311,793ᓂ.  ᖄᖓᒍᒃᑲᓐᓂᖅ ᑮᓇᐅᔭᖅᑖᖑᓯᒪᔪᑦ ᕿᑭᖅᑕᓂ ᐃᓚᒌᓄᑦ ᐃᑲᔫᑎᓄᑦ ᐱᓯᒪᔪᑦ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒧᑦ ᑮᓇᐅᔭᖏᓐᓂᑦ.

ᕿᑭᖅᑕᓃᒃᑯᑦ ᐸᕐᓇᐅᑎᖃᖅᓯᒪᔪᑦ ᖄᖓᒍᒃᑲᓐᓂᖅ ᐱᒋᐊᕈᑎᐅᔪᓂᒃ ᐃᑲᔫᑕᐅᓂᐊᖅᑐᓄᑦ ᕿᑭᖅᑕᓂ ᐃᓚᒌᓄᑦ ᑖᓐᓇ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ.  ᑐᑭᓯᒍᑎᒃᓴᒃᑲᓐᓂᕐᓂᖅ ᓴᖅᑭᑦᑐᖃᓛᖅᑐᑦ ᐱᓇᓱᐊᕈᓯᐅᓂᐊᖅᑐᓂᒃ ᐊᒡᒋᖅᑐᓄᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋᕼᐃ,

ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

867.975.8413 or

1.800.667.2742